Puku ya Beibele ya bo-38 Sakaria

Mongwadi: Sakaria

Lefelo Leo e Ngwadilwego go Lona: Jerusalema

Go Fetšwa ga go Ngwalwa ga Yona: 518 B.C.E.

Nako Yeo e Akareditšwego: 520-518 B.C.E.

1. Boemo e be e le bofe mabapi le tempele kua Jerusalema ge Sakaria a be a thoma go porofeta?

LE GO šutha ga o šuthe! Bjoo e be e le boemo bja modiro wa go aga tempeleng ya Jehofa Jerusalema ge Sakaria a be a thoma go porofeta. Lege Salomo a ile a aga tempele ya mathomo ka nywaga e 7 1/2 (1 Dikx. 6:37, 38), ba-Juda bao ba bušitšwego ba be ba boetše Jerusalema ka nywaga e 17 gomme moago o sa dutše o le kgole le go fela. Modiro mafelelong o ile wa emela ruri ka morago ga go thibelwa ke Arithasasitha (e ka ba Bardiya goba Gaumata). Eupja mo nakong ye, go sa šetšwe thibelo ye ya molao, modiro o be o tšwela pele o dirwa. Jehofa o be a diriša Hagai le Sakaria go šušumeletša batho go tsošološa moago le go o tšwetša pele go fihlela o phethwa.—Esera 4:23, 24; 5:1, 2.

2. Ke ka baka la’ng modiro o ile wa bonagala e le o mogolo, eupja Sakaria o ile a lebiša tlhokomelo ya bona go eng?

² Modiro wo ba o neilwego o be o bonagala e le o mogolo. (Sak. 4:6, 7) Ba be ba se nene gomme baganetši e le ba bantši, le gona gaešita lege ba be ba e-na le mokgoma wa lešika la bogoši la Dafida, e lego Serubabele, ba be ba se na kgoši e bile ba le ka tlase ga pušo e šele. Go be go le bonolo gakaakang go nwelela kgopolong ya go ba ba fokolago le ya boithati, mola nako e be e nyaka tumelo e matla le go šoma ka mafolofolo! Sakaria o ile a dirišwa go lebiša tlhokomelo ya bona mererong ya Modimo ya nakong yeo gaešita le mererong e megolo kudu ya nakong e tlago, ka go rialo a ba kgothaletša gore ba phethe modiro. (8:9, 13) E be e se nako ya gore ba swane le bo-rakgolokhukhu ba bona bao ba sa lebogego.—1:5, 6.

3. (a) Sakaria o hlaolwa bjang, gomme ke ka baka la’ng leina la gagwe e le le le swanetšego? (b) Boporofeta bja Sakaria bo ile bja bolelwa le go ngwalwa neng?

³ Sakaria e be e le mang? Go na le mo e ka bago batho ba 30 ba fapanego ka Beibeleng bao ba bitšwago ka leina la Sakaria. Lega go le bjalo, mongwadi wa puku yeo e bitšwago ka leina le o hlaolwa e le “moporofeta Sakaria morwa wa Berekia morwa wa Ido.” (Sak. 1:1; Esera 5:1; Neh. 12:12, 16) Leina la gagwe (Sehebere, Zekhar·yahʹ) le bolela gore “Jehofa o Gopotše.” Puku ya Sakaria e hlalosa ka mo go kwalago kudu gore “Morêna wa mašaba” o gopola batho ba Gagwe, gore a dirišane le bona gabotse ka baka la leina la Gagwe. (Sak. 1:3) Dinako tšeo di boletšwego di e nea kakaretšo ya bonyenyane nywaga e mebedi. E bile ka “kxwedi ya seswai ya ngwaxa wa bobedi wa Dario” (October/November 520 B.C.E.) moo go agwa ga tempele go ilego gwa tšwetšwa pele gomme Sakaria a thoma go porofeta. (1:1) Puku le gona e šupa “letšatši la bonê la kxwedi ya senyane ya Kisilefe,” ka “ngwaxa wa bonê wa kxoši Dario” (mo e ka bago ka December 1, 518 B.C.E.). (7:1) Ka gona, ka ntle le pelaelo boporofeta bja Sakaria bo be bo tla ba bo boletšwe le go ngwalwa nywageng ya 520-518 B.C.E.—Esera 4:24.

4, 5. (a) Ke ka baka la’ng Sakaria a ile a porofeta go wa ga Tiro nako e telele ka morago ga go rakelelwa ga motse ke Nebukadinetsara? (b) Ke phethagalo efe ya diporofeto tše di kgethegilego tšeo di hlatselago ka mo go kgodišago go budulelwa ga puku?

⁴ Barutwana ba puku ya Sakaria ba tla hwetša bohlatse bjo bo lekanego bja go nepagala ga yona. Ela hloko taba ya Tiro. E bile ka morago ga go rakelela ka nywaga e 13 moo kgoši ya Babele Nebukadinetsara a ilego a senya Tiro. Lega go le bjalo, se ga se sa bolela go senywa ga Tiro ka mo go feletšego. Nywaga e mentši ka morago Sakaria o ile a bolela e sa le pele ka go senywa ka mo go feletšego ga Tiro. E be e le motse wa Tiro wa sehlakahlaka woo Alexander o Mogolo a ilego a o menola mehleng ya modiro wa gagwe o tumilego wa go agwa ga tsela; o ile a o fiša ka ntle le kgaugelo, ka go rialo a phethagatša boporofeta bja Sakaria bja mo e ka bago nywaga-kgolong e mebedi pejana.a—Sak. 9:2-4.

⁵ Lega go le bjalo, bohlatse bjo bo kgodišago kudu bja gore puku ye e buduletšwe ke Modimo bo tla hwetšwa go phethagaleng ga diporofeto tša bjona tšeo di lego mabapi le Mesia, e lego Jesu Kriste, bjalo ka ge di ka bonwa ge go bapišwa Sakaria 9:9 le Mateo 21:4, 5 gotee le Johane 12:14-16; Sakaria 12:10 le Johane 19:34-37; Sakaria 13:7 le Mateo 26:31 gotee le Mareka 14:27. Le gona, go na le go swana mo go ka lemogwago magareng ga Sakaria 8:16 le Ba-Efeso 4:25; Sakaria 3:2 le Juda 9; le Sakaria 14:5 le Juda 14. Tumelelano yeo e hwetšwago Lentšung la Modimo ruri ke e makatšago!

6. (a) Ke eng se se bakago phetogo ya mongwalelo go tloga go kgaolo 9 ya Sakaria go ya pele? (b) Ke eng seo e ka bago e le lebaka leo ka lona Mateo a šupago Sakaria e le “Jeremia”?

⁶ Go na le bantšha-diphošo ba bangwe ba Beibele bao ba bolelago gore phetogo mongwalelong go tloga go kgaolo 9 go ya pele e bontšha gore karolo yeo e ka se ke ya ba yeo e ngwadilwego ke Sakaria. Lega go le bjalo, phetogo mongwalelong ruri ga e fete se se ka lokafatšwago ke go fetolwa ga taba. Lege dikarolo tša pele tše seswai di le mabapi le ditaba tšeo di bego di le bohlokwa kudu bathong ba mehleng ya Sakaria, go dikgaolo 9 go ya go 14 moporofeta o lebelela pele bokamosong bjo bo lego kgole. Ba bangwe ba ile ba gonona lebaka leo ka lona Mateo a tsopolago Sakaria eupja a tswalanya mantšu a gagwe le Jeremia. (Mat. 27:9; Sak. 11:12) Go bonagala gore Jeremia ka dinako tše dingwe o be a lebelelwa e le wa mathomo wa Baporofeta ba ka Morago (go e na le Jesaya, go etša Dibeibeleng tša rena tša mehleng yeno); ka gona Mateo, ka go šupa Sakaria e le “Jeremia,” a ka ba a be a latela mokgwa wa ba-Juda wa go akaretša karolo ka moka ya Mangwalo ka tlase ga leina la puku ya pele ya karolo. Jesu ka noši o ile a diriša “Dipsalome” ge a akaretša dipuku ka moka tšeo di tsebjago e le Mengwalo.—Luka 24:44.b

7. Puku ya Sakaria e rulagantšwe bjang?

⁷ Go fihla go kgaolo 6, temana 8, puku e na le lelokelelo la dipono tše seswai tšeo di swanago le tša Daniele le Hesekiele, tšeo ka kakaretšo di tswalanago le go agwa lefsa ga tempele. Tše di latelwa ke dipolelo le diporofeto mabapi le borapedi bja kgonthe, tsošološo le letšatši la Jehofa la ntwa.

DIKAGARE TŠA SAKARIA

8. Pono ya banamedi ba bane ba dipitsi e bontšha’ng mabapi le Jerusalema le ditšhaba?

⁸ Pono ya pele: Banamedi ba bane ba dipitsi (1:1-17) Jehofa o re: “Boêlang xo Nna! . . . Ké mo le Nna ke tl’o xo boêla xo lena!” gomme ka morago o a botšiša, “Tše ke bexo ke di bolêla kè laetša bahlanka ba-ka ba baporofeta, a xa tša ka tša tlêla bô-tata-weno?” (1:3, 6) Batho ba dumela gore ba amogetše seo se bego se tloga se ba swanetše. Pono ya pele ya Sakaria bjale e a tšwelela. Bošego, banamedi ba bane ba dipitsi ba ema gare ga dihlare kgaufsi le Jerusalema, ba tšwa go lekodišiša lefase ka moka leo ba hweditšego le iketlile. Eupja morongwa wa Jehofa yo a boledišanago le bona o tshwenyegile ka boemo bja Jerusalema. Yena Jehofa ka noši o bolela kgalefo ya gagwe e kgolo malebana le ditšhaba tšeo di thušago go tlišetša Tsione bošula, gomme o bolela gore o tla “boêla Jerusalema ka dikxauxêlô.” Ngwako wa gagwe o tla agwa go yona, gomme metse ya gagwe “e tlo boêla e tlala tše botse.”—1:16, 17.

9. Jehofa o hlalosa bjang pono ya dinaka le barudi?

⁹ Pono ya bobedi: Dinaka le barudi (2:1-4). Sakaria o bona dinaka tše nne tšeo di phatlaladitšego Juda, Isiraele le Jerusalema. Ka morago Jehofa o mmontšha barudi ba bane, a hlalosa gore ba ba tla tla ba wiša dinaka tše nne tša ditšhaba tšeo di lwantšhago Juda.

10. Jehofa o tswalanywa bjang le katlego ya Jerusalema?

¹⁰ Pono ya boraro: Katlego ya Jerusalema (2:5-17). Monna o bonwa a ela Jerusalema. Motse o tla šegofatšwa ka go katološwa, gomme Jehofa e tla ba leboto la mollo leo le o dikologilego le letago gare ga wona. O goeletša ka gore, “Hee, Tsione! Tšhaba,” gomme o oketša temošo ka gore, “Yo a kgwathago lena, o kgwatha thaka ya leihlo la-ka.” (2:7, 8, NW) Ka ge Jehofa a dula go yona, Tsione e tla thaba gomme ditšhaba tše dintši di tla itliša go Jehofa. Nama ka moka e laelwa gore e ikhomolele pele ga Jehofa, “xobane ó tsoxile moaxong wa xaxwe o mokxêthwa.”—2:17.

11. Moperisita o Mogolo Jošua o phagamišwa bjang, gomme ke tsela efe yeo a kgothaletšwago go e latela?

¹¹ Pono ya bone: Go hlakodišwa ga Jošua (3:1-10). Moperisita yo Mogolo Jošua o bonwa a le tekong, Sathane a mo lwantšha gomme morongwa wa Jehofa a kgalema Sathane. Na Jošua ga se “lexong le le ehotšwexo mo mollong”? (3:2) Jošua o bolelwa e le yo a hlwekišitšwego, gomme bakeng sa diaparo tša gagwe tše di šilafetšego o newa “diaparô tša bothšephi” tše hlwekilego. O kgothaletšwa go sepela ditseleng tša Jehofa yo ‘a tlišago mohlanka wa gagwe, yena Lehlogedi,’ le yo a beago lefsika le le nago le mahlo a šupago pele ga Jošua.—3:4, 8.

12. Go newa kgothatšo le kgonthišetšo dife mabapi le go agwa ga tempele?

¹² Pono ya bohlano: Sehloma-pone le dihlare tša mehlware (4:1-14). Morongwa o tsoša Sakaria gore a bone sehloma-pone sa gauta se se nago le mabone a šupago ka mahlakoreng ka bobedi go dutše mehlware. O kwa mantšu a a Jehofa ao a lebišitšwego go Serubabele: ‘E ka se be ka dira; e ka se be ka matla; e tlo ba ka moya wa Modimo!’ “Thaba-kxolo” e tla dirwa molala pele ga Serubabele, gomme lefsika la sehlwa la tempele le tla dirwa gore le goeletše ka gore: “A le atlêxê! A le atlêxê!” Serubabele o theile metheo ya tempele gomme o tla phetha modiro. Mabone a šupago ke mahlo a Jehofa ao “a bônaxo tša lefase ka moka.” (4:6, 7, 10) Mehlware e mebedi ke batlotšwa ba babedi ba Jehofa.

13-15. Ke’ng seo se bonwago diponong tša lengwalo le le fofago, seroto le dikoloi tše nne?

¹³ Pono ya botshelela: Lengwalo le le fofago (5:1-5). Sakaria o bona lengwalo le le fofago, la botelele bjo e ka bago dimithara tše 9 le bophara bja dimithara tše 4, 5. Morongwa o hlalosa gore ye ke thogako e dirwago ka baka la bao ba utswago le go ena ka maaka ka leina la Jehofa.

¹⁴ Pono ya bošupa: Seroto (5:5-11). Sekhurumelo se tlošwa serotong, (mo e ka bago dilithara tše 22), se utolla mosadi yo a bitšwago “bokgopo.” (PK) O lahlelwa gape ka serotong seo ka morago se rotošetšwago godimo ke basadi ba babedi bao ba nago le diphego, gore a tle a rwalwe a išwe Sineara (Babele) gomme ‘a dudišwe gona mo a agetšwego gona.’—5:8, 11.

¹⁵ Pono ya bo-seswai: Dikoloi tše nne (6:1-8). Bona! Go tšwelela dikoloi tše nne magareng ga dithaba tše pedi tša koporo di na le dipitsi tša mebala e fapanego. Ke meoya e mene ya magodimo. Di ralala le lefase ka taelo ya morongwa.

16. Go porofetwa eng mabapi le “Lehloxedi”?

¹⁶ Lehlogedi; go ikona ga boikaketši (6:9–7:14). Bjale Jehofa o laela Sakaria go rweša Moperisita o Mogolo Jošua mphapahlogo o mobotse. Ka tsela ya boporofeta o bolela ka “Lehloxedi” leo le tlago go aga tempele ya Jehofa gomme la buša e le moperisita sedulong sa gagwe sa bogoši.—6:12.

17. Ge e le ka borapedi, Jehofa o nyaka’ng, gomme bao ba ganago mantšu a gagwe ba tla welwa ke eng?

¹⁷ Nywaga e mebedi ka morago ga ge Sakaria a thomile go porofeta, go tla moemedi a e-tšwa Bethele go tla go botšiša baperisita ba tempele ge e ba mabaka a itšego a go lla le a go ikona a swanetše go tšwela pele a bolokwa. Ka Sakaria, Jehofa o botšiša batho le baperisita ge e ba ba tloga ba botega go ikoneng ga bona. Seo Jehofa a se nyakago ke ‘go kwa, toka ya kgonthe, botho bjo lerato le dikgaugelo.’ (7:7, 9, bapiša le NW) Ka ge ba gana mantšu a gagwe a boporofeta ka bonganga le bothata bja dipelo, o tla ba lahlela ka kgalefo ditšhabeng ka moka.

18. Dikholofetšo tša tsošološo ya letago tšeo Jehofa a di bolelago ke dife?

¹⁸ Tsošološo; “banna ba lesome” (8:1-23). Jehofa o bolela gore o tla boela Tsione gomme a dule Jerusalema yeo e tlago go bitšwa “motse wa therešô.” Batho ba bagolo ba tla dula mapatlelong a wona, gomme bana ba tla bapala gona moo. Se ga se se thata kudu go Jehofa, e lego Modimo wa therešo le wa go loka! Jehofa o holofetša peu ya khutšo go mašaledi a batho ba gagwe, ka gore: “Se boifeng! Dirang ka matla.” (8:3, 13) Tšeo ba swanetšego go di dira šidi: Ba botšane therešo gomme ba ahlole ka go rereša, dipelo di se loge maano-mabe le go ena dikeno tša maaka. Ee, go tla tla nako yeo ka yona batho ba metse e mentši ba tlago go laletšana gore ba rotogele go tsoma Jehofa ka phišego gomme “banna ba lesome” bao ba tšwago malemeng ka moka ba tla “swara monna wa Mo-Juda ka kobô” ba sepedišana le batho ba Modimo.—8:23.

19. Go latela dikahlolo dife tše šoro, eupja ke’ng seo se bolelwago mabapi le kgoši ya Jerusalema?

¹⁹ Dikahlolo malebana le ditšhaba, badiši ba dihwirihwiri (9:1–11:17). Karolong ya bobedi ya puku, go dikgaolo 9 go ya go 14, Sakaria o tloga diponong tša go swantšhetša o fetogela mokgweng o tlwaelegilego kudu wa boporofeta. O thoma ka dikahlolo tše šoro tše di lebanego metse e mmalwa, go akaretša motse wa sehlakahlaka wo o nago le matlapa wa Tiro. Jerusalema e botšwa gore e itie mokgolokwane wa phenyo ka gobane, “Šé Kxoši ya xaxo, e tla xo wene, Moloki Monamodi. Yêna yo bonôlô ó tla à nametše pôkôlô, pôkôlwana namane ya pôkôlô.” (9:9) Ka go fediša dikoloi tša ntwa le bora, yena yoo o tla kwatša khutšo ditšhabeng gomme a buša go fihla magomong a lefase. Jehofa o tla lwela batho ba gagwe malebana le Gerika, gomme a ba phološa. “Ka gobane botho bja gagwe ke bjo bogolo gakaakang, le kgaugelo ya gagwe ke e kgolo gakaakang!” (9:17, NW) Jehofa, Monei wa pula, o sola didupe le badiši ba maaka. O tla phagamiša ngwako wa Juda gomme ba-Efuraimi ba tla ba bjalo ka mogale. Ge e le bao a ba lopolotšego, “dipelo tša bona di tla thabela Jehofa . . . gomme ba tla sepela leineng la gagwe.”—10:7, 12, NW.

20. Go swantšhetšwa eng ka seo se dirwago ka mapara, “Bolêta” le “Kwanô”?

²⁰ Sakaria bjale o abelwa go diša mohlape wo o rekišeditšwego go hlabja ke badiši bao ba se nago kwelobohloko ba ba rego: “A xo rêtwê Morêna; ’na re humile!” (11:5) Moporofeta o tšea mapara a mabedi gomme o a rea “Bolêta” le “Kwanô.” (11:7) Ge a roba “Bolêta,” o swantšhetšha kgwerano ye e senyegilego. Bjale o nyaka meputso ya gagwe gomme ba mo elela ditsekana tše 30 tša silifera. Jehofa o laela Sakaria gore a di lahlele polokelong, gomme o bolela ka kgegeo e kgolo gore, “Ké yôna thêkô ye ba rexo ke rêkwa ka yôna.” (11:13) Bjale lepara le ba rego ke “Kwanô” le a robja, go robja borwarre bja Juda le Isiraele. Lerumo le tla tlela badiši ba maaka bao ba hlokomologilego dinku tša Jehofa.

21. (a) Kahlolo ya Jehofa ke efe go bao ba tsogelago Jerusalema matla? (b) Ke go gašanywa le go sekiša gofe mo go bolelwago e sa le pele?

²¹ Jehofa o lwa ntwa, o ba kgoši (12:1–14:21). Polelo e nngwe ya kahlolo e a thoma. Jehofa o tla dira Jerusalema senwelo seo se tlago go thekesediša batho le lefsika le boima le le tlago go kgobola bao ba le kukago. O tla fediša ditšhaba ka moka tšeo di tsogelago Jerusalema matla. Godimo ga ngwako wa Dafida, Jehofa o tla tšhollela moya wa kgaugelo le wa merapelo gomme batho ba tla lebelela yo ba mo hlabilego, ba mo llela “sellô sa motswalwa-esi.” (12:10). Jehofa wa mašaba o bolela go fedišwa ga medimo ka moka ya diswantšho le baporofeta ba maaka; batswadi ba yena motho yo ba swanetše go mo ntšha dintho e le gore a hlobole seaparo sa gagwe sa boporofeta ka dihlong. Modiši yo a lego ka tlase wa Jehofa o swanetše go itiwa gomme mohlape o gašanywe, eupja Jehofa o tla sekiša ‘karolo ya boraro’ gore e bitše leina la gagwe. Jehofa o tla re: “Ké bôná batho ba-ka,” gomme yona e tla araba ka gore: “Morêna ké Yêna Modimo wa rena.”—13:9, bapiša le NW.

22. Ke’ng seo se tlago go diragalela ditšhaba le Jerusalema ka “’tšatši la Morêna”?

²² “Tsebang, xo tla ’tšatši la Morêna.” Ditšhaba ka moka di tla hlasela Jerusalema, gomme seripa sa motse se tla išwa bothopja, sa tlogela mašaledi morago. Bjale Jehofa o tla tšwela ditšhaba tšeo dira, “ka mokxwa wa xaxwe wa go tsêna ntwa mohla wa thlabanô.” (14:1, 3) Thaba ya mehlware ka bohlabela bja Jerusalema e tla phatloga go tloga bohlabela go ya bodikela, ya dira moedi wa botšhabelo. Mohlang woo meetse a phelago a tla tšwa Jerusalema a elelela bodikela le bohlabela, marega le selemo gomme “Morêna e tlo ba Yêna Kxoši ya lefase lohle.” (14:9) Lege Jerusalema e šireletšegile, Jehofa o tla otla ditšhaba tšeo di e tsogelago matla. Nama ya bona, mahlo a bona le maleme a bona di tla bola ba eme. Ba tla welwa ke kgakanego. Letsogo la o mongwe le o mongwe le tla tsogela la wa gabo matla. Bao ba tlago go šala ba phela ba ditšhaba tšeo ka moka ba tla swanelwa ke ‘go rotoga ka nywaga yohle, ba tla go lotšha Morena Yena Kgoši ya mašaba.’—14:16.

LEBAKA LEO KA LONA E HOLAGO

23. Pego ya Sakaria e matlafatša tumelo bjang?

²³ Ka moka bao ba ithutago le go naganišiša ka boporofeta bja Sakaria ba tla holega ka go hwetša tsebo yeo e matlafatšago tumelo. Ka makga a fetago 50 Sakaria o lebiša tlhokomelo go “Morêna wa mašaba” e le Yena yo a lwelago le go šireletša batho ba Gagwe, a ba tlatša matla go ya kamoo ba a nyakago ka gona. Ge kganetšo ye e swanago le thaba e bea go phethwa ga go agwa ga tempele kotsing, Sakaria o itše: “Še-le Lentšu la Morêna le-êla-Serubabele, le re: E ka se bê ka dirá; e ka se bê ka matla; e tlo ba ka Môya wa-ka!—Ó r’yalo Morêna wa mašaba. O eng? Wene thaba-kxolo! Pele xa Serubabele O tlo ba molála.” Tempele e ile ya fetšwa ka thušo ya moya wa Jehofa. Ka mo go swanago le lehono, mapheko a tla tologa ge e ba a lwantšhwa ka tumelo go Jehofa. Go bjalo ka ge Jesu a boditše barutiwa ba gagwe gore: “Xe Le ka ba le tumêlô e kakaxo thôrwana ya lehlóko, Le ka bolêla le thaba yé la re: Tloxa mó, O yê kua! ya tlo tloxa ya ya. Xo ka se kê xwa ba le se se Le palêlaxo.”—Sak. 4:6, 7; Mat. 17:20.

24. Ke seswantšho sefe sa potego seo se newago go kgaolo 13 ya Sakaria?

²⁴ Go kgaolo 13, ditemana 2 go ya go 6, Sakaria o bontšha potego yeo e hlaolago phuthego ya Jehofa go fihla le mehleng yeno. Ye e swanetše go phagamela tswalano ya batho lege e le efe, go swana le ya bao ba tswalanego kgaufsi-ufsi. Ge e ba wa leloko la kgaufsi a ka porofeta maaka ka leina la Jehofa, ke gore, a bolela se se fapanego le molaetša wa Mmušo gomme a leka go tutuetša ba bangwe ka mo go fošagetšego ka phuthegong ya batho ba Modimo, gona ditho tša lapa labo motho yoo di swanetše go thekga ka potego mogato lege e le ofe wa kahlolo wo o gatwago ke phuthego. Boemo bjo bo swanago bo swanetše go kgomarelwa mabapi le mogwera lege e le ofe wa pelo-bohloko yo a porofetago maaka, e le gore a lewe ke dihlong le go kwa bohloko ka baka la tiro ya gagwe e fošagetšego.

25. Boporofeta bja Sakaria bo kgokagana bjang le mangwalo a mangwe tabeng ya go hlaola Mesia, “Lehloxedi” le modiro wa gagwe e le Moperisita o Mogolo le Kgoši ka tlase ga Jehofa?

²⁵ Bjalo ka ge dirapa tša rena tša matseno di bontšhitše, go tsena ga Jesu Jerusalema e le kgoši, “[e] bonôlô [a] tla à nametše pôkôlô,” go ekwa ga gagwe bakeng sa “disilifera tše masome a mararo,” go gašagana ga barutiwa ba gagwe ka nako yeo le go hlabja ga gagwe ka lerumo la mohlabani a le koteng ka moka di be di boletšwe e sa le pele ka botlalo bjo bo nepagetšego ke Sakaria. (Sak. 9:9; 11:12; 13:7; 12:10) Boporofeta gape bo bolela “Lehloxedi” e le lona moagi wa tempele ya Jehofa. Go bapišwa ga Jesaya 11:1-10; Jeremia 23:5; le Luka 1:32, 33 go šupa lona le e le Jesu Kriste, yo a “[tlago go] buša moloko wa Jakobo xo iša mehleng ya neng le neng, ’me boxoši bya xaxwe bo ka se kê bya ba le bofêlô.” Sakaria o hlalosa “Lehloxedi” e le “yêna moperisita à le sedulong sa xaxwe,” e lego seo se kgokaganago le mantšu a moapostola Paulo a rego: “Jesu . . . Moperisita e moxolo wa neng le neng ka mokxwa wa Melekitsedeke,” gape ‘o dutše letsogong le letona la sedulo sa borena bja kwa magodimong.’ (Sak. 6:12, 13, Ba-Heb. 6:20; 8:1) Ka gona boporofeta bo šupa “Lehloxedi” e le Moperisita o Mogolo le Kgoši e lego ka letsogong le letona la Modimo magodimong, mola ka nako e swanago bo tsebatša Jehofa e le Mmuši yo a Phagametšego bohle ka gore: “Xomme [Jehofa] e tlo ba Yêna Kxoši ya lefase lohle. Mohla woo [Jehofa] e tlo ba Yêna o tee a nnoši, le leina l’axwe e tlo ba le tee.”—Sak. 14:9, bapiša le NW.

26. Ke “mohla” ofe wa letago woo Sakaria a bolelago ka wona leboelela?

²⁶ Ge moporofeta a šupa mehleng yeo, o boeletša polelwana “mohla woo” ka makga a ka bago 20, gomme e bile e phetha boporofeta bja gagwe. Go hlahlobišišwa ga makga a mantši ao e tšwelelago ka ona go bontšha gore go tla ba le letšatši leo ka lona Jehofa a fedišago maina a medimo ya diswantšho le go tloša baporofeta ba maaka. (13:2, 4) Ke letšatši leo ka lona Jehofa a lwago le ditšhaba tše di mo rumolago gomme a phatlalatša kgakanego madulong a tšona ge a di fediša le go lokišetša ‘moedi wa dithaba tša gagwe’ go ba setšhabelo sa batho ba gagwe. (14:1-5, 13; 12:8, 9) Ee, “Morêna, Modimo wa bôná ó tlo ba hlakodiša mohla woo, ka xobane e le bôná mohlape wa ’tšhaba s’axwe,” gomme ba tla bitšana ka tlase ga morara le mogo. (Sak. 9:16; 3:10; Mika 4:4) Ke letšatši la letago leo ka lona Jehofa wa mašaba ‘a tlago go dula gare’ ga batho ba gagwe, le leo ka lona ‘meetse a phelago a tlago go ela a e-tšwa Jerusalema.’ Mantšu a Sakaria a hlaola ditiragalo tša “mohla woo” e le tšeo di tlago go direga pele ga “lexodimo le lefsa, le lefase le lefsa” tša kholofetšo ya Mmušo.—Sak. 2:11; 14:8; Kut. 21:1-3; 22:1.

27. Boporofeta bja Sakaria bo lebiša tlhokomelo bjang go kgethagatšweng ga leina la Jehofa?

²⁷ Jehofa o a botšiša: “Ke mang yo a nyaditšego mohla wo wa dilo tše nyenyane?” Bonang! Katlego ye e tla aparela lefase ka moka: ‘Batho ba bantši le ditšhaba tše matla di tla tla go tsoma Jehofa wa mašaba Jerusalema, gomme banna ba lesome bao ba tšwago malemeng ka moka a ditšhaba ba tla swara kobo ya monna wa mo-Juda, ba re: “A nke re yê le lena, ka xobane re kwile xore Modimo ó na lé lena.”’ “Mohla woo” gaešita le diklokwana tša dipitsi di tla ba le mantšu a rego “Bokgethwa bja Jehofa!” Diporofeto tše tše di ruthetšago pelo ke tše di holago kudu go ka elwa hloko, ka gobane di bontšha gore ruri leina la Jehofa le tla kgethagatšwa ka Peu ya gagwe ya Mmušo!—Sak. 4:10, NW; 8:22, 23; 14:20, PK.

[Mengwalo ya ka tlase]