Haramagedone

Tlhaloso: Har Ma·ge·donʹ ya Segerika yeo e tšerwego Sehebereng gomme ya bolelwa e le “Haramagedone” ke bafetoledi ba bantši, e bolela “Thaba ya Megido” goba “Thaba ya Pokano ya Madira.” Beibele e kgomaganya leina e sego le ntwa ya nuclear, eupja le ‘ntwa ya mohla-mogolo wa Modimo Ra-matla-ohle’ e tlago ya legohle. (Kut. 16:14, 16) Leina le le dirišwa kudu “lefelong [Segerika, toʹpon; ke gore boemo]” leo go lona babuši ba lefase ba bopolitiki ba bokantšhetšwago go lwa le Jehofa le Mmušo wa gagwe ka Jesu Kriste. Ntwa e bjalo e tla bontšhwa ke mogato wa lefase o gatwago malebana le bahlanka ba Jehofa lefaseng, e lego baemedi ba bonagalago ba Mmušo wa Modimo.

Na batho ba tla dumelelwa ke Modimo go fediša lefase ka seo se bitšwago “Haramagedone ye e bakwago ke nuclear”?

Ps. 96:10, PK: “Jehofa o a buša, ka gona lefase [le le tšweletšago dijo] [ka Sehebere ke te·velʹ’; e lego lefase ka ge le nontšhitšwe le go dulwa, kgokolo yeo e dulwago] le eme le tiile, le ka se ke la tekema.”

Ps. 37:29: “Baloki e ba beng ba naxa, ba dula mo xo yôna ka mehla le ka mehla.”

Kut. 11:18: “Ba-ntlê ba xalefile, xwa tla boxale bya xaxo [Jehofa], xwa tla lebaka . . . la xo senya basenya-lefase.”

Haramagedone ke’ng ka ge e bolelwa ka Beibeleng?

Kut. 16:14, 16: “Ké yôna meôya ya masathane e diraxo mehlôlô, ye e yaxo xo dikxoši tša lefase ka moka, ya di rapa xo ya ntweng ya mohla-moxolo wa Modimo Ra-matla-ohle. Xomme ó ba bokanthšitše felô mo xo bitšwaxo Haramagedone [ka Sehebere].”

Na Haramagedone e tla lwiwa feela Bohlabatšatši bja Magareng?

Babuši le madira a ditšhaba ka moka ba tla bokantšhetšwa go lwa le Modimo

Kut. 16:14: “Ye e yaxo xo dikxoši tša lefase ka moka, ya di rapa xo ya ntweng ya mohla-moxolo wa Modimo Ra-matla-ohle.”

Kut. 19:19: “Ka bôna Sebata [mebušo ya batho ya bopolitiki ka moka ga yona] sela, le dikxoši tša lefase, le madirá a tšôna, di bokanetše xo hlabana le Eo a nametšexo pitsi le dirá tša xaxwe.”

Jer. 25:33: “Babolawa ba [Jehofa] ba tlo tlala naxa mo xo fêla thokô tšohle xo ya kwa dipheletšong tša yôna.”

Go dirišwa ga leina Haramagedone go ka se ke gwa bolela gore ntwa e tla lwiwa Thabeng ya kgonthe ya Megido

Ga go na Thaba ya kgonthe ya Megido; ke feela mmoto wo o ilego godimo ka dimithara tše 21 moo marope a Megido ya kgale a hwetšwago gona.

Dikgoši le madira a bahlabani a “lefase ka moka,” di ka se ke tša lekana Molaleng wa kgonthe wa Esdraelone o lego ka tlase ga Megido. Molala ke wa khutlo tše tharo wo e lego feela wa botelele bja dikhilomithara tše 32 le bophara bja dikhilomithara tše 29 ka lehlakoreng la ka bohlabatšatši.—The Geography of the Bible (New York, 1957), Denis Baly, letl. 148.

Leina le a swanela ka baka la karolo ya Megido historing; molala o lego ka tlase ga Megido e be e le molala wa dintwa tša makgaola-kgang

Jehofa moo o ile a dira gore Sisera kgoši ya Kanana e fenywe pele ga Moahlodi Baraka.—Baa. 5:19, 20; 4:12-24.

Thutmose III yo e bego e le farao wa Egipita o itše: “Go thopja ga Megido ke go thopja ga metse e sekete!”—Ancient Near Eastern Texts Relating to the Old Testament (Princeton, N.J.; 1969), e ngwadilwego ke James Pritchard, letl. 237.

Go bolela ka Megido (e bolelago “Pokano ya Madira”) ke mo go swanetšego, ka gobane Haramagedone ke boemo bja lefase bjo go bjona madira le bathuši ba bangwe ba babuši ba ditšhaba ka moka ba tlago go akaretšwa go bjona.

Ke bomang goba ke eng seo se tlago go fedišwa ka Haramagedone?

Dan. 2:44: ‘Modimo wa legodimo o tla tsoša mmušo, gomme o tla pšhatla mebušo e mengwe ka moka wa e fediša; ge e le wona o tlo ema go ya go ile.’

Kut. 19:17, 18: “Ka bôna Morongwa e mongwê á eme kwa letšatšing, a hlaboša lentšu a bolêla le manong ka moka a fofaxo sebakeng a re: Tlang Le phuthêxêlê monyanya o moxolo wa Modimo. Le jê dinama tša maxoši, le dinama tša matona, le dinama tša baxale, le dinama tša dipitsi le tša banamedi ba tšôna le dinama tša bahunoloxi le tša bahlanka, le tša banyane le tša baxolo!”

1 Joh. 2:16, 17: “Tšohle tše lefaseng, e lexo kxanyoxô ya nama, le kxanyoxô ya mahlô, le xo phela ka xo ikxoxomoša, xa di tšwe xo Tata wešo, di tšwa lefaseng. Xomme lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.”

Kut. 21:8: “Xe e le ba boi, le ba xo se dumele, le ba dithšila, le babolai, le diotswa, le ba medimo e šele, le bohle ba maaká, ya bôná kabêlô e kwa bodibeng bya mollô le thsêbêla. Ké lôna lehu la bobedi.”

Na tshenyego e tla ba ya ka mo go sa felego?

Mat. 25:46: “Bôná [bao ba gannego go direla ‘banababo’ Kriste botse] ba tlo ya thlokofatšong ye e sa felexo.”

2 Ba-Thes. 1:8, 9: “Ba ba sa tsebexo Modimo, le ba ba sa kwexo Ebangedi ya Mong wa rena Jesu Kriste, . . . bôná-bao, kôtlô e tl’o xo ba wêla ké thsenyêxo e sa felexo.”

Na go tla ba le baphologi?

Tsef. 2:3: “Nyakang [Jehofa] lena babôtla bohle ba lefase, lena Le yaxo ka molaô w’axwe. Tsomang tôkô, Le tsomê boikokobetšô; mohlomongwê Le ka efošwa mohla woo wa boxale bya [Jehofa].”

Ba-Roma 10:13: “Ba xo tlo phološwa ké ba ba bitšaxo ’ina la [Jehofa].”

Ps. 37:34: “Letêla [Jehofa], O swarê ka tsela ya xaxwe, a Xo xodišê O be mong wa naxa; O bônê xe ba babe ba lôba.”

Joh. 3:16: “Modimo ó . . . [neile] Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelo byo bo sa felexo.”

Kut. 7:9, 10, 14: “Ka buša ka ba le pônô, ka bôna lešaba le lexolo la batho ba xo sexo motho e a kxônaxo xo ba bala, ba dithšaba ka moka, le meloko ka moka, le merafô ka moka, le maleme ka moka; ka bôna bà eme pele xa sedulô sa boxoši sa Kwana, ba apere ’kobô tše dithšweu, bà swere mahlare a molala ka diatla tša bôná. Ba hlaboša mantšu xa-xolo ba re: Xo phološa ké xa Modimo wa rena e a dutšexo sedulong sa boxoši, ké xa Kwana. . . . Ké bôná ba ba tšwaxo tlaišexong e kxolo.”

Go tla direga’ng ka bana ba banyenyane ka Haramagedone?

Beibele ga e arabe ka go lebanya potšišo yeo, gomme ga re baahlodi. Lega go le bjalo, Beibele e bontšha gore Modimo o lebelela bana ba banyenyane ba Bakriste ba therešo e le ‘ba bakgethwa.’ (1 Ba-Kor. 7:14) Le gona e utolla gore dinakong tše di fetilego ge Modimo a be a senya batho ba babe, ruri o ile a senya le bana ba bona ba banyenyane. (Num. 16:27, 32; Hesek. 9:6) Modimo ga a rate motho lege e le mang gore a fedišwe, ka gona o dirile gore temošo e newe mo nakong ye gore go holwe batswadi gotee le bana ba bona. Na e ka se ke ya ba bohlale go batswadi gore ba phegelele tsela yeo e tlago go feleletša ka go dira gore bana ba bona ga gaugelwe ke Modimo mo nakong ye, gaešita le ka Haramagedone?

Na lerato la Modimo le tapišwa ke go senywa ga ba babe?

2 Pet. 3:9: “[Jehofa] . . . sa xaxwe ke xo se Le fêlêle pelo, xobane xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.”

Luka 18:7, 8: “Modimo, a a ka se namolêlê bakxêthwa ba xaxwe ba ba mmitšaxo mosexare le bošexo, le xe a ka ba letetša? Ke a Le botša, ó tlo ba namolêla ka byakô.”

2 Ba-Thes. 1:6: “Se se loketšexo Modimo ké xe ba ba Le hlokofatšaxo a tlo ba bušetša thlokofatšô.”

Na go a kgonega go ba magareng ga ditsela?

2 Ba-Thes. 1:8: “Ba ba sa tsebexo Modimo [ka go ikgethela ga bona], le ba ba sa kwexo Ebangedi ya Mong wa rena Jesu Kriste, ó tlo ba lefetša ka dikxabo tša mollô.”

Mat. 24:37-39: “Xo tlo ba byalo ka mehleng ya Noaxe. . . . Ba be ba sa šetše selô; meetse-fula a bá a tla, a ba tšea ka moka. Le maboong a Morwa-motho xo tlo ba byalo.”

Mat. 12:30: “E a sa emexo le Nna, ó lwa le Nna; le e a sa kxobêlexo le Nna, ó a xašanya.”

Bapiša le Doiteronomio 30:19, 20.

Ke tutuetšo ya mang yeo e kgoromeletšago ditšhaba boemong bja lefase bjo bo tlago go feleletša ka ntwa ya go lwa le Modimo?

Kut. 16:13, 14: “Ka bôna molomong wa Nôxa [Sathane Diabolo; Kut. 12:9] le molomong wa Sebata, le molomong wa Moporofeta wa maaká, xò e-tšwa meôya e meraro ya dithšila bo-ka dixwêxwê. Ké yôna meôya ya masathane e diraxo mehlôlô, ye e yaxo xo dikxoši tša lefase ka moka, ya di rapa xo ya ntweng ya mohla-moxolo wa Modimo Ra-matla-ohle.”

Bapiša le Luka 4:5, 6; 1 Johane 5:19; gape le Ditiro 5:38, 39; 2 Koronika 32:1, 16, 17.

Jehofa

Tlhaloso: Leina la Modimo o nnoši wa therešo. Leina leo le mo hlaolago. Jehofa ke Mmopi gomme ke yo ka tshwanelo e lego Mmuši yo a Phagamego wa legohle. Leina “Jehofa” le fetoletšwe go tšwa go Tetragrammaton יהוה ya Sehebere, e lego leo le bolelago gore “Yo a Dirago Gore Dilo di be Gona.” Ditlhaka tše tše nne tša Sehebere di emelwa malemeng a mantši ke ditlhaka JHVH goba YHWH.

Leina la Modimo le hwetšwa kae diphetolelong tša Beibele tšeo di dirišwago kudu lehono?

Beibele ya Sepedi: Leina la Jehofa le tšwelela go Ekisodo 6:3; Psalme 68:4; Hosea 12:6; Joele 2:27; 3:16, 17; Amosi 5:8; 9:6. (Eupja ge e ba ye le diphetolelo tše dingwe di diriša leina “Jehofa” mafelong a mantši, gona ke ka baka la’ng e sa be tše di dumelelanago ka go le diriša kae le kae moo Tetragrammaton e tšwelelago gona lengwalong la Sehebere?)

Phetolelo ya Kgale: Leina la Jehofa le dirišwa ka go dumelelana Mangwalong a Sehebere phetolelong ye.