Oketša Go Ba Ga Gago Le Karolo Go Abeng Dimakasine
1 Go abja ga dimakasine ke e nngwe ya ditsela tše kgolo yeo ka yona molaetša wa Mmušo o phatlalatšwago ka gohle. Dinakong tša morago bjale go sepedišwa ga dimakasine go theogile kudu diphuthegong tše dintši. Ka June 1992, palo-gare ya dimakasine tšeo di bego di sepedišwa Afrika Borwa e be e le tše 3,8 ka mogoeledi, mola ngwagola e be e le tše 5,2. Tshekamelo ye e ka lokišwa bjang? Ke ka baka la’ng o sa diriše ditšhišinyo tše latelago tše pedi?
2 E-ba yo a Kgomegago ka Dimakasine: Gaešita lege maemo ao a mpefalelago pele a tša boiphedišo a ka ba a ile a kgoma go sepediša ga rena dimakasine, re dumela gore lebaka le legolo ke go se thekge dithulaganyo tša modiro wa dimakasine. Bontši bja rena Mokibelo o mongwe le o mongwe, e ka ba mesong goba thapama, re hwetša sebaka se sebotse sa go ba le karolo modirong wa go aba dimakasine. Diphuthego tše dintši di beela nako ka thoko bakeng sa modiro wa gare ga beke wa dimakasine e le gore di kgone go akaretša bagoeledi bao ba sa kgonego go ya tirelong ya tšhemo ka Mokibelo. Ba bangwe ba ka hwetša gore go nea bohlatse mantšiboa go ba nea dibaka tše dibotse tša go sepediša dimakasine ka ntlo le ntlo. Modiro wa setarateng, bohlatse bjo sa rulaganyetšwago le ditsejana tša dimakasine, ka moka ke ditsela tše dibotse tšeo ka tšona re ka bago le karolo go abeng dimakasine. Modirong wa ka mehla wa ntlo le ntlo, dimakasine tše difsa di ka neelwa ge mpho ya nakong yeo ya kgwedi e sa amogelwe. Go phafogela go dira bjalo go ka re tlišetša lethabo.
3 Ipeele Dipakane tša Motho ka Noši: Mo gongwe o ka rata go katanela palo-gare ya makasine o tee bakeng sa iri e nngwe le e nngwe yeo o lego tirelong ka yona kgweding. Pakane yeo o ipeelago yona e swanetše go ba e kwagalago, o nagana ka maemo a gago a motho ka noši le nako yeo o kgonago go e diriša tirelong ya tšhemo.
4 Jehofa ka phuthego ya gagwe e bonagalago o tšwela pele a re nea seo re se nyakago go oketša go ba ga rena le karolo go abeng dimakasine. Ka ge modiro o bjalo o tumiša Jehofa, re tla ba le maikwelo a tseneletšego a lethabo ao a tlišwago ke go ba le karolo ka mo go oketšegilego go abeng dimakasine.—Joh. 15:8.