Thuto Ya Modimo E Na Le Tutuetšo E Matla

1 Re na le tokelo e kgolo gakaakang ya go amogela thuto e tšwago go Yo Godimo, Mmopi wa rena Jehofa Modimo! (Ps. 50:1; Jes. 30:20b) Ditšhabeng ka moka lehono, mašaba a kgeregela thabeng ya gagwe ya borapedi bjo bo sekilego gore a rutwe ke yena. (Mika 4:2) Ba bangwe ba dimilione ba ngwadiša dikolong tšeo di phagamišago kgopolo ya motho le bohlale bja lefase. Eupja bohlale bjo bo hlokomologago Jehofa le Lentšu la gagwe le le ngwadilwego ke bošilo mahlong a Modimo, gomme bao ba hlahlwago ke bjona ba fetoga ba hlokago tlhaloganyo.—Ps. 14:1; 1 Ba-Kor. 1:25.

2 Sehlogo se se rego “Thuto ya Modimo” se tla tlala lenaneong ka moka kopanong ya rena ya selete lenyaga. Re tla ithuta gore Lentšu la Modimo gotee le moya wa gagwe di re kopanya borwarreng bja lefase ka bophara, di bopa dimelo tša rena, di re šireletša dithutong tša batemona gomme di re tlwaetša go ba badiredi ba kaone. Na o tla ba gona go e nngwe ya dikopano tše e le gore o kgone go holwa ka noši ke thuto ya Modimo?

3 Mafelelo Bophelong bja Bokriste: Thuto ya Modimo e thuša go tutuetša matswalo a rena. Motho o mongwe le o mongwe o belegwa a e-na le letswalo, eupja gore le re hlahle tseleng ya toko le tirelong yeo e kgahlišago Jehofa, le swanetše go tlwaetšwa. (Ps. 19:7, 8; Ba-Roma 2:15) Batho ba lefase ga se ba bopa menagano ya bona go ya ka Lentšu la Modimo, ka baka leo ba gakanegile le go se kgonthišege ka seo e lego se se lokilego le se se fošagetšego. Dingangišano di tsoga mabapi le dikgang tša boitshwaro le tša setho ka ge o mongwe le o mongwe a phegelela go dira seo e lego se se lokilego mahlong a gagwe ka noši. Ba bantši ba nyaka tokologo e feletšego ya go ikgethela tsela ya bona ka noši ya bophelo. Ba gana go kwa mothopo o nnoši wa bohlale bja kgonthe. (Ps. 111:10; Jer. 8:9; Dan. 2:21) Eupja thuto ya Modimo e re rarolletše dikgang tše bjalo, gomme re dula re le batee bjalo ka lapa la Modimo ka gobane re rutwa ke yena. Re lebeletšana le bokamoso ka kgodišego re e-na le letswalo le le botse, re dula re swaregile bodireding bja rena.

4 Thuto ya Modimo e re thuša go gana “phefô e nngwê le e nngwê ya thutô.” (Ba-Ef. 4:14) Ga re kgahlišwe ke thuto ya filosofi, yeo e dirago gore batho e be bao ba swayago diphošo le bao ba belaelago, yeo e kgothaletšago go itirela diphetho ka noši le yeo e lebišago go senyegeng ga boitshwaro. Re thabela go rutwa ke Jehofa, ka go rialo re phema manyami le bohloko bja pelo tšeo di kwewago ke ba bantši. Melao ya Jehofa le dikgopotšo tša gagwe di swana le ‘lentšu le le lego ka morago ga rena,’ le le rego: “Tsela šé! Tšeang ka yôna!”—Jes. 30:21.

5 Diboka tša Rena le Bodiredi: Re lebelela Ba-Hebere 10:23-25 e le taelo e tšwago go Modimo. Dibokeng tša phuthego, re rutwa ke Jehofa. Na ke mokgwa wa rena go ba gona dibokeng ka mehla, goba na re lebelela go ba gona dibokeng e le ga bohlokwa bjo bonyenyane? Gopola, go kopana gotee ke karolo ya borapedi bja rena. Ga se gwa swanelwa go tšewa e le ga boikgethelo. Re ka se kgotlelele go lahlegelwa ke karolo lege e le efe ya lenaneo la dijo tša moya tšeo Jehofa a re lokišeditšego tšona.

6 Moše o ile a rapela Modimo a re: “Re rutê xo bala matšatši a rena, re fiwê pelo tše bohlale.” (Ps. 90:12) Na le rena re rapela thapelo ye? Na re leboga letšatši le lengwe le le lengwe le bohlokwa? Ge e ba go le bjalo, gona re tla ‘fiwa pelo e bohlale’ ka go diriša letšatši le lengwe le le lengwe ka tsela e holago, bakeng sa go tumiša Morutiši wa rena o Mogolo, Jehofa Modimo. Thuto ya Modimo e tla re thuša go dira seo.