Gopolang Melao ya Motheo ya Bokriste

GE NGWANA a thoma go tsena sekolo, gare ga dilo tša mathomo tšeo a ithutago tšona ke go bala le go ngwala. Dithuto tše tše bohlokwa di mo lokišeletša dithuto tše raraganego kudu bjalo ka dithuto tša tša leago, tša thutamahlale le tša maleme. Ge e ba ngwana a palelwa ke go kwešiša ka botlalo mokgwa wa go bala le wa go ngwala, gona thuto ya gagwe ka moka ya nako e tlago e tla ba e kgomegile gampe.

Go ithuta kamoo re swanetšego go rapela Modimo ka gona go swana le seo ka tsela e itšego. Ge re ithuta Beibele, re hwetša gore go na le ditherešo tše dintšinyana tša motheo goba melao ya motheo, yeo e swanetšego go tsebja ka mo go feletšego. Ge re šetše re e tseba, gona re ka tšwela pele go ithuta dilo tšeo di lego thatanyana. Lega go le bjalo, ge e ba re sa kwešiše melao ye ya motheo ya mathomo ka mo go feletšego le go e dumela, gona borapedi bja rena e tla ba bjo bo fošagetšego. Re ka se ke ra kgona go dira diphetho tšeo di nago le tlhaologanyo, gomme tumelo ya rena e tla šišinywa gabonolo.

Melao ya motheo ya Beibele ga e thata go e kwešiša. (Bona tšhate.) Lega go le bjalo, ga se feela dilo tšeo di sego bohlokwa goba ditaba tšeo di kgahlišago mogopolo. Ke ditherešo tše phelago tše bohlokwa gomme Bakriste ba bohlale ba ithuta go e rata. Jehofa o re: “Ngwan’a-ka! Theetša mantšu a-ka, O sêkê-xêlê dipolêlô tša-ka tsêbê. A di se kê tša Xo široxêla; di bolokê mo pelong ya xaxo. Xobane di phediša ba ba di hwetšaxo; di ba fodiša mmele wohle.”—Diema 4:20-22; Hesekiele 18:19, 20, 23.

Lega go le bjalo, go sa šetšwe bohlokwa bja melao ye ya motheo, Jesu o lemošitše gore ke ba sego kae feela bao ba bego ba tla e kwešiša gomme ba phela ka yona. O itše: “Xobane kxôrô e išaxo bophelong e pitlaxane; le tsela ye e yaxo xôna ké e thsêsê; ’me ba ba e bônaxo xa ba nene.” (Mateo 7:14) Se ga se ka gobane melao ye ya motheo e fihlegile ka tsela e itšego. Jehofa o nyaka gore banna le basadi ba phele ka go dumelelana le yona gomme ba hwetše bophelo. (2 Petro 3:9) O dirile gore bohlale, tsebo le temogo di ngwalwe ka Beibeleng, yeo e hwetšagalago ka bophara go batho bohle. Le gona Dihlatse tša gagwe di kgothaletša baagišani ba tšona gore ba tsome tsebišo ye yeo e neago bophelo. Ka tsela ye “bohlale bo xowa bò le kua ntlê” e le ka kgonthe. (Diema 1:20; 2:1-9) Eupja go na le matla a mangwe ao a dirago.

Sathane o foufaditše mahlo a batho ba bantši ge e le mabapi le melao ya motheo ya therešo. (2 Ba-Korinthe 4:4) Go oketša moo, moya wa motho wa boipušo o mo dira gore a rate go itirela dilo go e na le gore a lebelele go Matla a Phagamego bakeng sa tlhahlo. Mehleng ya moapostola Paulo, gaešita le ba bangwe bao ba bego ba ithutile melao ya motheo ba ile ba e lebala. Ka gona, o ngwadile ka gore: “Xo rata xe motho à boeletša xo Le ruta ditaba tša mathômô a thutô ya Modimo.”—Ba-Hebere 5:12.

Go feta moo, Jesu o lemošitše ka gore: “Ké ba bantši, ka mohla woo bà tl’o xo nthêra ba re: Morêna! Morêna! A xa ra ka ra porofeta ka leina la xaxo? A xa ra ka ra lêlêka meôya e mebe ka leina la xaxo? A xa ra ka ra dira matete ka leina la xaxo? Ké mo Nna ke tl’o xo fetola ka la-ka ka re: Xa ke ešo ka ba ka Le tseba; ntloxeleng lena ba-dira-bokxôpô!” (Mateo 7:22, 23) Ke ka baka la’ng batho bao ba naganago gore ba direla Jesu ba ikhwetša ba ganwa? Ke ka gobane “matete” a bona ga a thewa melaong ya motheo ya Beibele. Go swana lege eka ba be ba leka go ithuta histori goba thutamahlale ka ntle le go ithuta go bala pele. Mediro ya bona e fošagetše, gomme ga se ya thewa therešong. Ka gona, ke “ba-dira-bokxôpô!”

Na Borapedi bja Gago bo a Amogelega?

Na re ka kgonthišega gore Jesu ka letšatši le lengwe a ka se re botše gore, ‘Ntlogeleng, lena badira-bokgopo’? Ee, re ka kgonthišega ge e ba borapedi bja rena bo theilwe ka mo go feletšego melaong ya motheo ya Beibele. Go ka ba bjalo ge e ba re hlahloba Beibele e le ka kgonthe, kudu-kudu mantšu a Jesu. Jesu o ile a tloga a sepela tseleng e tshese ye e pitlaganego yeo e išago bophelong, ge e le gabotse, yena e be e le ‘tsela le therešo le bophelo.’ (Johane 14:6) Ge e ba re dira ka go dumelelana le dipolelo tša gagwe gomme re latela mehlala ya gagwe e le ka kgonthe, gona re tla ba tseleng yeo a lego go yona.—Johane 6:68; 1 Petro 2:21.

Balatedi ba Jesu ba kgaufsi-ufsi le bona ba be ba sepela tseleng yeo e tshese le e pitlaganego e išago bophelong. Ka gona, ge Jesu a be a e-hwa o ile a ba nea modiro wa go ruta ba bangwe go rapela Modimo. Le gona o ile a lemoša gore o be a tla boa gomme a letela pego e tšwago go bona mabapi le kamoo ba ilego ba itshwara ka gona lebakeng la ge a be a se gona.—Mateo 24:46; 25:14-23; 28:19, 20.

Mafelelong, palo ya bao ba bego ba ipolela gore ba latela Kriste e ile ya gola ya ba dimilione tše makgolo. Eupja gantši borapedi bja mašaba a bo be bo se bja thewa melaong ya motheo ya Beibele. Ka gona, ge Jesu a be a bewa e le Kgoši ya legodimong ka 1914 gomme ka morago a ‘fihla’ go tla go ahlola bao ba bego ba ipitša gore ke balatedi ba gagwe, ke’ng seo a ilego a se hwetša? Dimilione tša bao ba ipolelago e le Bakriste di be di tsenetše ntwa e šiišago kudu historing ya batho go fihla mehleng yeo.

Ee, bontši bja “Bakriste” bo be bo dira go fapana le melao ya motheo ya Beibele ka mo go feletšego. Lega go le bjalo, go be go e-na le sehlopha sa Bakriste ba therešo bao ba bego ba leka ka matla go latela melao ya motheo ya Modimo gomme gape ba e ruta motho lege e le ofe yo a bego a tla theetša lefaseng leo le bego le gafišwa ke ntwa. Ba ba ile ba kgoboketšwa gotee gomme ge nako e dutše e e-ya ba ile ba tlatšwa ke lešaba le legolo la batho bao ba nago le kgopolo e swanago le yeo. (Mateo 24:31; Kutollo 7:4, 9, 10) Ba sa dutše ba latela melao ya motheo yeo e neago bophelo, ba botša ba bangwe mabapi le merero e megolo ya Modimo, ba bokana gotee e le mohlape o tee gomme ba leka ka matla go latela “thatô ya Modimo.”—Ba-Roma 12:2.

Molao wa Motheo o Bohlokwa wa Mangwalo

Se ga se sa ba bonolo. Ka mohlala, Bakriste ba ba therešo ba ile ba swanelwa ke go lwa le tlhago ya bona ka noši ye e sa phethegago ya sebe. Gape ba swanela go phela lefaseng leo le ganetšago ka mo go feletšego melao ya boitshwaro bjo bobotse le melao ya motheo yeo ba lekago go phela ka yona. Ge e le gabotse, moapostola Johane o itše: “Lefase ka moka le rapaletše bobeng.” (1 Johane 5:19) Ke ka baka leo barapedi ba therešo ba Modimo lehono ba swanetše go gopola molao wa motheo wo o lego bohlokwa kudu wo o boletšwego ke Jesu: “Bôná [Bakriste] xa se ba lefase.”—Johane 17:16.

Jehofa ga a gapeletše batho gore ba mo direle, eupja bao ba kgethago go dira bjalo ba swanetše go dira diphetho tše bohlokwa. Ka mohlala, ba swanetše go dumela therešo ya gore le ka mohla ba ka se ke ba ratwa lefaseng le. (Mateo 24:9) Morutiwa Jakobo o lemošitše ka gore: “E a rataxo xo xwêrana le lefase, ô itira lenaba la Modimo.” (Jakobo 4:4) Le gona moapostola Paulo o itše: “Tokô e ka amana bya’ng le bokxôpô?” le gore “Modumedi ô abêlana eng le e a sa dumelexo?” Ka morago o ile a tsopola mantšu a Jehofa ka noši: “Tšwang-xê moo xare xa bôná, Le khuduxê; . . . Le se swarê thšila.”—2 Ba-Korinthe 6:14-17; Ba-Efeso 5:11.

Re ka ‘ikarola’ bjang? Ee, e sego ka go tloga e le ka kgonthe lefaseng. Eupja re ka phema go ikgokela jokong e šele ya ba ba sa dumelego.’ Re ka phema ‘ditlwaelano tše mpe tšeo di bodišago mekgwa e mebotse.’ (1 Ba-Korinthe 15:33, bapiša le NW.) Le gona re ka ikarola moyeng wa lefase, e lego moya wa boithati, wa go se botege, wa go rata dilo tše di bonagalago le wa go tsoma lethabo ka tsela yeo e sa laolegego. (2 Timotheo 3:1-5) Kholofetšo e ruthetšago pelo e newa bao ba ikarolago ka tsela yeo dikganyogong tša lefase le: “E a tl’o xo dula à le xôna xo ya xo ile, ké eo a diraxo tše Modimo a di rataxo.”—1 Johane 2:15-17.

Bao ba Latelago Melao ya Motheo

Na go a kgonagala lehono go latela melao ya motheo ya Beibele gomme o sepele tseleng e tshese e išago bophelong? Ee, gaešita le bana ba ka dira seo. Ka mohlala, bana ba babedi kua Brazil ba be ba itshwere gabotse kudu sekolong mo e lego gore morutiši wa bona o ile a kgopela mmago bona gore a tle sekolong gore ba tle ba boledišane ka se se bakago seo. Mmago bona o ile a hlalosa gore ke ka baka la gore ba be ba latela melao ya motheo ya Beibele yeo e lego mabapi le go kwa batswadi le batho ba bangwe bao ba nago le matla a go buša. (Ba-Efeso 6:1-3) Mafelelong a sehla sa sekolo, ba ile ba newa sebaka sa go hlalosetša klase ka moka mehola yeo e tlišwago ke tsela e bjalo ya go dira thato ya Modimo.

Jesu o ile a bolela ka molao wo wa motheo: “Xobane bophelô bya motho xa bo tšwe lehumong le xo tše a di ruilexo.” (Luka 12:15) Ngaka yeo e atlegago ka tša ditšhelete kua Japane e ile ya ithuta se gomme seo se ilego sa makatša badiri-gotee le yona ke gore e ile ya diriša seo e ithutilego sona. O ile a tlogela boemo bja gagwe bjo bo bego bo mo nea tšhelete e ntši gomme a ya torotswaneng e itšego moo a bego a ka thuša batho ba moo moyeng. Go gafa mehola ya dilo tše di bonagalago mo ga se gwa ka gwa mo amoga lethabo. Go e na le moo, yena gotee le mosadi wa gagwe mo nakong ye ba hwetša lethabo le legolo ge ba iša Lentšu la bophelo go batho ba bangwe.

Beibele e bolela gore: “Monwi le sejatô ba tlo diila.” (Diema 23:21) Se ke temošo e kwalago malebana le go lemalela dilo tše itšego. Gape re lemošwa malebana le go dirišwa gampe ga dihlare-tagi: “Medirô ya nama . . . Ké xo hlankêla medimo, le boloi [phar·ma·kiʹa, “mokgwa wa go diriša dihlaretagi gampe” ka Segerika sa mathomo].” (Ba-Galatia 5:19, 20) Go oketša moo, moapostola Paulo o opeletša ka gore: “A re hlapeng re tšwê thšila tšohle tša nama le tša môya.”—2 Ba-Korinthe 7:1.

Go kgoga motšoko le go diriša dihlare-tagi tše dingwe tše di dirago gore motho a di lemalele go tloga go ganetšana le melao ye ya motheo ya Beibele gomme ka go rialo ke ‘bokgopo.’ (Mateo 7:23) Bahlanka lege e le bafe ba Modimo bao ba itšhilafatšago ka dilo tše bjalo ba tla hwetša gore borapedi bja bona ga bo amogelege go Modimo. Ka gona, ba dikete tše makgolo ba gatile mogato wa go tlogela go diriša dihlare-tagi tše, gomme ka baka leo ba amogetše mehola ya moya gotee le ya nama. Ke therešo gore ka mehla ga go bonolo go tlogela mekgwa ye yeo e sa hlwekago.

Lesogana le itšego kua Michigan, U.S.A., le ile la ithuta ka Modimo le melao ya gagwe ya motheo go badiredi ba bangwe bao ba ilego ba mo etela lapeng la gagwe. O ile a rata seo a se kwago eupja a lemoga gore mokgwa wa gagwe wa go kgoga patše le motšoko o be o sa dumelelane le borapedi bja Jehofa. O bolela gore: “Ga se ka ba le bothata tabeng ya go tlogela go diriša dihlare-tagi, tšeo ke bego ke di thabela. Eupja go ile gwa ntšea bonyenyane dikgwedi tše tshelelago go tlogela go kgoga disekerete.” O ile a thušwa ke Bakriste-gotee le yena le thapelo. Mo nakong ye ka ge a phela bophelo bjo bo hlwekilego ka go dumelelana le melao ya motheo ya Beibele, o na le letswalo le le hlwekilego, kwano le Modimo le bogwera bja Bokriste. Ge e le gabotse, o bolela gore go fihla ge a fetoga Mokriste, le ka mohla o be a sa ka a ba le mogwera.

Go latela melao ya motheo e lokilego ka kgonthe ke tsela e bohlale. Le gona bohlale e tloga e le bjo bohlokwa kudu go feta gauta e botse. Latela tsela ye wena ka noši, gomme o tla tliša tumišo go Jehofa le gona o tla itlišetša tšhegofatšo ya ka mo go sa felego.—Psalme 19:7, 10; Diema 16:16.

[Lepokisi go letlakala 27]

Melao ya motheo ke ditherešo tša motheo goba melao e bohlokwa yeo ditherešo tše dingwe goba melao e ka tšewago go yona. Yeo e latelago ke mehlala e itšego:

◻ “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka thlaoloxanyô ya xaxo ka moka.”—Mateo 22:37.

◻ “Tšohle tše Le rataxo xore batho ba Le dirêlê tšôna, le lena Le ba dirêlê tšôna-tšeo.”—Mateo 7:12.

◻ ‘Go gwerana le lefase ke bonaba go Modimo.’—Jakobo 4:4.

◻ “Xe Le e-ja, xe Le e-nwa, tšohle tše Le di diraxo Le di dirê xore Modimo a rêtwê ka tšôna.”—1 Ba-Korinthe 10:31.

◻ “Xomme sa rena ba re tiilexo, ké xore re kxôtlêlêlê mefôkôlô ya ba ba sa tiaxo, re lesê xo ithata.”—Ba-Roma 15:1.

◻ “Ké xôna a re ipexeng xo Modimo [ka sehlabelo] sa thêtô, e lexo sôna seenywa sa melomo ye e ipolêlaxo ka Leina la xaxwe.”—Ba-Hebere 13:15.

◻ “A re hlôkômêlaneng seng sa rena, re išanê leratong le medirong e botse. Re se ngalê phuthêxô ya xešo.”—Ba-Hebere 10:24, 25.

◻ “Motho xa a phele ka boxôbê fêla; ó phela ka mantšu ohle a a tšwaxo molomong wa Modimo.”—Mateo 4:4.