Kgaolo 15

Go Boela go Modimo wa Therešo

“Ké Le nea molaô o mofsa, wa xo re Le ratanê, wa xo re Le ratanê byalo ka Nna xe kè Le ratile. Seo bohle ba tl’o xo tseba ka sôna xe Le le barutiwa ba-ka, ké xe Le na le Leratanô.”—Johane 13:34, 35.

1, 2. Mafelelo a lerato gare ba Bakriste ba therešo e swanetše go ba afe?

KA MANTŠU ao, Jesu o ile a hloma tekanyetšo bakeng sa bao ba ipolelago gore ke balatedi ba gagwe ba therešo. Lerato la Bokriste le be le tla swanela go fetela ka kua ga dikarogano ka moka tša morafo le tša ditšhaba. Le be le tla nyaka gore Bakriste ba therešo ‘e se be karolo ya lefase,’ go etša ge Jesu e be e se “karolo ya lefase” e bile a sa dutše a se yona.—Johane 17:14, 16, NW; Ba-Roma 12:17-21.

² Mokriste o ipontšha bjang gore ga se “karolo ya lefase”? Ka mohlala, o swanetše go itshwara bjang malebana le dipolitiki tšeo di nago le mpheferefere, diphetogelo le dintwa tša mehleng ya rena? Moapostola wa Mokriste Johane o ngwadile ka go dumelana le mantšu a Jesu a lego ka mo godimo gore: “E a sa yexo ka tokô, xa a’ tswalwa ke Modimo, bo-ka le eo a sa ratexo ngwan’abô. Ké yôna taba ye Le e kwilexo xo tloxa mathomong, yé ya xore re ratanê.” Le gona Jesu ka noši o hlalositše lebaka leo ka lona barutiwa ba gagwe ba sa kago ba lwa bakeng sa go mo phološa, ka gore: “Mmušo wa-ka xa se o tšwaxo ’faseng leno. Xe mmušo wa-ka o ka be o e-tšwa lefaseng leno, bahlanka ba-ka ba ka be ba o hlabanêla. Byale mmušo wa-ka xa se o tšwaxo mono.” Gaešita lege bophelo bja Jesu bo be bo le kotsing, bahlanka bao ga se ba tšea karolo bakeng sa go lokiša kgang ka ditsela tša go lwa tša lefase.—1 Johane 3:10-12; Johane 18:36.

3, 4. (a) Ke’ng seo Jesaya a ilego a se porofeta mabapi le ‘bofelo bja mabaka’? (b) Ke dipotšišo dife tšeo di nyakago karabo?

³ Nywaga e fetago 700 pele ga Kriste, Jesaya o ile a porofeta gore batho ba ditšhaba ka moka ba be ba tla bokana borapeding bja therešo bja Jehofa gomme ba be ba ka se sa hlwa ba ithuta ntwa. O itše: “Bofelong bya mabaka thaba ya Ntlo ya Morêna e tlo ba e thekxilwe xodimo xa dithaba, . . . ’me dithšaba tšohle di tlo thšoloxêla mo xo yôna. Merafo-rafo e tlo ya xôna è re: A re yeng, re rotoxêlê thabeng ya Morêna, Ngwakong wa Modimo wa Jakobo, a re rutê ’tsela tš’axwe, xobane molaô o tlo tšwa Tsione, Lentšu la Morêna le tlo tšwa Jerusalêma. Ó tlo buša ba dithšaba, ó tlo ahlolêla ba merafo-rafo. Ké mo ba tl’o xo tšea dithšoša ba rula mexomá ka tšôna, ba tšea marumô ba rula maxwêtla ka ôna. Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana.”a—Jesaya 2:2-4.

⁴ Ke bofe go madumedi ka moka lefaseng bjo e bilego bjo bo phalago ohle tabeng ya go fihlelela ditekanyetšo tše? Ke bomang bao ba ilego ba gana go ithuta ntwa go sa šetšwe dikgolego, dikampa tša tshwenyo le dikahlolelo tša lehu?

Lerato la Bokriste le Boema-gare

5. Ke pego efe ya boema-gare bja Bokriste yeo Dihlatse tša Jehofa e le batho ka o tee ka o tee ba ilego ba e tšweletša, gomme ka baka la’ng?

⁵ Dihlatse tša Jehofa di tsebja lefaseng ka bophara ka boemo bja tšona bja letswalo bja boema-gare bja Bokriste e le batho ka o tee ka o tee. Di ile tša kgotlelela go golegwa, dikampa tša tshwenyo, tlhokofatšo, go lelekwa le tlaišo lekgolong la bo-20 la nywaga ka moka ka gobane di ile tša gana go gafa lerato la tšona le botee e le phuthego ya lefase ka bophara ya Bakriste ba gogetšwego go Modimo. Kua Jeremane ya Nazi nakong ya nywaga ya 1933-45, mo e ka bago Dihlatse tše sekete di ile tša hwa gomme tše dikete tša golegwa ka molato wa go gana go dirišana le boiteko bja ntwa bja Hitler. Ka mo go swanago, ka tlase ga Franco kua Sepania yeo pele e bego e le ya Bofasi, makgolo-kgolo a Dihlatse tša bafsa a ile a ya kgolegong gomme ba bantši ba ile ba diriša palo-gare ya nywaga e lesome o mongwe le o mongwe dikgolegong tša bohlabani go e na le gore ba ithute ntwa. Go ba go fihla le lehono dinageng tše dintši, Dihlatse tše dintši tša Jehofa tša bafsa di phela ka tlase ga kgatelelo dikgolegong ka baka la boemo bja bona tabeng ya boema-gare bja Bokriste. Lega go le bjalo, Dihlatse tša Jehofa ga di šitišane le mebušo mananeong a yona a tša bohlabani. Go se šišinyege ga boema-gare bja Bokriste bja Dihlatse ditabeng tša dipolitiki e bile e nngwe ya ditumelo tša bona tše tiilego diphapanong ka moka gotee le dintweng tša lekgolong la bo-20 la nywaga. Se se ba kgonthišetša e le balatedi ba therešo ba Kriste gomme se ba arola madumeding a Bojakane.—Johane 17:16; 2 Ba-Korinthe 10:3-5.

6, 7. Ke’ng seo Dihlatse tša Jehofa di ilego tša thoma go se kwešiša mabapi le Bokriste?

⁶ Ka go kgomarela Beibele le mohlala wa Kriste, Dihlatse tša Jehofa di bontšha gore di diriša borapedi bja Modimo wa therešo, Jehofa. Di lemoga lerato la Modimo ka ge le bontšhitšwe bophelong le sehlabelong tša Jesu. Di kwešiša gore lerato la kgonthe la Bokriste le feleletša ka borwarre bja lefase ka bophara bjo bo sa arolegego—bjo bo phagametšego dikarogano tša dipolitiki, tša morafo gotee le tša ditšhaba. Ka mantšu a mangwe, Bokriste ga se feela bja ditšhaba-tšhaba; ke bjo akaretšago ditšhaba ka moka, e lego bjo bo tshelago mellwane ya ditšhaba, taolo goba dikgahlego. Bo lebelela morafo wa batho e le lapa le tee leo le nago le motswadi yo a swanago le leo le nago le Mmopi yo a swanago, Jehofa Modimo.—Ditiro 17:24-28; Ba-Kolose 3:9-11.

⁷ Gaešita lege mo e ka bago madumedi a mangwe ka moka a kile a tsena dintweng—go bolaya banababo bona gotee le batho ba bangwe—Dihlatse tša Jehofa di ile tša bontšha gore di kgongwa e le ka kgonthe ke boporofeta bja Jesaya 2:4, bjo bo tsopotšwego pejana. Mo gongwe o ka botšiša gore, ‘Eupja Dihlatse tša Jehofa di tšwa kae? Di šoma bjang?’

Lelokelelo le Letelele la Dihlatse tša Modimo

8, 9. Ke taletšo efe yeo Modimo a ilego a e fetišetša go batho?

⁸ Nywageng e fetago 2 700 e fetilego, moporofeta Jesaya le yena o ile a bolela taletšo e latelago: “Tsomang Jehofa ge e sa le lebaka la go ka mmona, le mmitšeng a sa le kgaufsi. E mobe a tlogele tsela ya gagwe, gomme motho yo kgopo a lahle megopolo ya gagwe, a sokologele go Jehofa, gore a mo šokelwe, le go Modimo wa rena, gobane go Yena go na le tabelelo e ntši.”—Jesaya 55:6, 7, Phetolelo ya Kgale.

⁹ Makgolong a nywaga ka morago, moapostola wa Mokriste Paulo o ile a hlalosetša ba-Gerika ba Athene bao ba bego “ba boifa medimo [ya dinonwane] xa-xolo”: “Le xôna ke Yêna [Modimo] a dirilexo xore meloko ka moka ya batho e tšwê mading a o tee, e ênêlê lefase lohle; a e beêla mabaka, le mellwanê, le maaxô; a re ba nyakê Modimo, ba Mo kwê xe a le xôna, ba Mo hwetšê, xobane xa a kxolê, ó kxaufsi le e mongwê le e mongwê wa ba re lexo fá.”—Ditiro 17:22-28.

10. Re tseba bjang gore Modimo o be a se kgole le Adama le Efa gotee le bana ba bona?

¹⁰ Ka kgonthe Modimo o be a se kgole le dibopiwa tša gagwe tša batho Adama le Efa. O ile a bolela le bona gomme a bolela melao ya gagwe le tšeo a di ratago. Go feta moo, Modimo ga a ka ikutela barwa ba bona Kaine le Abele. O ile a eletša Kaine yo a nago le lehloyo ge a be a bontšha lehufa mabapi le sehlabelo sa ngwanabo go Modimo. Lega go le bjalo, go e na le go fetola sebopego sa gagwe sa borapedi, Kaine o ile a bontšha lehufa, go se kgotlelele bodumedi gomme a bolaya ngwanabo Abele.—Genesi 2:15-17; 3:8-24; 4:1-16.

11. (a) Lentšu “martyr [mohwela-tumelo]” le bolela’ng? (b) Go tlile bjang gore Abele e be mohwela-tumelo wa pele?

¹¹ Abele ka go botegela ga gagwe Modimo gaešita le go fihla lehung, o ile a ba mohwela-tumelo wa pele.b Le gona e le hlatse ya pele ya Jehofa, e lego ketapele ya lelokelelo le letelele la dihlatse tša babotegi go theoša le histori ka moka. Ka gona Paulo o be a ka bolela gore: “Tumêlô ké ka yôna Abele a ipexilexo xo Modimo ka sedimo se se phadilexo sa Kaine; ké ka yôna xe a hlatsêlwa dibexô tša xaxwe xwa thwe: ó lokile. Modimo a hlatsêla dibexo tša xaxwe; ké ka tšôna xe a bolêla le xe a hwile.”—Ba-Hebere 11:4.

12. Mehlala e mengwe ya dihlatse tše botegago tša Jehofa ke bomang?

¹² Ka go lona lengwalo leo le le ngwaletšwego Ba-Hebere, Paulo o lokeletša lelokelelo le le feletšego la banna le basadi ba botegago ba bjalo ka Noage, Aborahama, Sara le Moše, bao ka pego ya bona ya go botega, ba ilego ba bopa ‘leru le legolo la dihlatse [Segerika, mar·tyʹron]’ tšeo di ilego tša dira e le mehlala le kgothatšo bakeng sa ba bangwe bao ba ratago go tseba le go direla Modimo wa therešo. E be e le banna le basadi bao ba bego ba e-na le kwano le Jehofa Modimo. Ba ile ba mo tsoma gomme ba mo hwetša.—Ba-Hebere 11:1–12:1.

13. (a) Ke ka baka Jesu e le ponagatšo e phalago tšohle ya lerato la Modimo? (b) Ke ka tsela efe e kgethegilego yeo ka yona Jesu e lego mohlala go balatedi ba gagwe?

¹³ Yo a tsebegago kudu gare ga dihlatse tše bjalo ke yo a hlalositšwego pukung ya Kutollo, “Jesu Kriste, Yêna Hlatse ye e bôtêxaxo.” Jesu e bile ke bohlatse bjo bongwe bjo bobotse bja lerato la Modimo, ka gobane go etša ge Johane a ngwadile: “Ya ba rena re bonexo ra tseb’o ba dihlatse tša xe Tata wešo a romile Morwa wa xaxwe, a tla a ba Mophološi wa lefase. Byale e a êmaxo ka la xo re: Jesu ké Morwa wa Modimo,—Modimo ó tlo dula è le wa xaxwe, ’me yêna a dula è le wa Modimo. Xomme rena, leratô leo Modimo a re rataxo ka lôna re le lemoxile, re le dumetše.” Jesu ka ge a belegwe e le mo-Juda e be e le hlatse ya therešo gomme o ile a hwa e le mohwela-tumelo ka go botegela Tatagwe, Jehofa. Balatedi ba therešo ba Kriste go theoša le mehla ka mo go swanago e be e tla ba dihlatse tša gagwe le tša Modimo wa therešo, Jehofa.—Kutollo 1:5; 3:14; 1 Johane 4:14-16; Jesaya 43:10-12; Mateo 28:19, 20; Ditiro 1:8.

14. Ke potšišo efe yeo bjale e nyakago karabo?

¹⁴ Boporofeta bja Jesaya bo bontšhitše gore go boela go Modimo wa therešo, Jehofa, e be e tla ba karolo ya ‘bofelo bja mabaka,’ goba seo dikarolo tše dingwe tša Beibele di se bitšago “mehla ya bofelo.”c Ka baka la dikarogano tša bodumedi le kgakanego tšeo re di hlalositšego pukung ye, go rotoga potšišo e rego: Ke bomang bao mehleng ye ya bofelo yeo re phelago go yona ba ilego ba tsoma Modimo wa therešo, gore ba mo direle “ka Môya le ka therešô”? Gore re arabe potšišo yeo, re swanetše go thoma ka go lebiša tlhokomelo ya rena ditiragalong tša lekgolong la bo-19 la nywaga.—Jesaya 2:2-4; 2 Timotheo 3:1-5; Johane 4:23, 24.

Lesogana le Tsoma Modimo

15. (a) Charles Taze Russell e be e le mang? (b) Tše dingwe tša dipelaelo tša gagwe tša bodumedi e be e le dife?

¹⁵ Ka 1870 lesogana le le fišegago Charles Taze Russell (1852-1916) o ile a thoma go ipotšiša dipotšišo tše dintši mabapi le dithuto tša moetlo tša Bojakane. Ge e sa le mofsa, o ile a šoma lebenkeleng la tatagwe la go rekiša diaparo tša banna le dilo tša bokgabo motseng wa diintaseteri wa leema-ema wa Allegheny (yeo bjale e lego karolo ya Pittsburgh), Pennsylvania, U.S.A. Bodumedi bja gagwe bja setlogo e be e le bja Presbyterian le Congregational. Lega go le bjalo, o ile a tshwenywa ke dithuto tše bjalo ka go rulaganyetšwa e sa le pele le tlhokofatšo ya ka mo go sa felego mollong wa dihele. Mabaka a gagwe bakeng sa go belaela dithuto tše tša motheo tša madumedi a mangwe a Bojakane e be e le afe? O ngwadile gore: “Modimo yo a bego a ka diriša matla a gagwe go bopa batho bao a ba tsebilego e sa le pele le go ba rulaganyetša e sa le pele e le gore ba tle ba hlokofatšwe ka mo go sa felego, e ka se be yo bohlale, wa toka goba yo lerato. Tekanyetšo ya gagwe e be e tla ba e le ka tlase ga ya batho ba bantši.”—Jeremia 7:31; 19:5; 32:35; 1 Johane 4:8, 9.

16, 17. (a) Ke dithuto dife tšeo di ilego tša kgahliša e le ka kgonthe sehlopha sa thuto ya Beibele sa Russell? (b) Ke go se dumelelane gofe mo gogolo moo go ilego gwa rotoga, gomme Russell o ile a araba bjang?

¹⁶ Nakong ya ge a be a sa le nywageng ya go obelela e masome-pedi, Russell o ile a thoma sehlopha sa thuto ya Beibele sa beke le beke gotee le masogana a mangwe. Ba ile ba thoma go hlahlobišiša dithuto tša Beibele mabapi le ditaba tše dingwe, tše bjalo ka go se hwe ga moya (soul) gaešita le sehlabelo sa topollo sa Kriste le go tla la bobedi ga gagwe. Ka 1877, ge a e-na le nywaga e 25, Russell o ile a rekiša kabelo ya gagwe kgwebong ya tatagwe yeo e bego e atlega gomme a thoma modiro wa nako e tletšego wa go bolela.

¹⁷ Ka 1878 Russell o ile a ba le go se dumelelane mo gogolo le o mongwe wa badirišani ba gagwe, yo a ilego a gana thuto ya gore lehu la Kriste e be e ka ba tebalelo ya dibe. Lebakeng la gagwe la kganetšo Russell o ngwadile gore: “Kriste o phethile dilo tše dibotse tše di fapa-fapanego bakeng sa rena lehung le tsogong tša gagwe. E bile moemedi wa rena lehung; o hwile e le yo a lokilego bakeng sa ba sa lokago—ka moka ba be ba sa loka. Jesu Kriste ka kgaugelo ya Modimo o ile a latswa lehu bakeng sa motho o mongwe le o mongwe. . . . O bile mothopo wa phološo ya ka mo go sa felego go bohle bao ba mo kwago.” O ile a tšwela pele ka gore: “Go lopolla ke go rekolla. Ke’ng seo Kriste a ilego a se rekollela batho ka moka? Bophelo. Re lahlegetšwe ke bjona ka go se kwe ga Adama wa mathomo. Adama wa bobedi [Kriste] o ile a bo rekolla ka bophelo bja gagwe ka noši.”—Mareka 10:45; Ba-Roma 5:7, 8; 1 Johane 2:2; 4:9, 10.

18. (a) Ke’ng seo se ilego sa latela go se dumelelane ka topollo? (b) Ke mohlala ofe wo Barutwana ba Beibele ba ilego ba o latela mabapi le meneelo?

¹⁸ Russell ka ge ka mehla e bile mmoleledi yo a botegago wa thuto ya topollo, o ile a kgaotša ditswalano ka moka le yo e bego e le modirišani wa gagwe. Ka July 1879, Russell o ile a thoma go gatiša Zion’s Watch Tower and Herald of Christ’s Presence, yeo e tsebjago lefaseng ka bophara lehono e le Morokami—O Tsebatša Mmušo wa Jehofa. Ka 1881 yena gotee le Bakriste ba bangwe ba ba ineetšego ba ile ba tšweletša mokgatlo wa Beibele o sa hwetšego poelo. O be o bitšwa Zion’s Watch Tower Tract Society, wo lehono o tsebjago e le Watch Tower Bible and Tract Society of Pennsylvania, e lego sedirišwa sa molao seo se dirago legatong la Dihlatse tša Jehofa. Di sa tloga fase, Russell o ile a phegelela gore go ka se be le dikoleke tšeo di tšewago dibokeng tša phuthego goba meneelo yeo e kgopelwago ka dipuku tša Watch Tower. Batho bao ba ilego ba tlatša Russell thutong e tseneletšego ya Beibele ba ile ba thoma go tsebja e le Barutwana ba Beibele.

Go Boela Therešong ya Beibele

19. Ke dithuto dife tša Bojakane tšeo Barutwana ba Beibele ba ilego ba di gana?

¹⁹ Ka baka la thuto ya bona ya Beibele, Russell gotee le bagwera ba gagwe ba ile ba thoma go gana dithuto tša Bojakane tša “Boraro Botee bjo bo Kgethwa-kgethwa” bjo e lego sephiri, moya (soul) wa motho o abelwago wo o sa hwego gotee le tlhokofatšo ya ka mo go sa felego mollong wa dihele. Ba ile ba ba ba gana go ba le sehlopha seo se arogilego sa baruti seo se tlwaeditšwego seminareng. Ba be ba nyaka go boela mathomong a boikokobetšo a Bokriste, ka bagolo ba swanelegago moyeng e le bona ba etelelago pele diphuthego ka ntle le go nagana ka moputso goba mogolo.—1 Timotheo 3:1-7; Tito 1:5-9.

20. Ke’ng seo Barutwana bao ba Beibele ba ilego ba se utolla mabapi le pa·rou·siʹa ya Kriste le 1914?

²⁰ Go hlahlobišišeng ga bona Lentšu la Modimo, Barutwana bao ba Beibele ba ile ba kgahlišwa e le ka kgonthe ke diporofeto tša Mangwalo a Bakriste a Segerika tšeo di tswalanago le “bofelo bja lefase” le “go boa” ga Kriste. (Mateo 24:3, KJ) Ka go boela tabeng e ngwadilwego ya Segerika, ba ile ba utolla gore “go boa” ga Kriste moo, ge e le gabotse e be e le “pa·rou·siʹa,” goba go ba gona mo go sa bonagalego. Ka gona, Kriste o be a neile barutiwa ba gagwe tsebišo mabapi le bohlatse bja go ba gona ga gagwe mo go sa bonagalego nakong ya bofelo, e sego go boa mo go bonagalago ga nakong e tlago. Gotee le thuto yeo, barutwana bao ba Beibele ba be ba e-na le kganyogo ya kgonthe ya go kwešiša tatelano ya ditiragalo ya Beibele ge e bapetšwa le go ba gona ga Kriste. Ka ntle le go kwešiša ditaba ka moka ka botlalo, Russell gotee le bagwera ba gagwe ba ile ba lemoga gore 1914 e be e tla ba letšatši le bohlokwa historing ya motho.—Mateo 24:3-22; Luka 21:7-33, Int.

21. Ke boikarabelo bofe bjo Russell le badumedi-gotee le yena ba ilego ba bo kwa?

²¹ Russell o be a tseba gore modiro o mogolo wa go bolela o be o swanetše go dirwa. O be a lemoga mantšu a Jesu a ngwadilwego go Mateo: “Xomme Ebangedi yé ya mmušô wa maxodimong e tlo xoêlêlwa lefaseng ka moka xore e bê bohlatse mo xo dithšaba tšohle; ya tlo ba xôna bofêlô bo fihlaxo.” (Mateo 24:14; Mareka 13:10) Go be go e-na le kgopolo ya go akgofa modirong wa Barutwana bao ba Beibele pele ga 1914. Ba be ba dumela gore modiro wa bona wa go bolela o be o tla fihla seremong ngwageng woo, gomme ka go rialo ba ile ba ikwa gore ba swanetše go diriša boiteko bjo bongwe le bjo bongwe go thuša ba bangwe go tseba “Ebangedi ye ya mmušô.” Mafelelong, dithero tša Beibele tša C. T. Russell di ile tša gatišwa dikuranteng tše dikete-kete go dikologa lefase.

Meleko le Diphetogo

22-24. (a) Bontši bja Barutwana ba Beibele bo ile bja itshwara bjang ge C. T. Russell a e-hwa? (b) Ke mang yo a ilego a hlatlama Russell e le mookamedi wa Mokgatlo wa Watch Tower?

²² Ka 1916, ge a e-na le nywaga e 64 Charles Taze Russell o ile a hwa a le leetong la go bolela go phatša United States. Bjale go be go tla direga’ng ka Barutwana ba Beibele? Na ba be ba tla kgaotša modiro bjalo ka ge e ka re e be e le balatedi ba motho feela? Ba be ba tla lebeletšana bjang le meleko ya Ntwa ya I ya Lefase (1914-18), e lego polaong yeo United States e bego e tla tsena go yona kapejana?

²³ Tsela yeo bontši bja Barutwana ba Beibele ba ilego ba itshwara ka yona e ile ya swantšhetšwa ke mantšu a W. E. Van Amburgh, e lego mohlankedi wa Mokgatlo wa Watch Tower: “Modiro wo o mogolo wa lefase ka bophara ga se modiro wa motho o tee. Ke o mogolo kudu bakeng sa seo. Ke modiro wa Modimo gomme ga o fetoge. Modimo o dirišitše bahlanka ba bantši nakong e fetilego gomme ka ntle le pelaelo O tla diriša ba bantši nakong e tlago. Boineelo bja rena ga se bja go ineela go motho, goba modirong wa motho, eupja ke bja go ineela go dira thato ya Modimo, ka ge A tla re utollela yona ka Lentšu la Gagwe le tlhahlo ya gagwe. Modimo o sa dutše a le boemong bja taolo.”—1 Ba-Korinthe 3:3-9.

²⁴ Ka January 1917, Joseph F. Rutherford, ramolao yo e bilego e le morutwana yo a fišegago wa Beibele, o ile a kgethwa e le mookamedi wa bobedi wa Mokgatlo wa Watch Tower. O be a e-na le semelo se matla gomme o be a ka se tšhošwe. O be a tseba gore go swanetše go bolelwa ka Mmušo wa Modimo.—Mareka 13:10.

Phišego e Mpshafaditšwego le Leina le Lefsa

25. Barutwana ba Beibele ba ile ba arabela bjang tekong ya ka morago ga ntwa ya pele ya lefase?

²⁵ Mokgatlo wa Watch Tower o ile wa rulaganya dikopano kua United States ka 1919 le ka 1922. Ka morago ga tlaišo ya Ntwa ya I ya Lefase kua United States, go be go le bjalo ka Pentekoste e nngwe go Barutwana ba Beibele ba dikete tše sego kae ka nako yeo. (Ditiro 2:1-4) Go e na le go ineela poifong ya go boifa batho, ba ile ba amogela ka phišego e oketšegilego taletšo ya Beibele ya go ya go bolela. Ka 1919 Mokgatlo wa Watch Tower o ile wa tšweletša makasine wo o sepedišanago le Watch Tower wo o bitšwago The Golden Age, wo o tsebjago lefaseng ka bophara lehono e le Phafoga! Wo o ile wa dira e le sedirišwa se matla bakeng sa go phafoša batho ka bohlokwa bja dinako tšeo re phelago go tšona le go aga kgodišego kholofetšong ya Mmopi ya lefase le lefsa la khutšo.

26. (a) Ke boikarabelo bofe bjo Barutwana ba Beibele ba ilego ba bo gatelela? (b) Ke kwešišo efe e botse ya Beibele yeo Barutwana ba Beibele ba ilego ba e hwetša?

²⁶ Ka bo-1920 le ka bo-1930, Barutwana ba Beibele ba ile ba gatelela ka mo go oketšegilego mokgwa wa Bakriste ba pele wa go bolela—go ya ka ntlo le ntlo. (Ditiro 20:20, NW) Modumedi o mongwe le o mongwe o be a e-na le boikarabelo bja go nea bohlatse go batho ba bantši ka mo go ka kgonegago mabapi le pušo ya Mmušo ya Kriste. Ba ile ba thoma go bona gabotse go tšwa ka Beibeleng gore kgang e kgolo yeo e lego ka pele ga batho e be e le ya bogoši bja legohle le gore ye e be e tla rarollwa ke go fediša ga Jehofa Modimo Sathane gotee le mediro ya gagwe ka moka yeo e senyago mo lefaseng. (Ba-Roma 16:20; Kutollo 11:17, 18) Tabeng ye e lego mabapi le kgang ye, go ile gwa lemogwa gore phološo ya motho e be e le ya bobedi go go phagamišwa ga Modimo e le Mmuši yo a swanetšego. Ka gona, go be go tla swanela gore go be le dihlatse tše botegago mo lefaseng tše di ikemišeditšego go hlatsela merero ya Modimo le go phagama ga gagwe. Senyakwa se se ile sa kgotsofatšwa bjang?—Jobo 1:6-12; Johane 8:44; 1 Johane 5:19, 20.

27. (a) Ke tiragalo efe e bohlokwa yeo e ilego ya direga ka 1931? (b) Tše dingwe tša ditumelo tše hlaolago tša Dihlatse ke dife?

²⁷ Ka July 1931, Barutwana ba Beibele ba ile ba swarela kopano kua Columbus, Ohio, yeo go yona ba dikete-kete bao ba bego ba le gona ba ilego ba amogela setlamo. Go sona ba ile ba amogela ka lethabo “leina leo molomo wa Morena Modimo o le reilego,” gomme ba bolela gore: “Re rata go tsebja le go bitšwa ka leina ‘dihlatse tša Jehofa.’” Ga e sa le go tloga letšatšing leo, Dihlatse tša Jehofa di ile tša thoma go tsebja lefaseng ka bophara e sego feela bakeng sa ditumelo tša tšona tše arogilego eupja le bakeng sa bodiredi bja tšona bjo mafolofolo bja ntlo le ntlo le bja seterateng. (Bona matlakala 356-7.)—Jesaya 43:10-12; Mateo 28:19, 20; Ditiro 1:8.

28. Ka 1935 ke kwešišo efe e botse yeo Dihlatse di ilego tša e amogela mabapi le pušo ya Mmušo?

²⁸ Ka 1935 Dihlatse di ile tša thoma go kwešiša gabotse ge e le ka sehlopha sa Mmušo wa legodimong, seo se tlago go buša le Kriste gotee le balata ba sona mo lefaseng. Di be di šetše di tseba gore palo ya Bakriste ba tloditšwego ba bileditšwego go buša le Kriste ba le magodimong e be e tla ba 144 000 feela. Ka gona, kholofelo ya batho ka moka ba šetšego e be e tla ba efe? Mmušo o nyaka balata bakeng sa go kgonthišetša go ba gona ga ona. Pušo ye ya legodimong, e lego Mmušo, le wona o be o tla ba le dimilione tša balata ba kwago mo lefaseng. Ba e be e tla ba “lešaba le lexolo la batho ba xo sexo motho e a kxônaxo xo ba bala, ba dithšaba ka moka, le meloko ka moka, le merafô ka moka, le maleme ka moka;” bao ba goeletšago ka gore: “Xo phološa ké xa Modimo [Jehofa] wa rena e a dutšexo sedulong sa boxoši, ké xa Kwana [Kriste Jesu].”—Kutullo 7:4, 9, 10; 14:1-3; Ba-Roma 8:16, 17.

29. Ke teko efe yeo Dihlatse di ilego tša e lemoga le go e amogela?

²⁹ Kwešišo ye ya mabapi le lešaba le legolo e thušitše Dihlatse tša Jehofa go bona gore ka pele ga tšona di na le teko e kgolo—go hwetša le go ruta dimilione tšeo ka moka di bego di tsoma Modimo wa therešo le tšeo di bego di tla bopa “lešaba le lexolo.” Se se be se tla akaretša lesolo la ditšhaba-tšhaba la go ruta. Go be go tla nyaka diboledi le badiredi ba tlwaeditšwego. Dikolo di be di tla nyakega. Tše ka moka di ile tša akanywa ke mookamedi yo a latelago wa Mokgatlo wa Watch Tower.

Go Tsoma Bao ba Tsomago Modimo Lefaseng ka Bophara

30. Ke ditiragalo dife tša bo-1930 le bo-1940 tšeo di ilego tša kgoma Dihlatse?

³⁰ Ka 1931 go be go e-na le Dihlatse tše lego ka tlase ga 50 000 dinageng tše lego ka tlase ga 50. Ditiragalo tša bo-1930 le bo-1940 ga se tša dira gore boboledi bja bona bo be bonolo. Lebaka le le bile le go tšwelela ga Bonazi le Bofasi le go tsoga ga Ntwa ya II ya Lefase. Ka 1942 J. F. Rutherford o ile a hwa. Mokgatlo wa Watch Tower o be o tla nyaka boetapele bjo mafolofolo e le gore a matlafatše ka mo go tšwelago pele boboledi bja Dihlatse tša Jehofa.

31. Ke’ng seo se ilego sa thoma go šoma ka 1943 bakeng sa go katološa boboledi bja ditaba tše lokilego?

³¹ Ka 1942, ge a e-na le nywaga e 36, Nathan H. Knorr o ile a kgethwa gore e be mookamedi wa boraro wa Mokgatlo wa Watch Tower. E be e le morulaganyi yo mafolofolo yo a nago le temogo e botse ya go lemoga go nyakega ga go hlohleletša boboledi bja ditaba tše di lokilego lefaseng ka moka ka go akgofa ka mo go ka kgonegago, gaešita lege ditšhaba di be di sa dutše di nweletše Ntweng ya II ya Lefase. Ka baka leo, kapejana o ile a thoma go diriša thulaganyo ya sekolo bakeng sa go tlwaetša baromiwa, seo se bitšwago Sekolo sa Beibele sa Watchtower sa Gilead.d Barutwana ba pele ba lekgolo, bao ka moka e bego e le badiredi ba nako e tletšego, ba ile ba ngwadiša ka January 1943. Ba ile ba ithuta Beibele le dithuto tše di sepedišanago le bodiredi ka mo go tseneletšego ka mo e ka bago ka dikgwedi tše tshelelago pele ba romelwa dikabelong tša bona, kudu-kudu dinageng dišele. Go fihla ka 1990, dihlopha tše 89 di ile tša aloga sekolong, gomme badiredi ba dikete ba ile ba tloga Gilead go ya go dira go dikologa lefase.

32. Ke tšwelopele efe yeo e dirilwego ke Dihlatse tša Jehofa ga e sa le go tloga ka 1943?

³² Ka 1943 go be go e-na le Dihlatse tše 126 329 feela tšeo di bolelago dinageng tše 54. Go sa šetšwe kganetšo e šoro ya Bonazi, Bofasi le Bokomanisi, le Lesolo la Katholika gotee le go tšwa go seo se bitšwago mebušo ka batho nakong ya Ntwa ya II ya Lefase, ka 1946 Dihlatse tša Jehofa di be di šetše di fihleletše tlhora ya ka godimo ga 176 000. Nywageng e 44 ka morago, go be go e-na le mo e nyakilego e ka ba baboledi ba mafolofolo ba dimilione tše nne dinageng, dihlakahlakeng le mafelong a fetago 200. Ka ntle le pelaelo, go tsebja ga bona ka leina le tiro go bile go thušitše gore ba tsebje lefaseng ka bophara. Eupja mabaka a mangwe a ile a akaretšwa ao a ilego a tutuetša kudu go atlega ga bona.—Sakaria 4:6.

Thulaganyo ya Thuto ya Beibele

33. Ke ka baka la’ng Dihlatse tša Jehofa di e-na le Diholo tša Mmušo?

³³ Dihlatse tša Jehofa di swara diboka tša thuto ya Beibele tša beke le beke Diholong tša tšona tša Mmušo tšeo di direlago diphuthego tše fetago 60 000 lefaseng ka moka. Diboka tše ga se tša thewa ditirelong tša borapedi goba go tšeega maikwelo, eupja di theilwe tabeng ya go hwetša tsebo e nepagetšego ya Modimo, Lentšu la gagwe le merero ya gagwe. Ka gona, Dihlatse tša Jehofa di bokana gotee ka makga a mararo ka beke bakeng sa go oketša kwešišo ya tšona ya Beibele le go ithuta mabapi le mokgwa wa go bolela le go ruta molaetša wa yona go ba bangwe.—Ba-Roma 12:1, 2; Ba-Filipi 1:9-11; Ba-Hebere 10:24, 25.

34. Morero wa Sekolo sa Bodiredi sa Pušo ya Legodimo ke ofe?

³⁴ Ka mohlala, seboka sa gare ga beke se akaretša Sekolo sa Bodiredi sa Pušo ya Legodimo, seo ditho tša phuthego di ka ngwadišago go sona. Sekolo se seo se okamelwago ke mogolo yo a swanelegago wa Mokriste, se thuša go tlwaetša banna, basadi le bana ka bokgoni bja go ruta le go bolela ka go dumelelana le melao ya motheo ya Beibele. Moapostola Paulo o ngwadile gore: “Pôlêlô ya lena a e bê ya botho ka mehla, e bê e nokilwexo letswai; Le tsebê xo fetola mang le mang ka mo xo Le swanetšexo.” Dibokeng tša bona tša Bokriste, Dihlatse tša Jehofa gape di ithuta go bolela molaetša wa Mmušo “ka boleta le ka tlhompho e kgolo.”—Ba-Kolose 4:6; 1 Petro 3:15, NW.

35. Diboka tše dingwe tšeo di swarwago ke Dihlatse tša Jehofa ke dife, gomme mohola wa tšona ke ofe?

³⁵ Letšatšing le fapanego, Dihlatse di bokana gotee bakeng sa polelo ya Beibele ya metsotso e 45 yeo e latelwago ke tlhahlobo ya iri e tee ya phuthego (ka dipotšišo le dikarabo) ya go hlahloba sehlogo sa Beibele se se lego mabapi le thuto ya Bokriste goba boitshwaro. Ditho tša phuthego di lokologile go ka tšea karolo. Ngwaga o mongwe le o mongwe Dihlatse di ba gona dibokeng tše dikgolo tše tharo, dikopano tša letšatši le le tee go ya go a mane, moo gantši ba dikete ba bokanago bakeng sa go theetša dipolelo tša Beibele. Ka baka la tše le diboka tše dingwe tša go se lefelelwe, Hlatse e nngwe le e nngwe e godiša tsebo ya yona ya go tseba dikholofetšo tša Modimo bakeng sa lefase le le bakeng sa batho go okeletša tabeng ya go hwetša thuto e botse kudu ya boitshwaro bja Bokriste. O mongwe le o mongwe o batametšwa kgaufsi le Modimo wa therešo, Jehofa, ka go latela dithuto le mohlala wa Kriste Jesu.—Johane 6:44, 65; 17:3; 1 Petro 1:15, 16.

Dihlatse di Rulagantšwe Bjang?

36. (a) Na Dihlatse di na le sehlopha sa baruti seo se lefšago? (b) Ka gona, ke bomang bao ba etelelago pele ka phuthegong?

³⁶ Ka mo go kwagalago, ge e ba Dihlatse tša Jehofa di swara diboka gomme di rulaganyeditšwe go bolela, di swanetše go ba le o mongwe yo a di etelelago pele. Lega go le bjalo, ga di na sehlopha sa baruti seo se lefšago gaešita le go ba le moetapele yo a nago le matla a go dira mehlolo le yo a lego boemong bja tlhompho. (Mateo 23:10) Jesu o itše: “Le filwe fêla; le lena fang fêla.” (Mateo 10:8; Ditiro 8:18-21) Phuthegong e nngwe le e nngwe, go na le bagolo le bahlanka ba bodiredi ba swanelegago moyeng, bao bontši bja bona ba nago le modiro wa boiphedišo gomme ba hlokomela lapa, bao ka go ithatela ba etelelago pele tabeng ya go ruta le go hlahla phuthego. Wo e tloga e le mohlala wo o neilwego ke Bakriste ba lekgolong la pele la nywaga.—Ditiro 20:17; Ba-Filipi 1:1; 1 Timotheo 3:1-10, 12, 13.

37. Bagolo le bahlanka ba bodiredi ba kgethwa bjang?

³⁷ Bagolo ba le bahlanka ba bodiredi ba kgethwa bjang? Go kgethwa ga bona go dirwa ka tlase ga tlhahlo ya sehlopha se bušago sa bagolo ba tloditšwego go tšwa dinageng tše fapa-fapanego bao modiro wa bona e lego o swanago le wa sehlopha sa baapostola le bagolo kua Jerusalema, bao ba ilego ba etelela pele phuthegong ya pele ya Bokriste. Bjalo ka ge re bone go Kgaolo 11, ga go moapostola o tee yo a bego a phagametše ba bangwe. Ba be ba fihlelela diphetho tša bona e le sehlopha, gomme tše di ile tša hlompšha ke diphuthego tšeo di bego di phatlaletše le lefase ka moka la bogologolo la Roma.—Ditiro 15:4-6, 22, 23, 30, 31.

38. Sehlopha se Bušago se šoma bjang?

³⁸ Thulaganyo e swanago e dira go Sehlopha se Bušago sa Dihlatse tša Jehofa lehono. Se swara diboka tša beke le beke ntlong-kgolo ya sona ya lefase kua Brooklyn, New York, gomme ditaelo di romelwa go tloga moo go ya go Dikomiti tša Makala go dikologa lefase tšeo di okamelago modiro wa bodiredi nageng e nngwe le e nngwe. Ka go latela mohlala wa Bakriste ba pele, Dihlatse tša Jehofa di ile tša kgona go akaretša dikarolo tše dikgolo tša lefase ka boboledi bja ditaba tše di lokilego tša Mmušo wa Modimo. Modiro woo o tšwela pele takanyong ya lefase ka moka.—Mateo 10:23; 1 Ba-Korinthe 15:58.

Go Kgeregela go Modimo wa Therešo

39. (a) Ke ka baka la’ng Dihlatse di sa tšee lehlakore dikganyeng tša dipolitiki? (b) Dihlatse di ile tša atlega bjang ka tlase ga thibelo?

³⁹ Lekgolong la bo-20 la nywaga, Dihlatse tša Jehofa di ile tša atlega lefaseng ka moka. Se se bile bjalo le dinageng tšeo go tšona di bego di le ka tlase ga thibelo. Dithibelo tše kudu-kudu di ile tša tlišwa ke mebušo yeo e ilego ya palelwa ke go kwešiša boemo bja go se tšee lehlakore bja Dihlatse tša Jehofa mabapi le go botegela dipolitiki le setšhaba ga lefase le. (Bona lepokisi, letlakala 347.) Lega go le bjalo, dinageng tše bjalo dikete tše masome-some tša batho di ile tša retologela go Mmušo wa Modimo e le kholofelo e nnoši ya therešo bakeng sa khutšo le polokego tša batho. Dinageng tše dintši bohlatse bjo bogolo bo ile bja newa, gomme gona bjale go na le dimilione tša Dihlatse tše mafolofolo kae le kae.—Bona tšhate, letlakala 361.

40, 41. (a) Ke’ng seo Dihlatse tša Jehofa di se letetšego mo nakong ye? (b) Ke potšišo efe yeo e sa dutšego e nyaka go arabja?

⁴⁰ Ka lerato la tšona la Bokriste le kholofelo ya tšona ya go holofela “lexodimo le lefsa le lefase le lefsa,” Dihlatse tša Jehofa di lebeletše bokamosong bjo bo lego kgaufsi bja ditiragalo tše šišinyago lefase tšeo kapejana di swanetšego go fediša go hloka toka ka moka, kgobogo le bokgopo mo lefaseng le. Ka baka leo, di tla tšwela pele di etela baagišani ba tšona ka boiteko bjo botegago bja go batametša batho ba dipelo tše botegago go Modimo wa therešo, Jehofa.—Kutollo 21:1-4; Mareka 13:10; Ba-Roma 10:11-15.

⁴¹ Go sa dutše go le bjalo, go ya ka boporofeta bja Beibele, ke’ng seo bokamoso bo se huparetšego batho, bodumedi le lefase le le šilafetšego? Kgaolo ya rena ya mafelelo e tla araba potšišo yeo e bohlokwa.—Jesaya 65:17-25; 2 Petro 3:11-14.

[Mongwalo wa tlase

[Lepokisi go letlakala 347]

Boema-gare bja Bokriste kua Roma ya Boheitene

Ka go dumelelana le melao ya motheo ya lerato le khutšo yeo Jesu a ilego a e ruta, e bile go ithekgilwe ka thuto ya bona ya motho ka noši ya Lentšu la Modimo, Bakriste ba pele ba be ba ka se be le karolo dintweng goba tlwaetšong ya tšona. Jesu o be a itše: “Mmušô wa-ka, xa se o tšwaxo ’faseng leno. Xe mmušô wa-ka o ka be o e-tšwa lefaseng leno, bahlanka ba-ka ba be ba [tla] o hlabanêla. Byale mmušô wa-ka xa se o tšwaxo mono.”—Johane 18:36.

Nakong ya morago kua ka 295 C.E. Maximilianus wa Theveste, morwa wa letona la Roma, o ile a ngwadišetšwa tirelo ya bohlabani. Ge molaodi wa dira a be a mmotšiša leina la gagwe, o ile a araba ka gore: “Bjale, ke ka baka la’ng o rata go tseba leina la-ka? Ke gana tirelo ya bohlabani ka baka la letswalo: Ke Mokriste. . . . Nka se ke ka šoma; nka se ke ka dira sebe malebana le letswalo la-ka.” Molaodi wa dira o ile a mo lemoša ka gore o tla lahlegelwa ke bophelo bja gagwe ge e ba a sa kwe. “Nka se ke ka šoma. O ka nkgaola hlogo, eupja nka se ke ka hlankela mebušo ya Lefase Le; ke tla direla Modimo wa-ka.”—An Historian’s Approach to Religion, ka Arnold Toynbee.

Mehleng yeno thuto ya Beibele ya motho ka noši e dirile gore Dihlatse tša Jehofa e le batho ka o tee ka o tee lefaseng ka bophara ba latele ditaelo tša letswalo tabeng ya go gata mogato o swanago. Dinageng tše dingwe ba bangwe ba lefa tefo e phagamego, kudu-kudu kua Jeremane ya Nazi, moo ba ilego ba thuntšhwa, ba fegwa le go kgaolwa dihlogo nakong ya Ntwa ya II ya Lefase. Eupja botee bja bona bja lefase ka bophara, bjoo bo theilwego leratong la Bokriste, le gatee ga se bja ka bja robja. Ga go le o tee yo a ilego a hwa ntweng a bolawa ke o mongwe wa Dihlatse tša Bakriste tša Jehofa. Histori ya lefase e be e tla ba e fapanego gakaakang ge nkabe o mongwe le o mongwe yo a ipolelago e le Mokriste le yena a ile a phela ka molao wa Kriste wa lerato!—Ba-Roma 13:8-10; 1 Petro 5:8, 9.

[Lepokisi/Seswantšho go letlakala 356, 357]

Seo Dihlatse tša Jehofa di se Dumelago

Potšišo: Moya (soul) ke’ng?

Karabo: Ka Beibeleng moya [soul] (Sehebere, neʹphesh; Segerika, psy·kheʹ) ke motho goba phoofolo goba bophelo bjoo motho goba phoofolo e nago le bjona.

“Modimo a re: Lefase a le tšweletšê diphedi di e-ya ka mehuta ya tšôna, diruiwa le dixaxabi le diphôôfôlô tša naxa di e-ya ka mehuta ya tšôna. Morêna Modimo a na a bopa motho, lerole la mmu; mo dinkong tša xaxwe a budulêla môya wa bophelô, motho a napa a ba môya o phelaxo.”—Genesi 1:24; 2:7.

Diphoofolo le motho KE meoya (souls) e phelago. Moya (soul) ga se selo seo se ikemetšego se se arogilego. O ka hwa e bile o a hwa. “Bonang, meoya ka moka ke ya-ka, bjalo ka ga moya wa tatago motho ga e le wa-ka le wona, moya wa morwagwe ke wa-ka, moya o senyago wona o tlo hwa.”—Hesekiele 18:4, Phetolelo ya Kgale.

Potšišo: Na Modimo ke Boraro botee?

Karabo: Dihlatse tša Jehofa di dumela gore Jehofa ke Morena yo a Phagamego wa legohle yo go se nago yo a lekanago le yena. “Kwaa, Isiraele, Jehofa, Modimo wa rena, ke Jehofa a nnoši!” (Doiteronomio 6:4, Phetolelo ya Kgale) Kriste Jesu e le Lentšu e be e le sebopiwa sa moya gomme o ile a tla lefaseng ka go ikokobeletša thato ya Tatagwe. O ikokobeletša Jehofa. “Mohla tšohle di tlo xo ba di beilwe ka tlase xa ’naô tša xaxwe, ké mo le Yêna Morwa a tl’o xo bewa ka tlase xa E a mmeilexo mmuši wa tšohle, xore Modimo e bê Yena Mo-ba-tšohle-xo-bohle.”—1 Ba-Korinthe 15:28; bona gape le Mateo 24:36; Mareka 12:29; Johane 1:1-3, 14-18; Ba-Kolose 1:15-20.

Moya o mokgethwa ke matla a šomago a Modimo, e sego motho.—Ditiro 2:1-4, 17, 18.

Potšišo: Na Dihlatse tša Jehofa di rapela medimo ya diswantšho goba go e hlompha ka tsela ya borapedi?

Karabo: Dihlatse tša Jehofa ga di diriše sebopego lege e le sefe sa borapedi bja medimo ya diswantšho, e ka ba tšeo di akaretšago medimo ya diswantšho, batho goba mekgatlo.

“Re tseba xore medimo xa se selô mo lefaseng, le xore xa xo Modimo ó šele; Modimo ke Yêna o tee. Le xe xo ka na le tše ba rexo ké medimo lexodimong le lefaseng, etšwe xò na le medimo e mentši le marêna a mantši, wa rena Modimo ké o tee feela, Yêna Tatawešo, Yêna tlhaxo ya tšohle le boyô bya rena bohle. Le Mong wa rena ké o tee, Yêna Jesu Kriste Mo-tšweletša-tšohle le rena.”—1 Ba-Korinthe 8:4-6; bona gape le Psalme 135:15-18.

Potšišo: Na Dihlatse tša Jehofa di bina Mmisa?

Karabo: Dihlatse tša Jehofa ga di dumele go go fetoga ga senkgwa le beine bjalo ka ge go rutwa ke Kereke ya Roma Katholika. Di bina monyanya wa Selalelo sa Morena letšatšing leo le sepedišanago le Nisani 14 ya Sejuda (gantši ka March goba April) e le segopotšo sa ngwaga le ngwaga sa lehu la Kriste. Sebokeng se ba fetiša senkgwa se sa omelwago le beine e khubedu go dikologa phuthego e le seswantšhetšo sa mmele wa Kriste o se nago sebe le madi a sehlabelo. Ke feela bao ba nago le kholofelo ya go buša le Kriste Mmušong wa gagwe wa legodimong bao ba jago diswantšhetšo.—Mareka 14:22-26; Luka 22:29; 1 Ba-Korinthe 11:23-26; Kutollo 14:1-5.e

[Diswantšho]

Dihlatse tša Jehofa di bokana gotee ka mehla Diholong tša Mmušo bakeng sa thuto ya Beibele

Diholo tša Mmušo: Ichihara City, Japane (letlakaleng le le fetilego), le Boituva, Brazil

[Mongwalo wa tlase]

[Tšhate go letlakala 361]

Dinaga tše Dingwe Tšeo Dihlatse di Bolelago go Tšona

Naga Dihlatse tše Mafolofolo

Afrika Borwa 46 000

Argentina 79 000

Australia 51 000

Brazil 267 000

Brithania 117 000

Canada 98 000

Colombia 42 000

El Salvador 18 000

Finland 17 000

Fora 109 000

Gerika 24 000

Hungary 10 000

India 9 000

Italy 172 000

Japane 138 000

Jeremane, F. R. 129 000

Korea 57 000

Lebanon 2 500

Mexico 277 000

Nigeria 137 000

Philippines 102 000

Poland 91 000

Portugal 36 000

Puerto Rico 24 000

Sepania 78 000

U.S.A. 818 000

Venezuela 47 000

Zambia 72 000

[Diswantšho go letlakala 346]

Sehlwa-seeme sa khutšo sa UN se re: “Re tla rula megoma ka ditšhoša tša rena”; “Leboto la Jesaya” le nea temana ya Beibele

[Seswantšho go letlakala 351]

Dihlatse tša Jehofa di dumela go sehlabelo sa topollo sa Kriste bakeng sa dibe tša batho

[Diswantšho go letlakala 363]

Diholo tša Kopano tša Dihlatse tša Jehofa: Seswantšho seo se tšerwego ka godimo sa holo kua Pennines Bohlabela, Engelane

Holo ya Kopano, Fort Lauderdale, Florida, U.S.A., e dirišwa bakeng sa mananeo a Seisemane, Sepaniše le Sefora

[Diswantšho go letlakala 364]

Ntlo-kgolo ya Lefase ya Mokgatlo wa Watch Tower, Brooklyn, New York; (go tloga ka go le letshadi ka godimo) diofisi, difeketori le meago ya madulo (tše bonaditšwego kudu)

[Diswantšho go letlakala 365]

Diofisi tša Makala tša Watch Tower (go tloga ka godimo ka go le letshadi) Afrika Borwa, Sepania le New Zealand