Bophelo le Bodiredi bja Jesu

Keletšo e Tšwelago Pele ya ge a Tloga

JESU le baapostola ba itokišetša go tšwa ka phapošing ya ka godimo. O tšwela pele ka gore: “Ditaba ši-di tše ke Le boditšexo tšôna, xore Le se tlo kxopišwa.” Ka gona, o nea temošo e nyamišago ka gore: “Ba tlo Le nthša phuthexong; xo tlo bá xwa tla lebaka la xe motho à Le bolaya a tl’o xo re ké xôna xe a dirêla Modimo.”

Ka ntle le pelaelo, baapostola ba nyamišitšwe ke temošo ye. Lege Jesu pejana a ile a bolela gore lefase le tla ba hloya, ga se a ka a re ba tlo bolawa. Jesu o a hlalosa: “Xe xo tloxa mathomong kè sa ka ka Le botša, ké ka xobane ke be ke sa na le lena.” Lega go le bjalo, ke mo gobotse gakaakang go ba hlama e sa le pele ka ditaba tše pele a ka tloga!

Jesu o tšwela pele ka gore: “Byale ke ya xo E a nthomilexo; ’me mo xo lena xa xo e a mpotšišaxo a re: O ya kae?” Pejana ka nako ya mantšiboa, ba ile ba nyakišiša mabapi le moo a yago gona eupja mo nakong ye ba šišintšwe ke seo a ilego a ba botša moo ba palelwago ke go tšwela pele ba mmotšiša ka se. Go bjalo ka ge Jesu a bolela gore: “Byale xe ke Le boditše, dipelo tša lena di tletše manyami.” Baapostola ga se ba nyamišwa feela ke go tseba gore ba tlo welwa ke tlaišo e šoro gomme ba bolawa, eupja ka baka la gore Mong wa bona o a ba tlogela.

Ka gona, Jesu o hlalosa gore: “Xo a Le hola xe ke tloxa. Xobane xe ke sa tloxe, Molwedi a ka se tle xo lena. Fêla, xe ke ya, ke tlo mo roma a tla xo lena.” Jesu a ka ba feela lefelong le tee ka nako e tee, eupja ge a le legodimong a ka kgona go romela molwedi, e lego moya o mokgethwa wa Modimo go balatedi ba gagwe gohle mo ba ka bago gona lefaseng. Ka gona, go tloga ga Jesu go tla ba le mohola.

Jesu o re moya o mokgethwa o ‘tla lemoša lefase se e lego sebe, le toko le kahlolo.’ Sebe sa lefase, e lego go palelwa ga lona ke go dumela Morwa wa Modimo, se tla pepentšhwa. Go oketša moo, bohlatse bjo bo kgodišago bja go loka ga Jesu bo tla bontšhwa ke go rotogela ga gagwe go Tatagwe. Le gona, go palelwa ga Sathane gotee le lefase la gagwe le lebe ke go senya potego ya Jesu, ke bohlatse bjo bo kgodišago bja gore mmuši wa lefase o ahlotšwe.

Jesu o tšwela pele ka gore: “Ke sa na le tše ntši tša xo Le botša; fêla xe e le byale Le ka se kxône xo di rwala.” Ka gona, Jesu o holofetša gore ge a tšholla moya o mokgethwa, e lego matla a dirago a Modimo, o tla ba hlahla gore ba kwešiše dilo tše ka go ya ka bokgoni bja bona bja go di boloka.

Ka mo go kgethegilego baapostola ba palelwa ke go kwešiša gore Jesu o tla hwa gomme a tšwelele go bona ka morago ga tsogo. Ka gona, ba a botšišana: “Ó ra’ng xe a re: Xo šetše lebakanyana Le se sa tlo mpôna? Xe a re: Xo tlo buša xo feta lebakanyana la mpôna? Xe a re: Ke ya xo Tate?”

Jesu o lemoga gore ba nyaka go mmotšiša, ka gona o hlalosa ka gore: “Ruri, ruri, ke a Le botša, Le tlo lla la xôlôla; ’me lefase le tlo thaba. Le tlo nyamišwa; fêla, manyami a lena a tlo fetoxa thabô.” Mathapameng a latelago ge Jesu a bolailwe, baetapele ba lefase ba a thaba eupja barutiwa ba a nyama. Lega go le bjalo, manyami a bona a fetoga lethabo ge Jesu a tsošwa bahung! Gomme lethabo la bona le tšwela pele ge a ba nea matla ka Pentekoste gore e be dihlatse tša gagwe ka go ba tšhollela moya o mokgethwa wa Modimo!

Ge a bapetša boemo bja baapostola le bja mosadi nakong ya ge a le bohlokong bja pelego, Jesu o re: “Mosadi xe a bêlêxa a be le bohloko, xe lebaka la xaxwe le tlile.” Eupja, bjale ka ge a se sa hlwa a gopola bohloko bja gagwe ge ngwana a belegwe, Jesu o hlalosa gore: “Lena byale Le na le manyami. Fêla, ke tlo boêla kè Le bôna [ge ke tsogile], dipelo tša lena tša tlo thaba; xomme lethabô leo la lena Le ka se le amoxiwe ke motho.”

Go fihla mo nakong ye, baapostola le ka mohla ga se ba ka ba kgopela ka leina la Jesu. Eupja gona bjale o re: “Tšohle tše Le tl’o xo di kxopêla xo Tate ka Leina la-ka ó tlo Le fa. . . . Xobane Tate Yêna mong ó a Le rata, ka xobane Le nthatile la dumêla xore ke tšwa xo Modimo. Ke tšwile xo Modimo ka tla lefaseng; Ke buša ke tloxa lefaseng ’me ke ya xo Tate.”

Mantšu a Jesu ke kgothatšo e kgolo go baapostola. Ba re: “Rena ka tšôna-tšé re dumetše xe O tšwa xo Modimo.”

Jesu o re: “Byale Le a dumêla. Tsebang xore xo tla lebaka, le byale e šetše è le lôna, leo Le tl’o xo xašanywa, e mongwê le e mongwê a ya mo a yaxo; Nna la tlo ntloxêla ke nnoši.” Le ge se se bonagala se sa dumelege, se direga pele bošego bo ka sa!

Jesu o fetša ka gore: “Ditaba tšé ke Le boditše, xore Le bê le moláô ka Nna. Mono lefaseng Le tlo ba tlalelong. Fêla, betang dipelo, xobane lefase le fentšwe ke Nna.” Jesu o fentše lefase ka go dira thato ya Modimo ka potego go sa šetšwe dilo ka moka tšeo Sathane gotee le lefase la gagwe ba lekago go di dira bakeng sa go senya potego ya Jesu. Johane 16:​1-33; 13:36.

▪ Ke temošo efe ya Jesu yeo e nyamišago baapostola ba gagwe?

▪ Ke ka baka la’ng baapostola ba ile ba palelwa ke go botšiša Jesu mabapi le moo a bego a e-ya gona?

▪ Ke’ng seo baapostola ka mo go kgethegilego ba palelwago ke go se kwešiša?

▪ Jesu o bontšha bjang gore boemo bja baapostola bo tla fetoga go tloga manyaming go ya lethabong?

▪ Ke’ng seo Jesu a bolelago gore baapostola ba tla tloga ba se dira?

▪ Jesu o fenya lefase bjang?