Kamoo Moya o Thušago ka Gona

9. (a) Moya o mokgethwa ke “mothuši” ka tsela efe? (b) Re tseba bjang gore moya o mokgethwa ga se motho? (Bona mongwalo wa ka tlase.)

⁹ Jesu Kriste o biditše moya o mokgethwa ka gore ke “mothuši.” Ka mohlala, o boditše balatedi ba gagwe gore: “Ke tla kgopela Tate gomme o tla le nea mothuši o mongwe gore a be le lena ka mo go sa felego, e lego moya wa therešo, wo lefase le sa kgonego go o amogela, ka gobane ga le o bone e bile ga le o tsebe. Lena le a o tseba, ka gobane o dula o e-na le lena gomme o ka gare ga lena.” Selo se sengwe gape seo “mothuši” yo a bego a tla se dira e be e tla ba go ruta, ka gobane Kriste o holofeditše gore: “Mothuši, e lego moya o mokgethwa, wo Tate a tlago go o romela ka leina la-ka, ke yena a tlago go le ruta dilo ka moka le go le gopotša dilo ka moka tšeo ke le boditšego tšona.” Moya gape o be o tla nea bohlatse mabapi le Kriste, gomme o ile a kgonthišetša barutiwa ba gagwe gore: “Go holega lena ge ke tloga. Ka gobane ge ke sa tloge, mothuši a ka se ke a ba a tla go lena; eupja ge ke sepela, ke tla mo romela go lena.”​—Johane 14:​16, 17, 26, NW; 15:​26, NW; 16:7, NW.a

10. Ke ka ditsela dife moya o mokgethwa o ipontšhitšego gore ke mothuši?

¹⁰ Jesu a le kua legodimong o ile a tšhollela moya o mokgethwa o holofeditšwego godimo ga balatedi ba gagwe letšatšing la Pentekoste ya 33 C.E. (Ditiro 1:​4, 5; 2:​1-11) Ka ge e le mothuši, moya o ile wa ba nea kwešišo e oketšegilego ya thato ya Modimo le morero wa gagwe gomme wa ba utollela Lentšu la boporofeta. (1 Ba-Korinthe 2:​10-16; Ba-Kolose 1:​9, 10; Ba-Hebere 9:​8-10) Mothuši yoo o ile a ba a nea barutiwa ba Jesu matla a go ba dihlatse lefaseng ka moka. (Luka 24:​49; Ditiro 1:8; Ba-Efeso 3:​5, 6) Lehono, moya o mokgethwa o ka thuša Mokriste yo a ineetšego gore a gole tsebong ge e ba a diriša ditokišetšo tša moya tšeo Modimo a di dirilego ka “mohlanka yo a bôtêxaxo yo bohlale.” (Mateo 24:​45-47) Moya wa Modimo o ka re thuša ka go re nea sebete le matla ao a nyakegago gore re kgone go nea bohlatse re le bahlanka ba Jehofa. (Mateo 10:​19, 20; Ditiro 4:​29-31) Lega go le bjalo, moya o mokgethwa o thuša batho ba Modimo le ka ditsela tše dingwe gape.