Bophelo le Bodiredi bja Jesu

Pele ga Lekgotla la Sanhedrine, Gomme ka Morago o Išwa go Pilato

BOŠEGO ke bja matla-gosa. Petro o latotše Jesu ka lekga la boraro, gomme ditho tša Lekgotla la Sanhedrine di feditše ka tsheko ya tšona ya go mo kwera gomme di phatlaletše. Lega go le bjalo ba bokana gape mesong ya Labohlano kapejana ge masa a rwala, mo nakong ye ba Holong ya bona ya Lekgotla la Sanhedrine. Go bonala morero wa bona e le go dira gore tsheko ya bošego e bonagale e le yeo e dirilwego go ya ka molao. Ge Jesu a tlišwa pele ga bona ba bolela seo ba se boletšego bošego: “Re botšê, xe O le Kriste.”

Jesu o araba ka gore: “Xe nka Le botša, Le ka se kê la dumêla. Xe ke Le botšiša, xa Le fetole.” Lega go le bjalo, Jesu itsebiša ka sebete o re: “Xo tloxa byale Morwa-motho ó tlo dula ka letsoxong le letona la matla a Modimo.”

Bohle ba rata go tseba: “A O re O Morwa wa Modimo?”

Jesu o araba ka gore: “Le boletše, xobane ké Nna.”

Go banna ba ba ikemišeditšego go bolaya, karabo ye e lekane. Ba e lebelela e le thogako. Ba a botšiša: “Re sa nyaka bohlatse bya’ng? Re di kwile ka nnoši di e-tšwa molomong wa xaxwe.” Ka gona ba tlema Jesu ba sepela le yena gomme ba mo gafela mmuši wa Roma Pontio Pilato.

Judase, moeki wa Jesu, o be a dutše a lebeletše ge tše ka moka di direga. Ge a bona gore Jesu o ahlotšwe, o a itshola. Ka gona, o ya go baperisita ba phagamego le bagolo gore a bušetše ditsekana tše 30 tša silifera, gomme o a hlalosa: “Ké sentše. Ke ekile madi a se naxo molato.”

Bona ba araba ka bogale: “Re tlo di re’ng? Xo tlo bôna wêna.” Ka gona Judase o lahlela ditsekana tša silifera ka tempeleng gomme a sepela a ba a leka go iphega. Lega go le bjalo, kala yeo Judase a bofelelago thapo e a konoga gomme mmele wa gagwe o wela mafsikeng ao a lego ka tlase, gona moo mmele o a palega.

Baperisita ba phagamego ga ba tsebe se ba ka se dirago ka ditsekana tša silifera. Ba phetha ka gore: “Xa a swanêla xo ba sedimo, ka xobane ké thêkô ya madi.” Ka gona, ka morago ga ge ba boledišane, ba reka tšhemo ya mmopi wa dipitša bakeng sa go boloka batho ba šele ka tšhelete yeo. Ka gona, tšhemo e ile ya bitšwa “thšemo ya madi.”

E sa dutše e le mesong kudu ge Jesu a išwa ngwakong wa bogoši wa mmuši. Eupja ba-Juda ba ba sepetšego le yena ba gana go tsena ka gobane ba dumela gore go hlakana mo go bjalo le Ba-Ntle go tla ba šilafatša. Ka gona e le gore a thuše ba-Juda, Pilato o tšwela ka ntle. O a botšiša: “Motho é Le mmexa ka molato ofe?”

Ba araba ka gore: “Xe motho é e ka be e se mosenyi, re ka be re sa mo tliše xo wene.”

Ka go nyaka go phema go itsenya ditabeng, Pilato o araba ka gore: “Mo tšeeng-xê Le mo sekišê ka molaô wa lena.”

Ge ba utolla maikemišetšo a bona a go bolaya, ba-Juda ba re: “Hleng re ileditšwe xo bolaya motho!” Ruri ge e ba ba ka bolaya Jesu nakong ya Monyanya wa Paseka, go be go tla ba le kgonagalo ya gore batho ba tsoše mpherefere, ka ge ba bantši ba be ba hlompha Jesu kudu. Eupja ge e ba ba dira gore ba-Roma ba mo ahlole ka baka la molato wa bopolitiki, se se tla dira gore ba se ke ba ikarabelela pele ga batho.

Ka gona, baetapele ba bodumedi, bjale ba loga maano a go mmea molato wo o fapanego ba sa bolele molato wa tsheko ya pejana yeo go yona ba ilego ba ahlolela Jesu go rogaka. Ba mmea molato wo o nago le dikarolo tše tharo: “Motho yó re mo hwetša à [1] fapoša sethšaba; [2] ó iletša batho xo nthšetša Kesara mothšêlô; [3] ó re: Ké Nna Kriste, ké kxoši.”

Molato wo o tshwenyago Pilato ke wa ge a bolela gore ke yena kgoši. Ka gona o tsena ngwakong wa bogoši gape, o biletša Jesu go yena, gomme o a mmotšiša: “A ké Wene Kxoši ya Ba-Juda?” Ka mantšu a mangwe, na o robile molao ka go ipolela gore ke wena kgoši ye e ganetšanago le Kesara?

Jesu o rata go tseba kamoo Pilato a šetšego a ile a kwa ka yena, ka gona o a mmotšiša: “A tše O di bolêlaxo ke tša xaxo, xoba ke tša ba bangwê ba xo mpolêla xo wene?”

Pilato o ipolela ge a sa tsebe selo ka yena gomme o kganyoga go tseba ditherešo. O arabela ka gore: “A ke Mo-Juda? Ké sethšaba sa xeno le baperisita ba baxolo ba ba Xo tlišaxo xo Nna. O dirile’ng?”

Jesu le gatee ga a leke go široga kgang, e lego yela ya bogoši. Karabo yeo Jesu bjale a e neago ga go na pelaelo gore e tlaba Pilato. Luka 22:​66–23:3; Mateo 27:​1-11; Mareka 15:1; Johane 18:​28-35; Ditiro 1:​16-20.

◆ Lekgotla la Sanhedrine le kopana gape mesong ka morero ofe?

◆ Judase o hwa bjang, gomme go dirwa’ng ka ditsekana tše 30 tša silifera?

◆ Ke ka baka la’ng ba-Juda ba nyaka gore ba-Roma ba bolaye Jesu, go e na le gore bona ka noši ba mmolaye go etša ge ba ile ba leka go dira bjalo mabakeng a a fetilego?

◆ Ke melato efe yeo ba-Juda ba e fegago Jesu?