‘Tlhabano ke ya Jehofa!

“Xe e le nna ke tlile fá ka ’ina la Morêna wa Mašaba, Modimo wa dirá tša Isiraele tše O bexo O di roxa.”—1 SAMUELE 17:45.

1, 2. (a) Ke tlhohlo efe yeo e lebanego le madira a Isiraele a lego ka tlase ga taolo ya Kgoši Saulo? (b) Banna ba madira a Isiraele ba itshwara bjang mabapi le tlhohlo ya Goliata, gomme ke mang bjale yo a tšwelelago?

DIHLOPHA tše pedi tše kgolo tša madira di lebane molaleng wa Ela ka borwa-bodikela bja Jerusalema. Ka lehlakoreng le lengwe ke madira a Isiraele ao a etilwego pele ke Kgoši Saulo yo a lego boi. Ka lehlakoreng le lengwe ke madira a ba-Filisita gotee le nkgwete ya bona ya senatla Goliata. Mohlomongwe leina la Goliata le bolela gore “E a Bonalago.” Botelele bja gagwe ke dimithara tše 2,7 gomme o itlhamile ka botlalo. Goliata o goeletša mantšu a maroga malebana le Isiraele.—1 Samuele 17:1-11.

² Ke mang yo a tlago go lebeletšana le tlhohlo ya Goliata? “Banna ba Isiraele ka moka xe ba bona monna eo, ba mo thšaba ba mmoifa xaxolo.” Eupja mošemanyana o monyenyane šo o a tšwelela! Leina la gagwe ke Dafida gomme le bolela gore “Yo a Rategago.” O ile a itlhatsela go ba “yo a rategago” go Jehofa le ka go ineela ga gagwe ka sebete go lokeng. Samuele o šetše a tloditše Dafida go ba kgoši ya Isiraele ya nakong e tlago gomme moya wa Jehofa o dira ka matla godimo ga gagwe.—1 Samuele 16:12, 13, 18-21; 17:24; Psalme 11:7; 108:6.

3. Dafida o itlhama bjang bakeng sa ntwa, eupja Goliata yena o itlhamile bjang?

³ Dafida ge a e-kwa Goliata a ‘roga madira a Modimo yo a phelago,’ o ithapela gore a lwe le senatla. Ge Saulo a dumela, Dafida o tšwa ka lebelo eupja a se a apara diaparo tše tlwaetšwego tša ntwa le dibetša tšeo a di neilwego ke Saulo. O itlhamile feela ka molamo, seraga-mabje le mafsika a mahlano a boreledi—go fapana le Goliata yo a rwelego lerumo le le nago le ntlha ya boima bja dikilograma tše šupago gomme a apere seaparo sa ntwa sa koporo sa boima bja dikilograma tše 57! Ge Goliata yo matla gotee le yo a mo rwaletšego kotse ba dutše ba batamela, ‘mo-Filisita o ile a roga Dafida ka Modimo wa gagwe.’—1 Samuele 17:12-44.

4. Dafida o arabela bjang lenyatšong la senatla?

⁴ Dafida o araba ka go re’ng? O araba mantšu a go hlohla a senatla ka go goeletša gore: “O tla fa ka thšoša le ka lerumô, le ka kotse. Xe a le nna ke tlile fa ka ’ina la Morena wa Mašaba, Modimo wa dira tša Isiraele tše O bexo O di roxa. Lehono Morena o tlo Xo xafela ’atleng sa-ka, ka Xo bolaya ka Xo kxaola hlôxó. Manong a lexodimo le dibata tša naxa ke tlo di lahlela ’toto tša dira tša Ba-Filisita, xore lefase ka moka le tsebe xe xo Isiraele xo na le Modimo. Le lešaba le ka moka le tlo lemoxa xobane Morena xa’ thuše ka thšoša le ka lerumo. THLABANÔ YÉ KÉ YA MORÊNA. Ó tlo Le xafêla diatleng tša rena.”—1 Samuele 17:45-47.

5. Mafelelo a ntwa ke afe, gomme ke mang yo a tumišwago?

⁵ Dafida o leba ntweng ka sebete. Lefsika la gagwe le le tšwago seraga-mabjeng le fofela moo a le lebišitšego gona gomme Goliata o wela fase. Ee, Jehofa o putsitše tumelo ya Dafida le sebete ka go lebiša sebetša seo se senyenyane phatleng ya senatla ka ntle ga go dira phošo! Dafida o a kitima, o khwamola tšhoša ya Goliata ka noši gomme o kgaola hlogo ya nkgwete. Ba-Filisita ba tšhaba ba gakanegile. Ka kgonthe, go be go ka thwe: “THLABANÔ YÉ KÉ YA MORÊNA”!—1 Samuele 17:47-51.

6. (a) Ke ka baka la’ng Jehofa a ile a boloka ditaba ka moka tša ntwa ye ya kgale? (b) Ke kgonthišetšo efe yeo bahlanka ba Modimo ba e nyakago ge ba dutše ba kgotlelela tlaišo go tšwa go manaba ao a ka swantšhwago le Goliata?

⁶ Ke ka baka la’ng Jehofa a ile a boloka pego ye ya ntwa ka moka ga yona ka Lentšung la gagwe gaešita lege ntwa e ile ya lwewa nywageng e ka bago 3 000 e fetilego? Moapostola Paulo o a re botša: “Xobane tše di ngwadilwexo kxalê, di ngwaletšwe xo ruta rena, xore re hwetše kholofelo ka xo tiišwa le ka xo homotšwa ka ôna mangwalo.” (Ba-Roma 15:4) Lehono, bahlanka ba bantši ba Modimo ba kgotlelela kgobošo le kganetšo ya go lebanya go tšwa go manaba ao a ka swantšhwago le Goliata. Ge kgateletšo e tšwago go manaba e dutše e oketšega, ka moka ga rena re nyaka kgothatšo ya gore “THLABANÔ YÉ KÉ YA MORÊNA.”

Kgang ya Bogoši

7. Ke kgang efe yeo e kgomago batho bohle ba Modimo ditšhabeng ka moka, gona ka baka la’ng?

⁷ Goliata o ile a gwanta ka go nyatša Modimo wa Isiraele. Ka mo go swanago, lekgolong le la bo-20 la nywaga tshepedišo ya mmušo ya bopolitiki ya bonkgwete a ile ya tšwelela e hlohla bogoši bja Jehofa le go leka go gapeletša bahlanka ba gagwe go ikokobeletša Naga ka mokgwa wa borapedi. Batho ba Modimo ditšhabeng ka moka ka kgomegile ka kgang ye. Ke ka baka la’ng go le bjalo? Ka baka la gore Mehla ya Ba-ntle ye e porofetilwego goba “dinako tšeo di beilwego tša ditšhaba,” di ile tša fela ka 1914, gomme tša šuthela nako ya gona bjale ya “kgakanego ya ditšhaba, le tlabego.” (Luka 21:24-26; NW, King James Version) Mehla ya Ba-ntle a thomile ge ditšhaba di be di thoma go gatakela Jerusalema ya lefaseng ka 607 B.C.E. gomme ya akaretša nywaga a latelago e 2 520 go ba go fihla ka 1914, ge Jehofa a be a bea Jesu sedulong sa bogoši e le Kgoši ya gagwe ya Mesia Jerusalema wa legodimong.—Ba-Hebere 12:22, 28; Kutollo 11:15, 17.a

8. (a) Magoši a lefase a ile a arabela bjang taelong ya boporofeta ya ‘go hlankela Morena ka poifo’? (b) Ke dinkgwete dife tša lefase tšeo lehono di nyatšago Jehofa le tšeo di gatelelago Dihlatse tša gagwe?

⁸ Phetogo e kgolo e diragetše ka 1914. Ditšhaba tša Ba-ntle di be di ka se ke tša hlwa di sa buša ka ntle ga go tsenwa gare ke Modimo. Eupja na “maxoši” ao a bego a buša ka nako yeo a ile a kwa taelo ya boporofeta ya ‘go hlankela Jehofa ka go boifa’ le go amogela Kgoši ya gagwe a mpsha? Aowa! Go a na le moo, ba ile “ba lakana xo lwa le Morena le Motlotšwa w’axwe” Jesu. Ka baka la go phegelela dikganyogo tša bona, ba ile “ba tsoša lerole” Ntweng e Kgolo ya 1914-18. (Psalme 2:1-6, 10-12) Go ba go fihla nakong ye, pušo ya lefase ke kgang e kgolo pele ga batho. Lefase la Sathane le tšwela pele ka go tšweletša dinkgwete tša bopolitiki, tšeo di swanago le banna ba moloko wa gabo Goliata a lego ba-Rafa. Mebušo ye ya bonkgwete e nyatša Jehofa gomme e leka go gapeletša dihlatse tša gagwe go ba ka tlase ga yona, eupja bjalo ka mehleng, ntwa le phenyo ke tša Jehofa.—2 Samuele 21:15-22.

“Saulo” wa Mehleng Yeno

9. Ke bomang bao lehono ba ilego ba itshwara bjalo ka Kgoši Saulo, gona ka ditsela dife?

⁹ Kgoši Saulo o tsena kae tabeng ye? Pejana, ka baka la borabele bja gagwe, Jehofa o be a ikemišeditše go ‘gagola bogoši bja Isiraele mo go yena.’ (1 Samuele 15:22, 28) Ka gona, Saulo o be a paletšwe ke go thekga bogoši bja Jehofa ge a lebane le borumolane bja Goliata. Go feta moo, ka morago o ile a tšwela pele ka go tlaiša Dafida, mofenyi wa Goliata le yo a tloditšwego ke Jehofa go tšea legato la leloko la Saulo la bogoši. Baruti ba Bojakane ba ile ba swanelwa gabotse gakaakang ke boitshwaro bja mohuta wo! Ba hlanogetše therešo ya Beibele, ka go ba karolo ya borabele bjo bogolo bja ‘go se kwe ebangedi’ ye e lego mabapi le Morena wa rena Jesu le Mmušo wa gagwe o tlago. Ba paletšwe ka mo go feletšego ke go emela bogoši bja Jehofa bja legohle gomme ba ile ba tlaiša o šoro dihlatse tše tloditšwego tša Jehofa le bagwera ba bona ba lešaba le legolo. Jehofa o tla tloša bahlanogi bao ‘ka bogale bja gagwe.’—2 Ba-Thesalonika 1:6-9; 2:3; Hosea 13:11.

10. (a) Ka 1918, ke tsebišo efe ya phatlalatša yeo e ilego ya gatišwa kua London ke sehlopha sa baruti ba ba tumilego? (b) Go a na le go kgomarela tsebišo ya phatlalatša ya 1918, ke tsela efe yeo baruti ba ilego ba e phegelela?

¹⁰ Nakong ya ntwa ya pele ya lefase, ditsela tša go kwanantšha tša baruti ba Bojakane di ile tša bonala gabotse. Go molaleng gore boporofeta bja Jesu bjo bo lego go Mateo dikgaolo 24 le 25, le Luka kgaolo 21 bo be bo phethagala. Ge a le gabotse, ka 1918 sehlopha sa baruti ba ba tumilego kua London, Engelane, bao ba emelago Dikereke tša Baptist, Congregational, Presbyterian, Episcopal le Methodist ba ile ba ngwala tsebišo ya phatlalatša. Tsebišo ye a ile ya re: “Khuduego ya mo nakong ye a šupa go fela ga dinako tša Bantle.” Eupja ga se ba ka ba kgomarela tsebišong yeo. Baruti ba Bojakane ba be ba šetše ba tseneletše kudu tabeng ya go thekga mahlakore ka bobedi a ntwa ya pele ya lefase. Go e na le go lemoga go ba gona ga Jesu matleng a Mmušo, ba ile ba ineela kgopolong ya ditšhaba tša lefase ya gore batho ba swanetše go tšwela pele ba bušwa ke mebušo ya Ba-ntle ya bopolitiki e aroganyago gaešita le dinkgwete tše swanago le Goliata go e na le gore ba kopane ka tlase ga Mmušo wa Modimo.—Mateo 25:31-33.

Ga ba Kwanantšhe!

11. Ke bomang bao ba sa kago ba kwanantšha ge e le mabapi le kgang ya bogoši, gomme ba latela mohlala wa mang?

¹¹ Na bahlanka ba ineetšego ba Modimo ba a kwanantšha go kgang ye ya bogoši? Bjalo ka ge pego ya Beibele a bontšha ka mo go kwalago, ga ba kwanantšhe le gatee! (Daniele 3:28; 6:25-27; Ba-Hebere 11:32-38; Kutollo 2:2, 3, 13, 19) Bakriste ba botegago lehono ba thekga bogoši bja Jehofa le Mmušo go sa šetšwe dikgobošo ka moka tše sehlogo le ditlaišo tšeo Goliata wa seganka wa mehleng yeno a di tlišago godimo ga bona. Ka tsela yeo, ba sepela mehlaleng ya Jesu “Morwa wa Dafida,” yo a ilego a hlabana ntwa ya moya ka sebete bakeng sa bogoši bja Jehofa, ge ka nako e swanago a kgomaretše go se tšee lehlakore mo go tiilego malebana le dintwa tša lefase le dipolitiki. Ge a be a rapela Tatagwe, Jesu o ile a bolela gore balatedi ba gagwe bao e lego Bakriste ba therešo, le bona “xa se ba lefase.”—Mateo 4:8-10, 17; 21:9; Johane 6:15; 17:14, 16; 18:36, 37; 1 Petro 2:21.

12. (a) Ke bomang bao ba rapaladitšego Goliata wa mehleng yeno, gomme bjang? (b) Go lebelela ga bona “Goliata” bjalo ka yo a hwilego go ile gwa ba le mafelelo afe go batho ba Jehofa?

¹² Mašaledi a swanago le Dafida a Bakriste ba tloditšwego lehono ba rapaladitše Goliata wa mehleng yeno. Bjang? Ka tsela ya gore ba ile ba ipolela ka mo go kwagalago gore ba eme ka lehlakoreng la Jehofa la ngangišano ya mabapi le go buša lefase. “SETLAMO (Se se ilego sa amogelwa ke Mokgatlo wa Barutwana ba Beibele ba Ditšhaba ka Moka Kopanong kua Cedar Point, Ohio, ka Sontaga, September 10, 1922)” se ile sa bea mohlala. Se ile sa akaretša tše di latelago:

“10. Le gona, ka go tiiša le go hlatsela gore le ke letšatši la tefetšo ya Modimo malebana le mmušo wa Sathane o bonagalago le o sa bonagalego;

“11. Gore go mpshafatša lefase goba tshepedišo ya kgale ga go kgonege; le gore bjale ke nako ya go hlongwa ga mmušo wa Modimo ka Kriste Jesu; le gore mebušo ka moka le mekgatlo yeo e sa ikokobetšego ka tlase ga pušo e lokilego ya Morena a tla fedišwa.”

Ga go na pelaelo gore “Morwa-Dafida,” bjalo ka Hlogo ya phuthego ya Bokriste o ile a hlahla go betšwa ga ‘lefsika’ leo la therešo ya Mmušo. (Mateo 12:23; Johane 16:33; Ba-Kolose 1:18) Ditlamo tšeo di ilego tša amogelwa dikopanong tša ngwaga le ngwaga go tloga ka 1922 go ya go 1928 di ile tša gatelela boemo bjo. Go ya ka pono ya batho ba Jehofa, “Goliata” o be a rapaletše fase a hwile, a kgaotšwe hlogo. Pušo ya batho ya bonkgwete a hlokile matla a go gapeletša baboleledi ba nago le sebete ba bogoši bja Jehofa gore ba kwanantšhe.—Bapiša le Kutollo 20:4.

13. (a) Baruti ba Bojakane ba ile ba kwanantšha bjang nakong ya kgatelelo kua Jeremane ya Hitler? (b) Ke’ng seo puku Mothers in the Fatherland e ilego ya se bega mabapi le Dihlatse tšeo di sa kwanantšhego?

¹³ Mohlala o mogolo wa mehleng yeno wa go diriša boganka ga mebušo ya bopolitiki ya go swana le Goliata o diragetše kua Jeremane ya Hitler. Dikereke tše kgolo tša Bokatholika gotee le Boprotestanta, di ile tša kwanantšha ka tsela a kwešago bohloko ka baka la go hlompha bo-Nazi, go rapela führer, go lotšha folaga ya gagwe ya swastika, le go šegofatša madira a gagwe ditlhaselong tša ona tša go ya go bolaya badumedi-gotee le bona ditšhabeng tša baagišani. Ditumelo ka moka tšeo di ipitšago gore ke tša Bokriste—ka ntle ga Dihlatse tša Jehofa—di be di nweletše moyeng wa go rata naga. Puku ya Mothers in the Fatherland e ile ya bega ka gore: “[Dihlatse tša Jehofa] di be di romelwa dikampeng tša tshwenyo, ba sekete ba bona ba ile ba bolawa, gomme ba bangwe ba sekete ba ile ba hwa magareng ga 1933 le 1945 . . . Makatholika le Maprotestanta a ile a kwa ge baruti ba bona ba ba kgothaletša go dirišana le Hitler. Ge e ba ba ganne, gona ba dirile bjalo ka go se kwe ditaelo tša kereke le naga.” Kereke gotee le naga di ile tša ba le molato o mogolo gakaakang wa madi!—Jeremia 2:34.b

14. Ke ka baka la’ng Dihlatse tša Jehofa gantši di tlaišwa?

¹⁴ Go fihla mehleng yeno, kgatelelo a sehlogo godimo ga Dihlatse tša Jehofa e tšwela pele dinageng tše ntši, bjalo ka ge Jesu a boletše e sa le pele. Eupja ka tlase ga maemo ka moka, Bakriste ba ba tšwela pele ka go bolela “ebangedi ya mmušo wa maxodimong” ka mafolofolo. (Mateo 24:9, 13, 14) Se se makatšago ka taba ye ke gore Dihlatse di tsebja dinageng tše dintši e le baagi ba botegago, ba phelago maphelo a hlwekilego le ba beago mohlala o mobotse wa go hlompha molao le taolo. (Ba-Roma 13:1-7) Lega go le bjalo, ka mehla ba a tlaišwa. Ka baka la’ng? Ka ge borapedi e le bja Jehofa feela, ba phema go khunamela diswantšho tša Naga goba go di tumiša. (Doiteronomio 4:23, 24; 5:8-10; 6:13-15) Ka go se kwanantšhe, ba rapela Jehofa “a nnoši” ka go mo dira gore a be Mmuši yo a Phagamego wa maphelo a bona. (Mateo 4:8-10; Psalme 71:5; 73:28) Ka ge ‘e se ba lefase,’ ba boloka boema-gare bja Bokriste dipolitiking tša lefase le dintweng.—Johane 15:18-21; 16:33.

15, 16. (a) Ke mohlala wa mang woo Dihlatse tša nywaga ka moka ya bogolo di ka o latelago ge Goliata wa mehleng yeno a di tšhošetša, gomme se se ile sa bontšhwa bjang ke ngwanenyana wa Mokriste wa nywaga a tshelelago? (b) Batswadi ba Bakriste ba nyaka go tlwaetša bana ba bona gore ba swane le mang?

¹⁵ Goliata wa mehleng yeno gantši o tšhošetša babotegi ba, bao ba beago borapedi bja Jehofa ka pele ga mekgwa ya borapedi bja diswantšho. (Bapiša le Kutollo 13:16, 17.) Eupja Dihlatse tša ba bafsa le ba bagolo di ka latela mohlala wa Dafida ka go arabela tlhaselong ka go se boife. Nageng a nngwe ya Latin America, ngwanenyana wa nywaga e tshelelago wa Mokriste o be a amogetše tlwaetšo e botse ya ka gae go tloga bjaneng. (Bapiša le Ba-Efeso 6:4; 2 Timotheo 3:14, 15.) Se se ile sa tlaleletša mo tabeng ya go ba ga gagwe moithuti yo bohlale kudu sehlopheng seo a bego a le go sona sekolong. Eupja letswalo la gagwe leo le tlwaeditšwego ka Beibele le ile la mo dira gore a pheme go ba le karolo ditirelong tša borapedi bja medimo ya diswantšho sehlopheng. Ge a hlalosa boemo bja gagwe, morutiši o ile a bolela gore ngwanenyana yo a lekanago le yena e be e sa le o monyenyane kudu gore a ka ba le letswalo! Ngwana wa nywaga e tshelelago o ile a bontšha morutiši gore o fošitše ka go nea bohlatse bjo bobotse kudu.

¹⁶ Re holofela gore batswadi ka moka ba Bakriste ba tla tlwaetša bana ba bona gore ba tle ba latele mohlala wa Dafida o mofsa ka go ema ba tiile ge mmuši wa lefase wa go swana le Goliata a ba tšhošetša. Anke ba be bjalo ka bana ba bararo ba botegago ba ba-Hebere, le bjalo ka Daniele le ba bangwe ba bantši bao ba lego pegong ya Beibele ka ‘go kgomarela letswalo le se nago molato’ ka sebete ka go dumelelana le melao ya motheo ya Beibele.—1 Petro 2:19; 3:16; Daniele 3:16-18.

Go ya ka Kgopolo ya Bo-ra-dihistori

17. (a) Radihistori wa Leisemane Toynbee o ile a lemoša ka go gola ga eng? (b) Sehlopha sa mehleng yeno sa Goliata se leka potego ya batho ba Modimo bjang?

¹⁷ Ra-dihistori yo a tsebegago kudu wa Leisemane Arnold Toynbee o ile a lemoša ka go gola ga “sebopego se boifišago kudu sa borapedi bja boheitene bja go rapela mebušo ya dinaga tšeo di ipušago” mehleng ya rena, gomme a hlalosa se a le “komelo a galakago ya beine a mpsha ya pušo ka batho ka gare ga mapotlelo a kgale a pušo ya setšhaba.” Bao ba bolelago gore setšhaba sa bona se feta ditšhaba tše dingwe ka moka, bao ba bilego ba rapelago Naga, ba gogilwe ka nko ke babuši gomme ba gatelelwa gore ba tšwetše pele dikgopolo tša bona, go sa šetšwe gore ke tše di lokilego goba tše mpe. Ka baka la seo, sehlopha sa Goliata se tsogile bakeng sa go leka potego ya batho ba Modimo, bao ba ratago naga yeo ba tswaletšwego go yona eupja ba gana go rapela Naga le diswantšho tša yona.

18. Ke dipotšišo dife tšeo di fatollago tšeo Mokriste yo a hlahlwago ke letswalo a swanetšego go di araba?

¹⁸ Bjalo ka ge go bile bjalo kua Jeremane ya bo-Nazi, lehono go na le dipotšišo tšeo di fatollago tšeo Mokriste yo a hlahlwago ke letswalo a swanetšego go di araba: Na ke swanetše go dumela gore setšhaba sa gešo se ratwa kudu ke Modimo go feta ditšhaba tše dingwe ka moka? Kudu-kudu mo nakong ye e lego kotsi kudu historing ya batho, na go na le tlhaologanyo go lebelela karolo e tee e nyenyane ya lefase e le yeo e phagametšego dikarolo tše dingwe ka moka? Goba go lebelela karolo e tee feela ya lapa la batho e le e phagametšego dikarolo tše dingwe ka moka?

19. Ke’ng seo Radihistori o mogolo ka go fetisisa e lego Jehofa a re botšago sona ka go nagana le go dira bjalo ka ge eka setšhaba se tee sa batho se phagametše ditšhaba tše dingwe ka moka?

¹⁹ Anke re naganišišeng ka kgopolo ya Radihistori o mogolo ka go fetišiša e lego Jehofa Modimo, Mohlami wa Beibele. Moapostola Petro o a re botša: “Ka kxonthe, ke lemoxa xore Modimo xa a bebe motho. Anthe dithšabeng ka moka ó kxahlwa ke ba ba mmoifaxo, xe ba dira tše di lokilexo.” Le gona na ga re a swanela gore ka dinako tšohle re dire ka go dumelelana le polelo a buduletšwego ya moapostola Paulo ya gore Modimo “ke Yena a dirilexo xore meloko ka moka ya batho e tšwe mading a o tee, e enele lefase lohle”? Ke ka baka la’ng ge setšhaba se sengwe sa batho se nagana le go dira bjalo ka ge a ke se phagametše ditšhaba tše dingwe ka moka? Paulo ge a bolela ka batho ka moka o itše: “Re . . . moloko wa Modimo.”—Ditiro 10:34, 35; 17:26, 29.

20. Batho ba Modimo tshepedišong ya Jehofa e mpsha ba ka se sa hlaselwa ke eng gomme ke’ng seo thuto ya rena e latelago e tlago go se ahla-ahla?

²⁰ Tshepedišong e mpsha ya Jehofa, barati ba go loka ba ka se sa hlaselwa ke ditshepedišo tša bopolitiki tša bonkgwete tša go swana le Goliata ka gobane boikgogomošo bja go emela lehlakore le itšego le lehloyo e tla ba dilo tša nako a fetilego. (Psalme 11:5-7) Go sa ‘šetšwe moo ba dulago gona lefaseng, batho ba Modimo ba šetše ba širogile botšhaba bjo bo bjalo e le gore ba kwe taelo ya Jesu ya gore ‘ba ratane seng sa bona bjalo ka ge a ba ratile.’ (Johane 13:34, 35; Jesaya 2:4) Thuto ya rena e latelago e bontšha gore lerato leo ke la mohuta ofe!

[Mengwalo ya tlase]

Dipotšišo tša Tlhahlobo

◻ Ke eng seo se swantšhetšwago ke Goliata wa nkgwete?

◻ Ke ka ditsela dife batho ba Modimo ba bontšhago go se kwanantšhe ge a le mabapi le kgang ya bogoši?

◻ Ke ka baka la’ng batho ba Modimo ba ka bolela gore Goliata wa mehleng yeno o rapaladitšwe?

◻ Ke bomang bao ba latelago mokgwa wa boitshwaro wa Kgoši Saulo gomme ba dira seo bjang?

◻ Batho ba Jehofa ba ile ba itshwara bjang go swana le Dafida ge ba lebane le go gatelelwa ke Goliata wa mehleng yeno?