Ekiša Jehofa—O Bontšhe Toka Le Toko

“Ke nna Jehofa, Yo a bontšhago botho bjo lerato, toka le toko lefaseng; gobane dilo tše di a nkgahla.” —JEREMIA 9:23 (9:24, NW).

1. Ke tebelelo efe e makatšago yeo Jehofa a ilego a e holofetša?

JEHOFA o holofeditše gore go be go tla tla letšatši la ge mang le mang a be a tla mo tseba. O boletše ka moporofeta wa gagwe Jesaya gore: “Xo ka se hlwê xo dirwa dibe, xo ka se hlwê xo senywa mo xo fêla dithabeng tše kxêthwa tša-ka, xobane xo tseba Morêna xo tlo tlala ’fase lohle bo-ka meetse xe a nabile lewatleng.” (Jesaya 11:9) Yeo ke tebelelo e kgahlišago gakaakang!

2. Go tseba Jehofa go akaretša’ng? Ka baka la’ng?

² Ka gona, go tseba Jehofa go bolela’ng? Jehofa o ile a utollela Jeremia seo se lego bohlokwa kudu: “Go ba le temogo le go ba le tsebo ya go ntseba, gore ke nna Jehofa, Yo a bontšhago botho bjo lerato, toka le toko lefaseng; gobane dilo tše di a nkgahla.” (Jeremia 9:23 [9:24, NW]) Ka go rialo, go tseba Jehofa go akaretša go tseba tsela yeo a bontšhago toka le toko ka yona. Ka gona ge e ba re bontšha dika tšeo, re tla mo kgahliša. Re ka dira bjalo bjang? Ka Lentšung la gagwe Beibele, Jehofa o bolokile pego ya ditirišano tša gagwe le batho ba sa phethagalago nywageng ka moka. Ka go le bala, re ka tseba tsela ya Jehofa ya toka le toko gomme ka go rialo ra mo ekiša.—Ba-Roma 15:4.

O Dira ka Toka Eupša o na le Kwelobohloko

3, 4. Ke ka baka la’ng e be e le mo go swanetšego gore Jehofa a senye Sodoma le Gomora?

³ Kahlolo ya Modimo go Sodoma le Gomora ke mohlala o mobotse wo o bontšhago dibopego tše mmalwa tša toka ya Jehofa. Ga se feela gore Jehofa o ile a phetha kotlo e swanetšego, eupša gape o ile a nea phološo bakeng sa bao e ba swanelago. Na tshenyo ya metse yeo e be e swanetše e le ka kgonthe? Aborahama yo go bonalago a be a tseba ganyenyane ka bogolo bja bokgopo bja Sodoma, mathomong o be a nagana gore e be e se ya swanela. Jehofa o ile a kgonthišetša Aborahama gore ge e ba batho ba lesome feela ba lokilego ba be ba ka hwetšwa, o be a tla lesa go senya motse woo. Go molaleng gore toka ya Jehofa le ka mohla ga e dire dilo ka lebelo goba go ba yeo e se nago kgaugelo.—Genesi 18:20-32.

⁴ Go etelwa ke barongwa ba babedi go ile gwa nea bohlatse bjo bogolo bja go goboga boitshwarong ga Sodoma. Ge banna ba motse, “masoxana le bakxalabyê” ba be ba lemoga gore banna ba babedi ba be ba tlo dula legaeng la Loto, ba ile ba hlasela ngwako wa gagwe ka boikemišetšo bja go kata ka sehlopha bakeng sa go dira bosodoma. Bokgopo bja bona bo be bo tloga bo nweletše kudu gakaakang! Ka ntle le pelaelo, kahlolo ya Jehofa motseng woo e be e le ya go loka.—Genesi 19:1-5, 24, 25.

5. Modimo o ile a phološa Loto le lapa la gagwe bjang Sodoma?

⁵ Ka morago ga go tsopola tshenyo ya Sodoma le Gomora e le mohlala o lemošago, moapostola Petro o ngwadile gore: “Modimo, ba ba mmoifaxo ó ba hlakodiša melekong.” (2 Petro 2:6-9) Toka nkabe e se ya ka ya phethwa ge nkabe Loto wa moloki le lapa la gagwe ba ile ba fedišwa gotee le batho ba go se boife Modimo ba Sodoma. Ka go rialo, barongwa ba Jehofa ba ile ba lemoša Loto ka tshenyo e tlago. Ge Loto a be a dika-dika, barongwa “ka kwelobohloko ya Jehofa” (NW) ba ile ba mo swara ka seatla, ba swara mosadi wa gagwe le barwedi ba gagwe ka diatla gomme ba ba ntšha motseng. (Genesi 19:12-16) Re ka kgonthišega gore Jehofa o tla bontšha go kgomega mo go swanago bakeng sa baloki tshenyong e tlago ya tshepedišo ye e kgopo.

6. Ke ka baka la’ng re sa swanela go tshwenyega ka mo go feteletšego ka tshenyo e tlago ya tshepedišo e kgopo ya dilo?

⁶ Gaešita le ge bofelo bja tshepedišo ye e tla ba nako “ya go phetha toka,” ga go na lebaka la gore re tshwenyege ka mo go feteletšego. (Luka 21:22, NW) Kahlolo yeo Modimo a tlago go e phetha ka Haramagedone e tla itlhatsela ‘e le ya go loka ka mo go feletšego.’ (Psalme 19:9, NW) Ka ge Aborahama a ithutile, rena batho re ka bota toka ya Jehofa ka mo go feletšego yeo e lego boemong bjo bo phagamego kudu go feta bja ya rena. Aborahama o ile a botšiša gore: “A moahlodi wa lefase ka moka a ka se ke a dira ka go loka?” (Genesi 18:25, PK; bapiša le Jobo 34:10.) Goba bjalo ka ge Jesaya a e bea ka mo go swanetšego gore, “ke mang yo a rutago [Jehofa] tseleng ya toka?”—Jesaya 40:14, NW.

Tiro ya Toko Bakeng sa go Phološa Batho

7. Ke kgokagano efe e lego gona magareng ga toka ya Modimo le kgaugelo ya gagwe?

⁷ Toka ya Modimo ga e bonagatšwe feela tseleng yeo a otlago bafoši ka yona. Jehofa o itlhalosa e le “Modimo wa tokô, Mophološi.” (Jesaya 45:21) Ke mo go bonagalago gore go na le kgokagano ya kgaufsi magareng ga toko goba toka ya Modimo le kganyogo ya gagwe ya go kganyoga go phološa batho mafelelong a sebe. Ge e hlalosa ka temana ye, The International Standard Bible Encyclopedia, Kgatišo ya 1982 e hlalosa gore “toka ya Modimo e tsoma e le ka kgonthe go bonagatša kgaugelo ya Gagwe le go phetha phološo ya Gagwe.” Ga se gore toka ya Modimo e swanetše go tswakwa ka kgaugelo eupša go e na le moo, ke gore kgaugelo ke ponagatšo ya toka ya Modimo. Tokišetšo ya Modimo ya topollo bakeng sa phološo ya batho ke mohlala o kgahlišago kudu wa sebopego se sa toka ya Modimo.

8, 9. (a) Go be go akaretšwa’ng tlhalosong e rego, “tiro e tee ya go loka”? Ka baka la’ng? (b) Ke eng seo Jehofa a se nyakago go rena?

⁸ Theko ya topollo ka boyona—bophelo bjo bohlokwa bja Morwa wa Modimo yo a tswetšwego a nnoši, Jesu Kriste—e be e le e phagamego ka gobane ditekanyetšo tša Jehofa di apareditše gomme yena ka boyena o a di kgomarela. (Mateo 20:28) Bophelo bjo bo phethagetšego bja Adama bo ile bja timetšwa, ka gona go ile gwa nyakega bophelo bjo bo phethagetšego bja go lopolla bophelo bja ditlogolo tša Adama. (Ba-Roma 5:19-21) Moapostola Paulo o hlalosa tsela ya Jesu ya potego, go akaretša go lefša ga topollo e le “tiro e tee ya go loka.” (Ba-Roma 5:18, mongwalo wa ka tlase wa NW) Ke ka baka la’ng? Ka gobane go ya ka pono ya Jehofa, go lopolla batho e be e le selo se se nepagetšego le se lokilego go se dira, gaešita le ge go ile gwa nyaka mo gontši kudu. Bana ba Adama ba be ba le bjalo ka “lehlaka le le thinyexilexo,” leo Modimo a sa kago a nyaka go le thokgela ruri goba ba le bjalo ka “lebônênyana le le kunyêlêlaxo,” leo a sa kago a nyaka go le timela ruri. (Mateo 12:20) Modimo o be a kgodišegile gore banna le basadi ba bantši ba botegago ba be ba tla tšwelela gare ga ditlogolo tša Adama.—Bapiša le Mateo 25:34.

⁹ Re swanetše go arabela bjang tirong ye e phagamego ya lerato le toka? Se sengwe sa dilo tšeo Jehofa a di nyakago go rena ke gore re ‘bontšhe toka.’ (Mika 6:8, NW) Re ka dira se bjang?

Tsoma Toka, o Phegelele Toko

10. (a) Tsela e nngwe yeo re bontšhago toka ka yona ke efe? (b) Re ka tsoma bjang go loka ga Modimo pele?

¹⁰ Sa pele go tšohle, re swanetše go dumelelana le ditekanyetšo tša Modimo tša boitshwaro. Ka gobane ditekanyetšo tša Modimo ke tša toka le toko, re bontšha toka ge re phela ka go dumelelana le tšona. Ke seo Jehofa a se letetšego go batho ba gagwe. Jehofa o ile a botša ba-Isiraele gore: “Ithuteng go dira tše dibotse; tsomang toka.” (Jesaya 1:17, NW) Jesu o ile a nea keletšo e swanago go batheetši ba gagwe Thutong ya Thabeng ge a be a ba laela gore ba ‘tsome mmušo pele le go loka ga Modimo.’ (Mateo 6:33) Paulo o ile a kgothaletša Timotheo gore “[a] phêxêlêlê tokô.” (1 Timotheo 6:11) Ge re phela ka go dumelelana le ditekanyetšo tša Modimo tša boitshwaro gomme re apara semelo se sefsa, re phegelela toka ya kgonthe le toko. (Ba-Efeso 4:23, 24) Ka mantšu a mangwe, re tsoma toka ka go dira dilo ka tsela ya Modimo.

11. Ke ka baka la’ng gomme bjang re swanetšego go lwantšha go bušwa ke sebe?

¹¹ Bjalo ka ge re tseba gabotse, ga se ka mehla go lego bonolo go batho ba sa phethagalago go dira seo se lokilego le se se nepagetšego. (Ba-Roma 7:14-20) Paulo o ile a kgothaletša Bakriste ba Roma gore ba lwantšhe go buša ga sebe, e le gore ba ka iša mebele ya bona e neetšwego go Modimo e le “marumô a tokô,” ao a bego a tla ba le mohola go Modimo go phetheng morero wa gagwe. (Ba-Roma 6:12-14) Ka mo go swanago, ka go ithuta le go diriša Lentšu la Modimo ka mehla, re ka monya “tlhahlo ya monagano ya Jehofa” gomme ra ‘išwa tokong.’—Ba-Efeso 6:4, NW; 2 Timotheo 3:16, 17.

12. Ke eng seo re swanetšego go se phema ge e ba re tla swara ba bangwe ka tsela yeo re nyakago Jehofa a re swara ka yona?

¹² Sa bobedi, re bontšha toka ge re swara ba bangwe ka tsela yeo re nyakago Jehofa a re swara ka yona. Go bonolo go ba le ditekanyetšo tše pedi—ya go ba bonolo go rena ka noši eupša e thata bakeng sa ba bangwe. Re tshediša diphošo tša rena mahlo ka lebelo, eupša re akgofela go sola diphošo tša ba bangwe tšeo ge di bapišwa le tša rena e ka tlogago e e-ba tše sa rego selo. Jesu o ile a botšiša ka go lebanya gore: “O re’ng-xê Ò bôna lehlôkwana la mo ’ihlong la ngwan’eno, Ò sa lemoxe kwata ya mo ’ihlong la xaxo?” (Mateo 7:1-3) Re swanetše gore le ka mohla re se ke ra lebala gore ga go le o tee wa rena yo a bego a ka ema ge e ba Jehofa a be a ka hlahlobišiša diphošo tša rena. (Psalme 130:3, 4) Ge e ba toka ya Jehofa e mo dumelela gore a hlokomologe mafokodi a banababo rena, rena re bomang re ka ba ahlolago gampe?—Ba-Roma 14:4, 10.

13. Ke ka baka la’ng motho yo a lokilego a ikwa a tlamega go bolela ditaba tše di lokilego tša Mmušo?

¹³ Sa boraro, re bontšha toka ya go boifa Modimo ge re kopanela ka mafolofolo modirong wa boboledi. Jehofa o re eletša ka gore: “Yo a swanetšwexo ke tše botse O se mo hlokišê tšôna, xe ’atla sa xaxo sè kxôna xo di dira.” (Diema 3:27) E ka se be mo gobotse go ipolokela re nnoši tsebo e neago bophelo yeo Modimo a re neilego yona ka seatla se bulegilego gakaakaa. Ke therešo gore batho ba bantši ba ka gana molaetša wa rena, eupša ge feela Modimo a tšwela pele go fetišetša kgaugelo go bona, re swanetše go ikemišetša go tšwela pele re ba nea sebaka sa “[go] ka fihlêla thsokoloxô.” (2 Petro 3:9) Le gona ka go swana le Jesu, re ikwa re thaba ge re kgona go thuša motho yo mongwe go retologela tokeng le tokong. (Luka 15:7) Bjale ke nako e botse ya gore re ‘ipšalele toko.’—Hosea 10:12.

“Dikgošana tša Toka”

14. Ke tema efe yeo bagolo ba e kgathago mabapi le toka?

¹⁴ Ka moka ga rena re swanetše go sepela tseleng ya toko, eupša bagolo ka phuthegong ya Bokriste ba na le boikarabelo bjo bo kgethegilego tabeng ye. Pušo ya Jesu e le kgošana e ‘thekgwa ka toka le toko.’ Ka go dumelelana le seo, tekanyetšo ya bagolo ke toka ya Modimo. (Jesaya 9:6 [9:7, NW]) Ba gopola seo se hlaloswago ka tsela ya boporofeta go Jesaya 32:1: “Tsebang! Xo tlo bewa kxoši ya xo buša ka xo loka, ya bakxôma ba moahlolêlô wo o lokilexo.” Ka ge e le balebeledi ba kgethilwego ke moya goba ‘batseta ba Modimo,’ bagolo ba swanetše go dira dilo ka tsela ya Modimo.—Tito 1:7.

15, 16. (a) Bagolo ba ekiša bjang modiši yo a botegago seswantšhong sa Jesu? (b) Bagolo ba ikwa bjang ka bao ba lahlegilego moyeng?

¹⁵ Jesu o bontšhitše gore toka ya Jehofa e be e le e kwelago bohloko, ya kgaugelo le e leka-lekanego. Ka godimo ga tšohle, o ile a leka go thuša bao ba bego ba e-na le mathata gotee le “xo nyaka le xo phološa se se timetšexo.” (Luka 19:10) Go swana le modiši wa seswantšho sa Jesu yo a bego a tsoma a sa lape go fihla ge a hwetša nku yeo e bego e timetše, bagolo ba tsoma bao ba lahlegilego moyeng gomme ba katanela go ba hlahla gore ba boele ka lešakeng.—Mateo 18:12, 13.

¹⁶ Go e na le go bea bao ba ka bago ba dirile dibe tše dikgolo molato, bagolo ba tsoma go ba fodiša le go ba hlahla gore ba itshole ge e ba seo se kgonega. Ba a thaba ge ba kgona go thuša motho yo mongwe yo a lahlegilego. Lega go le bjalo, go a ba nyamiša ge mofoši a sa itshole. Ka gona ditekanyetšo tša Modimo tša go loka di nyaka gore ba kgaole motho yo a sa itsholego. Gaešita le ka morago ga moo, ka go swana le tate wa morwa wa lehlaswa ba holofela gore ka letšatši le lengwe mofoši o tla “ikxopola.” (Luka 15:17, 18) Ka go rialo, bagolo ba gata mogato wa pele wa go etela batho ba itšego ba kgaotšwego go ba gopotša kamoo ba ka boelago ka gona mokgatlong wa Jehofa.a

17. Ke pakane efe yeo bagolo ba bago le yona ge ba swaragana le taba ya go dirwa ga diphošo, gomme ke seka sefe seo se tlago go ba thuša go fihlelela pakane yeo?

¹⁷ Bagolo ba swanetše go ekiša toka ya Jehofa ka mo go kgethegilego ge ba swaragana le ditaba tša go dirwa ga diphošo. Badira-dibe ‘ba be ba batamela’ Jesu ka gobane ba be ba nagana gore o be a tla ba kwešiša le go ba thuša. (Luka 15:1; Mateo 9:12, 13) Ee, Jesu ga se a ka a tlogelela go dira diphošo. Go ba le Jesu dijong gatee go ile gwa tutueletša Sakeo, mohlalefetši yo a bego a tumile gampe gore a itshole le go lefelela tlaišego ka moka yeo a bego a e tlišitše godimo ga ba bangwe. (Luka 19:8-10) Bagolo lehono ba na le pakane e swanago ge ba le ditabeng tša boahlodi—gore ba lebiše mofoši boitsholong. Ge e ba ba batamelega go etša ge Jesu a be a le bjalo, bafoši ba bantši ba tla hwetša go le bonolo go tsoma thušo ya bona.

18. Ke eng seo se tlago go dira gore bagolo ba be bjalo ka “tšhireletšo ge phefo e foka”?

¹⁸ Pelo e kgomegago e tla thuša bagolo go diriša toka ya Modimo, e lego yeo e sego bogale goba ya go se naganele. Ka mo go kgahlišago, Esera o ile a lokiša pelo ya gagwe e sego monagano wa gagwe feela, e le gore a rute ba-Isiraele toka. (Esera 7:10) Pelo e kwešišago e tla dira gore bagolo ba kgone go diriša melao ya motheo e swanetšego ya Mangwalo le go šetša maemo a motho ka o tee ka o tee. Ge Jesu a be a fodiša mosadi yo a bego a na le bolwetši bja ngope, o bontšhitše gore toka ya Jehofa e bolela go kwešiša morero gotee le motheo wa molao. (Luka 8:43-48) Bagolo bao ba dirišago toka ka kwelobohloko ba ka swantšhwa le “tšhireletšo ge phefo e foka” bakeng sa bao ba tlaišitšwego ke mafokodi a bona ka noši goba ke tshepedišo ye e kgopo yeo re phelago go yona.—Jesaya 32:2, PK.

19. Kgaetšedi yo mongwe o ile a arabela bjang go dirišweng ga toka ya Modimo?

¹⁹ Kgaetšedi yo mongwe yo a bego a dirile sebe se segolo o ile a lemoga toka ya Modimo ka go iponela ka mahlo. O dumela ka gore: “Go bolela therešo, ke be ke boifa go ya go bagolo. Eupša ba ile ba ntshwara ka kwelobohloko le seriti. Bagolo ba be ba swana le bo-tate go e na le baahlodi ba bogale. Ba ile ba nthuša go kwešiša gore Jehofa o be a ka se ntahle ge e ba ke ikemišeditše go lokiša ditsela tša-ka. Ke iponetše ka mahlo kamoo a re layago ka gona bjalo ka Tate yo lerato. Ke ile ka kgona go bulela Jehofa pelo ya-ka, ke kgodišegile gore o be a tla kwa kgopelo ya-ka. Ge ke lebelela morago, nka bolela ka mo go nepagetšego gore go kopana moo le bagolo nywaga e šupago e fetilego e be e le tšhegofatšo e tšwago go Jehofa. Ga e sa le go tloga ka nako yeo, tswalano ya-ka le yena e bile e matla kudu.”

Boloka Toka Gomme o Dire Seo se Lokilego

20. Mehola ya go kwešiša le go bontšha toka le toko ke efe?

²⁰ Ka mo go lebogegago, toka ya Modimo e bolela mo gontši go feta go fo nea motho yo mongwe le yo mongwe seo se mo swanetšego. Toka ya Jehofa e mo tutueleditše go nea bao ba bontšhago tumelo bophelo bjo bo sa felego. (Psalme 103:10; Ba-Roma 5:15, 18) Modimo o dirišana le rena ka tsela ye ka gobane toka ya gagwe e šetša maemo a rena gomme e tsoma go phološa go e na le go bea molato. Ka kgonthe, kwešišo e kaone ya tekanyo ya toka ya Jehofa e re batametša kgaufsi le yena. Le gona ge re dutše re katanela go ekiša sebopego se sa semelo sa gagwe, maphelo a rena le a ba bangwe a tla šegofatšwa ka mo go humišago. Go phegelela ga rena toka ga se gore go ka se bonwe ke Tatago rena wa legodimong. Jehofa o a re holofetša: “Lena batho, bolokang toka gomme le dire seo se lokilego. Gobane phološo ya-ka e batametše go tla, le gore toko ya-ka e utollwe. Motho yo a dirago se o a thaba.”—Jesaya 56:1, 2, NW.

[Mengwalo ya tlase]

Na o a Gopola?

◻ Tshenyo ya Sodoma le Gomora e re ruta’ng ka toka ya Jehofa?

◻ Ke ka baka la’ng topollo e le pontšho e kgethegilego ya toka le lerato la Modimo?

◻ Ke ditsela dife tše tharo tšeo re ka bontšhago toka ka tšona?

◻ Ke ka tsela efe e kgethegilego bagolo ba ka ekišago toka ya Modimo?

[Seswantšho go letlakala 15]

Re bontšha toka ya go boifa Modimo ka modiro wa rena wa boboledi

[Seswantšho go letlakala 16]

Ge bagolo ba bonagatša toka ya go boifa Modimo, bao ba nago le mathata ba hwetša go le bonolo go tsoma thušo ya bona

[Seswantšho go letlakala 17]