Go Diriša ga Jehofa “Bošilo” Bakeng sa go Phološa Bao ba Dumelago

“Xe ka bohlale bya Modimo lefase lè šitilwe xo hlatha Modimo ka bohlale bya lôna, Modimo ó ikxahletšwe xo phološa ba ba dumêlaxo ka thutô yeo ba rexo ké bošilo.”​—1 BA-KORINTHE 1:21.

1. Ke ka kgopolo efe Jehofa a ka dirišago “bošilo,” gomme re tseba bjang gore lefase ka bohlale bja lona ga se la tseba Modimo?

ENG? Na Jehofa a ka diriša bošilo? Ge e le gabotse ga go bjalo! Eupja a ka bo diriša gomme e bile o diriša seo se bonalago e le bošilo go lefase. O dira bjalo e le gore a phološe batho bao ba tsebago Modimo le go mo rata. Ka bohlale bja lona, lefase le ka se kgone go tseba Modimo. Jesu Kriste o ile a hlalosa se ka mo go kwagalago ge a be a bolela thapelong gore: “Tate, Wene Moloki! Xe e le lefase xa la ka la Xo tseba.”​—Johane 17:25.

2. Ke bjang go ka bonalago e ka ditsela tša Jehofa le ditsela tša lefase di bapile, eupja therešo ke go re’ng?

² Mantšu a Jesu a bontšha gore ditsela tša Jehofa di fapana le tša lefase. Ka mo ntle go ka bonala e ka re morero wa Modimo le wa lefase le e bapile. Go ka bonala eka maikemišetšo a lefase le a šegofatšwa ke Modimo. Ka mohlala, Beibele e bolela gore Modimo o tla hloma mmušo wa go loka woo o tlago go tliša bophelo ka khutšo, lethabo le katlego bathong mo lefaseng. (Jesaya 9:​5, 6; Mateo 6:10) Ka mo go swanago, lefase le tsebatša morero wa lona bakeng sa go nea batho khutšo, katlego le mmušo wa go loka ka se se bitšwago thulaganyo ya lefase le lefsa. Eupja merero ya Modimo le ya lefase ga e swane. Morero wa Jehofa ke go itwela bjalo ka Mmuši yo a Phagamego wa legohle. Se o tla se dira ka mmušo wa legodimo woo o tlago go fediša mebušo ka moka ya lefase. (Daniele 2:44; Kutollo 4:11; 12:10) Ka gona, Modimo ga a na seo a swanago ka sona le lefase le. (Johane 18:36; 1 Johane 2:​15-17) Ke ka baka leo Beibele e bolelago ka mehuta e mebedi ya bohlale​—“bohlale bya Modimo” le “bohlale bya lefase.”​—1 Ba-Korinthe 1:​20, 21.

Phošo ya Mathomo ya Bohlale bja Lefase

3. Gaešita lege bohlale bja lefase bo ka bonala bo kgahliša, ke ka baka la’ng thulaganyo ya lefase le lefsa yeo e holofetšwago ke motho le ka mohla e ka se kgotsofatše?

³ Go bao ba sa hlahlwego ke bohlale bja Modimo, bohlale bja lefase bo bonala e le bjo bo kgahlišago. Go na le difilosofi tša lefase tšeo di kwalago e le tše phagamego tšeo di tutuetšago monagano. Mekgatlo e dikete ya thuto e phagamego e nea tsebišo ka seo ba bantši ba se lebelelago e le bohlale bjo bogolo bja batho. Makgobapuku a magolo a tletše ka tsebo ya motheo yeo e kgobokeditšwego ka nywaga-kgolo e mentši. Lega go le bjalo, go sa šetšwe se, thulaganyo ya lefase le lefsa yeo babuši ba lefase ba bolelago ka yona ke ya batho bao ba sa phethegago, bao ba kgomaretšwego ke sebe le bao ba hwago. Ka gona, thulaganyo yeo e tla ba yeo e sa phethagalago, ya bušeletša diphošo tše dintši tša nakong e fetilego gomme le ka mohla ya se kgotsofatše dinyakwa ka moka tša batho.​—Ba-Roma 3:​10-12; 5:12.

4. Seo go thwego ke thulaganyo ya lefase le lefsa se laolwa ke eng, gomme ka mafelelo afe?

⁴ Thulaganyo ya lefase le lefsa yeo motho a bolelago ka yona e ka se bušwe feela ke bofokodi bja motho eupja gape e tla bušwa ke tutuetšo ya dibopiwa tše kgopo tša moya​—ee, Sathane Diabolo le batemona ba gagwe. Sathane o foufaditše menagano ya batho e le gore ba se ke ba dumela “Ebangedi ya letaxô la Kriste.” (2 Ba-Korinthe 4:​3, 4; Ba-Efeso 6:12) Ka baka leo, lefase le hlaselwa ke meferefere ya go se fele. Lefase le tlaišwa ke tlalelo le tshenyo ka baka la boiteko bjalo lona bjo kotsi bja go ipuša ka ntle le thušo ya Modimo le ka go hlokomologa thato ya Modimo. (Jeremia 10:23; Jakobo 3:​15, 16) Ka gona, go bjalo ka ge moapostola Paulo a boletše gore, “lefase lè šitilwe xo hlatha Modimo ka bohlale bya lôna.”​—1 Ba-Korinthe 1:21.

5. Phošo ya mathomo ka bohlale bja lefase le ke efe?

⁵ Ka gona, phošo ya mathomo ya bohlale bja lefase le, go akaretša le maano a lona a go thea thulaganyo ya lefase le lefsa ke efe? Ke gore lefase le hlokomologa seo le ka se kego la atlega ge le se hlokomologa​—pušo e phagamego ya Jehofa Modimo. Ka makoko le gana go amogela bogoši bja Modimo. Lefase ka boomo le tlogela Jehofa mererong ya lona gomme le botile bokgoni bja lona le maano a lona. (Bapiša le Daniele 4:​31-34; Johane 18:​37.) Beibele e dira gore go be molaleng gore “mathômo a bohlale ké xo boifa Morêna.” (Diema 9:10; Psalme 111:10) Lega go le bjalo, lefase ga se la ithuta gaešita le senyakwa se sa motheo sa bohlale. Ka baka leo, ka ntle le thekgo ya Modimo, le ka atlega bjang?​—Psalme 127:1.

Go Kwatša Ditaba tše di Lokilego tša Mmušo​—Na ke Bošilo Goba go a Hola?

6, 7. (a) Bao ba hlahlwago ke bohlale bja Modimo ba kwatša eng, eupja lefase le ba lebelela bjang? (b) Baruti ba Bojakane ba kwatša ditaba tše di lokilego go ya ka bohlale bja mang, gomme ka mafelelo afe?

⁶ Ka lehlakoreng le lengwe, bao ba tsebago Modimo ba bontšha bohlale bja Modimo gomme ba kgetha go hlahlwa ke bjona. Bjalo ka ge Jesu a boletše e sa le pele, ba kwatša “Ebangedi yé ya mmušô . . . lefaseng ka moka.” (Mateo 24:14; 28:​19, 20) Na boboledi bjo bo bjalo bja ditaba tše di lokilego bo a šoma mo nakong ye, ge lefase la rena le tletše diphapang, tšhilafalo, bodiidi le go tlaišega ga batho? Go batho bao ba hlalefilego ka tsela ya lefase go kwatša Mmušo wa Modimo ka mokgwa o bjalo go bonala e le bošilo, e bile go sa hole selo. Ba lebelela bao ba kwatšago Mmušo wa Modimo e le batho bao ba tenago bao ba šitišago tšwelopele ya mmušo wa bopolitiki. Tabeng ye ba thekgwa ke baruti ba Bojakane, bao ba kwatšago ebangedi go ya ka bohlale bja lefase le gomme ba sa botše batho seo ba swanetšego go se tseba ka lefase le lefsa la Modimo le pušo ya lona ya Mmušo, gaešita lege ye e be e le yona thuto e kgolo ya Kriste.​—Mateo 4:17; Mareka 1:​14, 15.

⁷ Ra-dihistori H. G. Wells o ile a lebiša tlhokomelo go palelweng mo ga baruti ba Bojakane. O ngwadile gore: “Tsela yeo Jesu a ilego a etiša pele thuto ya seo a bego a se bitša Mmušo wa Legodimo e be e lemogega kudu, ge e bapišwa le go se be bohlokwa ga yona thulaganyong le thutong ya dikereke tše dingwe tša Bokriste.” Lega go le bjalo, gore batho ba moloko wo ba hwetše bophelo, ba swanetše go thoma ka go kwa ka Mmušo o hlomilwego wa Modimo, gomme gore go fihlelelwe seo, motho o mongwe o swanetše go kwatša ditaba tše di lokilego ka wona.​—Ba-Roma 10:​14, 15.

8. Ke ka baka la’ng go kwatša ditaba tše di lokilego tša Modimo e le selo sa bohlokwa kudu seo se ka dirwago lehono, eupja ke mogato ofe woo o ka se bego le mohola wa ka mo go sa felego?

⁸ Ka gona, go kwatša ditaba tše di lokilego tša Mmušo ke selo sa bohlokwa kudu lehono. Se se bjalo ka gobane molaetša wa Mmušo o nea kholofelo ya kgonthe yeo e tlatšago dipelo tša batho lethabo mehleng ye ya bofelo ‘ya mathata.’ (2 Timotheo 3:​1-5; Ba-Roma 12:12; Tito 2:13) Gaešita lege bophelo lefaseng le bo se na pele le morago e bile e le bjo bokopana, fela bophelo lefaseng le lefsa la Modimo e tla ba bjo bo sa felego, gare ga lethabo, mokhora le khutšo gona mo lefaseng. (Psalme 37:​3, 4, 11) Go bjalo ka ge Jesu Kriste a boletše gore, “motho xo tlo mo hola’ng xe a ka rua lefase ka moka ’me a senyêxêlwa ke môya wa xaxwe?” Ge e ba motho a lahlegelwa ke tshwanelego ya go phela lefaseng le lefsa la Modimo, gona lefase le leo le fetago le mo hola ka eng? Go ipshina gona bjale ga motho yoo ka dilo tše di bonagalago ke ga lefeela, mo go sa holego selo le mo go fetago ka pela.​—Mateo 16:26; Mmoledi 1:14; Mareka 10:​29, 30.

9. (a) Ge monna yo a bego a laletšwa gore e be molatedi wa Jesu a be a kgopela gore taba ye e bewe molatša, ke’ng seo Jesu a ilego a mo eletša gore a se dire? (b) Karabo ya Jesu e swanetše go re kgoma bjang?

⁹ Motho yo mongwe yo Jesu a ilego a mo laleletša gore e be molatedi wa gagwe o itše: “Ntumêlêlê ke thômê xo y’o boloka tate.” Ke’ng seo Jesu a ilego a mo eletša gore a se dire? Ka go tseba gore monna yo o be a tla ba a diegiša modiro wa bohlokwa kudu e le gore feela a lete go fihla batswadi ba gagwe ba e-hwa, Jesu o ile a araba ka gore: “Lesa bahu ba bolokê bahu ba bôná; ’me wêna O yê O kwalakwatše mmušô wa Modimo.” (Luka 9:​59, 60) Bao ba bontšhago bohlale ka go kwa Kriste ba ka se hlanamele go phetha thomo ya bona ya gore ba kwatše molaetša wa Mmušo. Bohlale bja Modimo bo ba dira gore ba ele hloko gore lefase le gotee le babuši ba lona le ahlotšwe. (1 Ba-Korinthe 2:6; 1 Johane 2:17) Bathekgi ba ba bogoši bja Modimo ba tseba gore kholofelo e tee ya kgonthe bakeng sa batho e letše go tseneng ga Modimo ditaba gare gotee le bobušing bja gagwe. (Sakaria 9:10) Ka gona, mola bao ba nago le bohlale bja lefase le ba sa dumele Mmušo wa Modimo gomme ba sa nyake mmušo woo wa legodimong, fela batho bao ba hlahlwago ke bohlale bja Modimo ba dira seo se tlišago mohola wa kgonthe go magagabo bona, ba ba lokišeletša bophelo bjo bo sa felego lefaseng le lefsa la Jehofa leo le holofeditšwego.​—Johane 3:16; 2 Petro 3:13.

‘Bošilo go Bao ba Hwago’

10. (a) Ge Saulo wa Tareso a be a sokollwa, ke modiro ofe woo a ilego a o amogela, gomme o ile a o lebelela bjang? (b) Ba-Gerika ba bogologolo ba be ba tsebega ka eng, eupja Modimo o be a lebelela bjang bohlale bja bona?

¹⁰ Saulo wa Tareso, yo a ilego a rewa la Paulo, moapostola wa Jesu Kriste, o ile a amogela modiro wo wa go phološa bophelo. Na ke mo go kwagalago go nagana gore ge Jesu Kriste a be a sokolla Saulo, O be a mo abela gore a kopanele modirong wa bošilo? Paulo o be a sa nagane bjalo. (Ba-Filipi 2:16) Ka nako yeo ba-Gerika ba be ba lebelelwa e le batho ba bohlale kudu lefaseng. Ba be ba ikgantšha ka bo-ra-difilosofi ba bona ba bagolo le banna ba bohlale. Gaešita lege Paulo a be a bolela Segerika, eupja o be a sa latele filosofi ya ba-Gerika le thuto ya ­bona. Ka baka la’ng? Ka gobane bohlale bjo bobjalo bja lefase le ke bošilo go Modimo.a Paulo o be a nyaka bohlale bja Modimo, bjo bo ilego bja mo tutueletša go kwatša ditaba tše di lokilego ka ntlo le ntlo. Mmoledi o mogolo wa ­ditaba tše di lokilego, yo a kilego a ba gona, Jesu Kriste, o be a ile a bea mohlala le go mo ruta gore a dire modiro o swanago.​—Luka 4:43; ­Ditiro 20:​20, 21; 26:​15-20; 1 Ba-Korinthe 9:16.

11. Ka kakaretšo, ke’ng seo Paulo a ilego a se bolela ka thomo ya gagwe ya go kwatša ditaba tše di lokilego le ka bohlale bja lefase?

¹¹ Paulo o bolela se se latelago mabapi le thomo ya go kwatša ditaba tše di lokilego: “Kriste xa a ka a nthoma xo y’o kolobetša ó nthomile xo tsebatša Ebangedi, e sexo ka polêlô ya bohlale, xore sefapanô sa Kriste se se kê sa kxôrwa-kxôrwa. Xobane thutô ya sefapanô, [sehlabelo sa Jesu sa topollo], ba bohlale ba re ké bošilo; rena baphološwa re hwetša è le matla a Modimo. Xobane xo ngwadilwe xwa thwe: Bohlale bya bahlale ke tlo bo senya; tlhaloxanyô ya bahlaloxanyi ke tlo e fediša. Ó kae yo bohlale [bjalo ka ra-difilosofi]? Ó kae mo-hlatha-tša-mabaka-ano?​—Bohlale bya lefase a Modimo xa a ka a bo dira bošilo? Xo byalo. Xe ka bohlale bya Modimo lefase lè šitilwe xo hlatha Modimo ka bohlale bya lôna, Modimo ó ikxahletšwe xo phološa ba ba dumêlaxo ka thutô yeo ba rexo ké bošilo.”​—1 Ba-Korinthe 1:​17-21.

12. Ke’ng seo Jehofa a se phethago ka ‘bošilo bja seo se bolelwago,’ gomme bao ba nyakago “bohlale byo bo tšwaxo xodimo,” ba tla itshwara bjang?

¹² Gaešita lege se se ka bonala se sa dumelege, eupja bona bao lefase le ba bitšago mašilo ke bona bao Jehofa a ba dirišago e le baboledi ba ditaba tše di lokilego. Ee, ka bošilo bja bodiredi bja baboledi ba ba ditaba tše di lokilego, Modimo o phološa bao ba dumelago. Jehofa o rulaganya ditaba e le gore baboledi ba “bošilo” bjo ba se ke ba itumiša, le gore batho ba bangwe ba se ke ba ba le tshwanelo ya go tumiša bao ba kwelego ditaba tše di lokilego ka bona. Se se bjalo e le gore “xo se bê sa nama se se kaxo ikxanthša pele xa xaxwe.” (1 Ba-Korinthe 1:​28-31; 3:​6, 7) Ke therešo gore mmoledi wa ditaba tše di lokilego o bapala karolo e bohlokwa, eupja molaetša wo a laetšwego gore a o bolele ke woo o lebišago go phologeng ga motho ge e ba a o dumela. Bao ba nyakago “bohlale byo bo tšwaxo xodimo” ba ka se nyatše molaetša wa mmoledi wa ditaba tše di lokilego ka gobane a bonala e ka ke lešilo e bile a nyatšega, o a tlaišwa, gomme o tšama a tsena ntlo le ntlo. Go e-na le moo ba boleta ba tla hlompha mogoeledi wa Mmušo bjalo ka mmoledi wa ditaba tše di lokilego yo a romilwego ke Jehofa gomme a e-tla ka leina la Modimo. Ba tla tšea molaetša woo mmoledi wa ditaba tše di lokilego a o ­bolelago ka molomo le ka dipuku e le wa bohlokwa kudu.​—Jakobo 3:17; 1 Ba-Thesalonika 2:13.

13. (a) Ba-Juda le ba-Gerika ba ile ba lebelela bjang go kwatšwa ga ditaba tše di lokilego tša Kriste yo a kokotetšwego koteng? (b) Ke go tšwa dihlopheng dife tša batho moo go sa bitšwago batho ba bantši gore e be balatedi ba Jesu, gomme ka baka la’ng?

¹³ Paulo ge a tšwela pele ka go ahla-ahla ditsela tša Modimo o re: “Ba-Juda ké ba-lla-mehlôlô; Ba-Gerika ké ba-nyaka-mahlale. Xe e le rena re baxoeledi ba Kriste Mmapolwa; Ba-Juda ba tla ba re ké kxopišô; Ba-Gerika ba tla ba re ke bošilo. Xe e le babidiwa ba Ba-Juda le ba Ba-Gerika ba tla ba hwetša è le ôna matla a Modimo, è le byôna bohlale bya Modimo. Xobane tša bošilo tšeo di tšwaxo xo Modimo, di phala batho ka bohlale. Le tša phôkôlô di tšwaxo xo Modimo, di phala batho ka matla. Bana bešo! Bônang ka mo Le biditšwexo ka xôna. Mo xo lena xa xo ba bantši ba bohlale ka nama; xa xo ba bantši ba baxolo; xa xo ba bantši ba meloko ya boxoši. Tše Modimo a ikxethetšexo tšôna ké tše lefase le rexo ké tša bošilo, xore a nyatšišê bohlale bya lôna; ó ikxethetše tše lefase le rexo ké tša phôkôlô, xore a nyatšišê tše matla.”​—1 Ba-Korinthe 1:​22-27; bapiša le Jesaya 55:​8, 9.

14. (a) Ge di botšišwa ka ditshwanelego tša tšona, Dihlatse tša Jehofa di šupa go eng? (b) Ke ka baka la’ng Paulo a ile a gana go kgahliša ba-Gerika ka pontšho lege e le efe ya bohlale bja lefase?

¹⁴ Ge Jesu a be a le lefaseng, ba-Juda ba ile ba mo kgopela pontšho e tšwago legodimong. (Mateo 12:​38, 39; 16:1) Eupja Jesu o ile a gana. Ka mo go swanago, Dihlatse tša Jehofa lehono ga di bontšhe ditshwanelego tše di swanago le pontšho. Go e-na le moo di šupa thomong ya tšona ya go kwatša ditaba tše di lokilego, bjalo ka ge go begilwe ditemaneng tša Beibele bjalo ka go Jesaya 61:​1, 2; Mareka 13:​10; le Kutollo 22:​17. Ba-Gerika ba bogolo-golo ba be ba nyaka bohlale, e lego thuto e phagamego dilong tša lefase. Gaešita lege Paulo a be a rutegile ka bohlale bja lefase le, fela o ile a gana go kgahliša ba-Gerika ka go e bontšha ka tsela le ge e ka ba efe. (Ditiro 22:3) O ile a bolela le go ngwala ka Segerika se se tlwaelegilego sa batho feela, go e na le Segerika sa maemo a godimo. Paulo o ile a botša ba-Korinthe gore: “Le nna, Bana bešo, mola kè e-tla xo lena xa nka ka tla ka bonatla bya polêlô le bohlale xe ke Le tsebiša bohlatse bya Modimo. . . . Xomme thutô ­ya-ka le polêlô ya-ka e be e se tša xo fenya ­ka mantšu a bohlale bya batho, e be e le xo hlatsêlwa ke Môya le tirô tše matla; Xore tumêlô ya lena e se kê ya êma ka bohlale bya batho, e êmê ka matla a Modimo.”​—1 Ba-Korinthe 2:​1-5.

15. Petro o gopotša bakweri ba ditaba tše di lokilego eng, gomme ke bjang boemo bja gona bjale bo swanago le bja mehleng ya Noage?

¹⁵ Mehleng ye ya bofelo, bakweri ba ditaba tše di lokilego tša lefase le lefsa la Modimo leo le tlago le bofelo bja lefase le bjo bo batamelago ba gopotšwa ke moapostola Petro gore lefase la mehleng ya Noage ‘le ile la apešwa ke meetse gomme la loba.’ (2 Petro 3:​3-7) Ge a lebeletšane le bofelo bjo bjalo bjo kotsi, ke’ng seo Noage a ilego a se dira? Ba bantši ba nagana gore e be e le feela moagi wa areka. Eupja Petro o bolela gore ge Modimo a be a tliša Meetse-fula godimo ga lefase la bogologolo, O ‘ile a phološa batho ba seswai ka Noage segoeledi sa toko.’ (2 Petro 2:5) Ka bohlale bja bona bja lefase, batho bao ba sa boifego Modimo bao ba phetšego pele ga Meetse-fula, ka ntle le pelaelo ba ile ba nyatša seo Noage a bego a se bolela gomme ba mmitša lešilo, molori le yo a bolelago dilo tše di ka se diregego. Lehono Bakriste ba therešo ba lebeletšane le boemo bjo bo swanago, ka ge Jesu a ile a bapiša moloko wa rena le wa mehleng ya Noage. Lega go le bjalo, lege go e-na le bakweri, go kwatša ditaba tše di lokilego tša Mmušo ga se feela go fo bolela. Ka go swana le boboledi bja ditaba tše di lokilego bjo bo bego bo dirwa ke Noage, se se bolela phologo go motho yo a kwatšago ditaba tše di lokilego le go bao ba mo theetšago!​—Mateo 24:​37-39; 1 Timotheo 4:16.

‘Go ba Mašilo Bakeng sa go ba Bohlale’

16. Bohlale bja lefase le bo tla diragalelwa ke’ng ka Haramagedone, gomme ke bomang bao ba tlago go phologela lefaseng le lefsa la Modimo?

¹⁶ Go se go ye kae, ka Haramagedone, Jehofa Modimo o tla senya ‘bohlale ka moka bja batho.’ O tla kgaphela ka thoko ‘tlhaloganyo ka moka ya bahlaloganyi’ bao ba inaganelago kamoo thulaganyo ya lefase la bona le lefsa e tlago go tlišetša batho maemo a kaone. ‘Ntwa ya mohla-mogolo wa Modimo Ra-matla-ohle’ e tla fedišetša ruri boradia ka moka, filosofi le bohlale bja lefase le. (1 Ba-Korinthe 1:19; Kutollo 16:​14-16) Batho bao e lego bona feela bao ba tlago go phologa ntwa yeo gomme ba hwetša bophelo lefaseng le lefsa la Modimo ke bao ba kwago seo lefase le le se bitšago bošilo​—ee, ditaba tše di lokilego tša Mmušo tša letago tša Jehofa.

17. Ke bjang Dihlatse tša Jehofa di fetogilego seo go thwego ke ‘mašilo,’ gomme ke’ng seo baboledi ba ditaba tše di lokilego ba Modimo ba ikemišeditšego go se dira?

¹⁷ Dihlatse tša Jehofa, di hlahlwa ke moya wa gagwe, ga di na dihlong tša go kwatša ditaba tše di lokilego tšeo lefase le di bitšago bošilo. Go e-na le go leka go hlalefa ka tsela ya lefase, di fetogile seo go thwego ke ‘mašilo.’ Bjang? Ka go dira modiro wa go kwatša ditaba tše di lokilego tša Mmušo e le gore ba tle ba be bohlale, bjalo ka ge Paulo a ngwadile gore: “Xe mo xo lena xo na le wa xo ithsema a re, ke yo bohlale ka tša mabaka ano, a a bê lešilo, a tseb’o ba yo bohlale.” (1 Ba-Korinthe 3:​18-20) Batho bao ba kwatšago ditaba tše di lokilego ba Jehofa ba tseba matla a phološago bophelo a molaetša wa bona gomme ba tla tšwela pele ba o kwatša ka ntle le go lapa go fihla bofelong bja lefase le le bohlale bja lona ntweng ya Haramagedone. Go se go ye kae, Jehofa Modimo o tla lwela bogoši bja gagwe bja legohle gomme a tliša bophelo bjo bo sa felego go bohle bao ba dumelago le go gata mogato ka go dumelelana le ‘bošilo bja seo se bolelwago.’

[Mongwalo wa tlase]

Dikarabo tša Gago ke Dife?

◻ Ke mehuta efe e mebedi ya bohlale yeo e lego gona?

◻ Phošo ya mathomo ya bohlale bja lefase ke efe?

◻ Ke ka baka la’ng go bolela ditaba tše di lokilego e le selo sa bohlokwa-hlokwa seo se ka dirwago?

◻ Go se go ye kae, ke’ng seo se tlago go diragalela bohlale ka moka bja lefase?

◻ Ke ka baka la’ng Dihlatse tša Jehofa di se na dihlong tša go bolela ditaba tše di lokilego tšeo lefase le rego ke bošilo?

[Seswantšho go letlakala 23]

Ba-Gerika ba be ba nyaka bohlale bja lefase gomme gantši ba lebelela ditaba tše di lokilego tše di bego di bolelwa ke Paulo e le bošilo