Dikahlolo tša Modimo di Swanetše go Bolelwa
“O tsoxê, O ba botšê tšohle tše ke tl’o xo Xo laêla tšôna. O se kê wa ba thšoxa.”—JEREMIA 1:17.
1. Dihlatse tša Jehofa di ile tša dira bjang gore ‘seetša sa bona se bonege’ kua Jeremane ya Nazi?
“TLAIŠO ya Dihlatse tša Jehofa Mmušong wa Tshenyo [Nazi Germany] e ile ya diragala magareng ga mehla e mengwe ya teko historing ya bona.” (Holocaust Studies Annual, Volume II—The Churches’ Response to the Holocaust) Daily News ya Afrika Borwa ya July 15, 1939, le yona e boletše ka Dihlatse tša Jeremane: “Go swana le seetša seo se sa fsifalego, sehlotswana se se senyenyane sa banna le basadi ba Bakriste se ile sa ema se tiile tumelong ya sona, e lego seo se bego se tshwenya Mmuši wa Munich [Adolf Hitler] e bile e le bohlatse bjo phelago bja gore e fo ba motho feela yo a hwago.” Mantšu a a re gopotša gore Jesu o ile a bolela gore balatedi ba gagwe ba be ba tla ba “seetša sa lefase” gomme ba be ba tla dira gore seetša sa bona se bonege pele ga lefase, go sa šetšwe boemo.—Mateo 5:11, 12, 14-16.
2, 3. Ke mohlala ofe wa boboledi bja go se boife woo o ilego wa direga kua Sri Lanka?
2 Pego e nngwe e tšwago nageng yeo e hlagaditšwego ke botšhošetši ya Sri Lanka, e laodiša ka Hlatse ya mofsa ya Tamil, David Gunaratnam, yoo ka mokgwa wa kgonthe wa Jeremia, a ilego a bolela ka go se boife go balaodi ba madira. O be a dikologilwe ke masogana a mangwe gore ba mmotšiše. Pego e bolela gore: “Bahlankedi le banna ba ba be ba makaditšwe kudu ke go rutega ga monna yo, gomme go feta moo, le ke go botega ga gagwe mo go lego molaleng kudu-kudu ge a be a re, ‘Ge e ba ke be ke tla gahlana lege e le mang wa batšhošetši, ke be ke tla bolela taba ye e swanago go bona.’”
3 Bošegong bjona bjoo o ile a utswa ke batšhošetši legaeng la gabo, e lego bao ba ilego ba mmea molato wa go dirišana le madira. O ile a kgomarela boemagare bja gagwe gomme a re o bolela feela ka molaetša wa Mmušo wa Modimo. “Ke dira modiro wa Modimo gomme ke tla tšwela pele ke o dira. Ke bolela ka go se hlaole le o mongwe le o mongwe yo a tlago theetša.” Hlatse ye e nago le sebete e ile ya thunywa gomme ya bolawa ke batšhošetši, gomme ya tlogela mohlologadi yo mofsa le ngwana wa mošemane.—Bapiša le Ditiro 7:51-60.
4. Ke tlaišo efe yeo e ilego ya amogelwa ke baruti ya go tlaišwa ga Dihlatse tša Jehofa yeo e ilego ya direga lefelong la Latin America?
4 Go tšwa nageng ya Latin America moo go tlaišwa ga Dihlatse tša Jehofa go ilego gwa amogelwa le go godišwa ke baruti ba bangwe ba Makatholika le ma-Presbyterian, re amogetše pego ye: “Go be go e-na le Dihlatse tša Jehofa tše hlano sebong sa madira . . . Ba be ba bethwa leboelela gomme ba dudišwa ba nnoši ba se na dijo. Mohlankedi wa bopolitiki yo a ikarabelelago ka go tlwaetša karolong ya rena o ile a ba otla ka gobane ba be ba bolela go madira a mangwe. O boletše gore go baganetši ka moka ba bodumedi Dihlatse tša Jehofa e be e le bona ba kotsi kudu.”
Tlhohleletšo le Boitshwaro
5. Ka go swana le tabeng ya Jeremia, ke’ng seo gantši se hlohleletšago go tlaišwa ga Dihlatse?
5 Ee, bjalo ka ge Jeremia a be a tlaišwa ke babuši ba bodumedi le ba bopolitiki ba mehleng ya gagwe, ka mo go swanago Dihlatse tša Jehofa di lebeletšane le kganetšo lefaseng ka bophara go tšwa methopong e swanago. Ke’ng seo se hlohleletšago ditiro tše? Gaešita lege Dihlatse e le sehlopha seo se nago le khutšo e bile e le seo se obamelago molao kudu sa setšhaba lege e le sefe, fela manaba a bona a lebelela Lentšu la Modimo le le kotsi, ka gobane a hloile e bile ga a nyake molaetša wa lona wo o lego mabapi le Mmušo wa Modimo. Boboledi bja bona bja go se kwanantšhe le melao ya bona ya motheo di pepentšha boithati le go se botege ga ditho tša dihlopha tša bopolitiki, tša papatšo le tša bodumedi tša tshepedišo ya Sathane.—Johane 15:18, 19; 1 Johane 5:19.
6. Dihlatse tša Jehofa di ile tša itshwara bjang ge di tlaišwa?
6 Eupja go sa šetšwe go golegwa, go bethwa, gaešita le lehu ruri Dihlatse tša Jehofa lefaseng ka bophara di ile tša itshwara bjalo ka Jeremia wa bogologolo. Mola ba bontšha lerato le bohlale, ba tšwela pele ba bolela dikahlolo tša Modimo tše sa ratwego ditšhabeng. (2 Timotheo 2:23-26) Ba tseba gore ba swanetše go kwa Modimo e le Mmuši go e na le batho. (Ditiro 4:19, 20; 5:29) Ba ela hloko keletšo ya Paulo go Bakriste ba ba-Hebere, e lego ya go se fele pelo ge ba dira thato ya Modimo. Ka gona ba tla bona phethagatšo ya kholofetšo, e lego bophelo bjo sa felego. Ka gona ka go swana le Paulo le Jeremia re swanetše go kgona go bolela gore: “Xomme rena xa re ba xo xomêla moraxo le xo y’o lahlwa; re ba tumêlô ya xo y’o rua bophelô.”—Ba-Hebere 10:35-39.
Jeremia wa Mehleng Yeno o Pepentšha Bojakane
7. Dihlatse lekgolong la nywaga la bo-20 di ile tša latela bjang mohlala wa baporofeta ba Jehofa ba botegago bao ba bego ba romilwe go Isiraele le Juda?
7 Bjalo ka ge Jehofa a ile a tšwela pele a roma baporofeta ba gagwe go Isiraele le Juda, ruri o romile dihlatse tša gagwe gore ba tšwetše pele molaetša wa kahlolo ya gagwe e tlago. (Jeremia 7:25, 26; 25:4, 8, 9) Kudu-kudu ga e sa le go tloga ngwageng wa go matlafatšwa moyeng e lego 1919, mašaledi a tloditšwego a banababo Kriste ka go se boife a ile a bolela dikahlolo tša Modimo, e lego melaetša e matla ya bošula go Bojakane. (Bapiša le Jeremia 11:9-13.) Ngwageng woo makasine wa The Golden Age o ile wa tsebišwa. Ka morago ga nywaga e mentšinyana le ka maina a wona a fetotšwego, Consolation (1937) gomme Awake! (1946), o ile wa thuša go pepentšha maaka a bodumedi bja Bojakane le Bokriste bja bjona bja boikaketši.
8, 9. (a) Ke ka baka la’ng dikereke di ile tša ntšhwa phošo phatlalatša ka 1922? (b) Ke bošula bofe bjoo bo ilego bja bolelwa e sa le pele bakeng sa bona?
8 Ka mohlala, Golden Age ya October 11, 1922, e ile ya bolela phatlalatša phošo ya bodumedi bja maaka ka mantšu a: “Boiteko ka moka bja mekgatlo ya dikereke, baruti ba tšona, baetapele ba tšona le bagwera ba tšona, a go phološa le go tsošološa tshepedišo ya dilo lefaseng . . . a swanetše go palelwa, ka gobane ga a bope karolo lege e le efe ya mmušo wa Mesia. Ka mo go fapanego nakong ya Ntwa ya [I] ya Lefase baruti ba dikereke tša maina a fapa-fapanego ba be ba sa botegele Morena Jesu Kriste go se, mo e lego gore ba ile ba kopana ka mo go fošagetšego le papatšo le bo-ra-dipolitiki ba bagolo go tšwetša pele Ntwa ya Lefase.”
9 Kgalemelo e ile ya tšwela pele ka gore: “Go feta moo ba ile ba latola Morena le mmušo wa gagwe gomme ba bontšha go se botege ga bona ka go ikopanya ka boithatelo le phuthego ya Sathane gomme ba tsebatša ka sebete lefaseng gore Kgwerano ya Ditšhaba ke pontšho ya bopolitiki ya mmušo wa Modimo mo lefaseng.” Mafelelong go ile gwa tla molaetša wa “bošula,” goba kahlolo: “Ka go ya ka mantšu a Kriste Jesu bjale go batametše nako e kgolo le yeo e e lego kgaufsi le go wela godimo ga ditšhaba tša lefase ya ‘masetla-pelo ao a sešogo a bonwa go tloga mathomong a lefase go fihlela mehleng ye le ao a ka se kego a ba gona le ka mohla.’”
10. Ke go ntšhwa phošo gofe ga phatlalatša mo go ilego gwa dirwa ka 1926?
10 Karolo ya Jeremia e ile ya katološwa ka go dirišwa ga dipuku tše dingwe, tše bjalo ka makasine wa Morokami, dipukwana, le dipuku. Ka mohlala, ka 1926 puku ya Deliverance e ile ya akaretša go pepentšhwa mo go matla ga dithuto tše fapošago tša Bojakane. Letlakaleng la 203 e bolela gore: “Dithuto tša maaka di be di tsenywa ka bolokologi [Bojakaneng bja bohlanogi] gomme tša tšea sebaka sa therešo. Magareng ga tše go bile le dithuto tša boraro botee, go se hwe ga meoya [souls] ka moka, tlhokofatšo ya ka mo go sa felego ya ba babe, tshwanelo e neilwego ke Modimo ya go ba baruti le tshwanelo e neilwego ke Modimo go dikgoši ya gore di buše. Ge nako e dutše e e-ya Maria mmago ngwana Jesu, o ile a dirwa modimo; gomme batho ba ile ba bitšwa gore ba tle ba mo rapele e le mmago Modimo.”
Bojakane bjo bo Aroganyago bo Lemošitšwe
11, 12. (a) Boemo bja go tšea lehlakore bja baruti bo ile bja pepentšhwa bjang? (b) Ke temošo efe yeo e ilego ya newa ke sehlopha sa Jeremia?
11 Puku yona yeo e ile ya pepentšha go ba le karolo ga baruti dintweng, ka gore: “Baruti ba ditshepedišo tše tše di fapa-fapanego tša dikereke ba šegofatša madira ao a romilwego ke dihlopha tša tša kgwebo le tša dipolitiki gomme tšhegofatšo ya bona e ile ya newa go sa šetšwe gore madira a a lwela lehlakore lefe. Baruti ba ka moka ba ipolela ba rapela Modimo o tee bakeng sa tšhegofatšo go madira ao a lwago a mahlakore ka bobedi.” (Bapiša le Jeremia 7:31.) Ka morago kahlolo e batamelago e ile ya bolelwa ka go lebanya: “Dihlopha tše ka moka tšeo di yago go bopa karolo e bonagalago ya phuthego ya Sathane di kgobokeletšwa ntwa e kgolo ya Haramagedone.”—Kutollo 16:14-16.
12 Go swana le mehleng ya Jeremia, nakong ya ge baetapele ba ipolela gore ba khutšong le Modimo, “ka gona baetapele ba ba dikereke ba ile ba ipotša gore ba bolokegile, le gore ba swanetše feela go ipitša ka leina la Kriste, ge ba dutše ba tšwela pele ba bapala ka mollo wa Diabolo. Ba iphoufaletša boemo bja kgonthe ka go tšhela mmu mahlong a bona ka noši gotee le ka mahlong a magagabo bona.” (Deliverance, letlakala 270) Boikaketši bja bona bo ile bja pepentšhwa ke Barutwana bao ba mafolofolo ba Beibele, ka ge Dihlatse tša Jehofa di be di tsebja bjalo.—Mateo 7:21-23.
13. Ke tiragalo efe yeo e ilego ya direga ka 1931, gomme ke ka baka la’ng e be e swanetše?
13 Ge nako e dutše e e-ya, go ile gwa kwešišega gabotse kudu gore Barutwana ba Beibele ba swana le Jeremia, ge ka 1931 kopanong kua Columbus, Ohio, U.S.A., go be go tsebišwa gore leina la Beibele la sehlopha se se nago le sebete sa Bakriste e swanetše go ba “Dihlatse tša Jehofa.” (Jesaya 43:10-12) Leina leo le be le ile la utollwa lekgolong la nywaga la boseswai Pele ga Mehla ya Rena nakong ya ge Jehofa a be a le diriša go Isiraele. Ka gona, mo e ka bago nywaga e lekgolo ka morago, nakong ya ge Jeremia a be a dira e le moporofeta, le yena e be e le hlatse ya Jehofa. (Jeremia 16:21) Ka mo go swanago, nakong ya ge Jesu a be a e-tla lefaseng e le mo-Juda, e be e le hlatse ya Tatagwe, Jehofa. (Johane 17:25, 26; Kutollo 1:5; 3:14) Ka gona, e be e le mo go swanetšego gore nakong e swanetšego ya Modimo, batho ba gagwe mafelelong ba be ba tla swanelegela leina le le le kgethilwego ke Modimo, e lego “Dihlatse tša Jehofa.”—Johane 17:6, 11, 12.
Bojakane bo Ile bja Pepentšhwa
14. Bojakane bo ile bja pepentšhwa bjang nywageng e fetago 70 e fetilego?
14 Ka nywaga e fetago e masome-šupa e fetilego, ka go dumelelana le go goeletšwa ga kholofelo ya letago ya Mmušo o tlago wa Jehofa, ruri Dihlatse tša Jehofa di ile tša phatlalatša lefaseng ka moka lefula la kgonthe la kgalemelo le kahlolo. Ka makgolo a dimilione a dipuku tše theilwego Beibeleng tše opago kgomo lenaka ba utolotše Bojakane e le tutuetšo e matla kudu go seotswa sa bodumedi, “Babele o Moxolo,” yeo e ilego ya solwa go Kutolla dikgaolo 17 le 18. (Bona “Babylon the Great Has Fallen!” God’s Kingdom Rules!, matlakala 576-615, e gatišitšwego ka 1963 ke Watchtower Bible and Tract Society of New York, Inc.)
15. Bojakane bo ile bja pepentšhwa bjang ka 1955?
15 Ka 1955 Dihlatse tša Jehofa di ile tša aba dikopi tše dimilione tša pukwana ya Christendom or Christianity—Which One Is “the Light of the World”? Tše dikete-kete di ile tša abelwa baruti ba Bojakane ka go lebanya. Pukwana yeo e ile ya ba botša’ng? Ka mokgwa wa kgonthe wa Jeremia, e boletše gore: “Go sa šetšwe mehola ka moka yeo e ilego ya bo phagamiša go tša boiphedišo, bohlaleng le go tša bohlabani, Bojakane ga se bja ka bja ipontšha e le ‘seetša sa lefase.’ Ka baka la’ng? . . . Ga bo bolele goba go diriša Bokriste [bja Beibele].” Ka gona bo rotošitše potšišo: “Na go pepentšhwa ga bodumedi bja maaka ke tlaišo ya go tlaiša bakgomaredi ba bjona? Na ke go beba sefahlego mo e sego ga Bokriste?”
16. Na e be e le go beba sefahlego ge Dihlatse di pepentšha Bojakane? Hlalosa.
16 Karabo e bile: “Aowa; go sego bjalo Jesu Kriste e be e le motlaiši yo a bebago sefahlego wa ba-Juda, . . . le baporofeta ka moka ba Jehofa ba mehleng ya bogologolo [go akaretša le Jeremia] pele ga Jesu e be e le batlaiši le bao ba bebago sefahlego, ka gobane ka moka ga bona ba ile ba pepentšha bodumedi bja maaka bja ba-Juda ba bahlanogi le bja ditšhaba tša baheitene.” Ka kgonthe, ge e ba Bakriste ba therešo e tla ba “seetša sa lefase,” gona “lefsifsi” la moya le swanetše go pepentšhwa. (2 Ba-Korinthe 6:14-17) Se ga se bolele gore batho ka o tee ka o tee ba a hlaselwa, eupja go e na le moo go hlaselwa tshepedišo yeo e ba dirago bahlanka. Ka gona, Jehofa o ile a nea Jeremia taelo: “’Me wena itlamê letheka O tsoxê, O ba botšê tšohle tše ke tl’o xo Xo laêla tšôna. O se kê wa ba thšoxa, . . . Le xe ba tlo lwa naxo’, ba ka se Xo kxonê, xobane e a lexo le wene ké Nna, xore ke Xo hlakodišê. Ó r’yalo Morêna.”—Jeremia 1:17, 19.
Modiro wa Jeremia o ya Phethegong ya Wona
17, 18. (a) Dihlatse tša Jehofa di ile tša tšwetša pele bjang modiro wa bona wa Jeremia nywageng ya morago bjale? (b) Ke keletšo efe yeo e ilego ya newa ba dipelo tše botegago?
17 Na Dihlatse tša Jehofa di ile tša nolofatša kahlolo ya Modimo? Ke therešo gore re phela nywageng yeo ka yona go ntšha diphošo tša bodumedi bjo bongwe go sa lebelelwego e le selo seo se swanetšego go dirwa. Lega go le bjalo, dipuku tša Dihlatse tša Jehofa di tšweletša melaetša e swanago ya kahlolo bakeng sa Bojakane ka mehla. Ka mohlala, nywageng e mene e fetilego Dihlatse tša Jehofa di ile tša gatiša dikopi tše dimilione tše 32 tša puku ya O ka Phela ka mo go sa Felego Paradeiseng mo Lefaseng, ka maleme a 76. Puku ye e nea dikarabo tša dipotšišo tšeo di botšišwago mehleng yeno, bjalo ka “Go Direga’ng Lehung?” “Ke ka Baka La’ng Modimo a Dumeletše Bokgopo?” le “Go Hlaola Bodumedi bja go Rereša.” Eupja le gona e nea temošo e kwalago mabapi le mmušo wa lefase wa bodumedi bja maaka.
18 Ka go kgaolo 25, yeo e nago le sehlogo se se rego “Na o wa Lefase la Sathane, Goba o wa Tshepedišo e Mpsha ya Modimo?” e bolela gore: “Bodumedi bja maaka ka Beibeleng bo swantšhwa e le ‘seotswa se sexolo’ se se bitšwago ka leina la ‘Babele o Moxolo.’ . . . Ke taba ye e tsebjago ka kudu ya gore historing yohle bodumedi bo ile bja dula bo itswakanya le dipolitiki, gantši bo botša mebušo seo e swanetšego go se dira.” Ka gona ke mogato ofe wo puku yeo e o kgothaletšago? E a botšiša: “Na o rata go ba wa lefase la Sathane? Goba na o wa tshepedišo e mpsha ya Modimo? Ge e ba o le wa tshepedišo e mpsha ya Modimo, gona o swanetše go ikarola lefaseng go akaretša le bodumedi bja lona bja maaka. O tla kwa taelo e rego: ‘Khuduxang! [go Babele o Mogolo], lena ba sethšaba sa-ka.’ (Kutollo 18:4)”
19. O ka bontšha bjang gore lentšu la Jeremia wa mehleng yeno ga se la homotšwa nakong ye ya morago?
19 Melaetša ye e swanago e matla ya go arola le go ahlola e kwala gabotse pukung ya Polokego ya Lefase ka Bophara Tlase ga ‘Kgoši ya Khutšo,’ yeo e gatišitšwego ka 1986 (dikopi tše dimilione tše tshelelago ka maleme a 25). E pepentšha baruti ba Bojakane bakeng sa ‘go tutuetša masogana gore a ye mapatlelong a ntwa’ a Ntwa ya I ya Lefase. E tšwela pele ka gore: “Bojakane bo tšwetše pele e le lenaba la Modimo Yo Godimo-dimo go fihlela le gona mo nakong ye. Ge e le gabotse, ga bo šireletšwe ke Modimo gomme ka lona lebaka le le bohlokwa, ga se bja bolokega.” (Bala matlakala 30-2.) Lentšu la Jeremia wa mehleng yeno ga le a homotšwa! Mola maiteko a dirwa ke baruti le bo-ra-dipolitiki go thibela boboledi bja dikahlolo tša Modimo, dihlatse tša gagwe tše botegago di tšwela pele di ikemišeditše go phetha modiro wa go lemoša.—Jeremia 18:18.
20. Ke ka baka la’ng Dihlatse tša Jehofa di tla tšwela pele go tsebatša dikahlolo tša Jehofa go ditšhaba?
20 Ke ka baka la’ng modiro wo o swanetše go phethwa? Ka gobane Jehofa Morena yo a Phagamego yo a phelago wa legohle, o na le tsheko le ditšhaba le bodumedi bja tšona. Go swana le ge Jehofa a ile a kgopela Juda le Jerusalema tša bofora, ka gona potšišo ye e dira ka mo go lekanago go Bojakane lehono: “A nka lesa xo lefetša dilô tšeo? O r’yalo Morêna. Sethšaba sa mohuta woo a pelo ya-ka e ka lesa xo se ôtla?” Ka gona Dihlatse tša Jehofa di tla tšwela pele go etela batho ba ditšhaba ka melaetša yeo e hlabago ba bantši e le kahlolo e sa ratwego eupja ke ditaba tše di lokilego tše thabišago go ba bantši, e lego ditaba tše di lokilego tša Mmušo wa Modimo.—Jeremia 5:9, 29; 9:9; Ditiro 8:4, 12.
21. Go sa šetšwe kotsi yeo e boletšwego e sa le pele, ke kholofelo efe e kgolo yeo e lego ka pele ga bao ba elago modiro wa Jeremia hloko? (Psalme 37:9, 11, 18, 19, 28, 29)
21 Mola Jeremia gantši a ile a bitšwa mohlabi wa mokgoši wa bošula, eupja e bile ke therešo gore melaetša ya gagwe e ile ya tšweletša mahlasedi a kholofelo go ba-Juda. (Jeremia 23:5, 6; 31:16, 17) Ka tsela e swanago, mola Dihlatse tša Jehofa di tsebatša ‘masetla-pelo a magolo,’ ao a batamelago ka kahlolo ya Modimo ya Haramagedone, ba bile ba goeletša le ditšhegofatšo tša “maxodimo a mafsa le lefase le lefsa” tšeo di tlago go feleletša ka go tsošološwa ga toka le Paradeise polaneteng ye, gotee le bophelo bjo sa felego. (Mateo 24:21, 22; Kutollo 16:16; 21:1-4) Ka gona, bjale ke nako ya go ela hloko melaetša ya Jehofa ya kahlolo le go thekga go phethwa ga modiro o mogolo wa Jeremia.—Bapiša le Jeremia 38:7-13.
Na o a Gopola?
◻ Ka go swana le Jeremia Dihlatse tša Jehofa di tlaišwa bjang?
◻ Ke ka baka la’ng Dihlatse di phegelela boboleding?
◻ Modiro wa Jeremia o ile wa katološwa bjang?
◻ Ke mehlala efe ya morago bjale yeo e bontšhago gore tsholo ga se ya ka ya fetoga?
◻ Go sa šetšwe melaetša ya bošula, ke kholofelo efe gape yeo e phagamišwago?
[Seswantšho go letlakala 23]
Ge nako e dutše e e-ya, Maria o ile a dirwa modimo gomme batho ba ile ba bitšwa gore ba tle ba mo rapele e le “Mmago Modimo”
[Seswantšho go letlakala 24]
Ka 1931 Barutwana ba Beibele ba ile ba amogela leina “Dihlatse tša Jehofa” kopanong ya bona kua Columbus, Ohio
[Pictures on page 25]
Dihlatse tša Jehofa lefaseng ka bophara di latela mohlala wa Jeremia