Go Tloga Tseleng e Yago Lehung go ya Tseleng e Yago Bophelong

KA NYWAGA e mentši bophelo bja-ka bo be bo sentšwe ke go lemalela ga-ka dihlare-tagi. Ke thomile ka tšeo e sego tše matla gomme ka feleletša ka tše bogale, go swana le LSD. Dihlare-tagi di ile tša thoma go swantšhetša khunologo mehuteng yohle ya mathata a motho ka noši le a leago. Ka mo go nyamišago, ke ile ka kgothaletša bafsa ba bangwe go sepela le nna tseleng e yago lehung.

Ka ge ke be ke tsebja ke le mmapatši wa dihlare-tagi, ke bile yo a beilwego leihlo ke maphodisa. Ke swanetše go dumela gore ke be ke tšhogile, ka gobane ke be ke tseba gore go swarwa go be go tla bolela nywaga e mentši kgolegong. Lege ke phetše tlalelong, fela se e be e se se lekanego go ntira gore ke fetoše ditsela tša-ka.

Batswadi ba-ka ba lekile go nthuša ka go nkiša legaeng la ba babjago monaganong bakeng sa kalafo. Go be go holofelwa gore dihlare tšeo di bego di hwetšwa fao le kalafo di be di tla rarolla bothata bja-ka, eupja kapejana ka morago ga ge ke tšwele, batswadi ba-ka ba ile ba lemoga gore gaešita le kalafo ka dihlare e be e ka se ke ya mphetoša. Ba ile ba leka go nthuša gape ka go dira gore ke boledišane le moruti. Se le sona ga se sa hola ka selo. Ke ile ka kgoga patše le go nwa pele ga gagwe, tše nkego o be a se gona moo. Ke be ke tloga ke sa rate go fetoga!

Moratiwa wa-ka, Oriana, o be a ganetša ka go tia tsela ya-ka ya go phela, gomme ke be ke sa rate ge a ka ntlogela. Mohlomongwe se se ile sa bonala eka ke tutuetšo e botse ya go dira phetogo. Eupja go e na le moo, ke ile ka tšwetša pele mokgwa wa-ka wa go diriša dihlare-tagi ka sephiring. Ke ile ka dira gore Oriana a dumele gore ke be ke lwala. Ka pela ka fetoga motho wa segwahla e le ka kgonthe. Ka fela ke ikholofetša gore ke tla kgaotša le gore ke be nka kgona seo, eupja ga se gwa thuša ka selo. Ke be ke fo tsenelela gara-gare tseleng e išago lehung.

Ka ge ke be ke nyaka go nyala Oriana ka pela ka mo go ka kgonegago, re ile ra kopana le mokgabiši yo a kgabišago bokagare bja nywako gore a tle a dire modiro o mongwe phapošing ya rena. Mosadi wa gagwe e be e le o mongwe wa Dihlatse tša Jehofa, gomme o ile a bolela le rena ka tumelo ya gagwe. Mathomong poledišano e ile ya kgoma Oriana kudu go feta nna, eupja ge e tšwela pele, ke ile ka lemoga gore Dihlatse tša Jehofa di dumela ka go tia gore Modimo kapejana o tla dira lefase le paradeise le gore batho ba tla phela mo ka mo go sa felego ka khutšo.

Ke ile ka rata go iponela ka noši ge e ba e be e le therešo gore “gaešita le gona bjale Dihlatse tša Jehofa di bontšha leratano le tlhomphano,” go etša ge mosadi yo a boletše. Ka gona nna le Oriana re ile ra ya Holong ya Mmušo. Ke ile ka kwa ke tshwenyegile ka baka la moriri wa-ka o motelele le diaparo tša-ka tša mankgeretla, eupja kamogelo yeo Dihlatse di re amogetšego ka yona e dirile gore ke ikwe ke lokologile. Ke ile ka ikwa gore nka di holofela. Go be go le molaleng gore leratano la kgonthe le tlhomphano e be e šetše e le dilo tša kgonthe go bona.

Go tloga letšatšing leo go iša pele, ke ile ka thoma go ba gona ka mehla dibokeng tša Bokriste, gomme ka thoma go ithuta Beibele le Dihlatse tša Jehofa. Ka kota moriri le go fetoša mokgwa wa go apara, gomme ka boiteko bjo bogolo, ka kgona go kgaotša go kgoga le go diriša dihlare-tagi. (2 Ba-Korinthe 7:1) Lega go le bjalo, go be go e-na le bothata bjo bongwe bjo bogolo bophelong bja-ka. Ke ile ka ba lekgoba la bjalwa, ka ntle le go lemoga seo. Ge ke nwele ke be tsena mathateng. Ke be ke ngangišana le batho gomme ke e-ba le lehufa le legolo ka Oriana. Ke ile ka ba manyaming a magolo. (Diema 23:29-35) Ka dira boiteko bja go kgaotša mokgwa wo, gomme ka thušo ya Jehofa, matla a thapelo gotee le thušo ya banabešo ba Bakriste, ka kgona go tloša ka mo go feletšego mokgwa wo o mobe bophelong bja-ka.

Nna le mosadi wa-ka re ile ra kolobetšwa ka August 23, 1974. Ka baka la therešo, maphelo a rena bjale a be a e-na le morero. Bjalo ka ge ke ile ka ba le mafolofolo gape, ke ile ka hwetša tlhompho modirong. Bobedi nna le mosadi wa-ka re dirile tšhelete e ntši, eupja bjale re ile ra lemoga gore re be re e-na le nako e nyenyane yeo e re šaletšego bakeng sa tirelo ya rena e kgethwa. Ge e ba re be re nyaka go thabela tswalano ya kgaufsi le Jehofa, re be re tla swanela go dira diphetogo maphelong a rena. Go sego bjalo, go be go e-na le kotsi ya gore lerato la rena la pele la therešo le tape. Ka gona ka 1979 re ile ra thoma go bula madibogo, ra ineela ka mo go feletšego modirong wa boboledi.

Ke ka baka la’ng re dirile phetho ye? Nkabe ke le kae lehono ge nkabe e se ka seetša sa therešo? Bao ba bego ba e-na le nna tseleng e yago lehung mo gongwe ga bjale ke makgoba a dino tše tagago goba ga ba sa na lapa goba ba kgolegong—goba ba hwile. E bile molaetša wa Beibele wo o nkhunolotšego. Kalafo le maikemišetšo e be e se tšeo di lekanego. Tutuetšo e matla e be e nyakega. Go nyaka go hlagolela bogwera bja kgonthe le Jehofa, Mmopi, go tšweleditše tutuetšo e bjalo. Bjale, kganyogo ya-ka ya kgonthe ke go dira sohle se nka se kgonago go thuša bao e lego makgoba a mokgwa wa go diriša dihlare-tagi gotee le bao ba tlaišegago goba ba nyakago tsela ya go tšwa mathateng a bona. Ka go kopanela ka mafolofolo bodireding bja Bokriste, nna le mosadi wa-ka re be re dutše re dira sona seo. Re bile le tokelo ya go thuša batho ba bantši go tsena tseleng e išago bophelong. Gare ga ba go na le batho ba bararo bao nna ka noši ke ba rutilego go diriša dihlare-tagi. Lebakeng le ke dira ke le molebeledi wa tikologo ka leboa la Italy.

Ke therešo: Go dirišwa gampe ga dihlare-tagi go bjalo ka tsela yeo ka nako e itšego e tlago go go lebiša lehung goba mo gongwe bophelong bjo bo se nago morero lege e le bokamoso. Ke felelwa ke mantšu a go hlalosa tebogo ya-ka go Jehofa! O mpontšhitše tsela ya go tšwa lefsifsing leo ke bego ke phela go lona gomme a ntšhupetša tsela e išago bophelong, e tletšego seetša le e išago bokamosong bja ka mo go sa felego.—Ka ge go anega Ruggero Polotti.