E-bang Babadi Ba Ba Thabilego Ba Puku Ya Kutollo

“Wa lehlôxônôlô ké e a balaxo le ba ba kwaxo mantšu á a porofetô le ba ba lôtôlaxo tše di ngwadilwexo mo xo yôna; xobane lebaka le kxaufsi.”​—KUTOLLO 1:3.

1. Moapostola Johane o ile a ikhwetša a le maemong afe ge a be a ngwala Kutollo, gomme ke lebaka lefe leo ka lona dipono tše di ilego tša ngwalwa?

“NNA Johane . . . ke be ke le sehlakehlakeng se ba rexo ké sa Patimo, molato è le Lentšu la Modimo, è le xo hlatsêla Jesu.” (Kutollo 1:9) A e bile maemo ao moapostola Johane a ngwaletšego puku ya Apocalypse goba Kutollo go ona. Go naganwa gore o be a išitšwe bothopša Patimo nakong ya pušo ya Mmušiši wa Roma Domitian (81-96 C.E.), yo a bego a gapeletša go dirišwa ga borapedi bja mmušiši gomme a fetoga motlaiši wa Bakriste. Ge a be a le Patimo, Johane o ile a amogela lelokelelo la dipono tšeo a ilego a di ngwala. O ile a di anega, e sego bakeng sa go tšhoša Bakriste ba pele, eupša bakeng sa go ba matlafatša, go ba homotša le go ba kgothatša ka lebaka la diteko tšeo ba bego ba feta go tšona le tšeo di bego di sa letše ka pele.​—Ditiro 28:​22; Kutollo 1:4; 2:​3, 9, 10, 13.

2. Ke ka baka la’ng boemo bjo Johane le Bakriste-gotee le yena ba ilego ba ikhwetša ba le go bjona e le bjo bo kgahlago Bakriste bao ba phelago lehono?

² Maemo ao puku ye ya Beibele e ngwaletšwego go ona a bohlokwa kudu bakeng sa Bakriste bao ba phelago lehono. Johane o be a tlaišwa ka ge e be e le hlatse ya Jehofa le Morwa wa Gagwe, Kriste Jesu. Yena gotee le Bakriste-gotee ba be ba phela tikologong ya bonaba, ka gobane ge ba be ba le gare ba katanela go ba badudi ba lokilego ba naga, ba be ba ka se kgone go diriša borapedi bja mmušiši. (Luka 4:8) Dinageng tše dingwe, Bakriste ba therešo lehono ba ikhwetša ba le boemong bjo bo swanago, moo Mmušo wa naga o dirišago tshwanelo ya go laela seo e lego se se “lokilego go ya ka bodumedi.” Ka gona, mantšu ao a hwetšwago mathomong a puku ya Kutollo ke a kgothatšago gakaakang: “Wa lehlôxônôlô ké e a balaxo le ba ba kwaxo mantšu á a porofetô le ba ba lôtôlaxo tše di ngwadilwexo mo xo yôna; xobane lebaka le kxaufsi.” (Kutollo 1:3) Ee, babadi bao ba elago hloko le bao ba kwago ba Kutollo ba ka hwetša lethabo la kgonthe le ditšhegofatšo tše dintši.

3. Mothopo wa Kutollo ye e neilwego Johane ke mang?

³ Mothopo o mogolo wa Kutollo ke mang, gomme go dirišwa mokero ofe go e fetiša? Temana ya mathomo e re botša gore: “Kutollô ya Jesu Kriste ye Modimo a Mo filexo yôna, ya ba xo bonthša bahlanka ba xaxwe tše di tl’o xo dirêxa ka pelá. O di tsebišitše ka Morongwa wa xaxwe yo a mo romilexo a tla xo Johane mohlanka wa xaxwe.” (Kutollo 1:1) Ka boripana, Mothopo wa kgonthe wa Kutollo ke Jehofa Modimo, yo a e neilego Jesu gomme ka morongwa, Jesu o ile a e fetišetša go Johane. Go seka-seka taba ganyenyane ka mo go oketšegilego go utolla gore Jesu gape o ile a diriša moya o mokgethwa go fetišetša melaetša diphuthegong le go nea Johane dipono.​—Kutollo 2:​7, 11, 17, 29; 3:​6, 13, 22; 4:2; 17:3; 21:​10; bapiša le Ditiro 2:33.

4. Jehofa o sa dutše a diriša mokgwa ofe lehono go hlahla batho ba gagwe lefaseng?

⁴ Jehofa o sa dutše a diriša Morwa wa gagwe yo e lego “hlôxô ya phuthêxô,” go ruta bahlanka ba gagwe lefaseng. (Ba-Efeso 5:​23; Jesaya 54:​13; Johane 6:​45) Jehofa gape o diriša moya wa gagwe go ruta batho ba gagwe. (Johane 15:​26; 1 Ba-Korinthe 2:​10) Le gona go fo swana le ge Jesu a dirišitše “Johane mohlanka wa xaxwe” go fetišetša dijo tša moya tše di phedišago diphuthegong tša lekgolong la pele la nywaga, le lehono o diriša sehlopha sa “molaki e a bôtêxaxo yo bohlale,” seo se bopšago ke ‘bana babo’ ba tloditšwego ba lefaseng bakeng sa go nea ba lapa la gagwe le bagwera ba bona “dijô [tša moya] ka lebaka la xôna.” (Mateo 24:​45-47; 25:​40) Ba thabilego ke bao ba lemogago Mothopo wa ‘dimpho tše botse’ tšeo re di amogelago ka tsela ya dijo tša moya le mokero wo A o dirišago.​—Jakobo 1:17.

Diphuthego Tšeo di Hlahlwago ke Kriste

5. (a) Diphuthego tša Bokriste le bagolo ba tšona ba swantšhwa le eng? (b) Go sa šetšwe go se phethagale ga batho, ke eng seo se tla tlaleletšago lethabong la rena?

⁵ Dikgaolong tša mathomo tša Kutollo, diphuthego tša Bokriste di swantšhwa le dihloma-pone. Balebeledi ba tšona ba swantšhwa le barongwa (batseta) le dinaledi. (Kutollo 1:​20)a Ge a ipolela, Kriste o ile a botša Johane gore a ngwale gore: “Xo bolêla E a swerexo ’naledi tše šupaxo ka seatla s’axwe, E a sepelaxo xare xa dihlôma-pônê tše šupaxo tša xauta.” (Kutollo 2:1) Melaetša e šupago yeo e rometšwego diphuthegong tše šupago tša Asia e bontšha gore lekgolong la pele la nywaga C.E., diphuthego le bagolo ba tšona ba be ba na le dika tšeo ba bego ba le matla go tšona le dika tšeo ba bego ba fokola go tšona. Go bjalo le lehono. Ka gona, re tla thaba kudu ge e ba le ka mohla re sa lahlegelwe ke pono ya gore Kriste, Hlogo ya rena, o gare ga diphuthego. O tseba gabotse seo se diregago. Bagolo ka tsela ya seswantšhetšo ba ka ‘seatleng sa gagwe se setona,’ ke gore, ba ka tlase ga taolo le tlhahlo tša gagwe gomme ba ikarabela go yena bakeng sa tsela yeo ba dišago diphuthego ka yona.​—Ditiro 20:​28; Ba-Hebere 13:17.

6. Ke eng se se bontšhago gore balebeledi ga se bona ba nnoši bao ba ikarabelago go Kriste?

⁶ Lega go le bjalo, re tla be re iphora ge e ba re nagana gore balebeledi ke bona ba nnoši bao ba ikarabelago go Kriste bakeng sa ditiro tša bona. Go o mongwe wa melaetša ya gagwe, Kriste o itše: “Diphutêxô ka moka di tlo tseba xe e le Nna Mo-lekola-phsio-le-pelo. Xomme mang le mang wa lena ke tlo mo nea se se lebanexo medirô ya lena.” (Kutollo 2:​23) Se ka nako e swanago ke temošo le mothopo wa kgothatšo​—temošo ya gore Kriste o tseba merero ya rena ya ka gare-gare le kgothatšo ka gobane e re kgonthišetša gore Kriste o tseba maiteko ao re a dirago gomme o tla re šegofatša ge e ba re dira sohle seo re ka se kgonago.​—Mareka 14:​6-9; Luka 21:​3, 4.

7. Bakriste ba Filadelfia ba ile ba ‘lotola lentšu la Jesu mabapi le kgotlelelo’ bjang?

⁷ Molaetša wa Kriste o yago phuthegong ya motseng wa Lidia wa Filadelfia ga o na tsholo, eupša o nea kholofetšo yeo e swanetšego go re kgahla kudu. “Ka xobane O lototše Lentšu la-ka la xo re: Kxôtlêlêla,​—le Nna ke tlo Xo lôtôla ka Xo hlakodiša nakong ya molekô wo o tl’o xo wêla lešakô ka moka, è le xo leka ba ba axilexo mo lefaseng.” (Kutollo 3:​10) Lentšu la Segerika bakeng sa “O lototše Lentšu la-ka la xo re: Kxôtlêlêla,” le ka bolela gape gore “o lototše seo ke se boletšego mabapi le kgotlelelo.” Temana 8 e bontšha gore ga se feela gore Bakriste ba Filadelfia ba ile ba kwa ditaelo tša Kriste eupša ba be ba bile ba latetše keletšo ya gagwe ya go kgotlelela ka potego ka bobona.​—Mateo 10:​22; Luka 21:19.

8. (a) Jesu o ile a dira kholofetšo efe go Bakriste ba Filadelfia? (b) Ke bomang bao lehono ba kgongwago ke ‘nako ya moleko’?

⁸ Jesu o ile a oketša ka gore o be a tla ba lotola “nakong ya molekô.” Ga re tsebe gore na seo se bego se bolelwa ke seo go Bakriste bao ba mehleng yeo ya morago ge e le gabotse e be e le eng. Le ge go ile gwa ba le lebakanyana la go khutša tlaišong ka morago ga lehu la Domitian ka 96 C.E., go ile gwa thoma lefula le lefsa la tlaišo ka tlase ga Trajan (98-117 C.E.), leo ka ntle le pelaelo le ilego la tliša diteko tše di oketšegilego. Eupša ‘nako e kgolo ya moleko’ e tšwelela ‘letšatšing la Morena’ nakong ya “lebaka la bofêlô” le re lego go lona gona bjale. (Kutollo 1:​10; Daniele 12:4) Bakriste ba tloditšwego ka moya ba ile ba feta nakong e kgethegilego ya go lekwa nakong ya Ntwa ya I ya Lefase le kapejana ka morago ga yona. Lega go le bjalo, ‘nako ya moleko’ e sa tšwela pele. E kgoma “lešakô ka moka,” go akaretša le ba dimilione bao ba bopago lešaba le legolo, bao ba nago le kholofelo ya go phologa tlaišego e kgolo. (Kutollo 3:​10; 7:​9, 14) Re tla ba ba thabilego ge e ba re ‘lotola seo Jesu a se boletšego mabapi le kgotlelelo,’ e lego: “E a tl’o xo tiišetša xo fihla bofelong, ké yêna a tl’o xo phološwa.”​—Mateo 24:13.

Go Ikokobeletša Bogoši bja Jehofa ka Lethabo

9, 10. (a) Pono ya sedulo sa bogoši sa Jehofa e swanetše go re kgoma ka ditsela dife? (b) Go bala ga rena Kutollo go ka tlaleletša bjang lethabong la rena?

⁹ Pono ya sedulo sa Jehofa sa bogoši le ya kgoro ya gagwe ya tsheko ya legodimong tšeo di hlaloswago go dikgaolo 4 le 5 tša Kutollo di swanetše go re tlatša ka poifo. Re swanetše go kgahlwa ke dipolelo tše di tšwago pelong tša theto tšeo di bolelwago ke dibopša tše matla tša legodimong ge di dutše di ikokobeletša bogoši bja Jehofa bja go loka ka lethabo. (Kutollo 4:​8-11) Mantšu a rena a swanetše go kwewa gare ga ao a rego: “Xo Eo a dutšexo sedulong sa boxoši, le xo Kwana a xo išwê teboxô le kxodišô, le thêtô le matla xo iša mehleng ya neng le neng.”​—Kutollo 5:13.

¹⁰ Ka tsela ya kgonthe, se se bolela go ba ga rena bao ba ikokobeletšago bogoši bja Jehofa ka lethabo dilong tšohle. Moapostola Paulo o ngwadile gore: “Tšohle tše Le kaxo di dira ka polêlô le ka diatla, Le di dirê ’ineng la Morêna Jesu, Lè leboxa Modimo Tata weno ka Yêna.” (Ba-Kolose 3:​17) Go bala ga rena Kutollo go tla re dira gore re be ba thabilego e le ka kgonthe ge e ba bogare-gareng bja menagano ya rena le dipelo tša rena re lemoga bogoši bja Jehofa gomme re nagana ka thato ya gagwe karolong e nngwe le e nngwe ya maphelo a rena.

11, 12. (a) Tshepedišo ya Sathane ya lefaseng e tla tšokotšwa bjang le go fedišwa? (b) Go ya ka Kutollo kgaolo 7, ke bomang bao ba “kaxo êma” ka nako yeo?

¹¹ Go ikokobeletša bogoši bja Jehofa ka lethabo ke motheo wa lethabo re le motho ka o tee ka o tee le ge re kopane. Kgaufsinyane tšhišinyego e kgolo ya lefase ya seswantšhetšo e tla tšokotša tshepedišo ya lefase ya Sathane go fihla metheong ya yona gomme ya e fediša. Go ka se be le lefelo la botšhabelo bakeng sa batho bao ba ganago go ikokobeletša pušo ya Mmušo wa Kriste wa legodimong, wo o emelago bogoši bja Modimo bja tshwanelo. Boporofeta bo re: “Dikxoši tša lefase tša utama mefomeng le mo maxaxeng a dithaba, di na le baxolo le matona, le bahumi le ba matla, le bahlanka bohle le bahunoloxi bohle. Ba bolêla le dithaba le mariba ba re: Re weleng, Le re thšabišê sefahloxô sa Eo a dutšexo sedulong sa boxoši, Le re thšabisê boxale bya Kwana, xobane letšatši le lexolo la boxale bya Yôna le tlile; xomme ké mang e a kaxo êma?”​—Kutollo 6:​12, 15-17.

¹² Mabapi le potšišo yeo, kgaolong e latelago, moapostola Johane o hlalosa bao ba bopago lešaba le legolo, bao ba tšwago tlaišegong e kgolo ba “eme pele xa sedulô sa boxoši sa Kwana.” (Kutollo 7:​9, 14, 15) Go ema ga bona pele ga sedulo sa bogoši sa Modimo go bontšha gore ba lemoga sedulo seo sa bogoši gomme ba ikokobeletša bogoši bja Jehofa ka mo go tletšego. Ka go rialo ba amogelwa.

13. (a) Bontši bja badudi ba lefase bo rapela eng, gomme leswao le le lego phatleng ya bona goba seatleng sa bona le swantšhetša eng? (b) Ka gona ke ka baka la’ng go tla nyakega kgotlelelo?

¹³ Ka lehlakoreng le lengwe, kgaolo 13 e hlalosa badudi ka moka ba lefase e le bao ba rapelago tshepedišo ya Sathane ya dipolitiki, yeo e swantšhetšwago ke sebata. Ba amogela leswao “phatleng” ya bona goba “seatleng” sa bona, e lego seo se bontšhago go thekga ga bona ka monagano le ka mmele tshepedišo yeo. (Kutollo 13:​1-8, 16, 17) Ka morago, kgaolo 14 e oketša ka gore: “Motho e a kaxo lothša Sebata le seswanthšô sa sôna, a dumêla xo swaiwa phatleng ya xaxwe le seatleng sa xaxwe, yêna ó tlo nošwa sebelá sa kxalefô ya Modimo, se se sa timolwaxo xe se thšêlwa senwelong sa boxale bya xaxwe . . . Ké mo xo nyakaxo kxôtlêlêlô ya bakxêthwa ba xo xomarêla melaô ya Modimo le xo dumêla Jesu.” (Kutollo 14:​9, 10, 12) Ge nako e dutše e feta, potšišo e tla golela pele ka go re: O thekga mang? Jehofa le bogoši bja gagwe goba tshepedišo ya dipolitiki ye e sa boifego Modimo yeo e swantšhetšwago ke sebata? Go tla thaba bao ba phemago go amogela leswao la sebata le bao ba kgotlelelago ka potego ba ikokobeleditše bogoši bja Jehofa.

14, 15. Ke molaetša ofe o tsenago tlhaloso ya Kutollo ya Haramagedone gare, gomme o bolela eng go rena?

¹⁴ Babuši ba “lefase ka moka” ba mo ntweng, ba lebile twantšhanong ya go lwantšhana le Jehofa ka kgang ya bogoši. Selepe sa makgaola-kgang e tla ba Haramagedone, ‘ntwa ya mohla-mogolo wa Modimo Ra-matla-ohle.’ (Kutollo 16:​14, 16) Tlhaloso e kgahlišago e tšwelela ka gare-gare ga tlhaloso ya go hlalosa go bokana ga dikgoši tša lefase bakeng sa go yo lwa le Jehofa. Jesu ka boyena o tsena ponong bakeng sa gore: “Tsebang, ke e-tla byalo ka lehodu. Wa lehlôxônôlô ke eo a phakxamaxo, a lôtôla diaparô tša xaxwe, a se tlo sepela à hlobotše, ba mmôna dihlong tša xaxwe.” (Kutollo 16:​15) Se se ka ba se šupa go bahlapetši ba tempeleng ba ba-Lefi bao ba bego ba hlobodišwa gomme ba lešwa dihlong phatlalatša ge ba be ba hweditšwe ba robetše ba le modirong wa bona wa go hlapetša.

¹⁵ Molaetša o kwagala gabotse: Ge e ba re nyaka go phologa Haramagedone, re swanetše go dula re phafogile moyeng gomme re boloke diaparo tša rena tša seswantšhetšo tšeo di re hlaolago re le Dihlatse tše botegago tša Jehofa Modimo. Re tla ba ba thabilego ge e ba re phema go otsela moyeng gomme re tšwela pele re sa kgaotše, re tšea karolo ka mafolofolo go phatlalatšeng “ditaba tše di lokilego tša neng le neng” tša Mmušo wa Modimo o hlomilwego.​—Kutollo 14:6, NW.

‘Wa Lehlogonolo ke yo a Lotolago Mantšu a’

16. Ke ka baka la’ng dikgaolo tša mafelelo tša Kutollo e le selo se segolo se se bakago lethabo?

¹⁶ Babadi ba thabilego ba puku ya Kutollo ba ka hlalala ka lethabo ge ba dutše ba bala dikgaolo tša mafelelo tšeo di hlalosago kholofelo ya letago​—legodimo le lefsa le lefase le lefsa, ke gore, pušo ya Mmušo o lokilego wa legodimong e bušago godimo ga lekoko le lefsa le le hlwekišitšwego la batho, tše ka moka e le bakeng sa go iša theto go “Morêna Modimo Ra-matla-ohle.” (Kutollo 21:​22) Ge lelokelelo le le kgahlišago la dipono le fihlile mafelelong, motseta wa morongwa o ile a botša Johane gore: “Ditaba tše di a bôtêxa, ké tša xo rereša. Morêna Modimo wa meôya ya Baporofeta ó romile Morongwa wa xaxwe, a bonthša bahlanka ba xaxwe tša xo tlo dirêxa ka byakô. Xomme O tsebê, ke tlo tloxa ke e-tla. Wa lehlôxônôlô ké eo a xomarêlaxo ditaba tša porofetô ya puku yê.”​—Kutollo 22:​6, 7.

17. (a) Ke kgonthišetšo efe yeo e newago go Kutollo 22:6? (b) Ke eng seo re swanetšego go phafogela go se phema?

¹⁷ Babadi ba Kutollo ba thabilego ba tla gopola gore mantšu a swanago le a a tšwelela mathomong a “puku.” (Kutollo 1:​1, 3) Mantšu a a re kgonthišetša gore ‘dilo’ tšohle tše di porofetilwego pukung ye ya mafelelo ya Beibele di tlo “dirêxa ka byakô.” Re phela ka gare-gare ga mehla ya bofelo mo e lego gore ditiragalo tše bohlokwa tšeo di boletšwego e sa le pele ka go Kutollo ruri di swanetše go direga ka go latelana kudu kgaufsinyane. Ka gona, go tsepama mo go ka bonagalago go le gona tshepedišong ya Sathane ga se gwa swanela go re kunkureletša gore re robale. Mmadi yo šedi o tla gopola ditemošo tšeo di neilwego melaetšeng yeo e rometšwego diphuthegong tše šupago tša Asia gomme o tla phema melaba ya dilo tše di bonagalago, borapedi bja medimo ya diswantšho, boitshwaro bjo bo gobogilego, go ba bololo le go ikaga dihlotswana tša bohlanogi.

18, 19. (a) Ke ka baka la’ng Jesu a sa swanetše gore a tle, gomme ke kholofelo efe yeo e bolelwago ke Johane yeo re nago le karolo go yona? (b) Jehofa o sa swanetše gore ‘a tle’ bakeng sa morero ofe?

¹⁸ Jesu o tsebatša gantši pukung ya Kutollo gore: “Ke tla tloxa kè e-tla!” (Kutollo 2:​16; 3:​11; 22:​7, 20a) O sa swanetše gore a tle a tlo phetha kahlolo go Babele o Mogolo, tshepedišo ya Sathane ya dipolitiki le bathong bohle bao ba ganago go ikokobeletša bogoši bja Jehofa, ka ge bjale bo hlaloswa ka Mmušo wa Mesia. Re hlabeletša mantšu a rena gotee le la moapostola Johane yo a itšego: “Amene! Tlaa Morêna Jesu!”​—Kutollo 22:​20b.

¹⁹ Jehofa ka boyena o re: “Tseba xore ke e-tla ka pelá; ’me moputsô wa-ka o tla le Nna, moputsô wa xo tlo bušetša e mongwê le e mongwê ka mo modirô wa xaxwe o tl’o xo ba ka xôna.” (Kutollo 22:​12) Ge re sa letile moputso o tagilego wa bophelo bjo bo sa felego re le karolo ya “legodimo le lefsa” goba “lefase le lefsa,” anke re tlatšeng ka mafolofolo go fetišetšeng taletšo bathong bohle ba dipelo tše botegago e rego: “Tlaa! Le e a nyorilwexo a a tlê a tšeê meetse a bophelô à fo fiwa fêla.” (Kutollo 22:​17) Eka le bona e ka ba babadi ba thabilego ba puku e buduletšwego le e tutuetšago ya Kutollo!

[Mengwalo ya tlase]

Dintlha tša Poeletšo

◻ Jehofa o ile a diriša mokero ofe go fetiša Kutollo, gomme ke eng seo re ka ithutago sona go se?

◻ Ke ka baka la’ng re swanetše go thabela go bala melaetša yeo e rometšwego diphuthegong tše šupa tša Asia?

◻ Re ka lotolwa bjang “nakong ya molekô”?

◻ Re tla ba le lethabo lefe ge e ba re lotola mantšu a puku yeo e huperego Kutollo?

[Mantšu ao a sepedišanago le seswantšho go letlakala

15]

Ba thabilego ke bao ba lemogago Mothopo wa ditaba tše di thabišago

[Mantšu ao a sepedišanago le seswantšho go letlakala

18]

Go thabile yo a dulago a phafogile