Diriša Dimakasine Ka Mo Go Holago

1 Ge o etela lefelong la go rekiša dikuranta le dimakasine, o bona sehlopha se segolo ka mo go makatšago sa dimakasine tšeo di bolelelago selo se sengwe le se sengwe go thoma ka metlae go ya go thekinolotši ya tša thutamahlale. O ka se ke wa kgona go di bala ka moka ga tšona. Gaešita lege dimakasine tše dingwe di e-na le taba e holago, fela bontši bja tšona ke tša bohlokwa bjo bo belaetšago. Tše dintši ke tšeo di gobogilego gomme di swanetše go phengwa.

2 A phapano e kgolo gakaakang ge di bapetšwa le Morokami le Phafoga! Dimakasine tše ke tšeo di ikgafetšego tabeng ya go nyakišiša le go tsebatša therešo yeo e ka dirišwago bakeng sa phološo go bohle bao ba arabelago leratong la Modimo.

3 Phafoga! e ka fihlelela batho ba mehuta ka moka ka mo go atlegago ka baka la go akaretša ga yona ditaba tše dintši le dihlogo tše di fapa-fapanego. Go etša ge go hlalositšwe go letlakala 4 la tokollo e nngwe le e nngwe, ke “ya go fahloša lapa ka moka.” E tšweletša dihlogo tše di lego mabapi le ditaba tše fapa-fapanego, tšeo di akaretšago batho, bodumedi le thutamahlale. E fatišiša ka mo go tseneletšego gomme ya šupa seo se tlogago se bolelwa ke ditiragalo tša gona bjale. Ka godimo ga tšohle, e “aga tumelo kholofetšong ya Mmopi ya lefase le lefsa la khutšo le le šireletšegilego.”

4 Tokollo ya October 8 ya Phafoga! e bolelela taba e rego, “O ka Kgona go Fenya Maikwelo a go se Thabe.” Maphelo a mantši kudu a šulafaditšwe ke maikwelo a bjalo. Go neela makasine wo ka go lebiša tlhokomelo keletšong ya wona e homotšago ya Beibele go ka kgoma motho pelo. Ge e le ka tokollo ya November 8, re swanetše go kgona go hwetša tsebe e theetšago ka go lebiša tlhokomelo dintlheng tše homotšago lelokelelong la “Lefase le Lefsa Leo le Kgotsofatšago Bohle.”

5 Morokami o ile wa ipontšha e le mmoleledi yo a tsebjago lefaseng ka bophara wa ditaba tše di lokilego tša Mmušo wa Modimo le ditšhegofatšo tša Paradeise tšeo o tlago go di tliša. Tokollo ya October 1 e tla araba potšišo e fatollago ya gore, “Na Batho Ruri ba Nyaka Mesia?” Se se tla re nea sebaka se sebotse sa go bolela ka kholofelo ya rena ya Mmušo. Taba yeo e lego mabapi le “Go Lebeletšana le Mathata a Bophelo bja Lapa Lehono,” yeo e bolelelwago ka go tokollo ya October 15, e tla re thuša go thoma dipoledišano le ditho tša lapa tšeo di hlologetšego kimollo dikgateletšong tše dintši tša bophelo.

6 Re nyaka batho bao ba tlogago ba thabela go amogela dimakasine tše tša bohlokwa ka mehla. Ge o bolela ka mehola e mentši ya dimakasine, katanela go hlohleletša kgahlego ya mong wa ntlo dimakasineng. E-ba le kgopolo e nepagetšego ge o neela peeletšo go motho o mongwe le o mongwe. Moo peeletšo e sa amogelwego, neela dimakasine tše pedi, o bolela gore o tla boa gape lebakeng la dibeke tše pedi o e-na le ditokollo tše difsa-difsa. Ka tsela ye o ka kgona go thoma tsejana ya ka mehla ya dimakasine. Moo batho ba sa kgonego go fihlelela peeletšo ya ngwaga, ke ka baka la’ng o sa neele peeletšo ya dikgwedi tše tshelelago?

7 Re ka bolelela dimakasine tša rena go bohle ka ge re kgodišegile ka bohlokwa bja tšona. Re na le selo se sebotse, gomme go se abelana le ba bangwe ke go ekiša Kriste.—Die. 3:27; Ba-Heb. 13:16.