E-Ba le Moya wa Boikgafo!

ROLFa e be e le mothwalwa yo a lebelelwago e le wa bohlokwa. Ge a be a phetha ka go hwetša modiro wa lebakanyana gore a kgone go oketša karolo ya gagwe bodireding bja Bokriste, mothwadi o ile a dirišana le yena ka ntle le bothata. Ka gona, Rolf o kgonne go thabela tirelo ya bobulamadibogo ka nywaga e mentši. Lega go le bjalo, boemo modirong bo ile bja fetoga. Rolf o be a itlhatsela e le yo a kgonago gakaakang modirong wa gagwe mo e lego gore o ile newa maemo a go ba molaodi wa thekišetšano wa feme. Modiro o be o akaretša moputso wo o lekago le ditebelelo tše botse tša go ba le tšwelopele. Lega go le bjalo, go šoma lebakanyana go be go ka se sa hlwa go kgonega.

Rolf o be a e-na le mosadi le bana bao a bego a swanetše go ba hlokomela, gomme tšhelete e oketšegilego e be e tla mo tšwela mohola. Lega go le bjalo, o ile a gana modiro gomme a dira kgopelo bakeng sa modiro o mongwe wo o bego o tla dira gore a kgone go phetha boikarabelo bja gagwe bja moya le bja tša ditšhelete. Mothwadi wa Rolf o ile a tlabja ke phetho ye. Ka go lemoga gore gaešita le go holofetšwa moputso o montši go be go sa thuše selo, mothwadi wa gagwe o ile phetha ka gore: “Ke bona gore nka se kgone go tšea kgang le go phegelela ga gago.”

Ee, Rolf o be a e-na le kgodišego. Eupja o be a e-na le seka sengwe gape​—moya wa boikgafo. Moya o bjalo o a welwa lefaseng la rena la go ikgobela ka matsaka. Eupja o ka lebiša tseleng ya bophelo e holago le e kgotsofatšago. Moya wa boikgafo ke eng? O nyaka eng? Le gona re swanetše go dira’ng gore re o kgomarele?

Se se Nyakwago ke Beibele

Go gafa selo go bolela go kgaogana le selo se sengwe sa bohlokwa goba go se neela. Sehlabelo e bile karolo ya borapedi bjo bo sekilego ga e sa le go tloga ge Abele, hlatse e botegago, a gafela Modimo “maitšibulô a dihuswane tša xaxwe” e le sehlabelo. (Genesi 4:4) Banna ba tumelo, bjalo ka Noage le Jakobo ba dirile sona seo. (Genesi 8:20; 31:54) Dihlabelo tša diphoofolo le tšona e be e le sebopego sa bohlokwa sa Molao wa Moše. (Lefitiko 1:​2-4) Lega go le bjalo, ka tlase ga Molao barapedi ba be ba opeletšwa gore ba neele se se kaone se ba nago le sona. Ba be ba sa dumelelwe go neela diphoofolo tše nago le bosodi e le dihlabelo. (Lefitiko 22:​19, 20; Doiteronomio 15:21) Ge ba-Isiraele ba bahlanogi ba roba molao wo, Modimo o ile a ba kgamelela, a re: “Xe Le ipexa ka se se hlotšaxo [bakeng sa go dira sehlabelo], a Le re xa se bobe? O k’O di išê xo mokxôma; a di ka mo kxahla? . . . A Le re nka kxahlwa ke tšôna-tšeo di e-tšwa diatleng tša lena?”​—Maleaki 1:​8, 13.

Molao wa motheo wa go dira dihlabelo o fetišeditšwe borapeding bja Bokriste. Lega go le bjalo, ka ge Kriste a lefeletše topollo ka botlalo, dihlabelo tša diphoofolo ga di sa amogelwa ke Modimo. Ka gona, Bakriste ba ka dira sehlabelo sefe ba amogelwa? Paulo o ngwala go Ba-Roma 12:1 gore: “Byale lena bana bešo, ke a Le rapêla ka xo bôna mabobo a Modimo ke re: Tlišang mebele ya lena, e bê sedimo [sehlabelo] se se phelaxo se sekxêthwa, sa xo kxahla Modimo; e bê xôna xo dirêla Modimo ka mo xo mo swanetšexo.” A phetogo e makatšago gakaakang! Go e na le go dira sehlabelo ka mebele e hwilego, Bakriste ba be ba swanetše go dira dihlabelo tše phelago tša bona ka noši​—matla, dilo tša bona le bokgoni. Le gona, go swana le Isiraeleng, Jehofa a ka se amogele dihlabelo ‘tše hlotšago’ goba tše di sa neelwego ka pelo ka moka. O nyaka gore barapedi ba gagwe ba mo nee se se kaone se ba nago le sona, gore ba mo direle ka pelo ka moka, moya, monagano le matla.​—Mareka 12:30.

Ka gona, moya wa boikgafo o akaretša go feta kgole go fo ikgafela ga motho lenaneong la diboka le modiro bodireding bja Bokriste. Go bolela go ba yo a ikemišeditšego go dira thato ya Modimo go sa šetšwe seo go tlago go se nyaka. Go bolela go ba yo a ikemišeditšego go welwa ke mathata. Jesu o itše: “Ge e ba motho a rata go ntšhala morago, anke a ikgafe gomme a rwale kota ya gagwe ya tlhokofatšo gomme a ntatele ka mo go tšwelago pele.” (Mateo 16:​24, NW) Mokriste ga a dire gore kganyogo ya motho ka noši ya modiro goba dipakane tša dilo tše di bonagalago e be seo a tshwenyegago kudu ka sona. Bophelo bja gagwe bo theilwe tabeng ya go tsoma Mmušo wa Modimo pele le go loka ga Gagwe. (Mateo 6:​33, NW) Ge go nyakega, o ikemišeditše go ‘rwala kota ya gagwe ya tlhokofatšo,’ a tlaišege, a lešwe dihlong goba gaešita le go hwa!

Ditšhegofatšo Tšeo di Tlišwago ke Boikgafo

Ge motho a lebane le dikgonagalo tše bjalo tše di boifišago, ka tlwaelo a ka ipotšiša ge e ba go ikgafa e le mo go swanetšego. Go bao ba ratago Jehofa Modimo le go kganyoga gore leina la gagwe le godišwe, ke mo go swanetšego e le ka kgonthe. (Mateo 22:37) Ela hloko mohlala o phethegilego o beilwego ke Jesu Kriste. Pele ga ge a e-tla lefaseng, o be a thabela boemo bjo bo phagamego bja legodimong e le sebopiwa sa moya. Lega go le bjalo, go etša ge a boditše barutiwa ba gagwe, o be a sa nyake ‘se a se ratago, eupja a nyaka se se ratwago ke [Modimo] yo a mo romilego.’ (Johane 5:​30) Ka gona, ‘o ile a upja a itlhakola, a tšea lebopo la mohlanka, a ba yo a swanago le batho, a ba motho ka sebele. A ikokobetša a ba e a kwago le go iša lehung, lehung la koteng ya tlhokofatšo’ ka boithatelo.​—Ba-Filipi 2:​7, 8 bapiša le NW.

Boikgafo bjoo ga se bja itlhatsela e le bja lefeela. Ka ge Jesu a be a ikemišeditše go ‘gafa bophelo bja gagwe ka baka la bagwera ba gagwe,’ o be a ka lefela topollo, a dira gore batho ba kgone go hwetša bophelo bja go se hwe magodimong, goba bophelo bjo bo sa felego lefaseng. (Johane 3:16; 15:13; 1 Johane 2:2) Ka go kgomarela potego ya gagwe ka mo go phethagetšego, o dirile gore leina la Jehofa le retwe kudu. (Diema 27:11) Ga go makatše ge Jehofa a mo šegofaditše ka baka la tsela ya gagwe ya boikgafo! ‘Modimo o mo godišitše gagolo, a mo setša ka Leina le le fetago maina ohle.’​—Ba-Filipi 2:9.

Ke therešo gore Jesu e be e le Morwa wa Modimo yo a tswetšwego a nnoši. Na Modimo le gona o putsa ba ikgafago ka baka la gagwe? Ee, gomme se se bontšhwa ke mehlala e mentši mehleng ya bogologolo le mehleng yeno. Ela hloko pego ya Beibele ya Ruthe wa Moaba. Go bonala a tsebile Jehofa ka monna wa gagwe wa mo-Isiraele. Ka morago ga ge monna a hwile, Ruthe o ile a swanelwa ke go dira phetho. Na o be a tla tšwela pele a dula nageng ya boheitene yeo a tswaletšwego go yona, goba na o be a tla ya Nageng ya Kholofetšo le mmatswale wa gagwe yo a tsofetšego, Naomi? Ruthe o ile a kgetha sa bobedi gaešita lege se be se bolela go gafa go ba gotee le batswadi ba gagwe goba mohlomongwe gaešita le tebelelo ya go nyalwa gape. Lega go le bjalo, Ruthe o be a šetše a tseba Jehofa, gomme kganyogo ya go mo rapela gare ga batho bao a ba kgethilego e ile a mo tutueletša go kgomarela Naomi.

Na Ruthe o ile a putswa ka baka la boikgafo bjo bjalo? Ge nako e dutše e e-ya, mong wa naga yo a bitšwago Boase o ile a mo tšea ya ba mosadi wa gagwe, gomme Ruthe o ile a ba mmago morwa yo a bitšwago Obede, e lego seo se mo dirilego gore e be makgolo-khukhu wa Kriste.​—Mateo 1:​5, 16.

Ditšhegofatšo ka tsela e swanago di be di thabelwa ke bahlanka ba Modimo ba mehleng yeno. Ka mohlala ka 1923, William R. Brown, yo a tsebjago kudu e le “Bible” Brown, o ile a tlogela legae la gagwe ka West Indies gore a ye go etelela modiro wa boboledi pele ka Afrika Bodikela. O sepetše gotee le mosadi wa gagwe le morwedi. Mafelelong o ile a hudugela Nigeria, moo modiro wa boboledi e bego e le gona o sa thoma go enywa dienywa. “Bible” Brown, gotee le mo-Amerika o moso yo a bitšwago Vincent Samuels le Hlatse e nngwe ya India Bodikela e bitšwago Claude Brown, o kgathile tema e bohlokwa ya dibopego tša pele tša modiro Afrika Bodikela.

Lehono bagoeledi ba ba fetago 187 000 ba šoma Sierra Leone, Liberia, Ghana le Nigeria, e lego mašemo ao a ilego a thongwa ke “Bible” Brown le bašomi-gotee le yena. Pele ga lehu la gagwe ka 1967, “Bible” Brown o itše: “A lethabo le kaakang go bona banna le basadi e e-ba ba ba kwago ditaba tše di lokilego tša Mmušo wa Modimo!” Ee, o be a šegofaditšwe ka mo go humilego ka baka la boikgafo bja gagwe.

Ditsela tša go ba le Boikgafo

Ke ditsela dife tšeo ka tšona re ka bontšhago moya o bjalo lehono? Motho o swanetše go ba le karolo ka mehla bodireding bja ntlo le ntlo beke le beke. (Ditiro 20:20) Go dira bjalo, kudu-kudu ka morago ga beke ya go lapišwa ke modiro, mo gongwe go ka se be bonolo. Mo gongwe go tla nyaka go itaya le lenaneo le lebotse. Eupja lethabo le feta mathata a a bago gona. Ee, mo gongwe o ka šegofatšwa ka go thuša motho o mongwe gore e be ‘lengwalo la Kriste . . . la go se ngwalwe ka pilwana, la go ngwalwa diphaphathing tša nama, tša dipelo.’​—2 Ba-Korinthe 3:3.

Ka ‘go reka nako e swanetšego’ mohlomongwe modirong goba boitapološong, ba bangwe ba okeditše go ba le karolo ga bona modirong wa boboledi. (Ba-Efeso 5:​16, bapiša le NW.) Ba bangwe ba rulagantše mananeo a bona gore ba kgone go thabela tirelo ya bobulamadibogo bja go thuša bonyenyane gatee ka ngwaga. Ba bangwe ba kgona go tšwela pele ka bobulamadibogo bja go thuša goba ba šoma e le babulamadibogo ba ka mehla. Boikgafo bjo bongwe bjo go ka naganwago ka bjona ke go hudugela mafelong ao go ona go nyakegago bagoeledi ba oketšegilego ba Mmušo. Se gantši se nyaka diphetogo tše kgolo mokgweng wa bophelo, go kgotlelela mathata, go itumelelanya le ditlogo le meetlo e mefsa. Eupja ditšhegofatšo tša go ba le karolo e tletšego go thušeng ba bangwe gore ba hwetše bophelo di dira gore boikgafo bjo bjalo e be bjo bo swanetšego.

John Cutforth yo a belegetšwego Canada o ile a hwetša se phihlelong ya gagwe ka noši. Ka morago ga go aloga ga gagwe Sekolong sa Beibele sa Watchtower sa Gilead, o ile a abelwa go ba moromiwa Australia. Ngwanabo rena Cutforth o a gopola: “Seo e be e le bokgole bjo bokaakang le gae! Na ke be ke tla ka ka tsoga ke boetše Canada go yo bona batswadi le bagwera gape pele ga Haramagedone. Tsela feela ya go kgonthišega e be e le go ya moo.” Ngwanabo rena Cutforth o ile ya, gomme ga se a itshola ka boikgafo bjo a bo dirilego. Nywageng ya ka morago o ile a etelela pele modirong wa go nea bohlatse kua Papua New Guinea, moo a sa dutšego a šoma gona ka mafolofolo, a feditše nywaga e 50 tirelong ya nako e tletšego. O kile a re: “Go tsoma tlhahlo ya Jehofa ka mehla, go amogela kabelo lege e le efe yeo a bonago e swanetše go newa, go tliša lethabo, kgotsofalo le bagwera ba bantši.”

Ke therešo gore maemo, go swana le bophelo bja mmele, tša ditšhelete le boikarabelo bja lapa, mo gongwe a ka lekanetša se o ka se dirago; ga se bohle bao ba ka šomago e le babulamadibogo le baromiwa. Lega go le bjalo, e-ba yo a ikemišeditšego go ba le karolo e tletšego dibokeng le tirelong ya tšhemo ge go kgonega, o sa dumelele mathatanyana a swanago le boemo bjo bo sa kgahlišego bja leratadima a go thibela. (Ba-Hebere 10:​24, 25) Le gona o ka kgona go gafa nako e oketšegilego bakeng sa thuto ya motho ka noši ya Lentšu la Modimo. Malapa a mangwe a dira bjalo ka go lekanetša nako yeo a e dirišetšago go boga mananeo a TV, mohlomongwe gaešita le go ba le bošego bjoo ka bjona a sa ‘bogego TV’ bekeng e nngwe le nngwe goba go se be le TV ka mo go feletšego. Ka go bula sebaka sa thuto ya motho ka noši, “sedimo [sehlabelo] sa thêtô” seo ka sona o “ipolêlaxo ka Leina la xaxwe” dibokeng le tirelong ya tšhemo se tloga se bonala e tla ba sehlabelo sa maemo a godimo.​—Ba-Hebere 13:15.

Elelwa gore modiro wa boboledi gona bjale o megatong ya wona ya mafelelo. Go se go ye kae Modimo o tla tliša kahlolo lefaseng la megabaru le la go rata go ikgobelela leruo. (Tsefanya 2:3) Gore re kgomarele go amogelwa ke Modimo ga se ra swanela go ipabalela. Re swanetše ‘go tliša mebele ya rena e be sehlabelo se phelago, se sekgethwa, sa go kgahla Modimo.’ (Ba-Roma 12:1) Moya o bjalo o tla tliša lethabo le kgotsofalo. O tla re thuša go hwetša lethabo le le oketšegile bodireding bja rena. Le gona se se tla thabiša pelo ya Jehofa Modimo!​—Diema 27:11.

Ka gona, kgomarela moya wa boikgafo! O se ke wa dika-dika go gafa boiketlo bja gago ka baka la ba bangwe le go thekga dikgahlego tša Mmušo. Paulo o a opeletša: “Le se kê la lebala xo dira batho xa-botse le xo ba nea; xobane Modimo ó kxahlwa ke [dihlabelo, NW] tše byalo.”​—Ba-Hebere 13:16.

[Mongwalo wa tlase]

[Seswantšho go letlakala 26]

Go bula sebaka sa thuto ya motho ka noši le tirelo ya tšhemo go ka nyaka boikgafo, eupja go a putsa

[Seswantšho go letlakala 28]

W. R. Brown le John Cutforth ba be ba šegofaditšwe ka mo go humilego ka baka la tsela ya bona ya boikgafo