Bophelo le Bodiredi bja Jesu

Go Etela Tempele Gape

JESU le barutiwa ba gagwe ba be ba sa tšo fetša bošego bja bona bja boraro Bethania ga e sa le go tloga mola ba fihlago go tšwa Jeriko. Bjale seetša sa mesong ya Mošupologo, Nisani 10 se ba hwetša ba šetše ba le tseleng ya go ya Jerusalema. Jesu o swerwe ke tlala. Ka gona ge a bona mogo o e-na le matlakala, o ya go wona go yo bona ge e ba o ka ba o e-na le mago.

Matlakala a mogo a bile gona pele ga lebaka la ona, ka ge sehla sa mago se be se le ka June, gomme gona bjale e sa fo ba mafelelong a March. Lega go le bjalo, go molaleng gore Jesu o dumela gore ka ge matlakala a bile gona ka pela le mago a ka ba gona ka pela. Eupja o a nyama. Matlakala a tšweleditše ponagalo ye e forago ya sehlare. Jesu bjale o rogaka sehlare ka gore: “Xo ka se hlwê xo e-ja motho seenywa sa xaxo neng le neng.” Tokollong e latelago ya makasine wo, re tla thabela go ithuta ka mafelelo a go rogaka ga Jesu mogo le seo e bego e le tlhaloso ya seswantšhetšo se.

Ge ba tšwela pele, Jesu le barutiwa ba gagwe kapejana ba fihla Jerusalema. O ya tempeleng ye a ilego a e lekola thapameng e fetilego. Lega go le bjalo, lehono o gata magato go fo etša ge a dirile nywageng e meraro pele ge a be a tlile Pasekeng ka 30 C.E. Jesu o leleka bao ba bapatšago le bao ba rekago tempeleng gomme o wiša ditafola tša baananyi ba ditšhelete le ditulo tša bao ba rekišago maeba. Ga a dumelele motho lege e le mang go sepela a rwele sebjana ka tempeleng.

Ge a sola bao ba ananyago ditšhelete le bao ba bapatšago diphoofolo ka tempeleng, o re: “A xa xo a ngwalwa xo thwe: Ngwakô wa-ka ba tlo re ké Ngwakô wa thapêlô! ’Me lena la o dira lexôlô la bahlakodi.” Ke bahlakodi ka gobane ba nyaka ditefo tše di fetago tekanyo go bao ba nago le sebaka se senyenyane sa go ikgethela ge e se go reka go bona diphoofolo tše di nyakegago bakeng sa sehlabelo. Ka gona Jesu o lebelela ditirišano tše tša kgwebo e le sebopego sa boradia le bohlakodi.

Ge baperisita ba bagolo, ba mangwalo le bagolo ba setšhaba ba e-kwa se Jesu a se dirilego ba ile ba tsoma gape tsela yeo ba ka mmolayago ka yona. Ka go rialo ba itlhatsela gore ke bao ba sa sokologego. Lega go le bjalo, ga ba tsebe tsela yeo ba ka bolayago Jesu ka yona ka ge batho ka moka ba mo kgomaretše gore ba mo kwe.

Ka ntle le ba-Juda ba tlhago, Ba-ntle le bona ba tlile Pasekeng. Ba ke basokologi, ke gore ba sokologetše bodumeding bja ba-Juda. Ba-Gerika ba bangwe, bao ka ntle le pelaelo e lego basokologi bjale ba tla go Filipi gomme ba kgopela go bona Jesu. Filipi o ya go Andrea, mohlomongwe a yo botšiša ge e ba kopano e bjalo e be e tla ba e swanetšego. Go bonala Jesu a sa dutše a le tempeleng moo ba-Gerika ba kgonago go mmona.

Jesu o tseba gore o šaletšwe ke go phela matšatši a sego kae feela, ka gona o swantšha boemo bja gagwe gabotse ka gore: “Lebaka la xore Morwa-motho a yê letaxong la xaxwe le tlile. Ruri, ruri ke a Le botša, xe thôrô ya mabêlê [korong, NW] e sa wele mobung ya hwa, e tlo dula è nnoši; fêla xe e hwa kè xôna e enyaxo dienywa tše ntši.”

Thorwana e tee ya korong e na le bohlokwa bjo bonyenyane. Lega go le bjalo, go thwe’ng ge e ba e ka khupetšwa mmung gomme “ya hwa,” ya felelwa ke bophelo bja yona bjalo ka peu? Bjale e a hloga gomme ge nako e dutše e e-ya e a gola ya ba lehlaka leo le tšweletšago dipeu tše dintši-ntši tša korong. Ka mo go swanago, Jesu e fo ba motho o tee yo a phethagetšego. Eupja ge a e-hwa a botegela Modimo, o ba tsela ya go fetišetša bophelo bjo bo sa felego go babotegi bao ba nago le moya o swanago wa boikgafo wo a nago le wona. Ka gona, Jesu o re: “E a rataxo bophelô bya xaxwe, ó tlo bo timetša. Xomme e a hloilexo bophelô bya xaxwe lefaseng leno, ó tlo bo lôtêla bophelô byo bo sa felexo.”

Go molaleng gore Jesu ga a nagane feela ka yena ka noši, ka gobane ka morago o a hlalosa: “Xe motho a ntirêla, a a ntatêle. Mo Nna ke lexo xôna, le mohlanka wa-ka ó tlo ba xôna. Xe motho a ntirêla, Tate ó tlo mo xodiša.” A moputso o makatšago wa go latela Jesu le go mo direla! Ke moputso wa go ba yo a putswago ke Tate ka go ba gotee le Kriste Mmušong.

Jesu ge a dutše a nagana ka tlaišo le lehu le bohloko tše di mo letetšego o tšwela pele ka gore: “Môya wa-ka o huduexile. Xomme ke tlo re’ng? Tata Mphološe nakong yé!” Ruri ge feela seo se mo letetšego se be se ka phengwa! Eupja ga go bjalo go etša ge a re: “Fêla, ké tšôna tše ke di tletšexo nakong yé.” Jesu o dumelelana le thulaganyo ka moka ya Modimo, go akaretša le lehu la gagwe ka noši la sehlabelo. Mateo 21:12, 13, 18, 19; Mareka 11:12-18; Luka 19:45-48; Johane 12:20-27.

◆ Ke ka ba la’ng Jesu a lebeletše go hwetša mago gaešita lege e sešo ya ba sehla sa ona?

◆ Ke ka baka la’ng Jesu a bitša bao ba bapatšago tempeleng “bahlakodi”?

◆ Ke ka tsela efe Jesu a swanago le peu yeo e hwago ya korong?

◆ Jesu o ikwa bjang ka tlaišo le lehu tšeo di mo letetšego?