E-ba le Pono e Nepagetšego ka Kgaugelo ya Modimo

NGAKA e be e le ye botho le yeo e tshwenyegago kudu. Go ya ka kahlolo ya yona e kaone-kaone, molwetši wa yona o be a tloga a nyaka go buiwa e le gore a phološe bophelo bja gagwe. Ge molwetši a be a dika-dika gomme a rotoša taba ya tšhelo ya madi, ngaka e ile ya makala. Ge a be a hlalosa gore ka baka la mabaka a bodumedi o be a ka se ke a dumela go buiwa mo go akaretšago tšhelo ya madi, ngaka e ile ya tlabega o šoro. E ile ya leka go nagana kudu ka tsela yeo e ka mo thušago ka yona. Mafelelong e ile ya nagana gore e hweditše tsela ya go mo thuša. E ile ya re: “O a tseba, ge e ba o sa amogele tšhelo ya madi, o tlo hwa. Ga o nyake seo, na ga go bjalo?”

Molwetši wa gagwe o ile a re, “Ee ga ke nyake go hwa.”

“Eupja, ka mo go bonagalago ka gona, ge e ba o amogela tšhelo ya madi, o tla be o thulana le ditumelo tša bodumedi bja gago, tšeo le tšona e lego tša bohlokwa go wena. Ge go le bjalo, tšhišinyo ya-ka še. Ke ka baka la’ng o sa amogele tšhelo ya madi gomme ka go rialo o phološe bophelo bja gago. Ke moka ka morago o ipobole go Modimo gore o dirile sebe, gomme o itshole. Ka tsela yeo o tla ba o tsošološitšwe le bodumeding bja gago.”

Ngaka yeo e nago le maikemišetšo a mabotse e be e nagana gore e hweditše karabo e phethagetšego. E be e lemoga gore molwetši wa yona o be a dumela go Modimo wa kgaugelo. Ruri, se e be e le sebaka se sebotse sa go ikhola ka kgaugelo ya Modimo! Eupja na tšhišinyo ya gagwe e be e le e leka-lekanego go etša kamoo e bego e kwala ka gona?

Na re ke re Nagane ka Tsela ye?

Ka dinako tše dingwe re ka ikhwetša re nagana ka tsela yeo ngaka e ilego ya dira ka yona. Mohlomongwe re tšhošwa ke go phulega gatee-tee mo go sa letelwago ga kganetšo sekolong goba modirong. Goba re ka ikhwetša boemong bjo bo gakantšhago moo re lego tlase ga kgateletšo ya go dira selo se sengwe seo se kgopišago letswalo la rena. Ka baka la letšhogo, mo gongwe re ka sekamela go kgetheng tsela e bonolo gomme ra dira seo re tsebago gore se fošagetše, re ikemišeditše go kgopela tebalelo ka morago.

Goba ba bangwe ba ka lekwa ke ditshekamelo tša bona ka noši tšeo di fošagetšego. Ka mohlala, lesogana le ka ikhwetša le le boemong bjoo le lekegago ka matla go dira boitshwaro bjo bo gobogilego. Go e na le gore le lwe le kganyogo e fošagetšego, mo gongwe le ka itlogelela, le ikemišeditše go lokiša ditaba le Modimo ka morago. Ba bangwe ba ile ba ba ba fihla bokgoleng bja go dira sebe se segolo go sa šetšwe go tseba ga bona gore ba tla kgaolwa ka phuthegong ya Bokriste. Mohlomongwe ba ile ba nagana gore: “Ke tla dumelela nako e nyenyane go feta. Ke moka ka morago ke tla itshola gomme ka bušetšwa.”

Maemo a ka moka a na le dilo tše pedi tšeo a swanago ka tšona. Sa pele, batho ba a itlogelela go e na le go katanela go dira se se lokilego. Sa bobedi, ba nagana gore ka morago ga ge ba dirile se se fošagetšego, ka mo go itiragalelago feela, Modimo o tla ba swarela ge feela ba fo kgopela.

Pono e Nepagetšego ke Efe?

Na se se bontšha tebogo e swanetšego bakeng sa kgaugelo ya Modimo? Nagana ka kgaugelo yeo ka nakwana. Jesu o itše: “Modimo ó ratile lefase xakaakaa, a bá a le nea Morwa wa xaxwe e a tswetšwexo á nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:16) Moapostola Johane o ile a hlalosa kamoo kgaugelo yeo e šomago ka gona ge a be a re: “Ke Le ngwalêla ditaba tšé, xore Le se kê la dira dibe. Xe xo ka ba le e a diraxo dibe, xôna re na le Morapeledi xo Tata wešo, Jesu Kriste Yêna Moloki.” (1 Johane 2:1) Ka gona, ge e ba ka baka la go se phethagale re wela sebeng, re ka tla go Modimo ka thapelo gomme ra kgopela tebalelo motheong wa sehlabelo sa Jesu.

Lega go le bjalo, na se se bolela gore ga go na taba ge e ba re dira sebe goba go se bjalo, ge feela ka morago re kgopela tebalelo? Le gatee-tee. Gopola mantšu a mathomo a tsopolo yela: “Ke Le ngwalêla ditaba tše, xore Le se kê la dira dibe.” Mantšu a Johane a tšwelago pele temaneng yeo a bontšha thulaganyo e lerato ya Jehofa ya go dirišana le go se phethagale ga rena. Lega go le bjalo, re swanetše go leka ka thata ka mo re ka kgonago ka gona go phema go dira sebe. Go sego bjalo re tla be re bontšha go hloka tlhompho mo go kwešago bohloko bakeng sa lerato la Modimo, go fo swana le bao Juda a bolelago ka bona bao ba ilego ba diriša botho bjo bo sa swanelago bja Modimo e le seširelo bakeng sa boitshwaro bjo bo hlephilego.—Juda 4, NW.

Go lebelela kgaugelo ya Modimo bjalo ka selo seo ekago ke lelokwa la tšhireletšo leo ka mehla le tlago go re kama go sa šetšwe seo re se dirago go nyenyefatša kgaugelo ya Modimo gomme gwa dira gore sebe se bonale e se se sebe gakaalo. Se ga se therešo le gatee. Moapostola Paulo o ile a botša Tito gore: “Xo bônaxetše kxauxelô ya Modimo ya xo phološa batho bohle. Ké yôna e re rutaxo xo lahla xo nyatša Modimo, xo lahla dikxanyoxô tša lefase, xore mehleng yeno re phelê rè eletšexile, rè loka, rè na le borapedi.”—Tito 2:11, 12.

Paulo o bontšhitše tebogo ya gagwe bakeng sa kgaugelo ya Modimo ka tsela yeo a ilego a katana le go se phethagale ga gagwe ka gona. O itše: “Ke ôtlaka mmele wa-ka xore ke o thapišê; xore e se bê kè le motsenedi wa ba bangwê, nna mong ka nyatšêxa.” (1 Ba-Korinthe 9:27) Paulo ga se a fo go tšea gabohwefo fela ka ntle le go dira boiteko gore o be a tlemagane le sebe nako le nako. Na le rena re swanetše go dira bjalo?

Pono ya Jesu

Nakong e nngwe, Jesu o ile a bontšha kamoo a lebelelago kgopolo ya go kwanantšha se se lokilego le go tšea tsela e bonolo e le go phema go tlaišega. Ge a be a thoma go botša barutiwa ba gagwe ka go tla ga lehu la gagwe la sehlabelo, Petro o ile a leka go mo lemoša ka gore: “Morena! A k’o lôtexe, tšeo di se kê tša Xo direxêla.” Jesu o ile a araba bjang? “Tloxa fá pele xa-ka, wene Lenaba; O a nkgopiša, xobane xa O eleletše tša Modimo, O eleletša tša batho.”—Mateo 16:22, 23.

Kgalemelo e matla ya Jesu go Petro e bontšhitše e le ka kgonthe gore Jesu o ile a gana go tšea tsela e bonolo yeo e bego e akaretša go thulana le thato ya Modimo. Pego e bontšha gore o ile a latela tsela e lokilego ka go tia, a hlaselwa ka mehla ke Sathane. Mafelelong o ile a kwerwa, a bethwa o šoro le go hwa lehu le bohloko. Lega go le bjalo, ga se a ka a kwanantšha, gomme ka baka la se o ile a kgona go nea bophelo bja gagwe e le topollo bakeng sa rena. Ruri ga se a ka a kgotlelela tše ka moka e le go re re ka ‘ipabalela’ ge mathata goba diteko di rotoga!

Go itšwe ka Jesu: “O rata xôna xo loka; O hlôya bokxôpô [“go hloka molao,” NW].” (Ba-Hebere 1:9) Ka mehla go tšea tsela e bonolo go akaretša go hloka molao. Ka gona, ge e ba re hloile se e le ka kgonthe—go etša ge Jesu a ile a dira—ka mehla re tla gana go kwanantšha. Pukung ya Diema, Jehofa o re: “Ngwan’a-ka! Hlalefa, O nthabišê pelo, ke tsebê se nkaxo fetola sôna xe ba nnyatša.” (Diema 27:11) Toko ya Jesu ye e leka-lekanetšego eupja e le e sa kwanantšhego e ile ya tliša lethabo le legolo pelong ya Jehofa. Re ka nea Jehofa lethabo le swanago ge e ba re latela tsela ya Jesu ya potego.—1 Petro 2:23.

Go Tlwaetšwa ke Kgotlelelo

Moapostola Petro o ngwadile gore: “Ké tšôna Le di thabêlaxo, Lè le ba xo hlokofatšwa lebakanyana xe xo swanetše xo ba bjalô, Lè le melekong ya mehuta-huta; è le xore xo bônale xo botexa xa tumêlô ya lena ya thêkô ye e fetaxo ya xauta ye e ônalaxo le xe e lekotšwe ka mollô, xore tumêlô ya lena e hwetšwê è ratêxa, è tumišêxa, è na le letaxô mohla wa pônaxalô ya Jesu Kriste.” (1 Petro 1:6, 7) Ka ge re se ra phethagala gomme re phela gare ga lefase la Sathane, re tla lebeletšana le meleko le diteko ka mehla. Go etša ge Petro a bontšha, se se ka phetha morero o mobotse. Moleko le diteko di leka tumelo ya rena, go bontšha ge e ba e le yeo e fokolago goba e le e tiilego.

Gape di šoma go tlwaetša rena ka noši. Jesu “ó ithutile xo kwa ka xôna xo tlaišêxa.” (Ba-Hebere 5:8) Le rena re ka ithuta go kwa, gotee le go bota Jehofa ge e ba re kgotlelela ka tlase ga teko. Le gona mogato wo wa go ithuta o tla tšwela pele go fihlela o fela, go etša ge Petro a ngwadile gore: “Modimo . . . yena ka noši o tla phetha tlwaetšo ya lena, o tla le tiiša, o tla le matlafatša.”—1 Petro 5:10, NW.

Lega go le bjalo, ge e ba re kwanantšha ka tlase ga teko, re ipontšha re le ba boifago goba ba fokolago, re hlaelelwa ke lerato le matla la go rata Jehofa le la go rata toko goba re hlaelelwa ke boitshwaro. Go fokola lege e le gofe mo go bjalo go bea tswalano ya rena le Modimo kotsing o šoro. Ka kgonthe, temošo ya Paulo e ka ba ya therešo boemong bja rena: “Xobane xe re senya ka boomo xe re šetše re filwe xo tseba therešô, xôna xa xo sa na sedimo sa xo hlatswa sebe seo.” (Ba-Hebere 10:26) Go kaone gakaakang go se dire sebe di sa tloga fase go e na le go ineela bofokoding le go ba kotsing ya go lahlegelwa ke kholofelo ka moka ya bophelo!

Potego Yeo e Sego ya Ithekga ka Maemo

Mehleng ya moporofeta Daniele, ba-Hebere ba bararo ba ile ba tšhošetšwa ka lehu la mollo ge ba be ba ka se rapele modimo wa seswantšho. Karabo ya bona e bile efe? “Xe xo ka dirwa ka mokxwa woo, xôna Modimo wa rena ó na le matla a xo re phološa leubeng la mollô o tukaxo, le xo re namolêla seatleng sa xaxo. Le xe a ka lesa xo re namolêla, xona wene kxoši O fêlê Ò tseba xore medimo ya xaxo xa re e hlankele, seswantšho seo O se tsemilexo, xa re se khunamele.”—Daniele 3:17, 18.

Ba ile ba tšea boemo bjoo ka gobane ba be ba nyaka go dira seo se bego se lokile. Ge nkabe seo se ile sa lebiša lehung la bona, gona ba be ba ikemišeditše gore go be bjalo. Kholofelo ya bona e be e le tsogong. Lega go le bjalo, ge e ba Modimo a ile a ba phološa, seo e be e tla ba se se kaone kudu. Eupja boemo bja bona bjo bo tiilego bo be bo se bja ithekga ka maemo. Ke kamoo go swanetšego go ba ka gona ka mehla go bahlanka ba Modimo.

Mehleng ya rena ba bangwe bao ba ilego ba gana go kwanantšha ba ile ba golegwa, ba hlokofatšwa, gaešita le go bolawa. Ba bangwe ba ile ba gafa dilo tše di bonagalago, ba kgetha go dula ba diila go e na le go huma ka go kwanantšha melao ya motheo. Go diregile’ng ka mosadi wa Mokriste yo go boletšwego ka yena mathomong a sehlogo se? O ile a leboga maikemišetšo a botho eupja e le a fošagetšego a ngaka, eupja ga se a ka a kwanantšha tumelo ya gagwe. Go e na le moo, tlhompho ya gagwe bakeng sa molao wa Jehofa e ile ya mo dira gore a gane go buiwa. Ka mo go thabišago, o ile a fola go sa šetšwe seo gomme a tšwela pele a hlankela Jehofa ka mafolofolo. Lega go le bjalo, ge a be a tšea boemo bja gagwe, o be a sa tsebe seo mafelelo e bego e tla ba ona, eupja o be a ikemišeditše go tlogela taba ka moka ka diatleng tša Jehofa.

Ke eng seo se ilego sa mo thuša go dula a tiile gakaakaa ka tlase ga kgatelelo? Ga se a leka go ikemela ka noši, le gona ga go mohlanka lege e le ofe wa Modimo yo a swanetšego go dira bjalo. Gopola, “Modimo ké sebô sa rena le matla a rena; ké Mohlakodiši, re mo lemoxile dikotsing tše ntši.” (Psalme 46:1) Go kaone gakaakang go retologela go Modimo bakeng sa thušo ge re le ka tlase ga teko go e na le go dira sebe gomme ka morago ra swanela go retologela go yena bakeng sa kgaugelo!

Ee, a re se keng ra tšea kgaugelo e kgolo ya Modimo gabohwefo. Go e na le moo, a re hlagoleleng kganyogo ya kgonthe ya go dira se se lokilego, gaešita le ge re lebane le mathata. Se se tla matlafatša tswalano ya rena le Jehofa, sa re nea tlwaetšo yeo re e nyakago bakeng sa bophelo bjo bo sa felego, gomme sa bontšha tlhompho e swanetšego bakeng sa kgaugelo ya Modimo. Boitshwaro bjo bjalo bo bohlale bo tla tlišetša pelo ya Tatago rena wa legodimong lethabo.

[Seswantšho go letlakala 24]

Kholofelo e feletšego tsogong e ile ya thuša ba-Hebere ba bararo go boloka potego