“Therešô ké Eng?”

BANNA ba babedi ba bego ba lebeletšane ba be ba sa swane le gatee. Yo mongwe e be e le ra-dipolitiki yoo a bego nyatša, a fišega, a humile, a ikemišeditše go dira selo le ge e le sefe go tšwetša pele modiro wa gagwe. Yo mongwe e be e le morutiši yo a ilego a gana lehumo le botumo, gomme o be a ikemišeditše go gafa bophelo bja gagwe bakeng sa go phološa maphelo a ba bangwe. Go molaleng gore banna ba babedi ba, ba be ba sa bone dilo ka tsela e swanago! Tabeng e nngwe ka mo go kgethegilego ba ile ba se dumelelane ka mo go feletšego—taba ya therešo.

Banna ba e be e le Pontio Pilato le Jesu Kriste. Jesu o be a eme pele ga Pilato bjalo ka sesenyi se se bonwego molato. Ka baka la’ng? Jesu o hlalositše gore lebaka la se—e lego lona lebaka leo ka lona a tlilego lefaseng gomme a thoma bodiredi bja gagwe—e be e le letee feela: therešo. O itše, “Ké se ke se tswáletšwexo; ke tletše sôna lefaseng xore ke bê hlatse ya therešô.”—Johane 18:37.

Karabo ya Pilato e be e le potšišo e sa lebalegego: “Therešô ké eng?” (Johane 18:38) Na ruri o be a tloga a nyaka karabo? Go bonagala go be go se bjalo. Jesu e be e le mohuta wa motho yoo a bego a kgona go araba potšišo le ge e efe yeo a bego a e botšišwa ka potego, eupša ga se a ka a araba Pilato. Le gona Beibele e re Pilato ka morago ga go botšiša potšišo ya gagwe, o ile a tšwa ka phapošing ya batheetši. Go molaleng gore mmušiši wa mo-Roma o ile a botšiša potšišo ka lenyatšo la go se dumele, bjale ka ge ekare o re, “Therešo? Ke’ng seo? Ga go na selo se bjalo!”a