Go Dirišana le Tshepedišo ya Sekolo

Dihlatse tša Jehofa di dumela gore thuto e botse ke bjo bongwe bja bohwa bjo bohlokwa bjoo bo ka newago bana. Eupja ke mang yoo kudu-kudu a ikarabelago ka thuto ya ngwana? Na ke barutiši ba nnoši sekolong?

Batho ba bangwe go bonala ba nagana bjalo. Lega go le bjalo, bana ba belegelwa batswadi gomme ke karolo ya malapa. Ga se ditšweletšwa tša Mmušo goba tša mekgatlo lege e le efe ya mmušo. Ka gona, batswadi ba na le boikarabelo bjoo ba bo neilwego ke Modimo bja go kgetha seo bana ba bona ba tlago go se rutwa.

Fela, ka nako e swanago, barutiši ba sekolo ba neela tirelo yeo e lebogwago le yeo e holago ka kudu. Le gona re lemoga gore matšatšing a a go senyega ga tayo, modiro wa bona ga se o bonolo. Batswadi ba ka dira’ng gore ba dirišane le bona?

Tirišano ya Batswadi

Sa mathomo, ke gabohlokwa gore batswadi ba tlwaelane le barutiši ba bana ba bona gomme ba dire ditokišetšo tša go ba tseba le go bolela le bona. Ruri go kopana ga se gwa swanela go dirwa ka morero wa go ngangišana, eupja e be ka morero wa go bona kamoo batswadi le barutiši ba ka dirišanago ka gona go thuša go godiša ngwana. Batswadi ba thabela go theetša ge morutiši a bolela gotee le go bolela ka mo go kwagalago seo ba se nyakelago bana ba bona.

Go kopaneng mo go bjalo, tate goba mma yo e lego Hlatse o swanetše go tsebiša morutiši gore batswadi ba lebeletše boitshwaro bjo bo swanetšego bja Bokriste go bana ba bona, le gore ge e ba bana ba itshwara gampe, ruri ba nyaka gore ba tsebišwe. Le gona, batswadi ba swanetše go holofetša gore ba tla thekga morutiši mabapi le tayo lege e le efe e swanetšego yeo e fiwago, gaešita le go e šomiša le ka gae.

Ditsela tše dingwe tšeo ka tšona batswadi ba ka thušago: Kgonthišang gore bana ba hwetša sefihlolo se sebotse pele ga ge ba e-ya sekolong. Bonang gore modiro wa bona wa sekolo wo o dirwago gae o dirilwe le gore ba tšere dipuku tšohle tša bona. Ka mehla le bontšhe tlhompho ya go hlompha melao ya sekolo gomme le lebelele gore le bana ba e hlomphe. Dirang gore bana ge ba le gae ba bolele ka mediro ya sekolo le ka mathata lege e le afe ao ba thulanago le ona moo.

Ka pukung ya yona ya Helping Children Make Career Plans: Tips for Parents, Kgoro ya tša Maphelo, Thuto le Katlego ya U.S. e botša batswadi kamoo ba ka tutueletšago bana ba bona go ithuta, ka gore: “Thušang ngwana wa lena go kwešiša kamoo modiro wa gagwe wa sekolo o tlago go ba bohlokwa ka gona ka morago ge a dira diphetho mabapi le modiro. Ba bontšheng kamoo dithuto tše bjalo ka go bala, dipalo le dipoledišano di dirišwago ka gona moo e nyakilego go ba medirong yohle. Ka bokopana, ba thušeng go kwešiša gore go na le mabaka a oketšegilego a bohlokwa bakeng sa go ya sekolong go e-na le go fo ya sekolong.”

Re holofela e le ka kgonthe gore tsebišo ye e lego ka pukwaneng ye e tla thuša go tliša tirišano e thabišago magareng ga balaodi ba sekolo le malapa a Dihlatse tša Jehofa.

[Seswantšho go letlakala 30]

Batswadi ba Dihlatse ba kgothaletšwa gore ba tlwaelane le barutiši ba bana ba bona

[Seswantšho go letlakala 31]

Batswadi ba na le boikarabelo bjo bogolo bja go ruta bana ba bona