Ke Dilo Dife Tšeo Jesu a Ilego a di Dira ge a be a le mo Lefaseng?

Batho ba bantši ba nagana gore Jesu e be e no ba leseana leo le bego le le ka gare ga legopo, moporofeta yo bohlale, goba monna yoo a kilego a hwela batho. Eupša thutong ye, re tlo kwa ka mo go oketšegilego gore bophelo bja Jesu bja mo lefaseng bo be bo le bjang. E bile re tlo ithuta tše dingwe tša dilo tše bohlokwa kudu tšeo a ilego a di dira, le kamoo di ka go thušago ka gona.

1. Mošomo wa Jesu o mogolo e be e le ofe?

Mošomo o mogolo wa Jesu e be e le “go bolela ditaba tše dibotse tša Mmušo wa Modimo.” (Bala Luka 4:​43.) O be a bolela ditaba tše dibotse tša gore Modimo o tlo hloma mmušo woo o tlago go fediša mathata a batho ka moka.a Jesu o ile a šoma ka thata gore a botše batho molaetša wo wa Modimo ka mengwaga e meraro le seripa.​—Mateo 9:35.

2. Ke ka baka la eng Jesu a be a dira mehlolo?

Beibele e re botša ka ‘mediro e mentši e matla le ka dika le dipontšho tšeo Modimo a di dirilego a diriša Jesu.’ (Ditiro 2:​22) Modimo o ile a fa Jesu matla a gore a laole ledimo, a fepe batho ba bantši, a fodiše batho bao ba babjago le go tsoša bahu. (Mateo 8:​23-27; 14:​15-21; 14:​15-21; Mareka 6:​56; Luka 7:​11-17) Mehlolo yeo Jesu a ilego a e dira e be e bontšha gabotse gore o be a romilwe ke Modimo. Le gona e be e bontšha gore Jehofa o na le matla a gore a fediše mathata a rena ka moka.

3. Re ithuta eng tseleng yeo Jesu a bego a phela ka yona?

Jesu o be a ekwa Jehofa dilong ka moka. (Bala Johane 8:​29.) O ile a dira dilo ka moka tšeo Tatagwe a bego a mo kgopetše gore a di dire. O dirile seo bophelo bja gagwe ka moka le ge batho ba bantši ba be ba leka go mo thibela. O ile a bontšha gore go a kgonega gore re dire dilo tšeo Modimo a di nyakago le ge go le boima. Ka go dira bjalo, o re tlogeletše ‘mohlala gore re latele dikgato tša gagwe kgauswi.’​—1 Petro 2:​21.

5. Jesu o ile a ruta batho dithuto tše bohlokwa

Jesu o be a ruta batho ditaba tše dibotse tša Mmušo wa Modimo e bile a ba ruta le dithuto tše bohlokwa tšeo ba ka di dirišago maphelong a bona. Ekwa tše dingwe tša dithuto tša gagwe tša thabeng tšeo di tumilego kudu. Balang Mateo 6:​14, 34 le 7:12, gomme le boledišaneng ka dipotšišo tše di latelago:

• Ke dikeletšo dife tše bohlokwa tšeo Jesu a re fago tšona mo ditemaneng tše?

• Na o nagana gore dikeletšo tše le rena di ka re thuša lehono?

6. Jesu o ile a dira mehlolo

Jehofa o ile a fa Jesu matla a gore a dire mehlolo e mentši. E le gore le kwe ka o mongwe wa mehlolo yeo, balang Mareka 5:​25-34 goba le bapaleng BIDIO ye. Ke moka le boledišaneng ka dipotšišo tše di latelago:

BIDIO: Mosadi yo a Babjago o a Fodišwa (5:10)

• Mosadi yo a babjago mo bidiong ye, o be a na le tumelo ya go re’ng?

• Ke’ng seo o se ratago ka mohlolo wo?

Balang Johane 5:​36, gomme le boledišaneng ka potšišo e latelago:

• Mehlolo yeo Jesu a ilego a e dira e be e “hlatsela” eng, goba e bontšha eng ka yena?

O ITHUTILE ENG?

Jesu o be a ruta batho ka Mmušo wa Modimo, a dira mehlolo e bile a ekwa Jehofa dilong ka moka.

Dipotšišo

• Ge Jesu a be a le mo lefaseng, mošomo wa gagwe o mogolo e be e le ofe?

• Mehlolo yeo Jesu a ilego a e dira e be e bontšha’ng?

• Ke dithuto dife tše bohlokwa tšeo Jesu a ilego a di ruta?

ITHUTE KA MO GO OKETŠEGILEGO

Ke taba efe yeo Jesu a bego a rata go bolela kudu ka yona?

“Mmušo wa Modimo​—Seo o se Bolelago go Jesu” (Morokami wa October 1, 2014.)

Ekwa gore ke ka baka la eng re swanetše go tshepa gore mehlolo yeo Jesu a ilego a e dira e diragetše e le ka nnete.

“O Ka Ithuta’ng Mehlolong Ya Jesu?” (Morokami wa July 15, 2004.)

Ekwa gore bophelo bja monna yo mongwe bo ile bja fetoga bjang ka morago ga gore a ithute kamoo Jesu a bego a rata batho ka gona.

“Ke be ke Iphelela” (Morokami wa October 1, 2014.)

Bona dilo tše bohlokwa tšeo Jesu a di dirilego ka go latelana ge a be a ruta batho ditaba tše dibotse.

“Ditiragalo tše Dikgolo tša Bophelo bja Jesu bja Lefaseng” (Tlhahlo ya go Ithuta Lentšu la Modimo, Karolo 4)