Kgaolo 9

Khutšo le Polokego Lefaseng ka Bophara ke Kholofelo e ka Botwago

1, 2. Ke maemo afe a boletšwego e sa le pele ka Beibeleng ao a tlago go dira lefase le gore e be lefelo leo le kgahlišago kudu leo go ka dulwago go lona?

LEFASE le e ka ba lefelo le le thabišago le le kgahlišago kudu gore go phelwe go lona, ge e ba ruri maemo a khutšo le polokego a ka ba gona kae le kae. Gaešita lege le tloga le se bjalo mo nakong ye, fela Beibele e bolela gore lefase e tla ba legae le le thabišago kudu moo lapa la motho le tlago go thabela bophelo ka botlalo.

² Beibele ge e le gabotse e holofetša’ng? Re ka tiiša bjang gore tšeo di tla phethagatšwa?

Motheo o Tiilego wa go Holofela

3, 4. (a) Re ithuta’ng ka go botega ga melao ya motheo yeo e laolago legohle? (b) Modiri wa melao yeo ke mang, gomme ke go eng gape moo re nago le lebaka le lebotse la go e bota?

³ Melao e itšego ya motheo e laola legohle. E mentši ya yona ga re e hlokomele. Go hlaba ga letšatši, go sobela ga lona, go bonagala ga kgwedi gotee le dihla di tla le go tloga ka mokgwa wo o thekgago go tia ga bophelo bja batho. Batho ba ngwala dialmanaka gomme ba lokišetša mediro ya nywaga e sa tlago. Ba tseba gore go sepela ga letšatši, kgwedi le dikgokolo ke mo go botegago. Re ithuta’ng go se?

⁴ Modiri wa melao ye o botega e le ka kgonthe. Re ka bota seo a se bolelago le seo a se dirago. Ke ka leina la gagwe ka ge e le Mmopi wa legodimo le lefase moo Beibele e holofetšago tokišo e mpsha ya go loka. (Jesaya 45:18, 19) Bophelong bja rena bja letšatši le letšatši, gantši re bota batho ba bangwe ka tsela e itšego, e lego batho ba ba tlišago dijo mmarakeng, bao ba tlišago mangwalo le bagwera ba kgonthe. Ka gona, na ga se ga tlhaologanyo go holofela Modimo kudu gotee le go phethagatšwa mo go tiilego ga dikholofetšo tša gagwe?—Jesaya 55:10, 11.

5. Go hloka tutuetšo lege e le efe ya boithati go seo Modimo a re holofeditšego sona go re nea bjang tumelo?

⁵ Gaešita lege dikholofetšo tša batho gantši e le tšeo di ka se botwego, fela dikholofetšo tša Modimo ke tšeo di ka botwago ka mo go tletšego gomme ke tša go hola rena e sego tša go hola yena. Gaešita lege Modimo a sa nyake selo go rena, fela o thabela bao ba mo dumelago ka baka la ge ba mo rata le go rata ditsela tša gagwe tša go loka.—Psalme 50:10-12, 14.

6. Ke tumelo ya mohuta ofe yeo Beibele e re thušago gore re be le yona?

⁶ Beibele le gona e nyaka matla a rena a tlhaologanyo. Ga e nyake tumelo e foufetšego goba tumela-tšohle e foufetšego. Ge e le gabotse, e hlalosa tumelo ya kgonthe e le “kholofêlô ye e tiilexo ya xo holofêla tše di letetšwexo; ké xo bôta tše di sa bonwexo ka mahlô.” (Ba-Hebere 11:1) Modimo ka Beibeleng o re nea motheo o kwalago wa tumelo. Go ba ga kgonthe ga motheo woo go ba molaleng kudu ge re dutše re gola tsebong ya Lentšu la Modimo gomme re bona kamoo therešo ya lona e dirago ka gona maphelong a rena le ka go phethagatšwa ga diporofeto tša lona.—Psalme 34:8-10.

7. Ge re hlahloba dikholofetšo tša Beibele tša ditšhegofatšo tša nakong e tlago, ruri ke’ng yeo re se ra swanelago go e lebelela gore e nyakega go rena tabeng ya go di dumela?

⁷ Dikholofetšo tša Beibele tša ditšhegofatšo tša nako e tlago di nanabalela kgole kudu go feta seo batho ba lekago go se nea. Lega go le bjalo dikholofetšo tšeo ga di re nyake gore re dumele dilo tšeo di lwantšhanago le phihlelo ya motho ka moka ga yona. Le gona ga se tšeo di fapanego le tšeo motho a di kganyogago tša tlhago. Ela hloko tše dingwe tša ditšhegofatšo tše tše dikgolo gomme o bone kamoo se e lego sa therešo ka gona.

Lefase le tla Fetolwa Legae la Tšhemo

8, 9. (a) Ke kgopolo efe yeo e swanetšego go tlišwa megopolong ya rena ke lentšu “paradeise”? (b) Na selo se se bjalo se kile sa ba gona lefaseng? (c) Ke’ng seo se bontšhago gore ke morero wa Modimo gore Paradeise e aparetše lefase ka bophara?

⁸ Lentšu “paradeise” le tšwa mantšung a swanago ao a dirišitšwego mehleng ya kgale (Sehebere, par·desʹ; se-Peresia, pai·ri·daeʹza; Segerika, pa·raʹdei·sos), e lego mantšu ao a ilego a dirišwa go hlalosa dilo tšeo di bego di le gona lefaseng. Mantšu a ka moka a na le kgopolo ya motheo ya phaka e botse goba tšhemo e swanago le phaka. Go swana le mehleng ya kgale, ruri le lehono go na le mafelo a bjalo a mantši ao a mangwe a wona e lego diphaka tše dikgolo. Motho o na le tlhologelo ya tlhago ya go hlologela botse bja tšona. Beibele e holofetša gore letšatši le tla tla leo ka lona kgokolo ye ka moka e tlago go ba tšhemo e bjalo e swanago le phaka goba paradeise!

⁹ Nakong ya ge Modimo a bopa batho ba babedi ba pele o ile a ba nea legae la tšhemo ya Edene, e lego leina leo le bolelago “Paradeise ya Lethabo.” Eupja Paradeise e be e se ya swanela go lekanetšwa lefelong leo feela. Modimo o itše go bona: “Tswalang Le atê, tlalang lefase, Le le fenyê.” (Genesi 1:28; 2:8, 9) Se se be se tla akaretša go katološetša mellwane ya Paradeise mafelelong a lefase, e lego morero wo o bego o boletšwe wa Modimo wo o se wa kago wa fedišwa ke tsela ya go se kwe ya Adama le Efa. Jesu Kriste ka noši o ile a bontšha go holofela morero wo ge a be a holofetša motho yo a bego a e-hwa ka lehlakoreng la gagwe gore o tla ba le sebaka sa go phela Paradeiseng e bjalo ya lefase. (Luka 23:39-43) Se se tla tla bjang?

10. Ke mapheko afe ao a thibelago Paradeise ao Modimo a holofetšago go a tloša, go ya ka Kutollo 11:18?

¹⁰ ‘Masetla-pelong a magolo’ a tlago ruri Modimo o tla tloša mapheko ka moka Paradeiseng ya gagwe e tlago ya lefaseng ka go “senya basenya-lefase.” (Kutollo 11:18) Modimo o tla dira seo mebušo ya batho le ka mohla e ka se kego ya se dira. O tla tloša batho ka moka bao ba šilafatšago ka boithati lefase e le gore ba kgotsofatše megabaru ya tša papatšo, a tloše batho ka moka bao ba lwago dintwa tše di senyago le batho ka moka bao ba hlagatšago lefase ka baka la go se hlomphe dimpho tše dintši tše Modimo a di lokišeditšego.

11. (a) Ke tiragalo efe ya histori e bontšhago gore go tsošološwa ga Paradeise lefaseng ga se mo go fapanego le phihlelo ya motho? (b) Se se matlafatša tumelo ya rena tšhegofatšong efe e holofeditšwego?

¹¹ Lefase ka moka le tla thunya ka botse. Botse le go seka di tla tla moyeng wa lona, meetseng le nageng. Go tsošološwa mo ga Paradeise ga se selo seo se ka se kego sa dumelwa goba seo se fapanego le phihlelo ya motho. Makgolong a nywaga a mantši a fetilego nakong ya ge setšhaba sa Isiraele se be se ntšhwa bothopjeng Babele, ruri Jehofa Modimo o ile a ba bušetša lefaseng la bona leo ka nako yeo le bego le fetogile marope. Lega go le bjalo, ka baka la tšhegofatšo ya Modimo go sona le modirong wa sona, lefase le ile la ba le lebotse gatee-tee mo ditšhaba tše di lego ka mathoko di ilego tša makala: ‘Le fetogile tšhemo ya Edene!’ Le gona e ile ya ba leo le enywago dienywa kudu gomme la tloša poifo lege e le efe ya go boifa tlala. (Hesekiele 36:29, 30, 35; Jesaya 35:1, 2; 55:13) Seo Modimo a ilego a se dira kgale moo se ile sa bontšha ka tekanyo e nyenyane seo a tlago go se dira lefaseng ka moka gore a phethagatše dikholofetšo tša gagwe. Batho ka moka bao ba balelwago e le ba ba swanetšwego ke go phela ka nako yeo, ba tla thabela maipshino a tlago go newa ke Modimo a bophelo Paradeiseng.—Psalme 67:6, 7; Jesaya 25:6.

Go Fela ga Bodiidi le Bohlanka bja tša Boiphedišo

12. Ke maemo afe a tša boiphedišo le a tša mediro ao a swanetšego go tlošwa ge e ba re tla ba le lethabo la kgonthe bophelong?

¹² Bodiidi le bohlanka tshepedišong ya tša boiphedišo ya setšhaba di hwetšwa lefaseng ka bophara. Go be go ka se ke gwa ba le go thabela Paradeise ga kgonthe, ge e ba batho ba dimilione ba be ba ka tšwela pele go dira mediro yeo e bego e ka ba nea feela tšhelete e nyenyane goba go dira modiro wo o tenago wo o dirago motho karolonyana ye e sego bohlokwa ka gare ga motšhene o mogolo.

13-15. (a) Ke kae moo re hwetšago mohlala wa histori wo o re bontšhago seo e lego thato ya Modimo bakeng sa motho tabeng ye? (b) Tokišetšo e bjalo e atlegišitše bjang polokego le go thabela bophelo ga motho o mongwe le o mongwe le lapa le lengwe le le lengwe?

¹³ Thato ya Modimo bakeng sa motho tabeng ye e bonwa tseleng yeo a ilego a sepediša ditaba tše bjalo ka yona le Isiraele ya kgale. Lapa le lengwe le le lengwe moo le ile la amogela karolo ya lefa la naga. (Baahlodi 2:6) Gaešita lege karolo ye e be e ka rekišwa gomme gaešita lege batho le bona ba be ba ka ithekiša bohlankeng ge ba e-na le melato, fela Jehofa o be a sa dutše a dirile ditokišetšo tša gore go elwe hloko mokgwa wa go ithopela dinaga tše dikgolo goba go dira batho bahlanka ka nako e telele. Bjang?

¹⁴ Ka ditokišetšo tša boiphedišo tše di bego di le Molaong wo a bego a o neile batho ba gagwe. Ngwaga wa bošupa wa bohlanka e be e le ‘ngwaga wa khunologo’ nakong yeo mo-Isiraele lege e le ofe yo a bego a le bohlankeng a bego a swanetše go lokologa ka yona. Le gona, ngwaga o mongwe le o mongwe wa bo-50 e be e le ngwaga wa “moxobo” setšhabeng ka moka, e lego ngwaga woo ka wona baagi ka moka ba wona ba bego ba ‘hlabelwa mokgoši wa khunologo.’ (Doiteronomio 15:1-9; Lefitiko 25:10) Ka gona, karolo e nngwe le e nngwe ya lefa yeo e bego e rekišitšwe e be e bušetšwa go mong wa yona. Bohle bao ba bego ba le bohlankeng ba be ba hunollwa gaešita lege nywaga e šupago e be e sešo ya fela. E be e le nako e thabišago ya go kopana gape ga lapa ka lethabo le go thoma bophelo ka lefsa ka mokgwa wa tša boiphedišo. Ka gona, ga go na naga yeo e bego e rekišetšwa sa ruri. Ge e le gabotse go rekišwa ga yona e be e le thekišo yeo e bego e tla fela ka morago ngwageng wa Megobo.—Lefitiko 25:8-24.

¹⁵ Tše ka moka di be di atlegiša boemo bja tša boiphedišo bja setšhaba le polokego gotee le khutšo ya lapa le lengwe le le lengwe. Ge melao ye e be e hlokomelwa, gona e be e dira gore setšhaba se se ke sa wela boemong bjo bo nyamišago bjo re bo bonago lehono mafaseng a mantši moo go nago le bahumi-humi le badiitšana ba kwešago bohloko. Mehola e bego e direlwa motho e be e matlafatša setšhaba, ka gobane go be go se na motho yo a bego a swanetšwe ke go se be le ditokelo le go gatakelwa ke maemo a mabe a tša boiphedišo. Bjale ka ge go begilwe nakong ya pušo ya Kgoši Salomo, ruri “Ba-Juda le Ba-Isiraele ba be ba dutše bà iketlile moriting wa merara ya bônà.” (1 Dikxoši 4:25) Batho ba bantši lehono ga ba kgone go diriša dimpho tša bona ka moka le matla a bona ka gobane ba tantšwe tshepedišong ya tša boiphedišo yeo e ba gapeletšago gore ba direle dikganyogo tša batho ba sego bakae goba gaešita le tša motho o tee. Ka tlase ga melao ya Modimo, motho yo e bego e le seroto o be a thušwa gore a neele matla a gagwe katlegong le lethabong la batho ka moka. Se se re nea pontšho ya kgopolo ya tshwanelo le seriti seo batho bao ba tlago go hwetša bophelo Tokišong e Mpsha ya Modimo ba tlago go se thabela.

16. Ge e le ka maemo a go phela le boemo bja motho bja tša boiphedišo, ruri ke’ng seo Mmušo wa Modimo o tlago go se nea babušwa ka moka ba wona?

¹⁶ Boporofeta bja Mika 4:3, 4 bo tla phethagatšwa ka phethagatšo e kgolo lefaseng ka bophara. Batho ba ba ratago khutšo ba ba tlago go phela tlase ga pušo ya go loka ya Modimo ba tla ‘dula meriting ya merara ya bona, le meriting ya mego ya bona, go se e a ba tšhošago; ka gobane go boletše molomo wa Jehofa wa mašaba.’ Ga go na mmušwa lege e le ofe wa Mmušo wa Modimo yo a tlago go dula metseng ye e lalanego ya ditšhila goba metseng e lalanego ya bodiitšana. Ba tla ba le lefase le magae ao e tlago go ba a bona. (Jesaya 65:21, 22) Kgoši, Kriste Jesu o be a holofeditše kgale gore ‘ba boleta ba tlo tšea lefase ya ba kabelo ya bona,’ gomme o neilwe “matla ka moka lexodimong le lefaseng” gore a bone gore se se a direga.—Mateo 5:5; 28:18.

Boiketlo bja Neng le Neng le Bophelo

17-19. (a) Ke’ng seo se bontšhago gore boiketlo le bophelo bjo botelele ke dikganyogo tša tlhago tša batho? (b) Ke ditherešo dife ka bophelo bja motho le ka dimela tšeo di dirago gore bophelo bja motho bja nakonyana bo bonale e le bjo bo makatšago? (c) Ke’ng e lego gona ka bjoko bja motho yeo e bontšhago gore ruri go a kwala go dumela gore motho o be a bopetšwe go phela ka mo go sa felego?

¹⁷ Lega go le bjalo, ga go na le ka botee bja maemo a a mabotse kudu bjo bo ka dirago gore bophelo e be bja khutšo e le ka kgonthe le bja polokego ge feela bolwetši, botšofadi le lehu di dutše di fsifatša bokamoso. Na ke go se be le tlhaologanyo goba ke mo go fapanego le phihlelo ya motho go holofela go imollwa dilong tše tšeo di gatelelago? Ruri ga se mo go fapanego le tlhago ya motho ya go nyaka se, ka gobane batho ba sentše dinako tša bona bophelong gotee le tšhelete e ntši-ntši ba leka go tšweletša se.

¹⁸ Ka gona, kholofelo ya boiketlo bja neng le neng le bophelo, le gatee ga se yeo e sego ya tlhaologanyo. Ge e le gabotse, seo e tlogago e se sa tlhaologanyo ke se: Batho ge feela ba fihla bogolong bjoo go bjona ba thomago go hwetša tsebo, phihlelo le matla a go dira dilo tšeo di swanetšego, e ba moo ba thomago go tšofala gomme mafelelong ba hwago. Lega go le bjalo, go na le dimela tšeo di phelago ka nywaga e dikete-kete! Ke ka baka la’ng motho yo a dirilwego ka go swana le Modimo a phela feela ka nako e nyenyane ya nako yeo e phelwago ke dihlare tšeo di hlokago bohlale? Na ruri o be a se a swanela gore a phele ka nako e telele kudu?

¹⁹ Go batsebi bao ba nyakišišago botšofadi, selo se ruri e sa dutše e le seo se makatšago kudu. Taba e nngwe yeo e makatšago ke therešo ya gore bjoko bja motho bo dirilwe gore bo rwale tsebišo yeo e ka se kego ya lekanywa. Bjalo ka ge mongwadi wa thutamahlale a boletše, bjoko bo “kgona e le ka kgonthe go rwala morwalo lege e le ofe wa thuto gotee le kgopolo yeo motho a kgonago go bo rweša yona, gomme bo rwala morwalo o rwalwago ga dimilione tše dikete.”⁠⁵⁵ Se se bolela gore bjoko bja gago bo kgona go rwala e sego feela morwalo ofe le ofe wo o ka o rwešago bjona nywageng e 70 goba e 80 ya go phela ga gago, eupja bo ka rwala le wa nywaga e dimilione tše dikete! Ga go makatše go bona motho kamoo a gora-gorelago tsebo, gomme a nago le kganyogo e bjalo ya go rata go ithuta go dira dilo le go di phetha. Lega go le bjalo, o šitišwa ke bophelo bja gagwe bjo bonyenyane. Na ke ga tlhaologanyo gore bjoko bjo bjalo bjo matla bja motho bo swanetše go ba gona, eupja go se ke gwa dirišwa gaešita le ka karolonyana e nyenyane ya matla a bjona? Na ruri ga se ga tlhaologanyo go phetha ka go bolela gore bjale ka ge Beibele e bontšha, Jehofa o be a bopetše motho gore a phele ka mo go sa felego lefaseng gomme a mo nea bjoko bjo ruri bo swanetšego morero woo?

20. Beibele e bolela gore Modimo o holofeditše go direla batho eng, ge e le mabapi le mafelelo a sebe go akaretša le lehu ka bolona?

²⁰ Beibele e bontšha gore motho mathomong o be a na le sebaka sa go phela ka mo go sa felego, eupja ka baka la borabele a timelelwa ke bjona: “Sebe sè tsene lefaseng ka motho [Adama] o tee, ’me lehu la tsêna ka sebe, lehu le aparetše batho bohle ka xe ba dirile dibe bohle.” (Ba-Roma 5:12) Eupja Beibele le gona e na le kholofetšo ya Modimo ya gore Paradeiseng yeo e tsošološitšwego “lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna.” (Kutollo 21:3, 4; bapiša le 7:16, 17.) E bolela gore bophelo bjo bo sa felego bjo bo se nago dika tša sebe ke wona morero wa Modimo bakeng sa batho. (Ba-Roma 5:21; 6:23) Se segolo go feta se, e holofetša gore ditšhegofatšo tša Tokišo e Mpsha ya Modimo di tla bulelwa batho ba dimilione tše dikete bao ba hwilego. Bjang? Ka tsogo yeo e tlago go tlogela mabitla a batho a ahlame. Jesu o boletše ka go se dika-dike ka gore: “Xo tla lebaka leo bohle ba lexo mabitleng ba tl’o xo kwa Lentšu la Morwa-Modimo ka lôna, xomme ba tlo tšwa.”—Johane 5:28, 29.

21, 22. Ke ka baka la’ng tebelelo ya go bušetšwa bophelong bjo bo tletšego e se selo seo e lego se segolo kudu gore se ka holofelwa?

²¹ Thutamahlale ya tša kalafo lehono e kgona go tšweletša “dihlare-tagi tša mohlolo,” gomme ba dira dipuo tše di makatšago tšeo di bego di ka bonala di ka se ke tša kgonwa gaešita le nywageng e masome a sego kae e fetilego. Na re swanetše go belaela gore Yo a bopilego batho a ka se kgone go dira mekgwa e makatšago kudu ya go fodiša? Ruri Mmopi o na le matla a go bušetša batho ba dipelo tša go loka boiketlong bja kgonthe, gaešita le go emiša mosepelo o išago botšofading. A ka dira se ka ntle le go diriša dihlare-tagi, go bua goba ditho tša maitirelo. Ee, Modimo o neetše bohlatse bja gore ditšhegofatšo tše di bjalo ga se tšeo e lego tše dikgolo kudu gore di ka holofelwa.

²² Modimo o ile a nea Morwa wa gagwe matla nakong ya ge a be a le lefaseng gore a dire mediro e matla ya phodišo. Mediro ye e re holofetša gore ga go na bofokodi, bogole goba bolwetši bjo bo ka palelago matla a Modimo a go fodiša. Ge motho yo nama ya gagwe e bego e tletše lephera a be a rapela Jesu gore a mo fodiše, Jesu o ile a kgoma motho yo ka go mo kwela bohloko gomme a re: “Fôla.” Bjale ka ge pego ya histori e bolela, “Lephêra la xaxwe la napa la fôla.” (Mateo 8:2, 3) Jesu o dirile dilo tša go swana le tše a lebeletšwe ka mo go tletšego ke dihlatse tše dintši go etša ge ra-dihistori Mateo a bega gore: “Mašaba a mantši a batho a tla xo Yêna; ba tla bà na le dihlotša, le difofu, le dimuma, le dixôlê, le ba bangwê ba bantši; ba ba bea fase maotong a xaxwe, Yêna a ba fodiša. Mašaba a tlabêxa . . . ’me ba rêta Modimo wa Isiraele.” (Mateo 15:30, 31) Ipalele taba e lego go Johane 9:1-21 go bona kamoo pego ya histori ya bophelo ya go fodišwa mo go bjalo e bilego ya kgonthe ka gona. Go ba ga kgonthe ga ditiragalo tše go hlatselwa ke dihlatse tše dintši go akaretša le ngaka Luka.—Mareka 7:32-37; Luka 5:12-14, 17-25; 6:6-11; Ba-Kolose 4:14.

23, 24. Ke ka baka la’ng e se go hloka tlhaologanyo go dumela gore bahu ba tla bušetšwa bophelong tlase ga Mmušo wa Modimo?

²³ Ka baka la mabaka a swanago, ruri ga re a swanela go bona go le thata go dumela kholofetšo ya Beibele ya gore “bahu ba tlo tsoxa.” (Ditiro 24:15) Lentšu la motho, ponagalo ya gagwe le ditiro di ka tšweletšwa paesekopong goba go videotape gaešita le nywaga e mentši ka morago ga lehu la gagwe. Na Motho yo a bopilego motho yo ruri a tsebago kagego ya motho ye e nepagetšego ya diathomo le ya metswako, a ka se kgone go dira mo gogolo go feta moo? Di-computer tšeo di dirilwego ke motho di ka boloka le go dumelelanya dikarolwana tše dimilione tše dikete tša tsebišo e le ka kgonthe. Eupja Modimo o bopile legohle le le boifišago gotee le melalatladi ya lona e dimilione tše dikete, gomme molalatladi o mongwe le o mongwe o e-na le dinaledi tše dimilione tše dikete. Seo se dira palo-moka ya dibilione, dibilione tše dikete gaešita le tšeo di fetago tšeo! Ka gona, Psalme 147:4 e re: “Ó beile palô ya dinaledi, ka moka xa tšôna ó di bitša ka maina”! Ruri ke mo go lego bonolo go Modimo yo a nago le matla a magolo gakaakaa a go gopola gore a gopole dibopego tša batho e le gore a tle a ba tsošetše bophelong.—Jobo 14:13.

²⁴ Jehofa gape o neile mehlala ya histori gore a matlafatše go dumela ga rena kholofelong e bjalo e makatšago. O ile a nea Morwa wa gagwe matla a gore a bontšhe ka tekanyo e nyenyane seo a tlago go se dira ka tekanyo e kgolo nakong ya pušo ya gagwe ya go loka lefaseng. Jesu o tsošitše bahu ba bantši gomme se o se dirile gantši mo a bego a bonwa ke batho. Latsaro yo a ilego a mo tsoša kgaufsi le Jerusalema o be a šetše a hwile ka nako e teletšana gomme setopo sa gagwe se be se thoma go bola. Ruri kholofelo ya tsogo ke yeo e nago le motheo o tiilego.—Luka 7:11-17; 8:40-42, 49-56; Johane 11:38-44.

Go Kgona ga Lefase go Rwala Baagi ba ba Bjalo

25, 26. Ge bahu ba tsošitšwe, ruri ke kae moo go tlago go hwetšwa madulo a batho ka moka gore ba dule?

²⁵ Na kgokolo ye e ka neela lefelo la bodulo leo le kgotsofatšago baaging ba bjalo ka ge ba tla tsošwa bahung? Go tšere nywaga e ka fetago e 5 000 gore baagi ba lefase ba fihle go dimilione tše sekete mathomong a nywaga ya bo-1800. Lehono go na le mo e ka bago baagi ba dimilione tše dikete tše hlano.

²⁶ Ka gona, batho ba ba phelago lehono ba emela karolo e kgolo ya batho ba ba kilego ba phela. Ba bangwe ba lekantše palo-moka ya baagi historing ka moka ya batho e le yeo e ka bago batho ba 15 000 000 000. Lefase ke leo e lego le legolo la dihekethare tšeo di fetago 15 000 000 000. Seo se tla dumelela mo go fetago hekethara ka e tee go motho ka o tee ka o tee. Se se ka se ke sa neela feela lefelo leo go ka tšweletšwago dijo go lona, eupja se tla neela gape le lefelo la matši, dithaba gotee le mafelo a mangwe a botse bja naga ka ntle le go pataganywa Paradeiseng ka mo go se gwa swanelago. Le gona moo Beibele e bontšha gore ga se batho ka moka bao ba phelago mo nakong ye, ba ba tlago go phologa gore ba phele Tokišong yeo e Mpsha. Ge e le gabotse, Jesu o itše, “Kxôrô e išaxo tahlexong ké pêtlêkê, le tsela ye e yaxo xôna e phatlaletše; ’me ba ba tsênaxo ka yôna ké ba bantši.” O boletše le gore ge tshenyego ya lefase e e-tla, bao ba sa dirego thato ya Jehofa “ba tlo ya thlokofatšong ye e sa felexo.”—Mateo 7:13; 25:46.

27. Na lefase le tla tšweletša dijo tše di lekanego bakeng sa batho bao ka moka?

²⁷ Eupja na lefase le ka tšweletša dijo tše di lekanego bakeng sa batho ba bantši gakaakaa? Bo-ra-thutamahlale ba bolela gore le ka kgona go dira bjalo gaešita le ka tlase ga maemo a mehleng yeno. Pego ya Toronto Star e boletše gore: “Ka go ya ka Lekgotla la Ditšhaba tše Kopanego la Dijo le Temo ruri go šetše go e-na le mabele a lekanego ao a bjalwago lefaseng ka bophara go fepa motho e mongwe le e mongwe mo lefaseng ka dikhalori tše 3 000 ka letšatši, e lego . . . mo e ka bago 50 lekgolong go feta tekanyo e amogelwago yeo e lego tlase.”⁠⁵⁶ Ge e le ka bokamoso, e hlalositše gore gaešita le maemong a lehono go ka ba le dijo tše lekanego tša go kgotsofatša tšeo di nyakegago tša baagi ba lefase ba lehono ge ba balwa gabedi. Le gona, re swanetše go gopola gore Jehofa o tla hlahla batho ba gagwe gore ba leme temo ya lefase ka mo go swanetšego, ka gobane Psalme 72:16 e re kgonthišetša gore: “Xo tlo ba le mohora wa mabêlé mo naxeng; ’phoxong tša thaba meré ya dienywa e tlo xwaša.”

28. Ke ka baka la’ng go se na kotsi ya gore ge batho ba phela ka mo go sa felego, gona lefase mafelelong le tla tlala wa go falala?

²⁸ Re swanetše go gopola seo e lego morero wa Modimo, bjale ka ge o ile wa bolelwa pele bathong ba pele ba babedi. Ba ile ba botšwa gore ba ‘tlale lefase gomme ba le fenye,’ gomme ba katološetše mellwane ya Edene go fihla mafelelong a lefase. (Genesi 1:28) Ruri se se bolela go tlatša lefase ka mokgwa wa tshwanelo, e sego go le falatša ka batho. Seo se be se tla dumelela gore lefase leo le ‘fentšwego’ e-be phaka ya lefase yeo e swanago le legae la pele la motho leo le bego le swana le phaka. Ka gona, taelo ye ya Modimo e bontšha gore nakong e beilwego ya Modimo le ka tsela ya gagwe ruri go oketšega ga batho go be go tla laolwa.

Motheo wa Kgonthe wa Lethabo la Neng le Neng

29. Ke mafelelo afe ao ditswalano le batho ba bangwe di nago le wona lethabong la motho?

²⁹ Lega go le bjalo, gaešita le tulo e botse, mahumo a dilo tše di bonagalago, modiro o kgahlišago le go thabela bophelo bjo kaone di ka se ke tša tiiša lethabo la gago la neng le neng. Batho ba bantši lehono ba na le dilo tše, eupja ga se ba thaba. Ka baka la’ng? Ka baka la batho bao ba ba dikologilego bao mo gongwe e ka bago e le baithati, ba meferefere, baikaketši goba bao ba nago le lehloyo. Lethabo la neng le neng Tokišong e Mpsha ya Modimo le tla ba gona e le ka kgonthe le tlišwa ke go fetoga ga lefase ka moka ga mekgwa ya batho. Lerato la bona, go hlompha Modimo le go kganyoga ga bona go tšwetša pele merero ya gagwe go tla tliša katlego ya moya. Ka ntle le yona, katlego ya dilo tše di bonagalago e ba yeo e sa kgotsofatšego le ya lefeela.

30. Re tseba bjang gore batho bao ba tlago go phela Tokišong e Mpsha ya Modimo e tla ba feela batho bao ba thekgago khutšo le polokego ya ba bangwe?

³⁰ Ee, go na le lethabo la kgonthe leo le tlišwago ke go ba gare ga batho bao ba lego botho, ba ikokobetšago le bao ba nago le bogwera, e lego batho bao o ka ba ratago e le ka kgonthe le go ba holofela, gomme e le bao le wena ba go ratago. (Psalme 133:1; Diema 15:17) Lerato la go rata Modimo ke lona le le tiišago lerato la go rata wa gabo motho e le ka kgonthe, lona lerato le le tlago go dira gore bophelo e be bjo bo thabišago Tokišong e Mpsha ya Gagwe ya go loka. Batho ka moka bao Modimo a tlago go ba nea bophelo bjo bo sa felego ba tla ba batho bao ba bontšhitšego lerato la go mo rata le la go rata ba gabo bona. Ge o e-na le batho ba ba bjalo e le batho ba geno, bagwera ba gago goba badiri-gotee le wena, gona o tla kgona go thabela khutšo ya kgonthe le polokego le lethabo la neng le neng.—1 Johane 4:7, 8, 20, 21.

31. Ge e ba ruri re nyaka bophelo Tokišong e Mpsha ya Modimo, gona re swanetše go dira’ng mo nakong ye?

³¹ Ruri tebelelo e bjalo e kgolo e go bulegetše! Ka gona, tsela ya bohlale bjo bo holago ke go nyaka seo se nyakegago e le gore o tle o e hwetše. Lehono, ke nako ya gore o dumelelanye bophelo bja gago le tšeo di nyakwago ke Modimo bathong bao ba tlago go phološwa ‘masetla-pelong a magolo’ a tlago.—2 Petro 3:11-13.

[Seswantšho go letlakala 98]

Kapejana go tla tla letšatši leo ka lona lefase ka moka le tlago go fetolwa go ba paradeise