Kgaolo 11

Johane o Lokiša Tsela

GO FETILE nywaga e 17 ga e sa le go tloga ge Jesu e le ngwana wa nywaga e 12 yo a bego a botšiša barutiši dipotšišo ka tempeleng. Ke seruthwane sa ngwaga wa 29 C.E., gomme go bonala eka mang le mang o bolela ka Johane motswala wa Jesu, yo a bolelago nageng ka moka go dikologa Noka ya Jorodane.

Ka kgonthe Johane ke motho yo a tlabago kudu ka ponagalo le ka polelo. Seaparo sa gagwe ke sa boya bja kamela gomme o itlema matheka ka lerala. Dijo tša gagwe ke ditšie le dinose tša naga. Molaetša wa gagwe ke ofe? “Sokoloxang, xobane mmušô wa maxodimo o batametše.”

Molaetša wo o kgahla batheetši ba gagwe. Ba bantši ba lemoga gore ba swanetše go sokologa, e lego go fetoša kgopolo ya bona le go lahla tsela ya bona ya nakong e fetilego ya bophelo e le yeo e sa rategego. Ka gona, nageng ka moka yeo e dikologilego Jorodane, gaešita le Jerusalema batho ba bantši ba tla go Johane gomme o ba kolobetša ka go ba ina ka meetseng a Jorodane. Ka baka la’ng?

Johane o kolobetša batho e le go dira seka goba tiišetšo ya bona ya gore ba sokologile go tšwa pelong dibeng tšeo di lego malebana le kgwerano ya Molao wa Modimo. Ka gona ge Bafarisei ba bangwe le Basadutsei ba e-⁠tla Jorodane, Johane o a ba sola. O re: “Lena matswinyana a dinôxa, . . . Napang Le enywê dienywa tše di amanaxo le thsokoloxô. Le se kê la eleletša xo tlo re: re na le tata-wešo, Aborahama; xobane ke a Le botša, Modimo ó kxona xo tsošetša Aborahama bana mo mabyeng á. Le xôna, selêpê se šetše se beilwe medung ya dihlare; ’me sehlare sefe le sefe se se sa enywexo dienywa tše botse, se tlo rêngwa sa lahlêlwa mollong.”

Ka baka la tlhokomelo ka moka yeo Johane a e gogelago go yena, ba-Juda ba mo romela baperisita le ba-Lefi. Ba a botšiša: “O mang?”

Johane o a ipolela: “Nna, xa se nna Kriste.”

Ba botšiša gore: “O eng-xe? A O Eliya?”

O araba ka gore: “Xa se nna.”

“A O Yêna Moporofeta?”

“Aowa!”

Ka gona ba phegelela ka gore: “O mang-xê? Re tlê re botšê ba xo re roma. O re’ng xe O ipolêla?”

Johane o a hlalosa: “Ke lentšu la sexoeledi lešokeng; ke re lokišang tsela ya Morêna, byalo ka xe moporofeta Jesaya a boletše.”

Ba rata go tseba: “Byalo O re’ng Ò kolobetša xe Ò se Kriste, Ò se Eliya, Ò se Yêna Moporofeta?”

O araba ka gore: “Nna ke kolobetša ka meetse. Fêla, mo xare xa lena xo eme yo Le sa mo tsebexo. Ke Yêna a tlaxo à etilwe-pele ke nna.”

Johane o lokiša tsela ka go hlama batho gore ba be boemong bjo bobotse bja gore ba amogele Mesia yo a tlago go ba Kgoši. Mabapi le Yena yo, Johane o re: “Ke hlatlangwa ke e a tl’o xo mpheta ka matla, yo ke sa swanelexo le xo mo rwalêla diêta tša xaxwe.” Ge e le gabotse, Johane le gona o re: “E a nthlatlamaxo, ke e a bexo a nthakile-pele, xobane ó be a le xôna, nna kè sešo ka ba xôna.”

Ka gona, molaetša wa Johane wa gore “mmušô wa maxodimo o batametše” o dira e le tsebišo go batho bohle gore bodiredi bja Kgoši e kgethilwego ya Jehofa, e lego Jesu Kriste, bo kgaufsi le go thoma. Johane 1:​6-8, 15-28; Mateo 3:​1-12; Luka 3:​1-18; Ditiro 19:⁠4.

▪ Johane ke motho wa mohuta mang?

▪ Ke ka baka la’ng Johane a kolobetša batho?

▪ Ke ka baka la’ng Johane a ka bolela gore Mmušo o batametše?