la xaxwe le ka bokwala bya xaxwe.” (2 Petro 1:2, 3) Ka gona o tswalanya go ba le botho bjo sa swanelago le khutšo le go hwetša ga rena tsebo ya go tseba Modimo le Morwa wa gagwe. Seo se a kwagala, ka ge Mmopi Jehofa, e le mothopo wa tsebo ya kgonthe. Motho yo a boifago Modimo o kgona go bona dilo ka pono e botse le go fihlelela diphetho tše kwagalago.—Diema 1:7.

⁶ Ka gona Petro o ile a kgothatša ka gore: “Tumêlô ya lena e tšweletšê bokwala; bokwala bo tšweletše tsebô; Tsebô e tšweletšê boithswarô; boithswarô bo tšweletšê kxôtlêlêlô; kxôtlêlêlô e tšweletšê borapedi; borapedi bo tšweletšê leratanô; leratanô le tšweletšê lôna leratô-ratô.” (2 Petro 1:5-8)b Kgaolong e latelago, re bala gore go hwetša tsebo go thuša batho gore ba lokologe ditšhileng tša lefase. (2 Petro 2:20) Ka gona Petro o hlalositše ka mo go kwagalago gore bao ba fetogago Bakriste ba nyaka tsebo, go etša ge go le bjalo ka bao ba šetšego ba hlankela Jehofa. Na o go le lengwe la magoro ao?

Ithute, Boeletša, o Diriše

7. Ba bantši ba hweditše tsebo e nepagetšego ya ditherešo tša motheo tša Beibele ka tsela efe?

⁷ Mohlomongwe o ithuta Beibele le Dihlatse tša Jehofa ka gobane o lemoga go kwala ga therešo molaetšeng wa bona. Gatee ka beke, ka iri e tee goba go feta moo, o hlahloba sehlogo sa Beibele o diriša thušo e bjalo ka O ka Phela ka mo go sa Felego Paradeiseng mo Lefaseng. Ke mo gobotse! Ba bantši bao ba bilego le thuto e bjalo le Dihlatse tša Jehofa ba hweditše tsebo e nepagetšego. Lega go le bjalo, ke’ng seo o ka se dirago gore o oketše tekanyo yeo o ithutago yona ka noši? Ditšhišinyo tše dingwe šidi.c

8. Ke’ng seo morutwana a ka se dirago gore a ithute mo go oketšegilego ge a lokišetša thuto?

⁸ E sa le pele, ge o dutše o lokišetša thuto ya gago, hlahloba taba yeo e tlago go akaretšwa. Seo se bolela go lebelela sehlogo sa kgaolo, dihlogwana le diswantšho lege e le dife tšeo di dirišitšwego bakeng sa go hlalosa taba. Ke moka ge o dutše o bala serapa goba karolo ya puku, tsoma dikgopolo tša motheo le mangwalo ao a di thekgago, o di thalele goba o di bonagatše ka mmala. Go bona ge e ba o kwešišitše ditherešo tšeo di akareditšwego, leka go araba dipotšišo tšeo di lego dirapeng tše di fapa-fapanego. Ge o dutše o dira bjalo, leka go hlama dikarabo ka mantšu a gago ka noši. Sa mafelelo, boeletša thuto, o leka go gopola dintlha tše kgolo le mabaka ao a di thekgago.

9. Go diriša ditšhišinyo tše di lego mabapi le thuto go ka thuša motho bjang gore a kwešiše?

⁹ O ka letela gore tsebo ya gago e oketšege ge e ba o diriša ditšhišinyo tše. Ka baka la’ng? Lebaka le lengwe ke gore o tla ba o leba taba ka kganyogo e tseneletšego ya go ithuta, bjalo ka ge eka o lokiša mmu. Ka go hwetša kakaretšo gomme ka morago wa lebelela dintlha tše dikgolo le tsela yeo mabaka a beilwego ka yona, o tla bona kamoo ditaba ka botlalo di tswalanago le sehlogo goba phetho. Poeletšo ya mafelelo e tla go thuša go gopola seo o ithutilego sona. Go thwe’ng ka nakong ya ka morago thutong ya gago ya Beibele?

10. (a) Ke ka baka la’ng go fo boeletša dintlha goba tsebišo e mpsha go hola ganyenyane? (b) Ke’ng seo se akaretšwago tabeng ya “go tšwela pele o gopola dilo tše difsa ka nako e telele”? (c) Barwa ba ba-Isiraele ba swanetše go ba ba ile ba holwa bjang ke poeletšo?

¹⁰ Ditsebi lehlakoreng la thuto di tseba bohlokwa bja poeletšo yeo e dirwago ka nako e swanetšego le ka morero. Se ga e fo ba go touta mantšu mo go se nago tlhaloganyo, moo o ka bago o ile wa go leka ge o be o le sekolong ge o ithuta maina a mangwe, ntlha, goba kgopolo ka go se diriše tlhaloganyo. Na lega go le bjalo, o hweditše gore kapejana o ile wa lebala seo o bego o se reta, wa hwetša gore se phumolegile ka bjako monaganong wa gago? Ka baka la’ng? Go fo touta lentšu goba taba e mpsha e ka ba mo go tenago, gomme mafelelo a seo ke a nakwana. Ke’ng seo se ka fetolago seo? Go nyaka ga gago e le ka kgonthe go ithuta go tla thuša. Thušo e nngwe ke poeletšo e nago le morero. Metsotso e sego kae ka morago ga gore o ithute ntlha, pele o e lebala leka go fatolla seo o ithutilego sona ka go wena. Se se ile sa bitšwa “go tšwela pele o gopola dilo tše difsa ka nako e telele.” Ka go hlahlabolla mogopolo wa gago pele o lebala, o oketša tekanyo ya go swara ka nako e telele. Isiraeleng bo-tate ba be ba swanetše go tiišetša bana ba bona ditaelo tša Modimo. (Doiteronomio 6:6, 7) ‘Go tiišetša’ go bolela go ruta ka go boeletša. Go bonala ba bantši ba bo-tate bao ba ile ba thoma ka go nea barwa ba bona melao yeo; ka morago ba boeletša tsebišo yeo; ke moka ba botšiša barwa ba bona dipotšišo ka seo se bego se ithutwa.

11. Ke’ng seo se ka dirwago nakong ya thuto ya Beibele bakeng sa go oketša tsebo?

¹¹ Ge e ba Hlatse e swara thuto ya Beibele le wena, e ka go thuša go ithuta ka go ba le dikakaretšo tše di tšwelago pele ge thuto e le gare e tšwela pele. Se ga se bjana. Ke mokgwa woo o kaonefatšago go ithuta, ka gona kopanela ka lethabo dipoeletšong tša nako le nako. Ke moka, mafelelong a thuto kopanela poeletšong ya mafelelo yeo go yona o arabago go tšwa go seo o se gopolago. Mo gongwe o ka hlalosa dintlha ka mantšu a gago go etša ge o be o tla dira ge o ruta motho o mongwe. (1 Petro 3:15) Se se tla thuša go dira gore seo o ithutilego sona e be karolo ya seo o se gopolago ka nako e telele.—Bapiša le Psalme 119:1, 2, 125; 2 Petro 3:1.

12. Morutwana ka noši a ka dira’ng go kaonefatša mogopolo wa gagwe?

¹² Mogato o mongwe o thušago e tla ba gore o botše o mongwe ka seo o ithutilego sona lebakeng la letšatši goba a mabedi ka morago, e ka ba yo o tsenago le yena sekolo, modiri-gotee le wena goba moagišani. O ka mmotša sehlogo gomme wa bolela gore o nyaka go bona ge e ba o ka kgona go gopola mokgwa wa motheo wo mabaka a beilwego ka wona goba ditemana tšeo di a thekgago go tšwa Beibeleng. Seo se ka tsoša kgahlego ya motho yoo. Gaešita lege se sa e tsoše, mogato wo wa go boeletša ga gago tsebišo e mpsha ka morago ga lebaka la letšatši goba a mabedi o tla e nweletša mogopolong wa gago. Ruri o tla ba o ithutile, o dira seo 2 Petro 3:18 e se kgothaletšago.

Go Ithuta ka Mafolofolo

13, 14. Ke ka baka la’ng re swanetše go nyaka go fetela ka kua ga go fo hwetša le go gopola tsebišo?

¹³ Go ithuta ga se feela go monya dintlha goba go kgona go gopola tsebišo. Batho ba bodumedi mehleng ya Jesu ba dirile seo ka dithapelo tša bona tša go touta. (Mateo 6:5-7) Eupja ba ile ba kgongwa bjang ke tsebišo? Na ba be ba tšweletša dienywa tša toko? Le gatee. (Mateo 7:15-17; Luka 3:7, 8) Karolo ya bothata e be e le gore tsebo ga se ya nwelela dipelong tša bona, ya ba le mafelelo a mabotse go bona.

¹⁴ Go ya ka Petro, se e be e swanetše go ba se se fapanego ka Bakriste, morago nakong yeo le gona bjale. O re kgothaletša gore re okeletše tsebo tumelong ya rena yeo e tlago go re thuša go phema go tapa goba go se tšweletše dienywa. (2 Petro 1:5, 8) Gore se se be bjalo go rena, re swanetše go nyaka go gola tsebong yeo le go nyaka gore e re kgome ka gare-gare, e kgome motho wa rena wa ka gare. Seo se ka no se direge ka mehla.

15. Ke bothata bofe bjo bo ilego bja tšwelela ka Bakriste ba bangwe ba ba-Hebere?

¹⁵ Mehleng ya Paulo Bakriste ba ba-Hebere ba ile ba ba le bothata tabeng ye. Ka ge e be e le ba-Juda ba be ba e-na le tsebo e itšego ya Mangwalo. Ba be ba tseba ka Jehofa le tše dingwe tša dilo tše a bego a di nyaka. Ka morago ba ile ba oketša tsebo ka Mesia, ba bontšha tumelo, gomme ba kolobetšwa gore e be Bakriste. (Ditiro 2:22, 37-41; 8:26-36) Ka dikgwedi tše dintši le nywaga, ba swanetše go ba ba ile ba ba gona dibokeng tša Bokriste, moo ba bego ba ka ba le karolo go baleng mangwalo le go neeng ditlhaloso. Lega go le bjalo, ba bangwe ga se ba ka ba gola tsebong. Paulo o ngwadile gore: “Xobane, le xe xo swanetše Lè e-ba baruti ka xo rutwa è le kxalê, byale xo rata xe motho à boeletša xo Le ruta ditaba tša mathômô a thutô ya Modimo, ka xe Le bile ba xo fiwa lebese, e sexo dijô tše di tiilexo.” (Ba-Hebere 5:12) Seo se be se ka ba bjalo bjang? Na le rena se ka re diragalela?

16. Lehlwa leo le sa tologego ke’ng, gomme le kgoma bjang dimela?

¹⁶ Go bontšha se, nagana ka mmu woo o dulago o e-na le lehlwa mafelong a Arctic le a mangwe moo thempheretšha e tlwaelegilego e lego ka tlase ga go kgahla. Mmu, malwala, le meetse ao a lego mmung a a kgahla a fetoga mokgobo o mogolo o kgahlilego, ka dinako tše dingwe a iša fase ka dimithara tše 900. Selemo go tologa go ka direga karolong ya ka godimo ya mmu (yeo e bitšwago llaga e šomago). Lega go le bjalo, llaga ye e tshesane ya mmu o tologilego gantši e ka sebopego sa leraga ka gobane monola o ka se nwelele lehlweng leo le sa tologego leo le lego ka tlase. Dimela tšeo di melago llageng e tshesane ya ka godimo gantši ke tše dinyenyane goba tše sa golego; medu ya tšona ga e kgone go tsenelela lehlweng le le sa tologego. Mo gongwe o ka botšiša gore, ‘Lehlwa le le sa tologego le tswalana bjang le taba ya ge e ba ke gola tsebong ya therešo ya Beibele?’

17, 18. Lehlwa le le sa tologego le llaga ya lona e šomago di ka dirišwa bjang go bontšha seo se diragetšego ka Bakriste ba bangwe ba ba-Hebere?

¹⁷ Lehlwa le le sa tologego le swantšhetša boemo bja motho yoo matla a gagwe a monagano a sa nwelelego ka mafolofolo tabeng ya go monya tsebo e nepagetšego, go e gopola le go e diriša. (Bapiša le Mateo 13:5, 20, 21.) Motho mohlomongwe o na le matla a monagano a go ithuta dithuto tše di fapa-fapanego, go akaretša le therešo ya Beibele. O ithutile “ditaba tša mathômô a thutô ya Modimo” gomme a ka ba a ile a swanelegela go kolobetšwa go etša ge go dirile Bakriste ba ba-Hebere. Lega go le bjalo, a ka no se “iše pele ka tša phêthêxô,” dilong tšeo di fetago “tša mathômô a thutô ya Kriste.”—Ba-Hebere 5:12; 6:1.

¹⁸ Bona ka leihlo la kgopolo ba bangwe ba Bakriste bao ba le dibokeng morago nakong yeo. Ba be ba le gona e bile ba phafogile, eupja na menagano ya bona e be e swaregile go ithuteng? Na ba be ba gola ka mafolofolo le ka potego tsebong? Mohlomongwe go be go se bjalo. Go batho bao ba sa golago tsebong, go ba le karolo lege e le gofe dibokeng go be go le bjalo ka ge e ka go direga llageng e tshesane e šomago, mola ka tlase go be go e-na le lehlwa le išago fase. Medu ya ditherešo tše di tiilego goba tše di raraganego kudu e ka se tsenelele karolong ya monagano yeo e nago le lehlwa leo le sa tologego.—Bapiša le Jesaya 40:24.

19. Ke ka tsela efe Mokriste yo a nago le phihlelo lehono a ka bago bjalo ka Bakriste ba ba-Hebere?

¹⁹ Go ka ba bjalo le ka Mokriste lehono. Gaešita lege a le gona dibokeng a ka no se diriše dibaka tšeo go gola tsebong. Go thwe’ng ka go tšea karolo go tšona ka mafolofolo? Go ka nyaka boiteko bjo bogolo gore motho yo mofsa goba mofsa ka nywaga a ithapele go bala temana ya lengwalo goba a nee tlhaloso ka mantšu a serapa, e lego seo se bontšhago go dirišwa mo gobotse ga bokgoni bja gagwe. Eupja Paulo o bontšhitše gore go ba bangwe, ka baka la nako yeo ba bilego Bakriste ka yona, ba swanetše go tšwela pele go feta mogato woo wa pele wa go ba le karolo ge e ba ba nyaka go tšwela pele ba gola tsebong.—Ba-Hebere 5:14.

20. Ke go itlhahloba gofe mo o mongwe le o mongwe wa rena a swanetšego go go dira?

²⁰ Ge e ba Mokriste yo a nago le phihlelo a se a ka a tšwela pele go feta feela go bala temana ya Beibele goba go fo nea tlhaloso ya motheo ka go lebanya go tšwa serapeng, gona mohlomongwe go kopanela ga gagwe go tšwa “llageng e šomago” ya ka godimo ya monagano wa gagwe. Ge re tšwetša pele papišo ya rena ya lehlwa le le sa tologego re ka re, go ka feta diboka di latelelana karolo e išago ya matla a monagano wa gagwe e dutše e le boemong bja go kgahla. Re swanetše go ipotšiša: ‘Na go bjalo ka nna? Na ke dumeletše mohuta wa monagano wa lehlwa le le sa tologego o ntsena? Ke phafogilego gakaakang monaganong le go ba yo a kgahlegelago go ithuta?’ Gaešita le ge re sa ikholofele ka dikarabo tša rena tše botegago, re ka thoma gona bjale go gata megato ya go gola tsebong.

21. Ke megato efe yeo e ahla-ahlilwego pejana yeo o ka e dirišago ge o lokišetša diboka goba o le go tšona?

²¹ Re le motho ka o tee ka o tee re ka diriša ditšhišinyo tšeo di lego go serapa 8. Go sa šetšwe gore ke nako e telele gakaakang re dutše re kopanela le phuthego, fela re ka ikemišetša go iša pele kgolong le tsebong e oketšegilego. Go ba bangwe se se tla bolela go lokišetša diboka ka phišego e oketšegilego, mohlomongwe ba tsošološe mekgwa yeo e bego e dirišwa nywageng e fetilego yeo e ilego ya kgaotšwa ganyenyane-ganyenyane. Ge o dutše o lokišetša, leka go bona gore dintlha tše dikgolo ke dife le go kwešiša mangwalo ao a sa tlwaelwago ao a dirišitšwego go tšweletša mekgwa ya go bea mabaka. Nyaka lehlakore lege e le lefe le lefsa goba karolo tabeng yeo e ithutwago. Ka mo go swanago, nakong ya seboka, leka go diriša go wena ditšhišinyo tšeo di boletšwego go dirapa 10 le 11. Katanela go dula o phafogile monaganong, bjalo ka ge e ka o boloka thempheretšha ya monagano wa gago e phagame. Seo se tla lwantšha tshekamelo lege e le efe ya gore “lehlwa le le sa tologego” le agele; boiteko bjo bjo matla gape bo tla tološa boemo lege e le bofe “bjo bo kgahlilego” bjo bo ka bago bo ile bja tšwelela nakong e fetilego.—Diema 8:12, 32-34.

Tsebo ke Thušo e Išago go Tšweletšeng Dienywa

22. Re tla holega bjang ge e ba re katanela go oketša tsebo ya rena?

²² O mongwe le o mongwe wa rena o tla holega bjang ge e ba re šomela tabeng ye ya go gola bothong bjo sa swanelago le tsebong ya go tseba Morena wa rena le Mophološi Jesu Kriste? Ka go dira ga rena boiteko bjo matla go boloka matla a monagano wa rena a phafogile, a loketše go monya tsebo, dipeu tša ditherešo tše mpsha le tše di raraganego tša Beibele di tla tsema medu e išago fase, gomme kwešišo ya rena e tla oketšega ya ba ya ka mo go sa felego. E tla swana le seo Jesu a se boletšego seswantšhong se se fapanego mabapi le dipelo. (Luka 8:5-12) Dipeu tše di welago mmung o mobotse di ka tšweletša medu e tiilego bakeng sa go thekga dimela tšeo di tšweletšago le go enywa dienywa.—Mateo 13:8, 23.

23. Ke mafelelo a afe ao a ka bago gona ge re tšeela godimo 2 Petro 3:18? (Ba-Kolose 1:9-12)

²³ Seswantšho sa Jesu se fapane ka tsela e itšego, eupja mafelelo a mabotse a be a swana ka tsela e itšego le seo Petro a se holofeditšego ka gore: “Byale a nke le phêxêleleng ruri xore tumêlô ya lena e tšweletšê bokwala; bokwala bo tšweletšê tsebô; . . . Xe dilô tše di ata, xôna Le ka se dule fêla Lè hlôka dienywa tše di išaxo tsebong ya xo tseba Mong wa rena Jesu Kriste.” (2 Petro 1:5-8) Ee, go gola ga rena tsebong go tla re thuša gore re be ba tšweletšago dienywa. Re tla hwetša gore go monya tsebo e oketšegilego le go feta e tla ba mo go thabišago ka mo go oketšegilego. (Diema 2:2-5) Seo o ithutago sona o tla dula o se gopola gabonolo gomme sa go hola ge o ruta ba bangwe gore e be barutiwa. Ka gona, ka tsela ye o tla ba yo a enywago kudu gomme wa tliša tumišo go Modimo le go Morwa wa gagwe. Petro o phethile lengwalo la gagwe la bobedi ka gore: “Sa lena a e bê xo tšwêlêla pele Lè le ba xo xauxêlwa le ba xo tseba Mong wa rena Mophološi Jesu Kriste. Xo rêtwa a e bê xa xaxwe mehleng ya byale, xo bê xo fihlê letšatši leo le le sa fetexo.”—2 Petro 3:18.

Dira Gore Boitshwaro bja Gago bo Tšwele Pele bo le Gona Gomme bo Ate

“Tumêlô ya lena e tšweletšê . . . bothswarô.”—2 PETRO 1:5, 6.

1. Ke maemong afe a sa tlwaelegago moo Mokriste a ka neago bohlatse?

JESU o itše; “Ba tlo Le bexa xo babuši le dikxoši ka ’baka la-ka, ya tlo ba bohlatse xo bôná.” (Mateo 10:18) Ge e ba o be o bileditšwe pele ga mmuši, moahlodi, goba mopresidente, ke’ng seo o bego o tla bolela ka sona? Mohlomongwe o be o tla thoma ka go botšiša lebaka leo ka lona o lego moo, le seo o latofatšwago ka sona. Moya wa Modimo o be o tla go thuša go dira bjalo. (Luka 12:11, 12) Eupja na o ka inagana o bolela ka boitshwaro? Na o lebelela seo e le karolo ya bohlokwa ya molaetša wa rena wa Bokriste?

2, 3. (a) Go diregile bjang gore Paulo a nee bohlatse go Felikisi le Dirusila? (b) Ke ka baka la’ng boitshwaro e be e le taba e swanetšego gore Paulo a ka bolela ka yona boemong bjoo?

² Nagana ka mohlala wa kgonthe. O mongwe wa dihlatse tša Jehofa o ile a swarwa gomme a tlišwa tshekong. Ge a newa sebaka sa go bolela, o ile a nyaka go hlalosa ditumelo tša gagwe bjalo ka Mokriste, e le hlatse. O ka hlahloba pego ye gomme o tla hwetša bohlatse bjo bo kwagalago