4; Jes. 8:12, 13) Go yena, bophelo bjo ke bjona feela bjo bo lego gona. Go boifa lehu go mo metša gabonolo. (Ka go se swane le se, hle bona Mateo 10:28; Ba-Hebere 2:14, 15.) Eupja matla a mafsa a sepediša megopolo ya batho bao ba thomago go tseba Jehofa, e lego bao ba tlatšago megopolo ya bona le dipelo ka dikholofetšo tša gagwe le bao ba ithutago go retologela go yena gore a ba thuše ka dinako tšohle ge ba nyaka seo.—Ba-Ef. 4:23, 24; Ps. 46:1; 68:19.

Go nea batho le dilo tlhompho ya borapedi yeo e lego ya Modimo

“Modimo wa tshepedišo ye ya dilo,” e lego Sathane Diabolo o kgothaletša mediro ka moka yeo e gakišago kgopolo yeo motho a e neetšwego ke Modimo ya gore a mo rapele. (2 Ba-Kor. 4:4, NW) Babuši ba bangwe ba swerwe go swana le Modimo. (Dit. 12:21-23) Batho ba dimilione ba rapela medimo ya diswantšho. Batho ba dimilione ba dira dithakga le dibapadi tše di tumilego medimo. Menyanya gantši e nea tlhompho ye e se ya swanelago bathong. Moya wo o apareditše kudu moo batho bao ba ratago Jehofa e le ka kgonthe le go rata go mo nea boineelo bjo bo kgethegilego, ba swanetšego go phafogela tutuetšo ya wona ka matšatši ohle.

New World Translation

Tlhaloso: Phetolelo ya Mangwalo a Makgethwa yeo e dirilwego ka go lebanya Sehebereng, se-Arameng le Segerikeng, gomme ya fetolelwa Seisemaneng sa mehleng yeno ke komiti ya dihlatse tše di tloditšwego tša Jehofa. Ba ba ipoletše mabapi le puku ya bona ka mokgwa o latelago: “Bafetoledi ba puku ye bao ba boifago le go rata Modimo yo e lego Mongwadi wa Mangwalo a Makgethwa, ba hwetša ba e-na le boikarabelo bjo bo kgethegilego go yena bja go fetišetša megopolo le dipolelo tša gagwe ka mokgwa o nepagetšego kamoo ba ka kgonago ka gona. Le gona, ba kwa ba e-na le boikarabelo go babadi ba ratago go tseba bao ba ithekgilego ka phetolelo ya Lentšu le le buduletšwego la Modimo yo Godimo-dimo gore ba tle ba phološwe ka mo go sa felego.” Phetolelo ye e ile ya hunollwa mathomong ka diripa go tloga ka 1950 go ya go 1960. Dikgatišo tša maleme a mangwe di ithekgile phetolelong ya Seisemane.

“New World Translation” e ithekgile go eng?

Ka go ba motheo wa go fetolela Mangwalo a Sehebere, ruri Biblia Hebraica ya Rudolf Kittel, dikgatišo tša 1951-1955 di ile tša dirišwa. New World Translation e boeleditšwego ya 1984 e hotšwe ke go tlišwa nakong ka go dumelelana le Biblia Hebraica Stuttgartensia ya 1977. Go oketša mo, ruri Mengwalo ya Lewatle le le Hwilego gotee le diphetolelo tše dintši tša pele ka maleme a mangwe di ile tša lekodišišwa. Ge e le ka Mangwalo a Bakriste a Segerika, ruri lengwalo la motheo la Segerika la 1881 le le ngwadilwego ke Westcott le Hort le ile la dirišwa kudu, eupja mangwalo a mangwe a mantši a motheo le wona a ile a lekodišišwa gotee le diphetolelo tše dintši tša pele tša maleme a mangwe.

Ke bomang bao e bego e le bafetoledi?

New World Translation Committee ge e be e go tšweletša e le mpho ditshwanelong tša go gatišwa ga phetolelo ya bona, ba kgopetše gore ditho tša yona di se bolelwe ka maina. Watch Tower Bible and Tract Society of Pennsylvania e hlomphile kgopelo ya bona. Bafetoledi ba be ba sa inyakele botumo, eupja ba be ba hlompha Modimo yo e lego Mongwadi wa Mangwalo a Makgethwa.

Dikomiti tše dingwe tša diphetolelo ka nywaga e mentši le tšona di bile le kgopolo e swanago. Ka mohlala, letlakala la ka ntle la Kgatišo ya Ditšhupetšo (1971) ya New American Standard Bible le re: “Ga se ra diriša leina lege e le lefe la morutegi bakeng sa ditšhupetšo goba dikeletšo, ka gobane re dumela gore Lentšu la Modimo le swanetše go ikemela ka noši.”

Na ruri ke phetolelo e fetoletšwego ke barutegi?

Ka ge bafetoledi ba kgethile gore ba se ke ba bolelwa ka maina, gona potšišo mo e ka se ke ya arabja ka go ya ka boemo bja bona bja thuto. Phetolelo e swanetše go tlogelwa e ikemetše.

Ye ke phetolelo ya mohuta ofe? Ge e le gabotse, ke phetolelo e nepagetšego, yeo gantši e lego e latelelago lentšu ka lentšu go tšwa malemeng a mathomo. Ga se feela yeo e hlalosago taba moo bafetoledi ba tlogelago ditaba tšeo ba bonago e se tša bohlokwa gomme ba oketša ka dikgopolo tšeo ba dumelago gore di tla thuša. Go thuša barutwana, ruri dikgatišo tše dintši di nea mengwalo ya ka tlase yeo e bontšhago ditaba tšeo di sa swanego tšeo go tšona mantšu a ka dirišwago e le ka kgonthe ka ditsela tše dintši go feta e tee, gotee le go lokeletša mengwalo e itšego ya kgale yeo ditaba tše dingwe di ithekgilego ka yona.

Ditemana tše dingwe mo gongwe di ka se ke tša balega ka mokgwa woo motho a o tlwaetšego. Ke mokgwa ofe o nepagetšego? Babadi ba kgopelwa gore ba hlahlobe mengwalo e thušago yeo e bontšhitšwego mengwalong ya ka tlase ya kgatišo ya Ditšhupetšo ya New World Translation, ba bale ditlhaloso tšeo di neilwego mametletšong gomme ba bapiše phetolelo le diphetolelo tše dingwe tše dintši. Ge e le gabotse, ba tla hwetša gore bafetoledi ba bangwe le bona ba bone go nyakega gore ba bolele taba ka mokgwa o swanago.

Ke ka baka la’ng leina Jehofa le dirišwa Mangwalong a Bakriste a Segerika?

Go swanetše go hlokomelwa gore New World Translation ga se yona Beibele feela yeo e dirago se. Leina la Modimo le tšwelela diphetolelong tša Mangwalo a Bakriste a Segerika ao a fetoletšwego Sehebereng le ditemaneng tšeo go tšona ditsopolo di beilwego ka go lebanya go tšwa Mangwalong a buduletšwego a Sehebere. The Emphatic Diaglott (1864) e na le leina la Jehofa ga-18. Diphetolelo tša Mangwalo a Bakriste a Segerika tšeo di ka bago ka maleme a mangwe a 38 le tšona di diriša mongwalelo wa tšona wa leina la Modimo.

Go gatelelwa moo Jesu Kriste a go dirilego leineng la Tatagwe, go bontšha gore yena ka noši o le dirišitše ka go hunologa. (Mat. 6:9; Joh. 17:6, 26) Ka go ya ka Jerome wa lekgolo la bone la nywaga Mehleng ya Rena, ruri moapostola Mateo o thomile go ngwala Ebangedi ya gagwe ka Sehebere, gomme Ebangedi yeo e tsopotše ka bontši ditemana tše di tšwago Mangwalong a Sehebere ao a nago le leina la Modimo. Bangwadi ba bangwe ba Mangwalo a Bakriste a Segerika ba tsopotše go Septuagint ya Segerika (phetolelo ya Mangwalo a Sehebere ao a fetoletšwego Segerikeng yeo e thomilwego mo e ka bago ka 280 Pele ga Mehla ya Rena), yeo dikopi tša yona tša pele di bego di e-na le leina la Modimo ka ditlhaka tša Sehebere ka ge go bontšhwa ke mongwalo wa kgonthe wo o ilego wa bolokwa.

George Howard mofahloši wa Yunibesithi ya Georgia o ngwadile ka gore: “Ka ge Tetragram [ditlhaka tše nne tša Sehebere tša leina la Modimo] e be e sa dutše e ngwalwa dikoping tša Beibele ya Segerika yeo e dirilego Mangwalo a kereke ya pele, gona ke mo go kwalago go dumela gore bangwadi ba T[estamente] e M[psha] ge ba be ba tsopola Mangwalong, ba ile ba se ke ba ntšha Tetragram beibeleng.”—Journal of Biblical Literature, March 1977, letl. 77.

Ke ka baka la’ng ditemana tše dingwe ruri di se gona?

Ditemana tšeo di hwetšwago diphetolelong tše dingwe, ga di hwetšwe mengwalong ya kgale yeo e lego gona ya Beibele. Go bapišwa ga diphetolelo tše dingwe tša mehleng yeno tše di swanago le The New English Bible le Jerusalem Bible ya Katholika, go bontšha gore bafetoledi ba bangwe le bona ba ile ba lemoga gore ditemana tšeo di belaelwago ga se tšona tšeo e lego tša Beibele. Mabakeng a mangwe, ruri di be di tšerwe karolong e nngwe ya Beibele gomme tša oketšwa lengwalong leo le ilego la ngwalollwa ke mongwadi.

Ge e ba o Mongwe a Bolela Gore

‘Le na le Beibele yeo e lego ya lena’

Mo gongwe o ka araba ka gore: ‘Ke phetolelo efe ya Beibele yeo o nago le yona? Na ga se . . . (bolela Dibeibele tšeo di lego ka leleme la geno)? Ee, go na le diphetolelo tše dintši.’ Mo gongwe o ka oketša ka gore: ‘Ke thabišwa ke go diriša phetolelo lege e le efe yeo o e ratago. Eupja mo gongwe o ka kgahlišwa ke go tseba lebaka leo ka lona ke ratago New World Translation. Ke ka baka la leleme la yona la mehleng yeno le go kwešišega ga lona, le gona ke ka gobane bafetoledi ba kgomaretše e le ka kgonthe seo se lego malemeng a mathomo a Beibele.’

Goba o ka re: ‘Seo o se bolelago se ntira gore ke bone gore o swanetše go ba o e-na le Beibele mo legaeng la gago. Ke phetolelo efe ya Beibele yeo o e dirišago? . . . Na o ka rata go e tšea?’ Mo gongwe o ka oketša ka gore: ‘Go rena ka moka, go sa šetšwe phetolelo yeo re e dirišago, ruri Jesu go Johane 17:3 o gatelela selo sa bohlokwa seo re ka se gopolago go etša ge o ka bona mo Beibeleng ya gago. . . . ’

Tsela e nngwe ya go araba: ‘Go na le diphetolelo tše dintši tša Beibele. Mokgatlo wa rena o kgothaletša go dirišwa ga tšona ka bontši e le gore re tle re kgone go di bapiša gomme re thuše barutwana go hwetša seo se bolelwago ke Mangwalo. Ka ge mo gongwe o ka ba o tseba, ruri Beibele mathomong e be e ngwadilwe ka Sehebere, se-Arama le Segerika. Ka gona, re leboga seo bafetoledi ba se dirilego ka go e tšweletša ka maleme a rena. Ke phetolelo efe ya Beibele yeo o e dirišago?’

Keletšo e nngwe: ‘Ruri o motho yo a ratago Lentšu la Modimo. Ka gona, ke holofela gore o tla kgahlišwa ke go tseba go se swane mo gongwe mo gogolo mo go lego gona magareng ga New World Translation le diphetolelo tše dingwe. Ke mo go akaretšago leina la motho o bohlokwa kudu yo a bolelwago Mangwalong. Na o tseba gore yoo ke mang?’ Mo gongwe o ka oketša ka gore: (1) ‘Na o be o tseba gore leina la gagwe le tšwelela ka Beibeleng yeo e lego ka Sehebere sa mathomo ka makga a ka bago 7 000, e lego go tšwelela gantši go feta leina le lengwe lege e le lefe?’ (2) ‘Ke phapano efe ye e lego gona tabeng ya ge e ba re diriša leina leo e lego la Modimo goba go se le diriše? Na o na le bagwera lege e le bafe ba pelo-bohloko bao o sa tsebego maina a bona? . . . Ge e ba re rata go kwana le Modimo, gona ke gabohlokwa go thoma ka go tseba leina la gagwe. Hlokomela seo Jesu a se boletšego go Johane 17:3, 6. (Ps. 83:18)’

Pakatori

Tlhaloso: “Ka go ya ka thuto ya Kereke ya [Roma Katholika], ke boemo goba lefelo lefaseng le le latelago . . . moo meoya ya bao ba hwago ba le boemong bja kgaugelo, eupja ba sešo ba hunologa boemong ka moka bja go se phethege, ba dirago poelanyo ya dibe tšeo di sego tša lebalelwa tše nyenyane goba ya kotlo ya nakonyana ka baka la dibe tše nyenyane le tše šoro tšeo ba šetšego ba di lebaletšwe gomme ka go dira bjalo, ba hlwekišwa pele ga ge ba ka tsena legodimong.” (New Catholic Encyclopedia, 1967, Puku XI, letl. 1034) Ga se thuto ya Beibele.

Thuto ya pakatori e theilwe go eng?

Ka morago ga go boeletša seo bangwadi ba Katholika ba se boletšego ditemaneng tše di swanago le 2 Maccabees 12:39-45, Mateo 12:32 le 1 Ba-Korinthe 3:10-15, New Catholic Encyclopedia (1967, Puku XI, letl. 1034) e re: “Ge go fetšwa taba, ruri thuto ya Katholika ya pakatori e theilwe mokgweng, e sego Mangwalong a Makgethwa.”

“Kereke e ithekgile ka mokgwa o tlwaetšwego go thekga lefelo la magareng ga legodimo le dihele.”—U.S. Catholic, March 1981, letl. 7.

Baboleledi ba Katholika ba bolela’ng mabapi le setlogo sa pakatori?

“Ba bantši ba gopola gore tlhokofatšo ya kgonthe ya pakatori