Go Hlagolela Mekgwa ya Bokriste Lefaseng Leo le se Nago Mekgwa

“A botse le thatêxô! xe bana ba motho bà dula bà kwana!”—PSALME 133:1.

1. Go diregile’ng ka mekgwa e mebotse?

MONGWADI wa dikuranta Ann Landers o bolela gore, “Mekgwa e lahlilwe ka mo go feletšego nywageng ye e 25 e fetilego. Ga se feela gore banna ga ba bulele basadi mejako ya dikoloi goba go ba nea ditulo mafelong a go letela dinamelwa goba ka dipeseng. E tsenelela ka kudu go feta moo.” Ka kgonthe, mo gongwe le mo gongwe mo re lebelelago gona, re ka bona bohlatse bja gore re phela lefaseng leo go hloka mekgwa go oketšegago. Batho ba tsenelela ba bangwe methalading, ba kgoga dilifiting tše tletšego batho, ba bapala mmino o phagamego mafelong a batho bohle, bjalo bjalo. Phihlelo ya letšatši le letšatši e re botša gore go sa šetšwe go kaonefala ga dibaka tša thuto le maemo a bophelo, ka kakaretšo mehla ya rena ke mehla yeo go yona Ke a Leboga le Hle di fetogilego mantšu a šele, gomme tlhompho e tlwaetšwego le tirišano di lebetšwe ka mo go feletšego.

2. Ke ka baka la’ng go hlokega ga mekgwa e mebotse lehono e se mo go makatšago?

² Na tše ka moka di a makatša? Ge e le gabotse ga go bjalo. Di upja di tliša kgopolong seo moapostola Paulo a ilego a budulelwa go se bolela mabapi le boitshwaro bja batho ba “mehleng ya bofêlô” moo ‘go bego go tla tla mabaka a mathata.’ Gare ga dilo tše dingwe, Paulo o boletše e sa le pele gore batho e tla ba “ba xo ithata, . . . ba lenyatšô le baikxoxomoši, . . . ba xo se leboxe, . . . e tlo ba ba-hlala-leratô, . . . ba ba sa tsebexo xo ithswara.” (2 Timotheo 3:1-3) Gaešita le go fo lebelela ka sewelo go utolla gore boitshwaro bjo bjalo ke bjo bo atilego lehono gare ga batho ba nywaga ka moka, dihlopha ka moka le ditšhaba ka moka. Ke ka baka la’ng se se le bjalo? Ke mabaka afe ao a dirago gore go be le go hlokega ga kakaretšo ga mekgwa e mebotse?

Tšeo di Bakago Mekgwa e Mebe

3. “Môya” wa tshepedišo ye o godiša bjang mekgwa e mebe?

³ Polelo e rego “ba xo ithata” e hlalosa “moloko wa nna” gabotse, e lego e šupago bao ba godišitšwego ka go gatelelwa ga boipoti, go ba le seo e lego sa gago le go ipolela. Moya [spirit] wo, o dumelelago “moya” [the air] o re dikologilego, o fapana ka go lebanya le keletšo ya Beibele ya gore Bakriste ba “se kê [ba] šetša tša xo ikhola; [ba] šetšê tša xo hola ba bangwê.” (Ba-Efeso 2:2, 3; Ba-Filipi 2:4) Ka mafelelo afe? Moloko o godišitšwego ka kgopolo ya gore ‘itirele se o se ratago’ ka kgonthe o ka se ele hloko ka kudu kamoo boitshwaro bja wona bo tlago go kgoma ba bangwe.

4. Bao ba nyatšago mekgwa ye e amogelegago lehono ba lebelelwa bjang, gomme Mokriste o swanetše go ba le pono efe ka taba?

⁴ Selo se sengwe seo pele se ilego sa tšea karolo e kgolo tabeng ya go boloka tekanyo ya tirišano gare ga batho e bile kgateletšo ya dithaka. Go kgomega ka seo batho ba bangwe ba ka se naganago e bile kgateletšo e thibelago ka nako e telele. Lega go le bjalo, lehono ge tiro e e-ba e selekišago le e hlabišago dihlong, ke gona mo e bago e amogelegago kudu bathong ba bantši. Bao ba hlokomologago ditekanyetšo tše amogelwago ga ba sa hlwa ba lebelelwa e le ba mekgwa e mebe goba ba sa thabišego eupja ba lebelelwa e le ba sepedišanago le mabaka goba ba hlabologilego, ba rategago kudu. Lega go le bjalo, gopola gore “go ba yo a hlabologilego” go bolela “go se be boemong bja tlhago, bjo hlwekilego goba bja mathomo.” Le tšwa modung wa Segerika o swanago le wa lentšu le le fetoletšwego e le “mahlajana” go 2 Petro 1:16. Ka kgonthe, Bakriste ba therešo ba tla dira gabotse ge ba furalela kgopolo e bjalo.

5. Ke sebopego sefe se sengwe seo se bilego le letsogo go senyweng ga mekgwa e mebotse?

⁵ Mmoledi 8:11 e re, “Pelo tša bana ba batho di tlala xo dira bobe, ka xe xò diêxa kôtlô ye e ahloletšwexo disenyi.” Le ke lebaka le lengwe leo le tlaleletšago tabeng ya go hloka mekgwa ga batho ka kakaretšo. Ka ge batho ba hwetša go le bonolo gakaalo go dira dilo ba sa otlwe, ruri e ba ba se nago kwelobohloko mabapi le go roba melao e amogelwago ya boitshwaro. Sehlogo seo se neago maikwelo a mongwadi sa kuranta ya The New York Times se re, “Badudi bao ba bego ba ka tšhošwa ka mo go feletšego ke go hlaolwa phatlalatša e le karolo ya sehlopha sa bokebekwa ka ntle le moo ba be ba roba mehuta ka moka ya melao ka bolokologi—melao ya tsela, melao ya dihlare-tagi, melao ya tšhilafatšo.” Ka baka leo, “go hloka molao, go senya thoto ka boomo le go ngwala ka bošaedi mafelong a sa swanelago” ka moka ga tšona di fetogile karolo e sa phemegego ya phihlelo ya rena ya letšatši le letšatši. Ka gona, tirišano gotee le tlhompho ya go hlompha ditshwanelo tša batho ba bangwe, thoto le go ba noši di tšwela pele di furalelwa.

6. Mekgwa ya batho e kgongwa bjang ke maphelo a bona a swaregilego, gomme ke bjang Jesu e bego e le yo a fapanego tabeng ye?

⁶ Ka ge mekgwa e mebotse e lebelelwa ka kakaretšo e le gare ga mekgwa e phagamego bophelong, e lebalwa gabonolo ge batho ba ihlaganetše—gomme gantši batho ba bantši ba bonagala ba ihlaganetše matšatšing a. Ka baka leo, ba fetana ka ntle le go ntšha lentšu. Ba a kgorometšana methalading, goba go phatša ba tsena le go tšwa methalading ya tsela feela gore ba boloke metsotso e se mekae goba metsotswana. Gantši, batho e ba ba swaregilego ka mo go feteletšego ka ditaba tša bona ka noši, goba mananeo a bona e ba a tletšego dilo tše dintši kudu tšeo ba swanetšego go di dira, mo e lego gore tiragalo lege e le efe e sa letelwago goba moeng e ba sekgopi goba motsenela. Ela hloko kamoo se se fapanego ka gona le tsela yeo Jesu a ilego a arabela ka yona go batho bao ba bego ba e-tla go yena gaešita le ka dinako tše pitlaganego.—Mareka 7:24-30; Luka 9:10, 11; 18:15, 16; Johane 4:5-26.

7. Bakriste ba therešo ba swanetše go itiša malebana le eng ge go tliwa tabeng ya mekgwa?

⁷ Gaešita lege re phela lefaseng le akgofilego gomme tše di nyakwago tša nako le matla a rena di oketšega ka mehla, ruri go dumelela dikgateletšo tše bjalo di re dira gore re itshware ka bogale ge e le gabotse go ka se ke gwa kaonefatša dilo. Ka mo go fapanego, tsela e bjalo e lebiša bošorong bjo bogolo kudu bjo bo se nago kwelobohloko bjo re kwago ka bjona—dingangišano, dintwa, diphapano gaešita le dipolao—tšeo di bakwago ke batho bao ba lefetšago kgalefo ka kgalefo. Tše ka moka ke karolo ya moya wa lefase leo Bakriste ba therešo ba sa swanelago go ba karolo ya lona.—Johane 17:14; Jakobo 3:14-16.

Mehlala e Phagamego ya Mekgwa e Mebotse

8. Gaešita lege ba dikologilwe ke batho ba se nago mekgwa, Bakriste ba kgothaletšwa go dira’ng?

⁸ Ka ge re dikologilwe ke batho bao ba lebelelelago ba bangwe fase, go bonolo go ineela dikgateletšong gomme ra tlogelela mekgwa e mebotse e re lahlegela. Lega go le bjalo, ge re gopola keletšo ya Beibele ya ‘go se ipapetše le ba mehla yeno,’ gona re ka lebelela mehlaleng e mentši e lemogegago ya Beibele gomme ra katanela go kgomarela melao e phagamego ya mekgwa ya Bokriste lefaseng le se nago mekgwa la lehono. (Ba-Roma 12:2, 21; Mateo 5:16) Ditiro tša rena di swanetše go bontšha gore re dumelelana ka pelo ka moka le mopsalme yo a boletšego gore: “A botse le thatêxô! xe bana ba motho bà dula bà kwana!”—Psalme 133:1.

9. Mangwalo a utolla’ng mabapi le tsela ya Jehofa ya go dirišana le batho?

⁹ Mohlala o mogolo kudu wa go bontšha mekgwa e mebotse ke Mmopi le Tate wa bohle, Jehofa Modimo ka boyena. Ke mo go tlwaetšwego ka bao ba lego maemong a phagamego goba bao ba nago le matla godimo ga ba bangwe go ‘lahlela morwalo wa bona’ gomme ba laela gore dikganyogo tša bona di hlompšhe. Lega go le bjalo, Motho yo a phagamego legohleng, Jehofa Modimo, ka mehla ke yo a bontšhago mekgwa e mebotse ge a dirišana le bao ba lego tlase ga gagwe. Ge a be a nea mogwera wa gagwe Aborahama tšhegofatšo, o itše: “Emiša mahlo a gago hle, gomme o lebelele o le moo o lego gona.” Gape: “Lebelela godimo magodimong hle, gomme o bale dinaledi.” (Genesi 13:14, NW; Ge 15:5, NW) Ge a be a nea Moše pontšho ya matla a Gagwe, Modimo o itše: “Tsenya seatla sa gago ka lehwafeng hle.” (Ekisodo 4:6, NW) Nywaga e mentši ka morago, Jehofa ka moporofeta wa gagwe Mika o ile a ba a botša batho ba gagwe ba sa kwego gore: “Kwaang hle, lena bagolo ba Jakobo le babuši ba ntlo ya Isiraele. . . . Kwaang se hle, lena bagolo.” (Mika 3:1, 9, NW) Tabeng ye, na re “baetši ba Modimo” ka go bolela gore “Hle” ge re dirišana le ba bangwe?—Ba-Efeso 5:1.

10, 11. (a) Go ka thwe’ng ka ditsela le mekgwa ya Jesu? (b) Re ka ekiša Jesu bjang mabapi le go ba ba nago le mekgwa e mebotse go batho bohle?

¹⁰ Jesu Kriste, “e a lexo difarong tša Tat’axwe,” ke mohlala o mongwe o lemogegago o swanetšwego ke go ekišwa. (Johane 1:18) Ge a be a dirišana le batho, e be e le yo boleta le yo a kwelago bohloko ka lehlakoreng le lengwe, e le yo matla le yo a tiilego ka go le lengwe; eupja le ka mohla ga se a ka a ba yo bogale goba yo a se nago botho go motho lege e le ofe. Puku ya The Man From Nazareth ge e hlalosa ka “mpho ya gagwe e kgethegilego ya go phedišana gabotse le mehuta ka moka ya batho” e bolela gore: “Ka mo go swanago phatlalatša le thopeng o gwerane le banna le basadi ka go lekana. A phedišana gabotse le bana ba banyenyane ba sa tsebego selo gomme ka mo go makatšago kudu o ile a ba a phedišana gabotse le babetli ba otlwago ke matswalo ba swanago le Sakeo. Basadi ba hlomphegago ba hlokomelago malapa ba swanago le Maria le Mareta, ba be ba kgona go bolela le yena ka bolokilogi bja tlhago, eupja diotswa le tšona di be di mo nyaka bjalo ka ge eka di be di kgodišegile gore o tla kwešiša gomme a gwerana le tšona . . . Go hlokomologa ga gagwe mo go makatšago mellwane yeo e ilego ya thibela batho feela ke se sengwe sa dika tša gagwe tše hlaolago kudu.”

¹¹ Go swara motho o mongwe le o mongwe ka tlhompho e swanetšego le go naganela ke seka sa motho yo a nago le mekgwa e mebotse e le ka kgonthe, gomme re tla dira gabotse ge re ekiša Jesu Kriste go se. Ee, batho ba bantši ba kgona go ba ba hlomphago go batho ba itšego, kudu-kudu bao ba lego boemong bjo phagametšego bja bona. Eupja go bao ba ba lebelelago e le ba tlase goba gaešita le bao ba lego boemong bjo bo swanago le bja bona, gantši e ba ba sa batamelegego, ba makoko le ba bogale. Seo se bonagala se ba nea maikwelo a go ba ba phagamego le ba matla ka tsela e itšego. Eupja go boletšwe gabotse gore “kgalefo ke yeo e dirišwago ke motho yo a fokolago ka go leka go ekiša ba matla.” Ka gona, Beibele e a kgothatša: “Le rakanê pele ka xo xodišana.” (Ba-Roma 12:10) Ge e ba re dira ka mo re ka kgonago go latela keletšo yeo, re ka se ke ra ba kgole le go ba batho ba nago le mekgwa e mebotse bathong ba bangwe, go etša ge Jesu a be a le bjalo.

12. Moko wa thuto ya Jesu ka ditswalano tša batho ke ofe?

¹² Seka se se nepagetšego se phagamego se bontšhitšwe gaešita le dithutong tša Jesu, kudu-kudu go seo se bitšwago Molao o Mogolo: “Tšohle tše Le rataxo xore batho ba Le dirêlê tšôna, le lena Le ba dirêlê tšôna-tšeo.” (Mateo 7:12) Ka mo go kgahlišago, ka go Analects, e nngwe ya Four Books tša Confucius—yeo e lego kgale e etše hloko tlhora ya kgopolo ya boitshwaro bja setho kua Bohlabela—morena o ile a botšišwa ke o mongwe wa barutiwa ba gagwe ge e ba go be go e-na le lentšu le tee leo le bego le ka dira e le molao wa motheo wa boitshwaro bophelong. Morutiši o ile a araba ka gore, “Mo gongwe lentšu ‘karolelano’ (shu) le ka dira,” gomme a oketša ka gore: “O se ke wa dira ba bangwe seo o sa nyakego ba bangwe ba go dira sona.” Ka mo go fapanego, re ka bona gabonolo go phagama ga thuto ya Jesu. Kwano e borutho, e thabišago le ya bogwera e ka tlišwa ke feela go ba wa pele go ‘direleng ba bangwe’ se se lokilego.

Mekgwa ya Bokriste e Theilwe Leratong la Bokriste

13, 14. (a) Go sa tšwa go lemogwa eng ka mekgwa ya batho ka kakaretšo? (b) Ke’ng seo se tutueletšago kgahlego ya gona bjale ya go kgahlegela mekgwa le melao ya boitshwaro?

¹³ Ka baka la go ata ga mekgwa e mebe, lehono go na le polelo e lego mabapi le go boela mokgweng o swanetšego. Marjabelle Stewart, mongwadi yo a tumilego yo e bilego e le morutiši tabeng ye, o bolela gore, “Re bile le borabele malebana le mekgwa e mebotse ka bo-60, eupja borabele bjo bofsa bo a e bušetša. Batho ba lemoga bohlokwa bja yona gomme ba nyaka go tseba seo melao ya setšhaba e lego sona.” Kgahlego ye e mpshafaditšwego ya go kgahlegela mekgwa e bontšhitšwe dipukung, dipuku tše atago tša dikgakollo, dikarolo tša dikeletšo gomme polelo ya TV e bontšha se sengwe le se sengwe go tloga ka mohuta wa foroko yeo e ka dirišwago dijong tša mosegare tše hlomphegago go ya go mokgwa wa go boledišana le motho o mongwe ditswalanong tša lehono tše raranego le tše fetogago ka lebelo tša setšhaba le tša lapa.

¹⁴ Ka gona, ke ka baka la’ng batho ba bangwe ba thoma go hlokomela mekgwa kudu? Stewart o hlalosa gore, “Lekokong le phadišanago la lehono, mekgwa ke tsela ya go phologa.” Ka mantšu a mangwe, mekgwa e mebotse e lebelelwa e le tsela ya go thuša motho gore a atlege le go tšwela pele. Ka gona batho ba bala dipuku gomme ba ba gona dithutong tša melao ya boitshwaro go ithuta kamoo ba ka aparelago go atlega, kamoo ba ka rotošago megopolo e botse, kamoo ba ka amogelegago lekokong, bjalo bjalo.a Bothata bja se ka moka ke gore mekgwa e fetogile selo se holago, go swana le segakantšhi seo motho a se aparago ge a bapala karolo e itšego tiragatšong gomme a se apola ge a feditše. Ka gona, ga se mo go makatšago gore ka dinako tšohle re kwa ka bokebekwa bjo bo phulago pelo maroba bjo bo sa lemogegego bjo bo dirwago ke batho ba ‘moloko’ o phagamego le ‘maemo.’

15, 16. (a) Setsebi se sengwe sa mekgwa se bolela’ng mabapi le “melao e mebotse ya boitshwaro”? (b) Ba-Korinthe ba Pele 3:4-7 e tswalana bjang le mekgwa ya Bokriste bja therešo?

¹⁵ Seo ke selo se se fapanego le seo mekgwa e mebotse e swanetšego go ba sona. Amy Vanderbilt, setsebi se hlompšhago tabeng ye, o ngwala ka go New Complete Book of Etiquette ya gagwe gore: “Melao e mebotse kudu ya boitshwaro e swanetše go hwetšwa Kgaolong 13 ya Ba-Korinthe ba Pele, polelo e botse mabapi le lerato ka Mokgethwa Paulo. Melao ye ga e bolele selo ka dintlha tše botse tša moaparo goba tša mekgwa ya boikaketši. E mabapi le maikwelo le dikgopolo, botho le go naganela ba bangwe.”

¹⁶ Ee, seo Amy Vanderbilt a se bolelago, ke temana ye e lego go 1 Ba-Korinthe 13:4-7 moo Paulo a hlalosago ka botlalo dibopego tše fapa-fapanego tša lerato la Bokriste. Ela hloko mafelelo a dintlha tše sego kae tšeo a di rotošitšego. Ka mohlala, motho yo a ‘kgotlelelago le yo botho’ ka kgonthe e tla ba yo a sa felego pelo le yo a hlomphago ge a dirišana le ba bangwe. Gore “xa le dire tša dihlong” ke tsela e nngwe ya go bolela gore ‘le itshwara setho,’ gomme ‘setho’ se hlalositšwe e le “go dumelelana le melao e ratwago, boitshwaro bjo bobotse, goba seka.” Ka gona, go etša ge New Testament in Modern English ya J. B. Phillips e fetolela lefokwana le, “Lerato le na le mekgwa e mebotse.” Ga go kgonege go akanya motho lege e le ofe yo a bontšhago lerato le bjalo e le yo a lebelelwago a e-na le mekgwa e mebe.

17. Mekgwa ya rena ke pontšho ya eng?

¹⁷ Ka gona, go molaleng gore mekgwa ya Bokriste e tswalane ka go lebanya le lerato la Bokriste. Ga e fo ba feela tsela ya go ya phethong goba lešira leo le aparwago ge feela go dira bjalo go hola motho. Go e na le moo, mekgwa ya rena—tsela yeo re dirišanago le ba bangwe ka yona, kgopolo ya rena gotee le mokgwa wa rena wa boitshwaro—ke pontšho ya bogolo bjoo ka bjona re elago batho ba bangwe hloko gotee le bja lerato la rena go bona. Re ka ba re le ba banyenyane goba ba bagolo, re swanetše go ikemišetša go kwa keletšo ya Beibele e rego: “A motho a se kê a inyakêla tša xaxwe; a a nyakê sa xo hola ba bangwê.” (1 Ba-Korinthe 10:24) Ka gona, ka ge e le seka sa lerato la Bokriste mekgwa ya Bokriste ke leswao le hlaolago barutiwa ba therešo ba Jesu Kriste.—Johane 13:35.

Go ba le Mekgwa e Mebotse ka Dinako Tšohle

18. Ke’ng seo re swanetšego go ikemišetša go se dira go sa šetšwe seo re se bonago se re dikologile?

¹⁸ Mabapi le moloko wa rena, Jesu o boletše e sa le pele gore “ka xo ata xa makxôpô xo tlo notlêxa leratô la ba bantši.” (Mateo 24:12) Go tapa mo ga lerato go bontšhwa gabotse ke kgopolo ya go se hlokomele le ya boithati bathong ba bantši lehono. Lega go le bjalo, go e na le go tutueletšega go itshwara ka tsela e swanago ya go se hlokomele, ruri re swanetše go gopola keletšo ya Paulo e rego: “Le se kê la lefetša motho bobe ka bobe. A batho bohle ba Le bônê Lè le ba xo bata bolô. Xe xo kxônêxa ka thokô ya lena, Le phedišanê xa-botse le batho ka moka.” (Ba-Roma 12:17, 18) Re swanetše go ikemišetša go ba ba nago le mekgwa e mebotse ka dinako tšohle, go sa šetšwe ge e ba boiteko bja rena bo lebogwa goba go se bjalo.—Mateo 5:43-47.

19. Mekgwa ya rena e kgoma bjang dibopego ka moka tša bophelo?

¹⁹ Ee, mekgwa ya Bokriste ke pontšho ya tlhago ya ka ntle ya lerato le go kgomega ka ba bangwe tšeo re nago le tšona dipelong tša rena. Go fo swana lege polelo ya rena e utolla seo re lego sona ka gare, le mekgwa ya rena e bontšha bogolo bjoo ka bjona re elago ba bangwe hloko goba ge e ba re sa ba hlokomele. (Mateo 12:34, 35) Ka baka leo, mekgwa e swanetše go tšea karolo e bohlokwa dibopegong ka moka tša bophelo bja rena. Ke bjang e swanetšego go ba tsela ya bophelo. E swanetše go dirišwa ka mo go tletšego? Ke bjang mekgwa e swanetšego ya Bokriste e ka hlagolelwago ka botlalo? Re tla seka-seka se sehlogong se se latelago.

“Le Sepeleng ka mo go Loketšego Ebangedi”

“Fela, le sepeleng ka mo go loketšego Ebangedi ya Kriste.”—BA-FILIPI 1:27, “Phetolelo ya Kgale.”

1. Tiragalo e sa tšwago go direga kua New York City e bakile ditheto dife tše kgahlišago go tšwa go ramotse? (Ba-Roma 13:3)

THE New York Times e begile gore ka September 29, 1988, go ile gwa tla “Dihlatse tše fetago 1000” Holong ya Motse kua Manhattan ya tlase. Di be di tlile go thekga kakanyetšo ya moago yeo e bego e swanetše go seka-sekwa pele ga Lekgotla la Kakanyetšo la motse. Gaešita lege kakanyetšo ya go dumelela moago o mofsa wa bodulo ntlong-kgolo ya lefase ya Dihlatse tša Jehofa e be e ganeditšwe, ramotse “o ile a reta Dihlatse e le ‘ba hlwekilego ka mo go fetišišago’ gomme a bolela gore ba be ‘ba swanetše go hlompšha e le ka kgonthe.’”

2. Mekgwa ya Dihlatse e fapane ka tsela efe, gomme ka baka la’ng?

² Ka tlhago, ge batho ba fetago sekete ba kopana gotee bakeng sa go bontšha go thekga selo se sa tlwaelegago, ke’ng seo se ka letelwago? Go kgorometšana, go hlaba mašata, gaešita le dipontšho tša matla a magolo le bošoro ga se tše di sa tlwaelegago. Ke ka baka la’ng Dihlatse e le tše fapanego? Ke ka gobane di lemoga gore ka dinako tšohle boitshwaro bja tšona bo bontšha tumelo ya tšona. Di gopola gabotse keletšo ya Mangwalo: “Tsela ye Le tšeaxo ka yôna Lè le xare xa ba-ntlê, a e bê e botse, xore xe ba Le phara ba re Le disenyi, e tlê e re xe ba lebeleša, ba bônê medirô e botse ya lena ‘me ba rêtê Modimo, è le letšatši le a ba etetšexo ka lôna.”—1 Petro 2:12.

Mekgwa e Mebotse e Tumiša Jehofa

3. Mekgwa ya rena e tšea karolo efe go godišeng Jehofa?

³ Go tumiša Jehofa Modimo ka boitshwaro bja rena bjo bobotse go molaleng gore ke karolo ya boikarabelo bja rena bja Bokriste. (Mateo 5:16) Ka kgonthe, boitshwaro bjo bobotse bo akaretša dilo tše dintši—ka mohlala, potego, phišego le thuto e botse. Lega go le bjalo, dika tše gantši di lemogwa ke feela bao ba re tsebago gabotse goba bao re nago le ditirišano tša ka mehla le bona, go swana le bagwera ba rena, metswalo ya rena, bathwadi ba rena, badiri-gotee le rena gotee le barutiši ba rena. Go thwe’ng ka bontši bja batho bao re kopanago le bona ka sewelo? Mo ke moo mekgwa ya rena e tsenago ka kudu-kudu tabeng. Go fo swana lege sephuthelwana se se gogelago se oketša go kgahliša ga mpho e bohlokwa, mekgwa e mebotse e dira gore seo re swanetšego go se nea e be se kgahlišago ka kudu. Dika lege e le dife tše botse tša Bokriste tšeo re ka bago re e-na le tšona goba lege boikemišetšo bja rena e ka ba bjo bo kgahlišago gakaaka’ng, di ka se hole ge e ba mekgwa ya rena e le e mebe. Ka gona mekgwa ya rena e ka tliša bjang tumišo go Jehofa?

4. Ke dibopegong dife tša bophelo moo re swanetšego go ela hloko mekgwa ya rena?

⁴ Paulo o re, “Fela, le sepeleng ka mo go loketšego Ebangedi.” (Ba-Filipi 1:27, Phetolelo ya Kgale) Ee, se se akaretša bodiredi bja rena bja phatlalatša. Eupja boitshwaro le mekgwa ya rena lefelong la rena la borapedi, tikologong ya rena, modirong, sekolong, ee, sebopegong se sengwe le se sengwe sa bophelo bja rena, le tšona di tswalana ka go lebanya le go atlega ga bodiredi bja rena. Paulo o ngwala gore, “Re r’yalo re sa kxopiše motho le ka selô se tee, xore bohlanka bya rena bo se bê le bosodi.” (2 Ba-Korinthe 6:3) Re ka kgonthišega bjang gore re diriša keletšo yeo? Re ka dira’ng gore re thušane, kudu-kudu bafsa ba lego gare ga rena, go bontšha mekgwa ya Bokriste ka dinako tšohle?

Holong ya Mmušo

5. Re swanetše go lemoga’ng ge re le Holong ya Mmušo?

⁵ Holo ya Mmušo ke lefelo la rena la borapedi. Re moo ka taletšo ya Jehofa le Morwa wa gagwe, Jesu Kriste. Ka go rialo, re baeng ngwakong wa Jehofa. (Psalme 15:1; Mateo 18:20) Na o moeng yo botse ge o e-tla Holong ya Mmušo? Gore re be ba ba bjalo, re swanetše go bontšha go naganela mo go swanetšego le tlhompho e sego go mong wa ntlo feela eupja le go baeng ba bangwe. Seo se akaretša’ng?

6. (a) Go ba yo a tlago dibokeng ka morago ga nako ka dinako tšohle go bontšha go se be le eng? (b) Go ka dirwa’ng bakeng sa go fenya bothata?

⁶ Sa pele, go na le taba ya go ba nakong. Ke mo go amogelegago gore ga go bonolo ka mehla go dira seo. Ba bangwe ba dula kgole; ba bangwe ba na le malapa le bana bao ba swanetšego go ba lokiša. Boiteko bjo ba bo dirago gore ba tle dibokeng tša Bokriste ka mehla ka kgonthe bo a retega. Lega go le bjalo, go lemogilwe gore ba bangwe ba wetše mokgweng wa go tla dibokeng ka morago ga nako. Ba ka dira’ng go lokiša se? Motho o swanetše go thoma ka go lemoga gore go ba yo a tlwaetšego go fihla dibokeng tša Bokriste ka morago ga nako ga se ka mehla go bontšhago go hloka tebogo ya go leboga bohlokwa bja diboka. Ba bangwe bao gantši ba fihlago ka morago ga nako ba bonala ba thabela diboka go swana le motho lege e le ofe o mongwe—ge feela ba fihlile moo. Go e na le moo, bothata bo ka ba bo bakwa ke dithulaganyo tše sa tsepamago le go se naganele Bakriste-gotee. Le lengwe la mabaka ao ka ona re lemošitšwego ‘go se ngale diphuthego tša rena’ ke gore re “hlôkômêlaneng seng sa rena, re išanê leratong le medirong e botse.” (Ba-Hebere 10:24, 25) Re ka šitwa go dira seo, ge e ba ka dinako tšohle re fihla ka morago ga nako gomme re baka tšhitišo. Ditsebi di bolela gore, gore re se fihle ka morago ga nako, re swanetše go ikemišetša go fihla metsotso e sego kae pele ga nako go e na le go ba nakong. Na o swanetše go dira se?

7. Hlalosa gore go theetša ka kelohloko dibokeng go tswalana bjang le mekgwa e mebotse.

⁷ Mekgwa e mebotse e nyaka gore re ele batho hloko ge ba bolela le rena. (Diema 4:1, 20) Se se dira gape le dibokeng tša Bokriste, moo bahlanka ba Modimo ba bolelago bakeng sa go abelana mpho ya moya e le go re aga. Ka kgonthe e be e tla ba pontšho ya mekgwa e mebe kudu ka lehlakoreng la rena ge e ba re be re ka otsela, ra heba-hebetša leboelela le yo a dutšego kgaufsi le rena, ra sohla mmotu goba malekere, ra bala dipuku tše dingwe, goba go rarolla ditaba tše dingwe ka nako ya seboka. Elihu yo monyenyane ga a dula feela ka go se fele pelo poledišanong e telele ya Jobo le bagwera ba gagwe ba bararo eupja o be a bile a “theeditše” seo ba bego ba se bolela gomme a ba “šeditše.” (Jobo 32:11, 12) Mekgwa e mebotse ya Bokriste e tla re šušumeletša go bontšha tlhompho e swanetšego go seboledi gotee le molaetša wa sona o theilwego Beibeleng ka go se theetša ka kelohloko le go se thekga.

8. Re bontšha bjang gore re barutiwa-gotee ba Jesu Kriste?

⁸ Pele le ka morago ga diboka, mekgwa ya Bokriste e akaretša go ba le kgahlego ya kgonthe go ba bangwe bao ba lego Holong ya Mmušo. Paulo o ile a lemoga gore ditho tše tloditšwego tša phuthego ya Bokriste ga di sa ‘hlwa e le dišele le badiiledi, eupja ke tša ngwako wa Modimo.’ (Ba-Efeso 2:19) Na o swara Dihlatse-gotee le wena bjalo ka bašele le badiiledi goba bjalo ka ditho tša lapa le tee? Tumedišo ya bogwera, go swarana ga borutho ka diatla, go nywanywa ka botho—mo gongwe ke dilo tše dinyenyane, eupja ke karolo ya bohlatse bja gore re barutiwa-gotee ba Jesu Kriste. Ge e ba re dira dika tše bjalo ge re gahlana le batho bašele, na ga se ra swanela go dira bjalo “xa-xolo re xo dirêlê batho ba-bo-rena ba tumêlô”?—Ba-Galatia 6:10.

9. Bana ba ka rutwa bjang go bontšha go kgahlegela batho ka ntle le dithaka tša bona?

⁹ Na bana ba ka rutwa go bontšha kgahlego ya mohuta wo bathong ba bangwe ka ntle le dithaka tša bona? Batho ba bangwe ba bagolo ba ka nagana gore bana ba swanetše go ya go bapala le bagwera ba bona ba banyenyane ka morago ga go dula ka iri goba tše pedi ba theeditše dibokeng. Eupja Holo ya Mmušo ga se lefelo la go bapalela. (Mmoledi 3:1, 17) Nakong ya ge mošemanyana wa nywaga e mene le seripa a be a botšišwa ke morutiši wa gagwe palo ya banababo le dikgaetšedi tšeo a nago le tšona, o ile a araba ka gore: “Ke ba bantši kudu nka se kgone go ba bala ka moka.” Ka morago, ge batswadi ba gagwe ba be ba mmotšiša ka se, mošemanyana o hlalositše ka gore: “Ga ke tsebe gore ke na le banabešo le dikgaetšedi tše kae. Ge ke e-ya Holong ya Mmušo, go na le ba bantši kudu.” Go yena, bohle bao ba bago gona ke banababo le dikgaetšedi.

Bodireding bja Rena bja Phatlalatša

10. Ke taelo efe ya Jesu yeo e ka re thušago go ‘sepela ka mo go loketšego ebangedi’ ge re le bodireding bja rena?

¹⁰ Go ‘sepela ka mo go loketšego ebangedi’ ka tlhago go akaretša bodiredi bja rena bja phatlalatša. Re swanetše go gopola gore re na le molaetša wa khutšo, gomme mekgwa ya rena e swanetše go e bontšha. (Ba-Efeso 6:15) Taelo e tšwago go Jesu ke e rego: “E re xe Le tsêna lapeng, Le dumedišê ba xôna. Xomme xe lapa leo le swanetše, xôna moláô wa lena o tlo le tlêla.” Ka go ba ba borutho, ba bogwera le ba hlomphago, re dira gore mong wa ntlo a tsebe gore re mo kgahlegela e le ka kgonthe pelong. Lega go le bjalo, ka dinako tše dingwe motho yo re kopanago le yena mojako mo gongwe e ka ba yo a se nago bogwera, e bile a sa amogele baeti. Na re tla tshwenyega gomme ra thoma go itshwara ka tsela e swanago? Gopola gore Jesu o tšwetše pele ka go bolela gore: “Fêla, xe [lapa] le s’a swanêla, xôna moláô wa lena o tlo boêla xo lena.” (Mateo 10:12, 13) Mekgwa ya rena ge re le mojako ka mehla e swanetše go swanela “bodiredi bja go bolela poelano.”—2 Ba-Korinthe 5:18, Phetolelo ya Kgale.

11. Mokgwa wa rena wa go apara le ponagalo ya motho ka noši di kgoma bjang karolo ya rena re le badiredi ba Modimo?

¹¹ Mekgwa ya rena e bolela ka rena ka ditsela tše dingwe gape. Ka mohlala, na ponagalo ya rena ya motho ka noši e swanela karolo ya rena re le bahlanka ba Lentšu la Modimo? Go thwe’ng ka didirišwa tšeo re di dirišago—mekotla ya dipuku, Beibele le dipuku tša Beibele? Mongwadi wa dikuranta o nea bo-rakgwebo keletšo ye: “Aparelang kgwebo, e sego monyanya, seboka sa boithabišo goba tiragalo ya dipapadi.” Ka baka la’ng? Ka gobane moaparo le ponagalo ya lena ya motho ka noši “ke melaetša e neago batho ba le dikologilego tsebišo mabapi le yoo le lego yena le seo le lego sona le moo le tsenago gona thulaganyong ya dilo.” Ka gona ge re e-tšwa ka “morero” wa rena wa bodiredi, moaparo le ponagalo ya rena ga se tša swanela go ba tše sa hlwekago le tša bošaedi, le go ba tša boikgantšho le tša go se šetše, eupja ka mehla e be tše “loketšexo Ebangedi.”—Bapiša le 1 Timotheo 2:9, 10.

12. Mekgwa e mebotse e ka bontšhwa bjang mabapi le ditshwanelo le thoto ya mong wa ntlo?

¹² Gaešita lege re swanetše go ‘dula re ikemišeditše go emela’ ebangedi, mekgwa e mebotse ya Bokriste e nyaka gore re dire bjalo “ka bolêta le ka go boifa.” (1 Petro 3:15, 16) Seo se akaretša go hlompha ditshwanelo tša mong wa ntlo le thoto. Na re rulaganya modiro wa rena gore re etele ka nako e botse? Na re phakgame go ka lemoga ge e ba re šitiša merero e bohlokwa goba mediro ya ka lapeng? Na re ba botho ge go tliwa tabeng ya go diriša mantšu a swanago le “Na nka?” “Hle,” “Ke a Leboga”? Na re ikemišetša go akaretša mong wa ntlo poledišanong goba re bolela kudu ka baka la go tšhoga gore mo gongwe re ka se kgone go fetša seo re bego re ikemišeditše go se bolela?

13. Bontšha kamoo mekgwa e mebotse bodireding gantši e tlišago mafelelo a mabotse.

¹³ Mekgwa e mebotse e sepedišanago le go kgomega ga kgonthe ga motho ka noši, gantši e bulela bohlatse bjo bobotse tsela. Se ke lebaka leo ka lona bana bao ba nago le mekgwa e mebotse gantši ba hlokomelwago le go kgahlegelwa ke beng ba dintlo mola batho ba bagolo ba palelwa ke go dira seo. Hlatse ya nywaga e 13 kua Mexico e ile ya gahlana le ngwanenyana o monyenyane yo a bego a rata go ithuta. Lega go le bjalo, ngwanenyana o ile a bolela gore o be a tla dira bjalo ka ntle le gore tatagwe a tsebe. Eupja mogoeledi yo monyenyane o ile a nagana gore tabeng ye, ka baka la go hlompha tate, o be a swanetše go hwetša tumelelo ya gagwe. Ka gona o ile a ikemišetša go bolela le tate gomme a mmotša gore seo ba bego ba e-ya go ithuta sona e be e le sa bohlokwa kudu. Ka go lemoga go kgonthišega ga kgaetšedi yo monyenyane le go leboga ge a ile a tla go yena ka go lebanya, monna o itše: “Ge e ba seo le yago go ithuta sona e le sa bohlokwa gakaalo, gona lapa la-ka ka moka le swanetše go ithuta.” Mafelelo e bile gore ngwana yo wa nywaga e 13 a thome thuto ya Beibele le lapa ka moka, go akaretša morwa yo a nyetšego le mosadi wa gagwe gotee le bana ba bangwe ba gotšego.

Mekgwa e Mebotse e Thoma ka Gae

14. Mekgwa e mebotse e thoma kae, gomme ke sebopego sefe seo se tšeago karolo ya bohlokwa?

¹⁴ Mekgwa e mebotse ya Dihlatse tša bafsa gantši ke bohlatse bjo bobotse bja tlwaetšo yeo go lego molaleng gore ba e hwetša ka gae. Ka kgonthe, mekgwa ya rena e bontšha tsela ya rena ya bophelo. Ka baka le, go fapana le kamoo ba bangwe mo gongwe ba ka naganago ka gona, mekgwa e mebotse e swanetše go ba ya bohlokwa ka gae. Mo, go fo swana le dibopegong tše dingwe tša bophelo bja lapa, mohlala wa batswadi ke wa bohlokwa ka kudu. (2 Timotheo 1:5) Go botša bana gore, “Dirang se ke se bolelago, e sego se ke se dirago” ge e le gabotse ga se tsela ya go ba ruta mekgwa. Dipeakanyo tše tletšego tše sa balegego tša mekgwa e mebotse ga di ithutwe ka ditaelo fela tša molomo, eupja di ithutwa ka go di bona le go di ekiša. Beverley Feldman, mongwadi wa Kids Who Succeed o lemogile gore, “Batswadi ga se barutiši ba mafelelo feela; e bile ke mehlala ka ge bana ba rena ba ithuta ka go ekiša ditsela tša rena.” Bana ba gago ba bona mekgwa ya mohuta ofe go wena?

15. Batswadi ba ka thuša bjang bana ba bona go hlagolela ditlwaelo tša bophelo ka moka tša mekgwa e mebotse?

¹⁵ Beibele e eletša gore, “Le lena Bô-tata-xo-bana! Le se kê la befediša bana ba lena.” (Ba-Efeso 6:4) Ke mo go befedišago le go gakantšha go bana go botšwa gore ba swanetše go ba ba botho le ba naganelago, mola ba bona batswadi ba bona ba ngangišana, ba seba, e le ba bogale, goba e bile ba selekega ka pela. Na ba ka bewa molato ge e ba ba itshwara ka tsela e swanago? Ka lehlakoreng le lengwe, lengwalo le tšwela pele go bolela gore: “Sa lena a e bê xo ba etetša ka xo ba ruta le xo ba eletša tša Morêna.” Seo se akaretša metheo ya mekgwa e mebotse, go swana le go bolela gore, “Dumela,” “Hle,” “Ke a leboga,” le “Tshwarelo,” go bontšha tlhompho bathong ba bagolo, gaešita le go abelana dilo le ba bangwe. (Lefitiko 19:32; Ba-Roma 16:3-7) Dika tše tše ithutwago ka gae nakong ya bjana e tla ba tše bohlokwa bophelong ka moka.—Diema 22:6.

16. Go nyakega boiteko bofe, gomme ka mafelelo afe?

¹⁶ Ka gona batswadi le bana ka mo go swanago ba swanetše go bontšha mekgwa e mebotse e le karolo ya modiro wa bona wa letšatši le letšatši go e na le go emela lebaka le kgethegilego. Ka go dira bjalo, batswadi e swanetše go ba ba sa felego pelo le ba kgotlelelago diphošo tšeo bana ba bona ba gapeletšegago go di dira. Ba tsebiše kamoo boitshwaro bja bona bjo bobotse e lego bja bohlokwa kudu go wena, gomme o akgofele go reta tšwelopele yeo ba e dirago. Ee, se se nyaka boiteko bjo bo oketšegilego ka lehlakoreng la gago. Eupja na Mangwalo ga a bolele gore go nweletša melao ya motheo ya go boifa Modimo baneng go swanetše go dirwa “Ò dutše ngwakong wa xaxo, le xe O le tseleng, xe O y’o rôbala le xe Ò tsoxa”? (Doiteronomio 6:7) Lega go le bjalo, go dira bjalo go hlola moya o thabišago le o mobotse ka gae, o tšwelago pele go matlafatša bana ba gago ge ba dutše ba gola go ba batho ba holago, ba hlokomelago le ba nago le mekgwa. Ka morago ba tla ba mothopo wa kgodišo le tlhompho go wena gotee le Mmopi wa bona, Jehofa Modimo.

Batho ba Nago le Mekgwa e Mebotse

17. Go lemogilwe’ng Diholong tša Mmušo tša Dihlatse tša Jehofa?

¹⁷ “Dihlatse tše fetago 1000” tšeo di bokanego ka ntle ga Holo ya Motse kua New York City mathapameng ao a September di ile tša fo bontšha tekanyo e nyenyane ya kamoo Dihlatse tša Jehofa di itshwarago ka gona ka mehla. Lefelong le lengwe, monna o ile a tla Holong ya Mmušo la mathomo gomme ka morago a bolela gore: “Ke kopane le batho ba nago le lerato e le ka kgonthe, ba fapanego ka mo go feletšego, ka letšatši le tee go feta bao ke ilego ka kopana le bona kerekeng yeo ke godišeditšwego go yona.” Mafelelo e bile afe? O itše, “Go be go le molaleng gore ke be ke hweditše therešo.” Monna yo o ile a fetola tsela ya gagwe ya bophelo, gomme dikgwedi tše šupago ka morago a neela bophelo bja gagwe go Jehofa gomme a kolobetšwa.—Bapiša le 1 Ba-Korinthe 14:25.

18. Boemo bja mekgwa e mebotse bja Dihlatse tša Jehofa bo kgomile bjang batho ba sego sehlopheng?

¹⁸ Boemo bja Dihlatse bja mekgwa le seriti dikopanong tša bona tša setšhaba le tša ditšhaba ka moka bo ile bja retwa ka mo go kgahlišago kudu. Morago bjale lebakeng le lengwe le bjalo kua Japane, motho yo a hlahlago pese ya basepedi ba go boga naga o ile a bolela gore: “Lena ge le be le e-tšwa ka peseng, o mongwe le o mongwe wa lena, go akaretša le ba banyenyane, ka ntle le go palelwa o itše go nna ‘Ke go leboga ka kudu.’ Seo se nthabišitše kudu!” Kopanong e nngwe, o mongwe yo a bilego gona kgaufsi le seporo o boditše Hlatse gore: “E bile manyami a magolo kudu ge go be go swerwe kopano e fetilego ya batho ba 12000 Holong ya Osaka Castle.” Eupja o ile a tšwela pele ka go re: “Lena le rulagantšwe e le ka kgonthe, gomme re imologile. Hle re lebogeleng go motho lege e le mang yo a ikarabelago.”

19. O mongwe le o mongwe wa rena o swanetše go ikemišetša go dira’ng?

¹⁹ Ditheto tše bjalo di bontšha’ng? Gore Dihlatse tša Jehofa ka kakaretšo di ‘sepela ka mo go loketšego ebangedi.’ Go thwe’ng ka rena re le motho ka o tee ka o tee? Go swana le bana bao ba lebeletšego tate yo lerato, eka ka moka ga rena, ba banyenyane le ba bagolo re ka lebelela go Tatago rena wa legodimong, Jehofa, e le gore re tle re rutwe go ba batho ba nago le mekgwa e mebotse, gaešita lege re le lefaseng le se nago mekgwa.—Doiteronomio 8:5; Diema 3:11, 12.

Na o a Gopola?

◻ Ke ka baka la’ng go nyakega mekgwa e mebotse e le karolo ya boitshwaro bjo bobotse?

◻ Ke mekgwa efe e mebotse e swanetšego lefelong la rena la borapedi?

◻ Mekgwa e mebotse e ka bontšhwa bjang tšhemong?

◻ Batswadi ba ka thuša bjang bana ba bona gore ba hlagolele mekgwa e mebotse?

◻ Re swanetše go ikemišetša go kgomarela boemo bofe bjo bo phagamego bja mekgwa?