Go Aga Dika tša Bokriste ka go Bana ba Rena

MMAGO Wanda, yoo monna wa gagwe a mo tlogetšego, o ile a šoma ka thata go aga dika tša Bokriste ka go morwedi wa gagwe. Ge Wanda a e-na le nywaga e 12, tlwaetšo ye e ile ya lekwa. Ka nako yeo, Wanda gotee le kgaetšedi’agwe le ngwanabo o ile a gapeletšega go tlogela mmagwe gomme a dula le tatagwe ka nako e itšego. Tatagwe e be se modumedi, ka gona, Wanda o be a tla itshwara bjang ge mmagwe a be a se kgaufsi go ka bona seo se dirwago?

Tiragalo yeo e tlelago batswadi ka moka ba Bakriste ke nako yeo ka yona bana ba bona ba swanelwago ke go itirela diphetho ka bobona, e lego tšeo di lekago tumelo ya bona. Bana mo gongwe ba ka arogana le batswadi ba bona bao e lego Bakriste bjalo ka Wanda. Mo gongwe ba ka lebeletšana le kgateletšo ya dithaka sekolong ya gore ba dire bobe. Goba mo gongwe ba ka lebeletšana le meleko e matla. Batswadi ba Bakriste ba holofela ebile ba rapelela gore ge seo se direga, bana ba bona ba tla ba le dika tša Bokriste tše matla ka mo go lekanego go ka lebeletšana le moleko.

Batswadi ba ka aga bjang dika tše matla tša Bokriste ka go bana ba bona? Pele re hwetša seo se diragetšego ka Wanda, anke re hlahlobeng kamoo Beibele e re thušago ka gona go araba potšišo yeo. Motheo wa karabo o hwetšwa mantšung a moapostola Paulo ao a a ngwaletšego Bakriste ba Korinthe: “Xobane xa xo e a kaxo bea mothêô o šele ka ntlê xa wo o beilwexo, Yêna Jesu Kriste. Byale xe motho a e-tla a axa xodimo xa mothêô woo, a axa ka xauta le ka silefêra le ka mabye-bohlokwa le dikwata le ka mabya’ng le ka dihlaka, Modirô wa e mongwê le e mongwê o tlo bônaxala; xo na le letšatši la xo tlo bonaxatša, la xo tlo utoloxa ka mollô woo o tl’o xo lekola modirô wa mang le mang wo o dirilwexo, xwa tlo bônala xe e le modirô-dirô.”​—1 Ba-Korinthe 3:​11-13.

Motheo

Ke ka baka la’ng Paulo a ile a ngwala mantšu a? O be a thomile lenaneo la go aga dika tša Bokriste kua Korinthe, eupja lenaneo leo le ile la ba le mathata. Ke therešo gore lenaneo la Paulo la go aga le be le sa akaretše bana ba gagwe ka noši ba nama. Le be le le mabapi le bao ba ilego ba fetoga Bakriste ka boboledi bja gagwe bja ditaba tše di lokilego. Eupja o ile a nagana ka bona e le bana ba moya, gomme seo a se boletšego ke sa bohlokwa kudu le go batswadi.​—1 Ba-Korinthe 4:15.

Paulo o be a ile a tla Korinthe nakong e itšego pejana gomme o be a hlomile phuthego ya Bokriste moo. Bao ba ilego ba amogela boboledi bja gagwe bja ditaba tše di lokilego ba be ba dirile diphetogo tše kgolo dikeng tša bona. Ba bangwe ba bona pele e be e le batho ba ba gobogilego, mahodu, barapedi ba medimo ya diswantšho le matagwa. (1 Ba-Korinthe 6:​9-11) Eupja ba ile ba kgona go fetogela kgopolong ya Bokriste ka gobane go bjalo ka ge eka Paulo o ile a thea motheo o mobotse. Motheo woo e be e le eng? “Xa xo e a kaxo bea mothêô o šele ka ntlê xa wo o beilwexo, Yêna Jesu Kriste.”​—1 Ba-Korinthe 3:11.

Paulo o ile a thea motheo wo bjang ge a dutše a ruta badumedi ba ba bafsa kua Korinthe? O a re botša: “Le nna, Baba bešo, mola kè e-tla xo lena xa nka ka tla ka bonatla bya polêlô le bohlale xe ke Le tsebiša bohlatse bya Modimo. Xobane xa nka ka ithsema matsebe wa selô, xe e se Kriste, kè bolêla Yêna Mmapolwa.” (1 Ba-Korinthe 2:​1, 2; Ditiro 18:5) Ga a ka a lebiša tlhokomelo go yena ka noši goba a fetola therešo ka go goketša ka bohlajana bjo bo sa rego selo. Go e na le moo o ile a lebiša tlhokomelo go Jesu Kriste le tseleng yeo ka yona motho yo a ilego a dirišwa ke Modimo.

Ge e le gabotse, Jesu ke motheo o matla kudu wa moago wa Bokriste. O neile sehlabelo sa topollo. Mo nakong ye ke Kgoši ya legodimo gomme ka go rialo go se go ye kae o tla fediša manaba a Modimo ka Haramagedone. Ka morago o tla tliša toko ya Modimo nakong ya pušo ya nywaga e sekete gomme bjalo ka Moperisita yo a Phagamego, o tla iša moloko wa batho phethegong ganyenyane-ganyenyane. Ke motheo ofe o mongwe woo motho a ka o nyakago?

Ka gona, ge re aga dika tša Bokriste ka go bana ba rena, re dira gabotse ge re ekiša Paulo, gomme ra kgonthišega gore ba lemoga ditherešo tše tša bohlokwa. Go tloga bjaneng bja bona, re swanetše go ruta bana ba rena go rata Jesu ka baka la seo a se dirilego le seo a sa dutšego a re direla sona.​—1 Petro 1:8.

Moago

Lega go le bjalo, gaešita lege Paulo a ile a thea motheo woo o mobotse, modiro wa go aga o ile wa ba le ditšhitišo ka morago ga ge a tlogile. (1 Ba-Korinthe 3:10) Bothata e be e se bjo bo fapanego le bjo batswadi ba bantši ba bago le bjona lehono. Ba godišetša bana ba bona tumelong ya Bokriste gomme ba kgodišegile gore bana ba kwešiša seo therešo e lego sona. Eupja ge ba gola, bana ba a aroga gomme ba lahla tumelo. Ke ka baka la’ng go le bjalo? Gantši ke ka baka la ditlabelo tša go aga tšeo di dirišitšwego.

Paulo o boletše gore dika di ka agwa ka dikago tše bohlokwa: gauta, silifera le mabje-bohlokwa. Goba tša agwa ka dikago tša maemo a tlase: kota, bjang le dihlaka. (1 Ba-Korinthe 3:​12) Bjale ge moagi a diriša gauta, silifera le mabje-bohlokwa o swanetše go ba a aga moago wa maemo a godimo. Eupja moagi yo a dirišago kota, bjang le dihlaka o fo aga selo seo e lego motšwa-o-swere, sa nakwana le seo se sa bitšego tšhelete e ntši.

Go bonala go be go dirišwa dikago tše fokolago kua Korinthe. Ba bangwe bao ba ilego ba aga motheong woo moapostola Paulo a o theilego ba be ba aga meago ya maemo a tlase, ba sa age meago e tiilego yeo e kgotlelelago nako e telele. Ba-Korinthe ba be ba thomile go lebelela go batho, gomme go be go e-na le karogano, mona le ditwantšhano gare ga bona. (1 Ba-Korinthe 1:​10-12; 3:​1-4) Se se be se ka thibelwa bjang? Ka go diriša dikago tša maemo a godimo tšeo di kgotlelelago nako e telele.

Tšona di be di emela dika tša bohlokwa tšeo e lego karolo e nyakegago ya semelo sa Bokriste. Ke dika dife? Moapostola Petro o boletše se tee sa tšona: “Seka se se lekilwego sa tumelo ya lena, sa theko e kgolo go feta gauta.” (1 Petro 1:​6, 7, NW) Kgoši Salome o boletše ka tše dingwe tše pedi: bohlale le temogo, tšeo go ba le tšona ‘go phalago go rua silifera.’ (Diema 3:​13-15, bapiša le NW.) Kgoši Dafida o ile a re gopotša gore go boifa Jehofa le go leboga melao ya gagwe go “kxanyoxêxa xo fetiša dixauta.”​—Psalme 19:​9, 10.

Tše gotee le dikago tše dingwe tša bohlokwa di ka agelelwa dikeng tša Bokriste bakeng sa go thuša bana ba rena gore ba phologe meleko. Lega go le bjalo, re ka kgonthišega bjang gore re aga ka dikago tše di bjalo? Ka go hlokomela dipelo tša bana gotee le tša rena ka noši.

Modiro o Atlegago wa go Aga

Tema yeo pelo ya motswadi e e kgathago modirong wo wa go aga e bonwa taelong yeo Jehofa a e neilego batswadi setšhabeng sa bogologolo sa Isiraele: “Mantšu a ke Xo laetšaxo lehono a dulê pelong ya xaxo.” Ka morago o tšwela pele ka gore: “O a tiišetšê bana ba xaxo; O bolêlê ôna Ò dutše ngwakong wa xaxo, le xe O le tseleng, xe O y’o rôbala le xe Ò tsoxa.” (Doiteronomio 6:6, 7) Ka gona, pele ga ge re ka aga ba bangwe, re swanetše go ikaga ka noši. Bana ba rena ba swanetše go lemoga ka dilo tšeo re di bolelago le go di dira gore semelo sa rena se bopilwe ka dikago tše swanetšego.​—Ba-Kolose 3:​9, 10.

Ka gona, thuto ya rena e swanetše go fihlelela dipelo tša bona. Jesu yo e lego moagi yo a atlegago kudu wa dika tša Bokriste, o ile a fihlelela dipelo ka go diriša diswantšho le dipotšišo. (Mateo 17:​24-27; Mareka 13:​34) Batswadi ba hwetša gore mekgwa e swanago ya go ruta ke yeo e atlegago kudu. Ba diriša diswantšho bakeng sa go dira gore ditherešo tša Bokriste e be tšeo di kgahlišago dipelong tša bana ba bona ba banyenyane, gomme ba diriša dipotšišo tšeo di naganišišitšwego gabotse bakeng sa go nyaka go hwetša seo bana ba bona ba bagolo ba tlogago ba se nagana, tsela yeo ba eleletšago ka yona ka dipelong tša bona.​—Diema 20:5.

Nakong ya ge Moše a be a leka go aga ka go ba-Isiraele kganyogo ya go ba ba botegago, o itše: “O hlôkômêlê ditaêlô tša xaxwe le melaô ya xaxwe ye ke Xo hlathollêlaxo yôna lehono, xore O lêtlêxê.” (Doiteronomio 10:​13) Ka mo go swanago, batswadi ba dira gabotse e sego feela ka go hlalosetša bana ba bona ka mo go kwagalago gore ditekanyetšo tša Modimo ke dife eupja gape le ka go ba bontšha ka mo go kgodišago lebaka leo ka lona dilo tša go swana le go botega, go hlweka boitshwarong le bogwera bjo bobotse e lego tšeo di holago go bona.

Sa mafelelo, Jesu o itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3) Ge bana ba thoma go tseba Jehofa bjalo ka motho e sa le ba banyenyane, ba ithuta go bolela le yena ka mathata a bona, gomme ba e-ba le phihlelo ya ge a araba dithapelo tša bona, ba hlagolela karolo e bohlokwa kudu ya semelo sa Bokriste: tswalano ya motho ka noši le Mmopi wa bona.

Mollo

Paulo o ile a hwetša gore ge modiro wa go aga kua Korinthe o be o sa dirwe ka tshwanelo, mekgwana ya lefase e bjalo ka go ikarola dihlotswana le ditshele, e ile ya thoma go tšwelela. Se se be se le kotsi ka gobane, go etša ge a hlalositše, “modiro wa e mongwê le e mongwê o tlo bônaxala; xo na le letšatši la xo tlo bônaxatša, la xo tlo utoloxa ka mollô woo, o tl’o xo lekola modirô wa mang le mang wo o dirilwexo, xwa tlo bônala xe e le modirô-dirô.”​—1 Ba-Korinthe 3:13.

Mollo ke eng? E ka ba teko e nngwe le e nngwe yeo Sathane a e tlišago go Mokriste. E ka ba kgatelelo ya dithaka, meleko ya nama, dilo tše di bonagalago, tlaišo gaešita le tutuetšo e bolayago ya dipelaelo. Diteko tše bjalo di tla tla e le ka kgonthe. “Modirô wa e mongwê le e mongwê o tlo bônaxala; xo na le letšatši la xo tlo utoloxa ka mollô.” Batswadi ba bohlale ba aga dika tša bana ba bona ka tebelelo ya gore bana ka morago ba tla lekwa. Eupja ba kgodišegile gore ka thušo ya Jehofa, bana ba bona ba ka phologa teko e kgolo. Ge batswadi ba e-na le kgopolo ye ba tla šegofatšwa kudu.

Moputso

Paulo o itše: “Motho eo modirô wa xaxwe ò tl’o xo êma, ó tlo fiwa moputsô.” (1 Ba-Korinthe 3:​14) Moapostola Paulo o ile a amogela moputso. O ngwaletše Bakriste bao ba bego ba le motseng wa Thesalonika, moo le gona a dirilego modiro wa go aga, gore: “Xobane kholofêlô ya rena, le lethabô la rena, le mphapahlôxo wo re kaxo kxanthša wôna, e ka ba mang xe e se lena? le lena Le ba re tl’o kxanthša bôná pele xa Morêna mohla a boaxo. Ké lena Le lexo letaxô la rena le lethabô la rena.”​—1 Ba-Thesalonika 2:​19, 20.

Mmago Wanda o hweditše moputso wo. Nakong ya ge Wanda wa nywaga e 12 a be a ikhwetša a arogane le mmagwe, o ile a lla go fihla a robala. Ka morago o ile a gopola keletšo ya mmagwe ya gore a boledišane le Jehofa ka thapelo ka mathata a gagwe. O ile a rapela gomme kapejana a tlelwa ke monagano wa go lebelela ka pukung ya megala go bona ge e ba go be go e-na le Dihlatse tša Jehofa tikologong yeo. O ile a ikopanya le bona gomme a hwetša gore lapa leo le dula ka letsogong le letona la tsela go tloga ntlong ya tatagwe. Wanda o re, “Ke be ke thabile!”

Ka kgothatšo ya lapa le, Wanda o ile a rulaganya gore kgaetšedi’agwe le ngwanabo ba banyenyane ba boele modirong wa Bokriste. O hlalosa ka gore, “Ke be ke ikarabela bakeng sa gore re itokišeletše diboka. Ke be ke swanela go hlatswa diaparo tša rena, ke kame moriri wa rena, gomme ke kgonthišetše gore re hlwekile e bile re a swanelega.” E be e le modiro o thata go ngwanenyana o monyenyane, eupja o ile a o dira. Nakong e nngwe tatago bona o ile a leka go ba thibela go ba gona dibokeng, eupja bana ba ile ba mo kgopela gomme a ba dumelela gore ba ye.

Ka morago, bana bao ba ile ba boela ba kopana le mmago bona. Nakong ya ge Wanda a be a e-na le nywaga e 15, o ile a ba Mokriste yo a kolobeditšwego, gomme mafelelong o boletše kganyogo ya gagwe ya go ba moromiwa. Ee, modiro wa mmago Wanda o ile wa feta tekong. O thabetše moputso wa go bona morwedi wa gagwe a emela therešo ka go tia ka boyena. Eka Bakriste ka moka ba ka ba le katlego e swanago ge ba dutše ba šoma ka thata go aga dika tša Bokriste ka go bana ba bona.

[Lepokisi go letlakala 27]

Gaešita lege batswadi ba leka ka matla go aga dika tša Bokriste ka go bana ba bona, bjalo ka ge sehlogo se se bontšha, fela bana le bona ka bobona ba na le boikarabelo. Bona, ka go swana le Bakriste ka moka, ba swanetše go dira modiro wa go aga ka go bona. (Ba-Efeso 4:​22-24) Gaešita lege batswadi ba e-na le sebaka se sebotse sa go thuša go se, mafelelong motho o mongwe le o mongwe o swanelwa ke go dira phetho ya gagwe ka noši ya go direla Jehofa.