Kgaolo 8

Baphologi e tla ba Bomang?

1. (a) Go phologela ga motho Tokišong e Mpsha ya Modimo ya khutšo go ithekgile ka’ng? (b) Kutollo kgaolo 7 e hlalosa bjang bao ba tlago go phologa e le gore ba phele lefaseng la Paradeise?

GO PHOLOGA tshenyego ya lefase e tlago e ka se ke ya ba taba ya mahlatse go swana lege go e ba bjalo ka mehla dintweng tša batho. Go ka se ke gwa laolwa ke lefelo leo motho a dulago go lona, e bile go ka se ke gwa tlišwa ke go tšhabela ga gagwe moo a ka širelago gona pomo goba go tšhabela botšhabelong bjo bongwe nakong ya ge temošo e newa. Go phologa go tla ithekga ka kgaugelo ya Modimo gotee le go ikgethela mo motho a tlago go go dira pele ga ge ‘masetla-pelo a magolo’ a thoma. O tla dira bjang phetho yeo e tlago go go bea gare ga batho bao ba tlago go phologa e le gore ba phele mo lefaseng Tokišong e Mpsha ya Modimo ya khutšo le ya paradeise?—Kutollo 7:9, 10, 14, 15.

2. Ke mang yo a beago melao bakeng sa phologo, gomme ye e hwetšwa kae?

² Beibele ga e bolele feela gore go tla ba le baphologi tshenyegong ya lefase e tlago. E nea le ka mohlala wo o tlago go re thuša go tseba batho bao. Ka ge Modimo a dira gore go phologa go kgonege, ruri ke yena yo a beago melao.

3. Gore go tle go be le khutšo le polokego, ruri ke ka baka la’ng go nyakega gore batho ba babe ba fedišwe?

³ Modimo o tla bona ka bohlale le ka tshwanelo gore baphologi e be batho bao ba tlago go dira gabotse Tokišong ya gagwe e Mpsha e sego batho bao ba tlago go e senya. Ge e ba a ka dira gore batho bao ba sa lokago ba phologe, gona khutšo le polokego ya ba ba lokilego di ka se ke tša ba gona. Magae a bona le go lotega ga bona go ka tšwela pele go le kotsing. Eupja Beibele e holofetša gore: “Ba babe ba tlo lôba; ba-leta-Morêna e tlo ba beng ba naxa.” Ke feela ka gore Modimo a diriše molao woo bjale ka ge o boletšwe go Psalme 37:9-11, moo baphologi ba tla kgonago go “thaba ka botlalô bya moláô.” Kamoo Modimo a tlago go dira se ka gona go bonwa mabakeng a fetilego nakong ya ge bobe bja batho bo ile bja tlama Modimo gore a tliše tshenyego.

Mehlala ya Nako e Fetilego ya Phologo

4-6. (a) Ke’ng seo se hlatselago gore tshenyego ya Jerusalema ka 70 Mehleng ya Rena ke therešo ya histori? (b) Tshenyego e ile ya tla ka baka la’ng? (c) Ke’ng yeo e ilego ya dira gore go kgonege go barutiwa ba Jesu gore ba phologe?

⁴ Motseng wa Roma lehono go sa eme moago wa kgale wa lekgolong la pele la nywaga la Mehla e Tlwaetšwego, e lego Moago wa Kgale wa Tito. Go wona go swantšhitšwe dithoto tšeo di ilego tša tšewa tempeleng ya Jerusalema ka morago ga tshenyego ya 70 Mehleng ya Rena. Tshenyego yeo ke taba ya histori. Therešo ya gore nywageng e masome-some pele ga tshenyego yeo Jesu Kriste o be a boletše ka go tla ga yona le kamoo batho ba bego ba tla phologa go yona le yona ke ya histori.

⁵ Batho ba ba-Juda ba be ba furaletše Modimo gomme ba latela batho le mekgwa ya bodumedi ya batho. (Mateo 15:3-9) Ba be ba dumela babušing ba batho ba bopolitiki go e na le go dumela Mmušo wo o holofeditšwego wa Modimo. (Johane 19:15) Ba ile ba ba ba fihla ntlheng ya go gana gaešita le go lwa le therešo yeo Morwa wa Modimo le baapostola ba gagwe ba bego ba e bolela. Jesu o be a lemošitše ka mafelelo ao tsela e bjalo e bego e tla a tliša.—Mateo 23:37, 38; 24:1, 2.

⁶ Mafelelo a bile bjalo ka ge a be a boletšwe. Ngwageng wa 66 Mehleng ya Rena, ba-Juda ba ile ba hlanogela Roma. Go hlaselwa ga pele ga Jerusalema mo go dirilwego ke ba-Roma go ile gwa latelwa ke go tloga ga bona mo go bego go sa lebelelwa. Se e be e le sešupo le sebaka sa gore bao ba bego ba dumela Jesu ba dire seo a bego a ba boditše sona: Tšhabang gomme le tšwe motseng o ahlotšwego le nageng ka moka ya Judea go sa šetšwe seo motho a bego a tla se tlogela morago. Barutiwa ba kgonthe ba Jesu ba dirile ka yona tsela yeo. Ka gona, ngwageng wa 70 Mehleng ya Rena ba-Roma ba ile ba boa gomme ka morago ga thakelelo ba senya Jerusalema le bao ba paletšwego ke go theetša. Hlatse e bonego ka mahlo, e lego ra-dihistori wa mo-Juda Josephus o bolela gore batho ba 1 100 000 ba ile ba hwa Jerusalema ka baka la tlala, go lwa ga bona goba ka marumo a ba-Roma. Lega go le bjalo, Bakriste bao ba ilego ba gata mogato o lebantšego ba ile ba phologa.—Luka 19:28, 41-44; 21:20-24; Mateo 24:15-18.

7. Batho ba be ba swanetše go dira’ng e le gore ba tle ba phologe nakong ya ge Babele e be e senya setšhaba sa Isiraele?

⁷ Boemo bjo bo swanago bo ile bja ba gona mo e ka bago makgolong a nywaga a šupago a fetilego nakong ya ge Modimo a ile a dumelela madira a Babele ka tlase ga Kgoši Nebukadinetsara (II) gore a senye setšhaba sa Isiraele. Tshenyego yeo le yona ke taba ya histori. Nywageng e mentši pele ga yona, Modimo ka baporofeta ba gagwe o ile a lemoša batho ba bahlanogi gore tsela ya bona e ba iša kotsing. Modimo o itše go bona: “Boang! Boang! Le lahlê ditsela tša lena tše mpe. Le hwêla’ng?” (Hesekiele 33:11) Batho ba bantši ba ile ba se ke ba dumela temošong gomme gaešita lege madira a Babele a be a rakeletše Jerusalema, ruri ba-Isiraele bao ba ile ba tšwela pele ba holofela gore ga go na tshenyego e tlago go tla. Lega go le bjalo, e ile ya tla bjalo ka ge go be go boletšwe. Ee, Modimo o ile a rata gore bao ba bontšhitšego tumelo ya bona ka go kwa ba phološwe.—Jeremia 39:15-18; Tsefanya 2:2, 3.

8-10. (a) Ke ka baka la’ng Jehofa a ile a tliša tshenyego ya lefase mehleng ya Noage? (b) Ke ka baka la’ng Noage le lapa la gagwe ba ile ba phološwa?

⁸ Ge re boela morago historing ya motho re hwetša go bontšhwa ga mehleng ya pele ga mohlala wa Modimo wa go phološa. O be o sa akaretše feela tshenyego ya setšhaba eupja o be o akaretša le tshenyego ya lefase. Ye le yona ke therešo ya histori yeo e akaretšago Meetse-fula a lefase nywageng ya 2370/2369 Pele ga Mehla ya Rena mehleng ya Noage. Beibele ka maemo ao a bego a le gona pele ga tshenyego yeo ya lefase e re: “Byale Morêna a bôna bokxôpô bya batho bò xodile mo lefaseng, le tirô ka moka tša diakanyô tša dipelô tša bôná è le bobe fêla ka mehla. Modimo yêna ó bone lefase lè senyêxa lè e-ya, lefase lè tletše tša sehloxo.”—Genesi 6:5, 11.

⁹ Bokgopo le bošoro di ile tša tlama Modimo gore a gate mogato. E bile feela Noage le lapa la gagwe bao ba bontšhitšego tumelo le go kwa. Jehofa Modimo ka go ba gaugela le ka go boloka toka mo lefaseng, ‘o ile a se ke a tsebafa lefase la kgale la banyatši.’ Mafelelo e ile ya ba gore ‘lefase la mehla yeo le lobe ge le be le apešwa ka meetse.’—2 Petro 2:5; 3:5-7.

¹⁰ Ee, Noage le lapa la gagwe ba ile ba phologa. Ka baka la’ng? Sa pele, ga se ba ka ba bapa le ‘lefase lela la banyatši’ bokgopong bja lona. Ga se ba ka ba itesa gore ba nwelele e le ka kgonthe dilong tša lefeela tša bophelo, e lego go ja, go nwa le go nyala mo ba bego ba ka hlokomologa thato ya Modimo goba go se kwe temošo ya gagwe. Noage o ‘sepetše le Modimo’ ka go loka. Se se be se sa bolele gore yena le lapa la gagwe ba ile ba gana feela go dira ditiro tše mpe. Go e na le se, ba ile ba gata mogato o lebanego wa go dira seo se nepagetšego. Ba dumetše seo Modimo a bego a se bolela e le ka kgonthe, gomme ba bontšhitše se ka go aga areka e kgolo ya mabato a mararo ya botelele bja dimithara tše fetago tše 130. Noage le gona o gatile mogato ka go lebana e le “sexoeledi sa tokô,” a botša ba bangwe ka merero ya Modimo gomme a bolela ka tsela ya go loka.—Genesi 6:9, 13-16; Mateo 24:37-39; Ba-Hebere 11:7.

11. Bjale ka ge go bontšhitšwe ke mehlala ye ya temošo, ruri ke’ng seo re swanetšego go se dira ge e ba re tla phologa tshenyego ya lefase e tlago?

¹¹ Batho ba ba seswai ba phologile ka baka la tumelo ya bona le mediro ya bona ya tumelo. Jesu le baapostola ba gagwe ba šupile tshenyego yeo ya lefase e le ya boporofeta bja seo se lebanego le batho mo ‘lebakeng la bofelo.’ Ka gona, go molaleng gore le rena re swanetše go ikarola lefaseng leo le lebilego tshenyego go swana lege Noage le lapa la gagwe ba dirile. Le rena re swanetše go phela ka go dumelelana le thato ya Modimo. Re ka se ke ra hlahlwa ke melao yeo e lego ya rena gomme ra lebelela go phologa. Lentšu la Modimo le re: “Xo na le tsela, ye batho ba rexo ké tsela, anthe e wetša ditseleng tša lehu.” (Diema 16:25) Gaešita le ponagalo ya go ikgakantšha ya go loka e ka se ke ya tliša phologo. Jehofa Modimo o bona seo se lego ka pelong.—Diema 24:12; Luka 16:15.

Seo Jehofa a se Lebelelago Dipelong tša Batho

12, 13. (a) Ke maemo afe ao a bakelago gore batho ba bantši ba nyake go fetoga? (b) Ke ka baka la’ng se e se seo se lekanego go tiiša go phologela ga bona Tokišong e Mpsha ya Modimo? (c) Gore re be gare ga baphologi, ruri ke’ng seo se swanetšego go tutuetša go kwa ga rena bohloko ka baka la maemo a mabe a mehleng yeno?

¹² Batho ba bantši ga ba thabišwe ke maemo a mehleng yeno, gomme ba bontšha se ka dipelaelo, meferefere gomme mafaseng a mangwe ba go bontšha ka phetogelo e sehlogo. Ba bantši ba gana makgetho a godimo le theko e boima ya tša boiphedišo. Ba llišwa ke kotsi ya bokebekwa. Poifo e ba dira gore ba nyake gore dilo di fetolwe. Eupja, na se ke se se lekanego go tiiša go phologela ga bona Tokišong e Mpsha ya Modimo? Aowa, ga se mo go lekanego. Ke ka baka la’ng go se bjalo?

¹³ Ke ka gobane motho a ka kwešwa bohloko ke maemo a, fela a tšwela pele e le moithati. Mo gongwe a ka ba a amogela dibopego tše dingwe tša go se botege le tša boitshwaro bjo bobe, ge feela yena a sa gobale. Lega go le bjalo, batho ba dipelo tšeo di lokilego ba lebelela dilo ka go se swane. Ge ba ithuta Beibele ba bona gore maemo a mabe ke bohlatse bjo bo bonwago bja bolwetši bja kgonthe bja lefase. Ba lemoga gore seo se tutueletšago dibopego tše ke go hlokomologa go tseba le go dira thato ya Jehofa gotee le ka go phela ka melao ya gagwe ya go loka. Ka gona, ga ba kwešwe bohloko kudu-kudu ke bokgopo bja tša leago, bokebekwa, tšhilafatšo goba poifo ya ntwa. Go e na le se, batho ba bjalo ba dipelo tše di lokilego ba llišwa kudu-kudu ke go bona ge leina la Modimo le gobošwa ke tsela ya batho e bodilego. Ba llišwa le ke ge ba bangwe, e sego bona feela ba e-kwa bohloko bjo bogolo ka baka la se.

14. Ke bomang bao ba bego ba ‘swaetšwe’ go phologa nakong ya tshenyego ya Jerusalema ge e be e senywa ke Babele?

¹⁴ Gore re tle re phologe tshenyego e tlago ya lefase, ruri re swanetše go swana le batho bao ba ilego ba phološwa ge Babele e be e senya Jerusalema ka 607 Pele ga Mehla ya Rena, e lego batho bao ba hlaloswago e le ba ba ‘llago ba hlokofetše ka go bona makgapa ka moka’ ao a bego a dirwa gare ga motse woo. (Hesekiele 9:4) Maemo e be e le a “makxapha” ka ditsela tše di fapa-fapanego. Ka mohlala, badiidi ba be ba gatelelwa, gomme ba bangwe ba be ba lahlelwa bohlankeng ka mokgwa wo e sego wa molao ba lahlelwa ke batho ba gabo bona. (Jeremia 34:13-16) Boemo bja boitshwaro bja mmušo wa Juda bo ile bja ba bjo bobe kudu go feta bjoo bja mmušo wa ka leboa wa Isiraele wo o ilego wa hlaloswa e sa le pele ke moporofeta Hosea ka gore: “Tše di lexo xôna ké maroxa le maaká le polaô le bohodu . . . ’me ba hlatlamanya melato ya madi.” (Hosea 4:2; Hesekiele 16:2, 51) Ke feela batho bao ba bego ba kwele bohloko dipelong ka baka la bokgopo bjo bo bjalo gotee le go se hlomphe Modimo, ba ba bego ba ‘swaetšwe’ phološo.—Hesekiele 9:3-6.

15. Ke’ng yeo e ditelago batho ba bangwe gore ba se ke ba dira diphetogo tšeo di nyakegago e le gore ba tle ba phologe tshenyego ya lefase yeo e tlago?

¹⁵ Gaešita lege batho ba bantši lehono ba ka rata go thabela bophelo mo lefaseng ka mo go sa felego ka khutšo, katlego le ka boiketlo, ruri ga ba rate go dira diphetogo tseleng ya bona ya bophelo tšeo go ithuta le go latela mohlala wa Beibele wa go phela gabotse go tlago go di tliša. Ruri ga ba rate go loka goba go kgongwa ke batho ba gabo bona e le ka kgonthe. Ka ge Tokišo e Mpsha ya Modimo e tla tšweletša lekoko le lefsa leo go lona “xo axilexo tokô,” gona ditaba tše di lokilego ka lona e ba tše botse feela go bao ba ratago toka. Ba bangwe ba hwetša ba sa swanelwe ke yona.—2 Petro 3:13; 2 Ba-Korinthe 2:14-17.

Seo o ka se Dirago mo Nakong ye

16-18. (a) Motho o ‘swaelwa’ bjang phologo? (b) Ke mogato ofe wo a swanetšego go o gata malebana le borapedi bja maaka, gomme a gate ofe malebana le borapedi bja therešo? (c) O swanetše go lebelela bjang mahlakore a bopolitiki ao a swanago le UN?

¹⁶ Jehofa o tla phološa feela batho bao ba ratago e le ka kgonthe go phela tlase ga pušo ya gagwe ya go loka. A ka se ke a gapeletša motho lege e le ofe go phela tlase ga maemo ao yena ka noši a sa a ratego. Ka gona, batho ba ba tlago go phološwa e swanetše go ba batho ba ba tlago go bontšha go amogela ga bona ga kgonthe pušo ya Modimo gona mo nakong ye. Ba ‘swaelwa’ phologo ka go apara “motho e mofsa” wa Bokriste, gomme ba bapiša maphelo a bona le ditsela tša Modimo le go nea bohlatse bja gore ke barutiwa ba Morwa wa Modimo. Ka gona, ba ‘kgetha bophelo’ le ditšhegofatšo e sego lehu. (Ba-Kolose 3:5-10; Doiteronomio 30:15, 16, 19) Na wena o tla kgetha’ng?

¹⁷ Go kgetha ga gago go akaretša go ikokobetša ga gago go Modimo tabeng ya go mo rapela. Jesu o itše: “Xo tla lebaka, le byale ké lôna, leo barapedi ba makxonthe ba tl’o xo rapêla Tate ka Môya le ka therešô. Le xôna Tate ó nyaka ba ba Mo rapêlaxo ka mokxwa woo.” (Johane 4:23) Go phologa tshenyego ya lefase yeo e tlago go nyaka gore motho a lahle borapedi ka moka bja maaka gomme a be le karolo borapeding bja therešo. Le gona, baphologi ba ka se ke ba hwetšwa gare ga bao ba botago Ditšhaba tše Kopanego goba bao ba lego mahlakoreng a mangwe a bopolitiki ka ge a e le karolo ya lefase le le tlago go senywa.—Kutollo 17:11; 18:17-21.

¹⁸ Ditšhegofatšo tše di sa felego di letetše batho bao ba tšeago tsela ye e išago phologong. Ela hloko mo nakong ye dilo tše dingwe tše dikgolo tšeo Modimo a di holofetšago bao ba dumelago Lentšu la gagwe gomme ba bontšha tumelo yeo ka go gata mogato o lebanego.

[Seswantšho go letlakala 87]

“Lešaba le lexolo” le tla phologa tshenyego ya lefase gore le phele lefaseng Tokišong e Mpsha ya Modimo