Latela Ka Kgodišego Bao Ba Etelelago Pele
1 Modimo ka lerato o neile phuthego ya Bokriste balebeledi bao boetapele bja bona bo lapološago le bjoo re swanetšego go kgodišega ka bjona. Ka go fapana le maiteko ao a palelwago a baetapele ba lefase, moporofeta Jesaya o bontšhitše gore balebeledi bao ba kgethilwego ke Modimo ba be ba tla ba “tšhireletšo ge phefo e foka, le setšhabelo sa go tšhabela pula; [ba] tlo ba bjalo ka noka ya meetse nageng e omilego, le bjalo ka moriti wa lefsika le legolo nageng e nyorilwego.” (Jes. 32:1, 2, Phetolelo ya Kgale) Go latela ka kgodišego boetapele bja banna ba bjalo e ka ba mothopo wa kgonthe wa tšhireletšo le tšhegofatšo go rena.
‘EKIŠANG TUMELO YA BONA’
2 Moapostola Paulo o ngwaletše Bakriste ba ba-Hebere gore: “Xopolang baruti ba lena ba ba Le boditšexo Lentšu la Modimo, Le bônê pheletšô ya bôná, Le etšê bôná ka tumêlô.” (Ba-Heb. 13:7) Ke tumelo ya banna ba yeo e swanetšego go ekišwa. Go ela hloko tsela ya bona ya go itshwara ka go dumelelana le mohlala wo Jesu a o beilego le melao ya motheo ya Lentšu la Modimo go re kgothaletša go dula re tiile tumelong. (Ps. 119:105) Re swanetše go thabela go amogela keletšo le tlhahlo e tšwago go balebeledi ba bjalo ba botegago bao ba etelelago pele gare ga rena gomme re ba šetše ka go fetišiša ka lerato ka baka la modiro wa bona.—1 Ba-Thes. 5:12, 13.
3 Lega go le bjalo, e le gore re holege e le ka kgonthe ‘dimphong tše tše e lego banna,’ re swanetše go lwantšha tshekamelo lege e le efe ya go godiša diphošo tša bona goba go se phethege ga bona ga batho gomme ka go ithekga ka seo ra hlokomologa keletšo ya bona goba ra e nyenyefatša. Go e na le moo, re swanetše go amogela keletšo ya bona yeo e theilwego Beibeleng le tlhahlo e le tše tšwago go Jehofa. Ka tsela ye re tla ba re latela ka kgodišego boetapele bja Yo e lego hlogo ya phuthego, e lego Kriste.—Ba-Ef. 4:8, 11-15.
4 Re ka bontšha bjang go ikokobetša ga rena le go kwa bookamedi bjo lerato bja bagolo? Ge re lemoga bothata bjo itšego ka phuthegong, na re bo bega go bagolo gomme ra leta ka go se fele pelo le ka kgodišego gore ditaba di lokišwe ka thulaganyo ya pušo ya legodimo? (Lef. 5:1) Ka ge re bota thulaganyo ya pušo ya legodimo, gona ga se ra swanela go nyama ka mo go sa swanelago ge dilo di sa dirwe ka tsela ya rena goba go ya ka tekanyetšo ya rena ya nako. Go e na le moo, re tla letela Jehofa le Kriste Jesu gore ba diriše banna bao ba kgethilwego ka moya gore ba gate mogato ka nako e swanetšego le ka tsela e swanetšego.—Die. 14:29.
MAFELELO A MABOTSE
5 Go latela ka kgodišego bao ba etelelago pele go tliša mafelelo ao a rategago a tumelo e matla le boitshwaro bja go boifa Modimo. Go palelwa ke go ikokobetša go tla itlhatsela e le morwalo go bao ba etelelago pele gomme go tla gobatša bao ba ikokobetšago. (Ba-Heb. 13:17) Ka go amogela kgothatšo ya moya le keletšo tšeo di tšwago go bagolo, re thušwa go phema mafokodi gomme re dira dipeakanyo tše nyakegago tšeo di kgonthišetšago kgolo ya moya. Ka go sepedišana le tlhahlo ya bona, botee bo a kgomarelwa ka phuthegong gomme re šireletšwa dilong tše di gobatšago le bokgopong bja tshepedišo ye ya dilo. Gape, ka go latela mohlala wa bona le boetapele bodireding, re kgothaletšwa go dula re le mafolofolo go boleleng ditaba tše di lokilego.
6 Ge re hlahloba karolo ya bagolo ka phuthegong ya Bokriste lehono, re lemoga gore bontši bja bona ke bao ba ikgafago gomme ba etelela pele ka tsela e botse. Re iša tebogo e tšwago pelong go Jehofa ka ge a hlomile thulaganyo e bjalo e lerato. Banna ba mohuta wo ba swanelwa ke go godišwa gabedi, gomme re na le mabaka ohle a go latela boetapele bja bona ka kgodišego.—1 Tim. 5:17.