Luke 17:29, 30: “Ka ’tšatši leo Loto a tšwilexo Sodoma, xwa na mollô le thsebêla di e-tšwa lexodimong, tša ba fetša ka moka. Le ka ’tšatši le Morwa-motho a tl’o xo utoloxa ka lôna, xo tlo ba byalo.”

Ga go swane le go kolobetšwa ka moya o mokgethwa moo e bego e le ga barutiwa

Dit. 1:5: “Johane yêna ó kolobeditše ka meetse; xe e le lena [baapostola ba botegago ba Jesu] Le tlo kolobetšwa ka Môya o mokxêthwa xe xo fetile matšatši a sexo makae.”

Dit. 2:2-4: “Ba thšoxa xo kwala modumô o tšwaxo lexodimong, e ke ké wa ledimo le matla le le tšutlaxo, wa tlala ngwakô ka moka wo ba dutšexo xo wôna. Ba bôna xo hlahlamoloxa maleme a kaxo dikxabo tša mollô; a tla a dula xodimo [eupja ga se a ka a ba khurumetša goba go ba ina] xa e mongwê le e mongwê wa bôná. Ka moka ba tlala Môya-mokxêthwa; ba thôma xo bolêla ka maleme a šele, ka mo Môya ó ba faxo xo bolêla ka xôna.”

Lefase (Earth)

Tlhaloso: Lentšu “lefase” le dirišwa ka ditsela tše dintši Mangwalong. Gantši re le nagana e le leo le bolelago kgokolo ka boyona yeo Jehofa a e neilego ka go rata e le gore e tle e thuše bophelo bja motho, ka go dira gore maphelo a rena e be ao a kgotsofatšago kudu. Lega go le bjalo, go swanetšwe go lemogwa gore “lefase” le ka ba la dirišwa ka tsela ya seswantšhetšo moo ka mohlala le ka bolelago batho bao ba phelago kgokolong ye goba lekoko la batho bao ba nago le mekgwa e itšego.

Na Lefase le tla senywa ke ntwa ya nuclear?

Ke’ng seo Beibele e se bontšhago e le morero wa Modimo mabapi le lefase?

Mat. 6:10: “Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.”

Ps. 37:29: “Baloki e ba beng ba naxa, ba dula mo xo yôna ka mehla le ka mehla.”

Bona gape le Mmoledi 1:4; Psalme 104:5.

Na go ka kgonega gore ka ge ditšhaba di hlompha ganyenyane morero wa Modimo, mo gongwe di senyetše ruri lefase gore le se sa hlwa le sa dulwa?

Jes. 55:8-11: “[Jehofa o re:] Bo-ka maxodimo à le kwa xodimo kxolê le lefase, le ditsela tša-ka di xodimo kxolê le ditsela tša lena; le kêlêlô tša-ka di xodimo kxolê le tša lena. . . . Lentšu la-ka . . . le ka se boele xo Nna lè le fêla; le tlo dira se nkxahlaxo, le tlo phêtha se ke le rometšexo sôna.”

Jes. 40:15, 26: “Hleng [Go ya kamoo Jehofa Modimo a bonago ka gona] dithšaba di byalo ka lerotholodi le le šaletšexo kxamelong! Di byalo ka lerojanyana le le šaletšexo leselong! . . . Llalang Le bônê tša kwa xodimo [letšatši, kgwedi le dinaledi tše dibilione]; ké mang e a di hlodilexo, a di nthša byalo ka mohlape wo o badilwexo? a di bitša tšohle ka maina, mo xo boati byo bokaakaa xwa se hlôkwê le setee, ka xobane è le yo matla a maxolo.” (Matla a nuclear a tšweletšwago ke ditšhaba a boifiša batho. Eupja dinaledi tše dibilione di tšweletša matla a nuclear ka tekanyo yeo re palelwago ke go e akanya. Ke mang yo a bopilego le go laola dilo tše ka moka tša legodimo? Na A ka se ke a thibela ditšhaba go diriša dibetša tša tšona tša nuclear ka tsela yeo e ka thibelago morero wa gagwe? Gore Modimo o tla dira se, ruri go bontšhwa ke go senya ga gagwe mmušo wa bahlabani wa Egipita nakong ya ge Farao a be a gopotše go šitiša go phologa ga ba-Isiraele.—Ek. 14:5-31.)

Kut. 11:17, 18: “Re a Xo leboxa Wene [Jehofa] Modimo Ra-matla-ohle, Mo-ba-xôna, Mo-hwetšwa-à-le-xôna, xe O tšere matla a maxolo a xaxo wa buša. Ba-ntlê ba xalefile, xwa tla boxale bya xaxo, xwa tla lebaka . . . la xo senya basenya-lefase.”

Na Modimo ka noši o tla senya lefase ka mollo?

Na 2 Petro 3:7, 10 e thuša kgopolo ye? “Maxodimo a mehla yeno le lefase la mehla yeno di thekxilwe ke lôna Lentšu leo, di sa lôtôlwa xwa tlo bá xwa tla mollô wa letšatši la kahlolô [“tshenyego,” RS] la xo tlo lôba xa batho ba banyatši. . . . ’Tšatši leo la [Jehofa] le tlo tla bo-ka lehodu le-tla-bošexo; xomme ka lôna maxodimo a tlo široxa ka lešata la modumô o moxolo; xomme tše lefase le bopilwexo ka tšôna di tlo fedišwa ke mollô, xwa tlo fsa xwa fêlêla lefase le medirô ka moka e lexo mo xo lôna. [“le tla nyamela,” TEV; “le tla utollwa,” NW, NAB; “le tla hlobodišwa,” NE].” (Hlokomela: Mengwalo ya Codex Sinaiticus le Vatican MS 1209 yeo bobedi bja yona e lego ya lekgolo la nywaga la bo-4 Mehleng ya Rena, e balega ka gore “le tla utollwa.” Mengwalo ya ka morago ya Codex Alexandrinus ya lekgolo la nywaga la bo-5 le mongwalo o boeleditšwego wa Clementine wa Vulgate wa lekgolo la nywaga la bo-16 di balega ka gore “di tla fišwa.”)

Na Kutollo 21:1 e bontšha gore lefase la rena le tla senywa? “Ka bôna lexodimo le lefsa, le lefase le lefsa. Xobane lexodimo la pele le be le tloxile, le lona lefase la pele. Le lewatlê xa le sa le xôna.”

Go hlaloswa ga ditemana tše gore e be mo go nepagetšego, ruri go swanetše go dumelelana le ditemana tše di di dikologilego gotee le dikarolo ka moka tša Beibele

Ge e ba ditemana tše (2 Petro 3:7, 10 le Kutollo 21:1) di be di bolela gore Lefase la kgonthe le swanetše go fišwa ka mollo, gona magodimo a kgonthe (dinaledi le dilo tše dingwe tša legodimo) le ona a tla swanelwa ke go senywa ka mollo. Lega go le bjalo, kgopolo e bjalo e ganetšana le kholofetšo e lego mangwalong a swanago le Mateo 6:10, Psalme 37:29 le 104:5 gotee le Diema 2:21, 22. Go feta moo, ruri ke matla afe ao mollo o bego o tla ba le ona go letšatši le dinaledi tšeo ka botšona e lego tšeo di fišago o šoro-šoro? Ka gona, lentšu “lefase” mangwalong a tsopotšwego ka mo godimo le swanetše go kwešišwa ka tsela e fapanego.

Go Genesi 11:1, Dikxoši tša Pele 2:1, 2, Koronika tša Pele 16:31, Psalme 96:1 le tše dingwe, ruri lentšu “lefase” le dirišwa ka tsela ya seswantšhetšo ge go bolelwa ka batho le ka lekoko la batho. Na se se swanetše go ba se se swanago ka 2 Petro 3:7, 10 le Kutollo 21:1?

Hlokomela gore ditabeng tše di bolelwago go 2 Petro 3:5, 6 (gape le go 2Pe 2:5, 9), go bolelwa ka Meetse-fula a mehleng ya Noage ao go wona lekoko le lebe la batho le ilego la senywa, eupja Noage le lapa la gagwe gotee le lefase la kgonthe ba ile ba phološwa. Ka mokgwa o swanago, go 2 Petro 3:7 go bolelwa gore bao ba tlago go senywa ke “batho ba banyatši.” Kgopolo ya gore “lefase” leo le bolelwago mo ke lekoko le lebe la batho e dumelelana e le ka kgonthe le mangwalo ka moka a Beibele, go etša ge go bontšhitšwe ke ditemana tše di boletšwego ka mo godimo. Ke “lefase” leo la seswantšhetšo goba lekoko le lebe la batho leo le tlago go “fêlêla,” ke gore Jehofa o tla le fediša go etša ge go fedišwa ka mollo, gomme a utolle bobe bja lekoko la batho ba banyatši, a bontšhe gore le swanelwa ke go fedišwa sa ruri. Lekoko leo le lebe la batho le gona ke “lefase la pele” leo le bolelwago go Kutollo 21:1.

Ka gona, mantšu a Jesu a lego go Luka 21:33 (“lexodimo le lefase di tlo feta; xomme . . . ”) a swanetše go kwešišwa seetšeng sa polelo e swanago le yeo e lego go Luka 16:17 (‘legodimo le lefase go ka ba bonolo gore di fete, go e na . . . ’), tšeo bobedi bja tšona di gatelelago go se kgonege ga boemo bjo bo bolelwago.—Bona gape le Mateo 5:18.

Na batho ba lokilego ba tla išwa legodimong gomme ka morago ba bušetšwe lefaseng ge batho ba babe ba fedišitšwe?

Na Kutollo 21:2, 3 e thuša kgopolo ye? E re: “Nna Johane ka bôna Motse-mokxêthwa wa Jerusalêma o mofsa, ka o bôna ò foloxa ò e-tšwa xo Modimo lexodimong, ò thakxilwe wa monyalwa e a hlophišeditšwexo monna wa xaxwe. Ka kwa lentšu le lexolo lè e-tšwa lexodimong lè re: Šoo ngwakô wa Modimo mo xare xa batho; ó tlo axa le bôná, ya ba sethšaba sa xaxwe. ’Me Yêna mong Modimo ó tlo ba le bôná è le Modimo wa bôná.” (Na taba ya gore Modimo o tla “axa” le batho gomme ‘a be le bona,’ ruri e bolela gore o tla ba Motho wa nama? Seo se ka se ke sa ba bjalo, ka gobane Jehofa o boditše Moše gore: “Motho a ka se ke a mpona a phela.” [Ek. 33:20] Ka gona, ditho tša Jerusalema o Mofsa di ka se ke tša boela lefaseng e le batho ba nama. Ke ka mokgwa ofe moo Modimo a tlago ‘go ba’ le batho, gomme ke bjang moo Jerusalema o Mofsa a tlago ‘go fologa a e-tšwa go Modimo legodimong’? Ka ntle le pelaelo, se se swanago le seo se hwetšwa go Genesi 21:1, PK moo go bolelwago gore Modimo o ile a “etela” Sara gomme a mo šegofatša ka morwa botšofading bja gagwe. Ekisodo 4:31, PK e re botša gore Modimo o ile a ‘etela’ ba-Isiraele ka go romela Moše e le molopolodi. Luka 7:16 e bolela gore ka bodiredi bja Jesu, ruri Modimo o “etetše” batho ba gagwe. Diphetolelo tše dingwe di diriša polelo ya gore Modimo o ile a “hlokomela” batho ba gagwe [NW] goba ‘a ba šokelwa’ [NE]. Ka gona, Kutollo 21:2, 3 e swanetše go bolela gore Modimo o tla ‘etela’ goba o tla ba le batho ka go diriša Jerusalema o Mofsa wa legodimo, woo ka wona a tlago go šegofatša batho ba ba kwago.)

Die. 2:21, 22: “Ba ba tl’o xo dula mo naxeng [“lefaseng,” NE] ke baloki; [“bao ba se nago bosodi,” NE]; ba ba tl’o xo šala ba le xona, ke bôná ba-ila-bokxopo. Ba babe ba tlo fedišwa naxeng; bakxeloxi ba tlo rakwa mo xo yôna.” (Hlokomela gore ga e bolele gore bao ba se nago bosodi ba tla boela lefaseng, eupja e bolela gore ba tla ‘šala mo go lona.’)

Na morero wa mathomo wa Modimo ka lefase o fetogile?

Gen. 1:27, 28: “Ké mo Modimo a bopilexo motho, a mmopa ka xo ithswanthša, a mmopa ka xo swanthša ka Yêna Modimo; a ba bopa monna le mosadi. Modimo a ba šexofatša, a bolêla le bona a re: Tswalang le atê, tlalang lefase, Le le fenyê. Le bušê ’hlapi tša lewatlê le ’nonyana tša xodimo, le nyabanyaba yohle ya diphedi mo ’faseng.” (Modimo ka gona o bontšhitše gore morero wa gagwe ke go ba le lefase le tletše ka bana ba Adama le Efa e le bahlokomedi ba paradeise ya lefase. Ka morago ga ge Modimo a bopile lefase le ka mohlolo gore le dulwe ke batho gomme a le dirile gore e be leo le swanetšwego ke go dulwa gare ga dikgokolo ka moka tšeo motho a ilego a di lekola ka metšhene ya gagwe e bonelago kgole le difofane, ruri na Mmopi o ile a hlanogela morero wa gagwe gomme a o tlogela o se wa phethega ka mo go sa felego ka baka la sebe sa Adama?)

Jes. 45:18, PK: “Gobane go bolela bjalo Jehofa e a hlodilego magodimo, Modimo e a bopilego lefase a le dirilego, a le tiišitšego a sa kago a le hlola gore le dule feela, eupja gore le dulwe ke batho, o re: Ke nna Jehofa, gomme ga go sa na e mongwe.” (Bona gape le Jesaya 55:10, 11.)

Ge e ba go se na motho yo a tlago go hwa Tokišong e Mpsha ya Modimo, gona batho ka moka ba tla dula bjang lefaseng?

Gopola gore ge Modimo a be a bolela morero wa gagwe ka lefase, o itše: “Tswalang le atê, tlalang lefase.” (Gen. 1:28) Modimo o ile a nea motho matla a go belega bana gomme ge morero wa Gagwe tabeng yeo o phethilwe, gona A ka dira gore go belega bana go kgaotšwe lefaseng.

Ke batho ba mohuta ofe bao Modimo a tlago go ba nea bophelo bjo bo sa felego lefaseng?

Tsef. 2:3: “Nyakang [Jehofa], lena babôtla bohle ba lefase, lena Le yaxo ka molaô w’axwe. Tsomang tokô, Le tsomê boikokobetšo; mohlomongwê Le ka efošwa mohla woo wa boxale bya [Jehofa].”

Ps. 37:9, 11, PK: ‘Ba ba holofetšego Jehofa ba tlo tšea naga ya ba ya bona. Ba boleta ba tlo tšea naga ya ba kabelo ya bona. Ba tlo ithabela khutšong e kgolo.’

Lefase (World)

Tlhaloso: “Lefase” ge le fetolelwa go tšwa lentšung la Segerika la koʹsmos, le ka bolela (1) batho ka kakaretšo go sa balwe boemo goba tsela ya bona ya boitshwaro ya bophelo, (2) maemo a rulagantšwego a motho ao motho a belegelwago go ona le go phela go ona goba (3) lešaba le lentši la batho bao e sego bahlanka ba Jehofa ba amogelwago. Bafetoledi ba bangwe ba Beibele ba tšweleditše dipolelo tšeo e sego tše di nepagetšego ka go diriša “lefase” e bile e le leo le swanago le mantšu a Segerika ao a bolelago “lefase le le agilwego” le “tshepedišo ya dilo.” Poledišano e latelago e bolela kudu ka tlhaloso ya bobedi ya ditlhaloso tšeo di bolelwago tša “lefase” go etša ge e neilwe ka mo godimo.

Na lefase le tla senywa ka mollo?

2 Pet. 3:7: “Maxodimo a mehla yeno le lefase la mehla yeno di thekxilwe ke lôna Lentšu leo [la Modimo], di sa lôtôlwa xwa tlo bá xwa tla mollô wa letšatši la kahlôlô la xo tlo lôba xa batho ba banyatši.” (Hlokomela gore ke “batho ba banyatši” e sego batho ka kakaretšo, bao ba tlago go senywa. Ka mokgwa o swanago, 2Pe 3 temana ya 6 e bolela ka tshenyego ya “lefase” la mehleng ya Noage. Batho ba babe ba ile ba senywa, eupja lefase gotee le Noage yo a bego a boifa Modimo le lapa la gagwe ba ile ba šala. Na “mollo” wa letšatši le le tlago la kahlolo e tla ba mollo wa kgonthe goba na ke o swantšhetšago tshenyego e feleletšego? Ke matla afe ao mollo wa kgonthe o tlago go ba le wona mebeleng ya kgonthe ya legodimo tšeo e lego letšatši le dinaledi tšeo di šetšego e le tše di fišago kudu? Bakeng sa poledišano e tšwelago pele ya temana ye, hle bona matlakala 233-235, tlase ga “Lefase (Earth).”)

Die. 2:21, 22: “Ba ba tl’o xo dula mo naxeng, ké baloki; ba ba tl’o xo šala bà le xôna ke bôná ba-ila-bokxôpô. Ba babe ba tlo fedišwa naxeng; bakxeloxi ba tlo rakwa mo xo yôna.”