Go Tlišetša Ba Lego Kgolegong Tokologo Ya Moya

“RE BE re dutše re go emetše.” “Mašegong a sego kae a fetilego ke ile ka lora o e-tla.” “Re leboga ge le abetše motho yo mongwe gore a re etele ka mehla.” “Re rata go bontšha tebogo ya rena bakeng sa tšhegofatšo e nngwe le e nngwe yeo re e amogelago ka mo go sa swanelago go Jehofa le mokgatlo wa gagwe le bakeng sa dijo tša moya tšeo di newago ka nako e swanetšego.”

Ke eng se se bego se baka dipolelo tše tša tebogo? Tše ke tše dingwe tša dipolelo tša bagolegwa bao ba golegilwego dikgolegong tše sa swanego tša Mexico. Ba leboga tlhokomelo yeo ba e amogelago go Dihlatse tša Jehofa yeo e ba tlišeditšego tokologo ya moya gaešita le ge ba le kgolegong. Kua Mexico go na le dikgolego tše 42 tšeo go tšona Dihlatse tša Jehofa di kgotsofatšago dinyakwa tša bagolegwa tša moya ka mehla. Mafelo a a bitšwa Centro Readaptación Social (Mafelo a Setšhaba a go Kgopamolla Mekgwa). Go tše dingwe tša dikgolego tše, diboka tša Bokriste di bile di swarwa ka mehla ka mafelelo a mabotse kudu. Ka mohlala, ge go be go balwa lekgeng le lengwe morago bjale batho ba ka bago 380 ba be ba e-ba gona dibokeng mafelong a. Lebakeng leo go be go swarwa tekanyo ya dithuto tše 350 tša Beibele. Ba 37 ba be ba ile ba swanelegela go thoma go bolela gomme ba 32 ba neetše maphelo a bona go Jehofa, ba bontšha se ka go kolobetšwa meetseng.

Kamoo Modiro o Dirwago ka Gona

Dihlatse tša Jehofa di phetha modiro wa tšona wa boboledi bjang mafelong a? Sa pele, di ya go balaodi ba hlokometšego go ya go kgopela tumelelo e ngwadilwego ya go tsena kgolegong, tša hlalosa morero wa diketelo—e lego go ruta bagolegwa kamoo ba ka kaonefatšago ka gona mohola wa bophelo bja bona gomme ba hlankele Modimo ka tsela e mo kgahlišago.

Boemong bjo bongwe le bjo bongwe balaodi ba ile ba nea tumelelo ya bona. Balaodi ba ba leboga thuto ya Beibele yeo e newago bagolegwa. Balaodi ba kgolego ba lemogile gore Dihlatse tša Jehofa di kwa melao ya tšhireletšego e hlometšwego mafelo a. Ba dumeletše badiredi ba, bao ba etelago gore ba diriše diofisi, diphapoši tša go jela le mabenkele go swara diboka tša bona. Lefelong le lengwe Dihlatse di ile tša ba tša dumelelwa go aga Holo e nyenyane ya Mmušo bjalo ka ge go bontšhitšwe phihlelong e latelago e anegwago ke molebeledi wa mosepedi ka borwa-bohlabela bja Mexico.

“Mathomong a 1991 re ile ra thoma go etela kgolego ya Tehuantepec, Oaxaca, moo re ilego ra hwetša tlala e kgolo ya moya. Go se go ye kae re ile ra thoma dithuto tše 27 tša Beibele. Ka baka la kgahlego ya bagolegwa, diboka tše hlano tša phuthego di ile tša rulaganywa. Yo mongwe wa bagolegwa yo a ilego a bontšha lerato le legolo la go rata Jehofa o ile a dira phetho ya go aga Holo e nyenyane ya Mmušo lefelong la kgolego e le gore go be le lefelo la go swarela diboka. O ile a ya go molaodi wa kgolego a kgopela tumelelo, gomme balaodi ba be ba e-na le tirišano kudu. Mathomong a December 1992, bagolegwa ba tshelelago ba ile ba swanelegela go ba bagoeledi ba ditaba tše di lokilego. Ka baka la tšwelopele e bontšhitšwego, go ile gwa dirwa dithulaganyo tša go swarela Segopotšo ka kgolegong. Re ile ra kgopela molaodi wa kgolego tumelelo ya go tliša diswantšhetšo—senkgwa le beine—gomme ka morago ga poledišano ya diiri tše nne tumelelo e ile ya newa.

“Go ile gwa direga gore ka April 3, 1993 (matšatši a mararo pele ga monyanya wa Segopotšo), bagolegwa ba bangwe ba lokollwe. Ge yo mongwe yo e bego e le mogoeledi a be a amogela dipampiri tša gagwe tša tokollo, o ile a kgopela go boledišana le molaodi wa kgolego gore a hwetše tumelelo ya go dula go fihlela ka morago ga monyanya wa Segopotšo. Se se ile sa makatša molaodi e le ka kgonthe ka ge ye e se kgopelo e tlwaelegilego kudu, eupša ka baka la kgahlego e kgolo ya mogolegwa ya go ba gona Segopotšong moo kgolegong o ile a amogela kgopelo. Segopotšong go bile le batho ba 53 bao ba ilego ba tšholla megokgo ya lethabo ge lenaneo le fela. Re dumetše go bitša sehlopha se ‘Tokologo ya Cereso’ ka gobane se lokologile ka kgopolo ya moya.”

Modiro wa Dihlatse tša Jehofa o lebogwa kudu mafelong a. Go e nngwe ya dikgolego tše tša mmušo, motho yo a hlokometšego o bolela phatlalatša go ba gona dibokeng tša Dihlatse tša Jehofa e le “kalafo” bakeng sa go kgopamollwa mekgwa ga kapejana ga bagolegwa.

Lenaneo le Atlegago la go Kgopamolla Mekgwa

Modiro wa Dihlatse tša Jehofa o feleleditše ka go kgopamollwa mo go feletšego ga mekgwa ya bagolegwa ba bantši. Le ge gantši e le therešo gore bao ba kilego ba ba kgolegong ba boela bophelong bja bosenyi ge ba lokolotšwe, bao ba amogetšego molaetša wa Lentšu la Modimo e le ka kgonthe ba fetogile ka mo go feletšego. Go fetoga ga bona go re gopotša mantšu a moapostola Paulo a rego: “Ba diotswa, . . . le mahodu, le ba mexabaru, le mataxwa, le ba maroxa, le bahlakodi, ba ba byalo xa ba na kabêlô mmušong wa Modimo. Ba bangwê ba lena e be e le ba ba byalo. Fêla, Le hlatswitšwe, Le kxethexile, Le lokafaditšwe ka Leina la Morêna Jesu le ka Môya wa Modimo wa rena.”—1 Ba-Korinthe 6:9-11.

Phetogo e kgolo ya semelo sa bona e bonagala ge ba hlalosa maikwelo a bona. Miguel yo a lego kgolegong ya Campeche kua Campeche City o bea se ka tsela ye: “Lehono nka bolela ka lethabo gore ke ipala gare ga dinku tše dingwe tšeo di nago le kholofelo e begilwego go 2 Petro 3:13 le Mateo 5:5.” José yo a lego Koben kgolegong ya Campeche o hlalositše gore: “Le ge ke le mogolegwa e bile bosenyi bja-ka e ka ba e le bjo bogolo kudu, ke kwešiša gore Jehofa o na le kgaugelo kudu gomme o theetša dithapelo le ditopo tša-ka. A ka ntshwarela dikarogo tša-ka gomme a nnea sebaka sa go diriša bophelo bja-ka ka moka ke abelana le ba bangwe ditaba tše di lokilego tše di lego mabapi le Mmušo wa Modimo. Re leboga bagolo ba rena ka baka la nako yeo ba ilego ba e diriša ba re etela kgolegong e le gore re ka holwa ke dikholofetšo tša Mmušo wa Modimo. Ke ditšhegofatšo tše di kgahlišago gakaakang! Na nka re ke mogolegwa? Aowa, Jehofa o nneile tokologo yeo ke bego ke e nyaka ya moya.”

Ke eng se se dirago gore babolai, bakati, bao ba fišago dithoto, mahodu le ba bangwe ba fetoge Bakriste ba ba phelago ka mo go swanetšego? Go ya ka banna bona ba, ke matla a fetošago a Lentšu la Modimo le segwera se sebotse le batho ba ineetšego e le ka kgonthe. Taba ya Tiburcio yo a golegilwego kgolegong ya mmušo ya Mazatlán, Sinaloa e bontšha katlego ya lenaneo le la go kgopamolla mekgwa. O be a bile kgolegong ya Concordia, Sinaloa moo a bilego le mathata ka baka la kgalefo ya gagwe e šoro. Mosadi wa gagwe e be e le yo mongwe wa Dihlatse tša Jehofa, gomme yena o be a mo swara gampe kudu gaešita le ge a be a tlile go mo etela kgolegong. Mosadi o be a sa fele pelo gomme a tšwela pele a e-tla go mo etela, ka gona monna a mo kgopela gore a mo tlišetše puku ya O ka Phela ka mo go sa Felego Paradeiseng mo Lefaseng yeo a ilego a thoma go e bala a nnoši.a Ka morago o ile a kgopela gore motho yo mongwe a tle kgolegong go ithuta le yena. O ile a thoma go tšwela pele moyeng gomme ditswalano tša gagwe le ba bangwe tša thoma go fetogela bokaoneng. O ile a išwa kgolegong ya Mazatlán moo go nago le sehlopha se se ithutago Beibele gomme bjale ke mogoeledi. O hlalosa gore: “Mo nakong ye, ke leboga kudu gotee le mosadi wa-ka le bana le bagwera ba-ka ba bagolegwa ge ke kgona go theetša ditherešo tša Beibele lefelong le, ke e-na le kholofelo ya gore nakong e tlago e lego kgaufsi ke tla lokollwa gomme ka kgona go ba gona dikopanong ka moka le dibokeng tša phuthego.”

Go bile go na le Conrado yo a lebogago kudu diphetogo tšeo a kgonnego go di dira bophelong bja gagwe. O be a e-na le mathata a magolo kudu a lenyalo moo mosadi wa gagwe a ilego a mo tlogela. Ka gona o ile a tsoma khomotšo dihlare-taging. Ge nako e dutše e e-ya e ile ya ba mogwebi wa dihlare-tagi. O ile a swarwa gomme a ahlolelwa kgolego ka baka la go romela thoto ya patše le cocaine. Kgolegong go be go e-na le sehlopha seo se ithutago Beibele le Dihlatse tša Jehofa, gomme o ile a laleletšwa go ithuta le sona. O hlalosa maikwelo a gagwe ka tsela ye: “Ke ile ka kgahlišwa ke tsela ya thulaganyo yeo diboka di bego di swarwa ka yona, lenaneo la tlhahlobo ka dipuku le therešo ya gore se sengwe le se sengwe se be se theilwe Beibeleng. Ke ile ka kgopela thuto ya Beibele gatee-tee gomme ka thoma go ba gona dibokeng.” E be e le ka January 1993. Bjale Conrado o tšwile kgolegong gomme o tšwela pele a gatela pele ka phuthegong ya Bokriste.

Islas Marías

Kua Mexico go na le kgolego e boifšago ya dihlakahlaka tše nne e bitšwago Islas Marías. Bagolegwa ba ka sepela-sepela dihlakahlakeng tša kahlolo tšeo ba golegetšwego go tšona. Ba bangwe ba dula moo le basadi ba bona le bana.

Go hlomilwe phuthego e nyenyane. Banababo rena ba bararo ba tšwago Mazatlán ba ya moo gatee ka kgwedi ba thuša go swara diboka, go nea dipuku le go kgothatša. Ka dinako tše dingwe molebeledi wa tikologo o ya go ba etela. Tekanyo ya bao ba bago gona e magareng ga 20 le 25. Go na le bagoeledi ba bane ba kolobeditšwego le ba babedi ba sa kolobetšwago. Molebeledi wa mosepedi o bega gore “ba bangwe ba sepela dikhilomithara tše 17 gore ba be gona dibokeng ka Sontaga gomme ba swanelwa ke go tloga sebokeng ka go akgofa e le gore ba boele morago bakeng sa ge go balwa maina. Ge ba sepediša, go tšea nako ya ka godimo ga diiri tše pedi gore ba fihle.” Yo mongwe wa banababo rena yo a ithutilego therešo a le kgolegong yeo o sa tšwa go re: “Ke be ke kgahlegela go tšwa ka pela, eupša bjale go ka direga ka nako le ge e le efe yeo Jehofa a ratago ka yona ka gore go ba gona ke na le modiro o montši wo ke swanetšego go o dira ka mo gare.”

Re thabela go bona gore therešo e diriša matla a yona go lokolla batho ba botegago bao ba nyakago tsela ya go kgahliša Jehofa. Ba fetago ba lesome-pedi ba ba, bao ba ithutilego therešo kgolegong ba lokolotšwe, ba kolobetšwa gomme bjale ba phela maphelo a hlomphegago e le bahlanka ba Modimo, ba bangwe e bile e ba bagolo ba phuthego. Matla ao Beibele e nago le ona a go fodiša dipelo le go fetola batho a bontšhitšwe ka mo go kgahlišago. Gatee-tee ge banna ba, bao ba bego ba golegetšwe go dira ditiro tše mpe ba tsene tseleng ya seetša sa Lentšu la Modimo, ba ba le tokologo ya kgonthe yeo Jesu a e holofeditšego ge a be a re: “La tlo tseba therešô, ’me therešô ya tlo Le lokolla.”—Johane 8:32; Psalme 119:105.

[Mengwalo ya tlase]

[Seswantšho go letlakala 23]

Batho ba bantši ba ile ba holwa ke ditherešo tša Bokriste tšeo ba ithutilego tšona kgolegong