Lebaka la go Ngwalwa ga Pukwana ye

Pukwana ye e gatišeditšwe go tšweletša kwešišano le tirišano magareng ga Dihlatse tša Jehofa le balaodi ba sekolo. Re kganyoga go dirišana le bohle bao ba šomelago katlego ya mananeo a motheo a thuto yeo e neelwago ka sekolong.

Batswadi bao e lego Dihlatse tša Jehofa ba nyaka go tsenya letsogo bakeng sa go tšweletša maemo a kgahlišago a tshepedišo ya go ithuta. Ba rata gore bana ba bona ba hwetše mohola o mogolo ka mo go ka kgonegago thutong ya bona. Ba nyaka le gore barutiši le balaodi ba bangwe ba sekolo ba tsebe gore ba tla dira tšohle tšeo ba ka di kgonago go ba thuša go fihlelela se.

Dihlatse tša Jehofa gantši di tumile ka boitshwaro bjo bo kgahlišago kudu gohle moo di dulago gona. Di tsebja ka go kwa ga tšona balaodi ba mmušo. Fela, barutiši ba bangwe mo gongwe ba ka nagana gore bana ba Dihlatse ga ba na tirišano ka gobane ba sa tšee karolo lenaneong le lengwe le le lengwe la sekolo goba medirong. Fela, go gana go tšea karolo mo ga se ka gobane bana e le ba ba rabelago goba ba ba lwago le tša leago. Boitshwaro bja bona bo theilwe ditumelong tša bodumedi le tša boitshwaro.

Ka pukwaneng ye re rata go tlwaelanya balaodi ba sekolo le ditumelo tša Dihlatse tša Jehofa, tšeo di kgomago go ba le karolo medirong ya sekolo. Go oketša go se, re rata go hlalosa lebaka leo ka lona ka baka la ditumelo tše bjalo, bana ba Dihlatse ba sa tsenyego letsogo medirong e mengwe ya sekolo le mananeong ao a tlwaetšwego mafelong a mantši go dikologa lefase ka moka. Ka nako e swanago, re rata go hlalosa ka mo go kwalago gore ga se boikemišetšo bja rena go tatetša ba bangwe ka dikgopolo tša rena.