Bophelo le Bodiredi bja Jesu

Go Tsena ga Kriste ka Phenyo Jerusalema

MESONG e latelago, Sontaga, Nisani 9, Jesu le barutiwa ba gagwe ba tloga Bethania gomme ba leba ka kua ga Thaba ya Mehlware go ya Jerusalema. Ka nako e kopana, ba batamela kgaufsi le Bethefage, yeo e lego Thabeng ya Mehlware. Jesu o laela barutiwa ba gagwe ba babedi gore:

“Yang motsaneng wo Le lebanexo nawô’; Le tlo tloxa Lè hwetša pôkôlo e kxokilwexo, è na le pôkôlwana. Le di tlišê fá xo Nna. Xomme xe motho a ka bolêla le lena, Le tlo re: Morêna ó a di hlôka. Xôna ó tlo akxofa a di lesa tša tla fá.”

Gaešita lege mathomong barutiwa ba ile ba šitwa go lemoga gore ditaelo tše di kgokagane le go phethagala ga boporofeta bja Beibele, ka morago ba ile ba lemoga gore go bjalo. Moporofeta Sakaria o boletše e sa le pele gore Kgoši e holofeditšwego ya Modimo e be e tla tsena Jerusalema e nametše pokolo, ee, “à nametše pôkôlô, pôkôlwana namane ya pôkôlô.” Ka mo go swanago, Kgoši Salomo o be a nametše pokolwana ya gagwe ge a yo tlotšwa.

Ge barutiwa ba tsena Bethefage gomme ba tšea pokolwana le mmago yona, ba bangwe bao ba bego ba eme fao ba re: ‘Le dira’ng?’ Eupja ge ba botšwa gore diphoofolo ke tša Morena, banna ba ile ba dumelela barutiwa ba di iša go Jesu. Barutiwa ba bea dikobo tša bona godimo ga pokolo le pokolwana ya yona, eupja Jesu a namela pokolwana.

Ge Jesu a dutše a lebile Jerusalema ka pokolwana, lešaba le a oketšega. Bontši bja batho ba ala dikobo tša bona tseleng, mola ba bangwe ba rema makala dihlareng gomme ba a ala. Ba goa ba re: “A xo rêtwê Kxoši e tlaxo ka Leina la Morêna; lexodimong xo be le khutšo; maxodimo-dimong xo yê tumišo.”

Bafarisei ba bangwe mo lešabeng ba nyamišwa ke kgoeletšo ye gomme ba lebiša pelaelo go Jesu ba re: “Moruti, kxalema barutiwa ba xaxo.” Eupja Jesu o a araba: “Ke a Le botša xe bao ba ka homola, xo tlo xoa mafsika.”

Ge Jesu a dutše a batamela Jerusalema, o lebelela motse gomme o thoma go o llela, a re: “O ka bê O re ka lôna ’tšatši lé la xaxo wa lemoxa tše di Xo išaxo khutšong, byale di utaxetše mahlô a xaxo.” Ka baka la go se kwe ga yona ga ka boomo, Jerusalema e swanetše go lefa, go etša ge Jesu a bolela e sa le pele gore:

‘Manaba a gago [Ba-Roma ka tlase ga Molaodi Titus] a tlo epa lengope a go dikologa; a go rakelela, a go tlaletše thoko tšohle. Ba tlo go digela fase le bana ba gago ba go wene; ba ka se ke ba tlogela lefsika le sa hlatlagane le le lengwe.’ Go senywa mo ga Jerusalema mo go boletšwego e sa le pele ke Jesu go diragetše e le ka kgonthe nywaga e 37 ka morago, ka 70 C.E.

Dibeke tše sego kae feela pele, ba bantši lešabeng ba ile ba bona Jesu a tsoša Latsaro. Bjale ba ba tšwela pele ba botša ba bangwe ka mohlolo woo. Ka gona ge Jesu a tsena Jerusalema, motse ka moka o a huduega. Batho ba rata go tseba: “Ké mang eo?” Mašaba a tšwela pele a bolela gore: “Ké Jesu moporofeta wa Natsaretha wa Galilea.” Bafarasei ge ba bona se se diregago ba lla ka gore ba tloga ba se na se ba ka se dirago, ka gobane go etša ge ba bolela: “Lefase ka moka le mo šetše nthaxo.”

Jesu ka ge e le tlwaelo ya gagwe ge a etela Jerusalema o ya go yo ruta tempeleng. Moo difofu le digole di tla go yena gomme o a di fodiša! Ge baperisita ba bagolo le ba mangwalo ba bona dilo tše di tlabago tše Jesu a di dirago le ge ba e-kwa bašemane ba goeletša tempeleng ba re, “Hosiana Morwa Dafida!” ba a galefa. Ba ngongorega ka gore, “Tše ba di bolêlaxo a O a di kwa?”

Jesu o fetola ka gore: “E! A xa L’ešo la bala mo xo rexo: O itheetše thêtô ka melomo ya bana ba masea?”

Jesu o tšwela pele a ruta gomme a lebelediša gohle dilong ka moka tše di lego ka tempeleng. Kapejana nako e šetše e ile. Ka gona o a tloga, gotee le ba 12, gomme o boela morago mo e ka bago dikhilomithara tše tharo go ya Bethania. Moo o dula bošego bja Sontaga mohlomogwe legaeng la mogwera wa gagwe Latsaro. Mateo 21:1-11, 14-17; Mareka 11:1-11; Luka 19:29-44; Johane 12:12-19; Sakaria 9:9.

◆ Ke neng gomme ka tsela efe Jesu a tsenago Jerusalema e le Kgoši?

◆ Ke gabohlokwa gakaaka’ng gore mašaba a tumiše Jesu?

◆ Jesu o ikwa bjang ge a lebelela Jerusalema, gomme ke boporofeta bofe bjo a bo bolelago?

◆ Go direga’ng ge Jesu a e-ya tempeleng?