Morwa-moratwa wa xaxwe.”—Ba-Kolose 1:13; 3:1.

15, 16. (a) Ke ka baka la’ng re re Jesu ga se a ba Kgoši ya Mmušo wa Modimo ka 33 C.E.? (b) Jesu o thomile neng go buša Mmušong wa Modimo?

¹⁵ Lega go le bjalo, ka nako yeo Jesu ga se a gata mogato e le Kgoši le Moahlodi godimo ga ditšhaba. O ile a dudišwa kgaufsi le Modimo, a letetše nako ya go gata mogato e le Kgoši ya Mmušo wa Modimo. Paulo o ngwadile ka yena gore: “Ké ofe wa Barongwa yo a mmoditšexo a re: Dula ka letsoxong la-ka le letona, ke bê ke dirê manaba a xaxo boxatô bya ’naô tša xaxo?”—Ba-Hebere 1:13.

¹⁶ Dihlatse tša Jehofa di phatlaladitše bohlatse bjo bontši bja gore lebaka la Jesu la go leta le fedile ka 1914, ge a be a e-ba mmuši wa Mmušo wa Modimo magodimong a sa bonagalego. Kutollo 11:15, 18 e re: “Mebušô ya lefase e tlile ya ba Mmušô wa Mong wa rena le wa Motlotšwa wa xaxwe. Xomme ó tlo buša xo iša mehleng ya neng le neng!” “Ba-ntlê ba xalefile, xwa tla boxale bya xaxo.” Ee, ditšhaba di bontšhitše go galefelana ga tšona nakong ya Ntwa ya I ya Lefase. (Luka 21:24) Dintwa, ditšhišinyego tša lefase, mauba a bolwetši, tlhaelelo ya dijo le tše di swanago le tšeo, tše re di bonego ga e sa le go tloga ka 1914 di tiiša gore bjale Jesu o buša Mmušong wa Modimo gomme bofelo bja mafelelo bja lefase bo kgaufsi.—Mateo 24:3-14.

17. Ke dintlha dife tša motheo tšeo re di hlalositšego go fihla ga bjale?

¹⁷ Se se latelago ke poeletšo e kopana: Modimo a ka bolelwa e le yo a dutšego sedulong sa bogoši e le Kgoši, eupša ka kgopolo e nngwe a ka dula sedulong sa gagwe sa bogoši bakeng sa go ahlola. Ka 33 C.E., Jesu o ile a dula ka letsogong le letona la Modimo gomme bjale ke Kgoši ya Mmušo. Eupša na Jesu yoo bjale a bušago e le Kgoši o bile o šoma e le Moahlodi? Gona ke ka baka la’ng re swanetše go tshwenyega ka se, kudu-kudu mo nakong ye?

18. Go na le bohlatse bofe bja gore Jesu e be e bile e tla ba Moahlodi?

¹⁸ Jehofa yo a nago le tshwanelo ya go kgetha baahlodi, o kgethile Jesu e le Moahlodi yo a fihlelelago ditekanyetšo tša Gagwe. Jesu o bontšhitše se ge a be a bolela ka batho ba thomago go phela moyeng: “Tate xa a sekiše [“ahlole,” NW] motho, kahlolô ka moka ó e xafetše Morwa.” (Johane 5:22) Lega go le bjalo, karolo ya Jesu ya boahlodi e fetela ka kua ga mohuta woo wa go ahlola, ka gobane ke moahlodi wa ba phelago le ba hwilego. (Ditiro 10:42; 2 Timotheo 4:1) Paulo o kile a tsebatša gore: “[Modimo] ó beile ’tšatši a tl’o xo ahlola lefase ka lôna ka tokô. Moahlodi ké Monna [Jesu] yo a mmeilexo, a bulêla batho bohle tsela ya tumêlô xe a Mo tsoša bahung.”—Ditiro 17:31; Psalme 72:2-7.

19. Ke ka baka la’ng e le mo go nepagetšego go bolela ka Jesu e le yo a dutšego e le Moahlodi?

¹⁹ Ka gona, na re a lokafatšwa tabeng ya go phetha ka gore Jesu o dula sedulong sa bogoši sa letago karolong e kgethegilego ya Moahlodi? Ee. Jesu o boditše baapostola gore: “Mohla xó tl’o xo mphsafala tšohle, mohla Morwa-motho à tl’o xo dula sedulong sa letaxô la xaxwe, lena ba Le ntatetšexo [le lena, NW] Le tlo dula ditulong tše lesome le metšô e mebedi, la ahlolêla meloko e lesome le metšô e mebedi ya Isiraele.” (Mateo 19:28, mongwalo o sekamego ke wa rena.) Gaešita le ge Jesu e le Kgoši ya Mmušo mo nakong ye, modiro wa gagwe o oketšegilego o boletšwego go Mateo 19:28 o tla akaretša go dula sedulong sa bogoši bakeng sa go ahlola Nywageng e Sekete. Ka nako yeo o tla ahlola batho ka moka, e lego baloki le ba sa lokago. (Ditiro 24:15) Ke mo go thušago go dula re gopola se ge re dutše re lebiša tlhokomelo ya rena go se sengwe sa diswantšho tša Jesu se se tswalanago le mehla ya rena le maphelo a rena.

Seswantšho se Re’ng?

20, 21. Baapostola ba Jesu ba ile ba botšiša’ng se se tswalanago le mehla ya rena, sa lebiša potšišong efe?

²⁰ Nako e kopana pele ga ge Jesu a e-hwa, baapostola ba gagwe ba ile ba mmotšiša gore: “Dilo tše di tla direga neng, gona pontšho ya go ba gona ga gago le ya bofelo bja tshepedišo ya dilo e tla ba eng?” (Mateo 24:3, NW) Jesu o boletše e sa le pele ka ditiragalo tše bohlokwa lefaseng pele ga ge ‘bofelo bo ka tla.’ Pejana ga bofelo bjoo, ditšhaba di tla “bôna Morwa-motho á e-tla à le marung a lexodimo, à e-tla ka matla le ka letaxô le lexolo.”—Mateo 24:14, 29, 30.

²¹ Ka gona, batho ditšhabeng tšeo ba tla ema bjang ge Morwa wa motho a e-tla ka letago la gagwe? Anke re nyakišišeng go tšwa seswantšhong sa dinku le dipudi seo se thomago ka mantšu a rego: “Mohla Morwa-motho a tlaxo ka letaxô la xaxwe à na le Barongwa ba xaxwe ka moka, ó tlo dula sedulong sa xaxwe sa boxoši sa letaxô. ’Me dithšaba ka moka di tlo phuthêlwa pele xa xaxwe.”—Mateo 25:31, 32.

22, 23. Ke dintlha dife tše di bontšhago gore seswantšho sa dinku le dipudi ga se sa thoma go phethagala ga sona ka 1914?

²² Na seswantšho se se šoma nakong yeo ka yona Jesu a dutšego matleng a bogoši ka 1914, go etša ge e le kgale re kwešiša bjalo? Ee, Mateo 25:34 e bolela ka yena e le Kgoši, ka gona seswantšho se se phethagala ka mo go kwalago ka ge Jesu a bile Kgoši ka 1914. Eupša ke go ahlola gofe mo a go dirilego nakwana ka morago ga moo? E be e se go ahlolela “dithšaba ka moka.” Go e na le moo, o ile a lebiša tlhokomelo ya gagwe go ba ipolelago gore ba bopa “Ngwakô wa Modimo.” (1 Petro 4:17, mongwalo o sekamego ke wa rena.) Ka go dumelelana le Maleaki 3:1-3, Jesu o ile a hlahloba Bakriste ba tloditšwego ba bego ba šetše lefaseng ka tsela ya boahlodi e le motseta wa Jehofa. E be e bile e le nako ya kahlolo go Bojakane bjo bo bego bo ipolela ka maaka gore ke “Ngwakô wa Modimo.”c (Kutollo 17:1, 2; 18:4-8) Lega go le bjalo ga go na se se bontšhago gore ka nako yeo goba gaešita le go tloga ka nako yeo, Jesu o ile a dula bakeng sa go ahlola batho ba ditšhaba ka moka mafelelong e le dinku goba dipudi.

²³ Ge re seka-seka modiro wa Jesu seswantšhong, re mmona a ahlola ditšhaba ka moka mafelelong. Seswantšho ga se bontšhe gore go ahlola mo go bjalo go be go tla tšwela pele ka lebaka le letelele la nywaga e mentši, bjalo ka ge eka motho yo mongwe le yo mongwe yo a hwago nywaga-someng ye e fetilego o be a ahlotšwe e le yo a swanelwago ke lehu la ka mo go sa felego goba bophelo bjo bo sa felego. Go bonala bontši bja ba hwilego nywaga-someng ya morago bjale ba ile lebitleng le tlwaelegilego la batho. (Kutollo 6:8; 20:13) Ka gona, seswantšho se bontšha nako yeo ka yona Jesu a ahlolago batho ba “dithšaba ka moka” ba phelago ka nako yeo gomme ba lebeletšane le go phethwa ga kahlolo ya gagwe.

24. Seswantšho sa dinku le dipudi se tla phethagala neng?

²⁴ Ka mantšu a mangwe, seswantšho se šupa nakong e tlago yeo ka yona Morwa wa motho a tlago go tla ka letago la gagwe. O tla dula gore a ahlole batho ba phelago ka nako yeo. Kahlolo ya gagwe e tla thewa go seo ba ipontšhitšego ba le sona. Ka nako yeo “phapano magareng ga moloki le yo kgopo” e tla be e bonwe gabotse. (Maleaki 3:18, NW) Go bolelwa ga kgonthe le go phethwa ga kahlolo di tla phethwa ka nako e lekaneditšwego. Jesu o tla nea dikahlolo tša toka tše theilwego go seo se bonagetšego ka batho ka o tee ka o tee.—Bona le 2 Ba-Korinthe 5:10.

25. Mateo 25:31 e bontšha’ng ge e bolela ka Morwa wa motho a dutše sedulong sa gagwe sa bogoši sa letago?

²⁵ Ka gona, se se bolela gore ‘go dula [ga Jesu] sedulong sa gagwe sa bogoši sa letago’ bakeng sa go ahlola mo go boletšwego go Mateo 25:31, go šoma nakong e tlago ge Kgoši ye e matla e tla dula bakeng sa go bolela le go phetha kahlolo go ditšhaba. Ee, boemo bja kahlolo bjo bo akaretšago Jesu go Mateo 25:31-33, 46 bo swana le boemo bjo bo lego go Daniele kgaolo 7, moo Kgoši e bušago e lego Motala wa Mabaka a ilego a dula bakeng sa go kgatha tema ya gagwe e le Moahlodi.

26. Ke tlhaloso efe e mpsha ya seswantšho e lemogwago?

²⁶ Go kwešiša seswantšho sa dinku le dipudi ka tsela ye go bontšha gore go ahlolelwa ga dinku le dipudi ke ga nakong e tlago. Go tla direga ka morago ga ge “ma-setla-pelo” a boletšwego go Mateo 24:29, 30 a thomile gomme Morwa wa motho ‘a e-tla ka letago la gagwe.’ (Bapiša le Mareka 13:24-26.) Ka gona, Jesu o tla swara tsheko gomme a nee le go phetha kahlolo ge tshepedišo e kgopo ka moka e le bofelong bja yona.—Johane 5:30; 2 Ba-Thesalonika 1:7-10.

27. Ke eng seo re swanetšego go kgahlegela go se tseba ka seswantšho sa Jesu sa mafelelo?

²⁷ Se se hlalosa ka mo go kwalago kwešišo ya rena ya nako ya go phethagala ga seswantšho sa Jesu, e bontšhago nako yeo dinku le dipudi di tlago go ahlolwa ka yona. Eupša rena bao re bolelago ditaba tše di lokilego tša Mmušo ka phišego e re kgoma bjang? (Mateo 24:14) Na e dira gore modiro wa rena e se be wa bohlokwa kudu, goba na e oketša boima bja boikarabelo? Anke re boneng kamoo re kgomegago ka gona sehlogong se se latelago.

Dinku le Dipudi di na le Bokamoso Bofe?

“Ó tlo ba kxêtholoxanya byalo ka modiši xe a kxêtholoxanya dinku le dipudi.”—MATEO 25:32.

1, 2. Ke ka baka la’ng seswantšho sa dinku la dipudi se swanetše go re kghališa?

JESU KRISTE ruri e be e le Morutiši yo mogolo kudu lefaseng. (Johane 7:46) O mongwe wa mekgwa ya gagwe ya go ruta e be e le go diriša dipapišo goba diswantšho. (Mateo 13:34, 35) Tše di be di le bonolo eupša e le tše matla tabeng ya go fetišetša ditherešo tše di tseneletšego tša moya le tša boporofeta.

² Seswantšhong sa dinku le dipudi, Jesu o ile a šupa nako yeo ka yona a bego a tla gata mogato a le boemong bjo bo kgethegilego: “Mohla Morwa-motho a tlaxo ka letaxô la xaxwe à na le . . . ” (Mateo 25:31) Se se swanetše go re kgahliša ka gobane ke seswantšho seo Jesu a phethago karabo ya gagwe ka sona, ya potšišo e rego: “Pontšho ya go ba gona ga gago le ya bofelo bja tshepedišo ya dilo e tla ba eng?” (Mateo 24:3, NW) Eupša se se bolela’ng go rena?

3. Pejana polelong ya gagwe, Jesu o itše ke eng se se bego se tla tšwelela gatee-tee ka morago ga ge masetla-pelo a magolo a thomile?

³ Jesu o boletše e sa le pele ka ditiragalo tše di makatšago tše di tlago go tla “gatee-tee ka morago” ga go thoma ga masetla-pelo a magolo, e lego ditiragalo tšeo re di letetšego. O boletše gore ke moo “pontšho ya Morwa wa motho” e bego e tla tšwelela. Se se tla kgoma kudu “merafô yohle ya lefase” yeo e tlago go “bôna Morwa-motho á e-tla à le marung a lexodimo, à e-tla ka matla le ka letaxô le lexolo.” Morwa wa motho o tla felegetšwa ke “Barongwa ba xaxwe.”