Tsebatša Ditaba Tše Di Lokilego Letšatši Le Letšatši
1 A tokelo e thabišago gakaakang ya go ba le karolo ka mehla tabeng ya go kwatša molaetša wa mmušo! Re ba ba šegofetšego gakaakang ka go iša molaetša wo go ba bangwe! Ge re dutše re abelana molaetša wo le ba bangwe, tumelo ya rena le phišego di a matlafatšwa. Dipelo tša rena di a thaba ge re dutše re e-kwa kgothatšo ya gore “hlabang sefela sa Morêna, Le rêtê leina la xaxwe.”—Ps. 96:2-4.
2 Na o go dira pakane ya gago go bolela molaetša wa phološo letšatši le lengwe le le lengwe? Bao ba tsenelago modiro wa bobulamadibogo bja go thuša goba bja ka mehla gantši ba kopanela letšatši le letšatši go boleleng ditaba tše di lokilego. Na o ka dira se? Ge e ba go se bjalo, na mo gongwe o ka ba le karolo e itšego, gaešita lege e ka ba go kopanela go se nene ka mo go sa rulaganyetšwago letšatšing le lengwe le le lengwe? A mokgoši o mogolo gakaakang wa tumišo wo o ka išwago go Jehofa ge e ba ka moka ga rena re ka dira se! O tla thabelwa ke Jehofa gotee le go hwetša ditšhegofatšo tše dingwe tše dintši tše di humilego ge o dutše o kwatša kholofelo ya Mmušo letšatši le lengwe le le lengwe.
3 Ge ditho tša lapa di šoma gotee tabeng ya ‘go iša theto le matla’ go Jehofa, go na le ditšhegofatšo tše dintši tšeo di ka thabelwago. (Ps. 96:7) Ditlemo tša lapa gotee le tša moya di a matlafatšwa ge nako e rulaganyetšwa go dira bodireding le le lapa.
DIRIŠA PUKU YA PHELA KA MO GO SA FELEGO
4 Ka September re tla ba re sepediša puku ya Phela ka mo go sa Felego, bobedi dikgatišo tša ka mehla le tše nyenyane. Batho ba kgongwa kudu ke bophelo bja letšatši le letšatši gomme ba kganyoga bokamoso bjo bo thabišago. Batho ba dipelo tše botegago ba thabela go ithuta ka kholofelo ya bophelo bjo botelele bjoo bo tlago go hloka mathata ao e lego a atilego gakaakaa bathong lehono. Tsebo e nepagetšego ya kholofelo ye le tumelo ya gore e kgaufsi le go phethagala, di swanetše go re šušumeletša go gata mogato o lebanego tabeng ya go neela molaetša wa Mmušo.
5 Naganišiša e sa le pele ka thapelo seo o tlago go se bolela go dira gore thero ya gago e be e kgahlišago. Ka morago ga go itsebiša, mo gongwe o ka bolela se se swanago le se: “Ke bokamoso bja mohuta ofe bjoo o bego o ka rata gore wena le lapa la gago le be le bjona? [Dumelela karabo.] Ka moka ga rena re thabela bophelo gomme re kganyoga go phela nako e telele kamoo re ka kgonago ka gona. Lega go le bjalo, mathata a mantši a a tšwelela gomme go bonagala a tšhošetša maphelo a rena ka noši. Ka baka le mo gongwe o ka thabela go ithuta molaetša wa Beibele ka bokamoso bjo bo kgahlišago gotee le kamoo o ka bapago ka gona le mathata a bophelo.” Ntlheng ye, mo gongwe o ka gatelela mangwalo ao a lego Sehlogong sa Poledišano sa gona bjale. Diriša dintlha tše lebanego tšeo di ka bolelelwago tše di lego go matlakala 9, 11-13, 161 le 162 ka pukung ya Phela ka mo go sa Felego, go gatelela bokamoso bjo bo kgahlišago bjoo bo lego ka pele.
6 A molaetša o thabišago le o matlafatšago tumelo gakaakang woo Jehofa a re neilego wona go o kwatša! Le gona re na le tokelo ya go dira kgaufsi-ufsi le ba bangwe bao ba lebogago e le ka kgonthe dikholofetšo tše dikgolo tša Jehofa. Ka ge modiro wo re o dirago mo nakong ye e le wo le ka mohla o ka se sa dirwago gape gomme e le woo o tla tlogago o fetšwa, gona na ga se ra swanela go diriša dinako tša rena le mahumo a rena tabeng ya go bolela ditaba tše di lokilego tša phološo letšatšing le lengwe le le lengwe?