’me xa e bone. E na le ditsêbê, ’me xa e kwe; e na le dinkô, xomme xa e dupe. E na le diatla, xomme xa e sware; e na le dinaô, ’me xa e sepele; xa xo n’e ’ntšu le tšwaxo mexolong ya yôna. Babopi ba yôna ba swana le yôna, le bohle ba e bótilexo.”

Ditoro

Tlhaloso: Megopolo goba dikakanyo tša motho nakong ya ge a robetše. Beibele e bolela ka ditoro tša tlhago, ditoro tše di tšwago go Modimo le ditoro tšeo di akaretšago bonoge.—Jobo 20:8; Num. 12:6; Sak. 10:2.

Na ditoro mehleng ya rena di na le seo di se bolelago?

Banyakišiši ba ithutile’ng ka ditoro?

The World Book Encyclopedia (1984, Puku 5, letl. 279) e bolela gore: “Motho o mongwe le o mongwe o a lora. Batho ba bantši ba bagolo ba lora mo e ka bago ka metsotso e 100 nakong ya diiri tše seswai tša ge ba robetše.” Ka gona, ditoro ke tšeo di tlwaetšwego ke batho.

Ngaka Allan Hobson wa Sekolo sa tša Kalafo sa Harvard, o itše: “Ke tutuetšo yeo e sego ya kgonthe yeo e ka hlaloswago ka tsela lege e le efe yeo ngaka e ka e bolelago. Eupja seo se bolelwago ke tšona se bonwa ke motho yo a lebeletšego, e sego toro ka boyona.” Karolo ya “Science Times” ya The New York Times ge e bega ka se, e oketša ka gore: “Sekolong seo se bolelago kudu ka mohola wa ditoro, ruri go na le ditsela tše dintši tša go hwetša molaetša wa kelello wa ditoro, tšeo e nngwe le e nngwe e bontšhago toro e fapanego yeo e gopolwago. Ya Freud e tla hwetša mohuta o mongwe wa seo se bolelwago ke toro, ge ya Jung e tla hwetša e nngwe gomme ngaka ya Gestalt e tla hwetša se sengwe gape seo se bolelwago ke yona. . . . Eupja kgopolo ya gore ditoro di na le seo di se bolelago sa tlhaloganyo ruri ke yeo e hlasetšwego kudu ke bo-ra-thutamahlale ba tša tshepelo ya ditšhika.”—July 10, 1984, letl. C12.

Na ditoro tšeo di bonagalago di nea tsebo e kgethegilego di ka tšwa mothopong o mongwe go e na le Modimo?

Jer. 29:8, 9: “Xobane [Jehofa] wa mašaba . . . o re: Le se forwê ke baporofeta ba Le naxo le bôná, le didupê tša lena; Le se kê la ya ka dilôrô tše ba di loraxo. Xobane ba a Le fora, xe ba Le porofetêla ka leina la-ka; xa b’a rongwa ke Nna. Ó r’yalo [Jehofa].”

Harper’s Bible Dictionary e a re botša: “Ba-Babele ba be ba bota ditoro kudu moo bošegong bja pele ga diphetho tša bohlokwa ba bego ba robala ka ditempeleng ba letetše keletšo. Bagerika bao ba bego ba rata go kwa ka tša bophelo ba be ba robala dialetareng tša Aesculapius [yo seka sa gagwe e bego e le noga], gomme Baroma ba robala ditempeleng tša Serapis [ka dinako tše dingwe o be a dudišwa gotee le noga e tataganego]. Ba-Egipita ba be ba ngwala dipuku tše dintši tša go hlalosa ditoro.”—(New York, 1961), Madeleine Miller le J. Lane Miller, letl. 141.

Modimo nakong e fetilego o be a diriša ditoro go nea ditemošo, tayo le boporofeta, eupja na o sepediša batho ba gagwe tseleng e bjalo mo nakong ye?

Dipolelo tše di bolelago ka ditoro tše di bjalo tše di tšwago go Modimo, di hwetšwa go Mateo 2:13, 19, 20; 1 Dikxoši 3:5; Genesi 40:1-8.

Ba-Heb. 1:1, 2: “Modimo kxalê ó boletše le bo-tata-wešo xa-ntši le ka mekxwa e mentši [go akaretša ditoro] ka Baporofeta. Mehleng yeno ya bofêlô a tla a bolêla le rena ka Morwa [Jesu Kriste, yo dithuto tša gagwe di ngwadilwego Beibeleng].”

1 Ba-Kor. 13:8: “Xe e le diporofetô [Modimo ka dinako tše dingwe o be a nea diporofeto go bahlanka ba gagwe ka go diriša ditoro], tšôna di tlo fêla.”

2 Tim. 3:16, 17: “Mangwalô ka moka ké ma-hebetšwa-ke-Modimo, le xôna a hola batho ka xo ruta, . . . xore motho wa Modimo e bê yo boló-ka-tlalô, a kxonišwê xo dira medirô e botse ka moka.”

1 Tim. 4:1: “Môya o boletše xwa kwala, wa re mehleng e tl’o xo tla ba bangwê ba tlo hlanoxêla tumêlô, ba ya le meôya ya xo fora batho, [yeo ka dinako tše dingwe e tlišwago ka ditoro] ba ya le dithutô tša meôya e mebe.”