Boboledi—Tokelo e Hlomphegago
1 Bodiredi bja ditaba tše di lokilego ke tokelo e hlomphegago yeo Jehofa a re neilego yona. (Ba-Roma 15:16; 1 Tim. 1:12) Na ke tsela yeo o bo lebelelago ka yona? Go feta ga nako le dikwero tša ba bangwe ga se tša swanela go dumelelwa di fokotša bohlokwa bja bjona go ya kamoo re bo lebelelago ka gona. Go rwala leina la Modimo ke tlhompho e neilwego ba sego kae feela. Re ka godiša bjang tebogo ya rena ya go leboga tokelo ye?
2 Go bolela ka molaetša wa Mmušo ga go re dire gore re ratwe ke lefase. Ba bantši ba lebelela modiro wa rena ka go se šetše goba ka go o hlokomologa. Ba bangwe ba a o nyefola le go o ganetša. Kganetšo e bjalo e ka tšwa go ba o šomago le bona, baagišani goba gaešita le go ditho tša lapa. Mahlong a bona re ka bonala re le ba ba arošitšwego, e bile re le mašilo. (Joh. 15:19; 1 Ba-Kor. 1:18, 21; 2 Tim. 3:12) Dipolelo tša bona tše di nyamišago di rulaganyeditšwe go fokodiša phišego ya rena le go re dira gore re nyame goba go re tlogediša tokelo ya rena e hlomphegago. Dikgopolo tše di fošagetšego di tšweletšwa ke Sathane yo a “foufaditšexo dipelo tša [ba ba sa dumelexo], xore ba se bônêxêlwê ke lebônê la Ebangedi.” (2 Ba-Kor. 4:4) O arabela bjang?
3 Ke gabohlokwa go dula re gopola gore go bolela ga rena ka Mmušo ke modiro o bohlokwa kudu wo yo mongwe le yo mongwe wa rena a ka o dirago lehono. Re na le molaetša o phološago bophelo woo o sa hwetšagalego ka ditsela tše dingwe. (Ba-Roma 10:13-15) Selo sa bohlokwa ke go hwetša kamogelo ya Modimo e sego ya batho. Kgopolo e fošagetšego ya lefase mabapi le modiro wa rena wa boboledi ga e re thibele go bolela ditaba tše di lokilego ka sebete.—Dit. 4:29.
4 Jesu o ile a hlompha tokelo ya gagwe ya go dira thato ya Tatagwe kudu. (Joh. 4:34) O ile a ineela ka mo go feletšego bodireding gomme a se dumelele ditšhitišo goba baganetši ba mo nyamiša. Ka mehla go bolela ka molaetša wa Mmušo go be go e-tla pele bophelong bja gagwe. (Luka 4:43) Re laelwa gore re ekiše mohlala wa gagwe. (1 Pet. 2:21) Ka go dira bjalo, re hlankela re le “badirišani ba Modimo.” (1 Ba-Kor. 3:9) Na re diriša ka mo go tletšego tokelo ye? Na re tsoma dibaka tša go abelana le ba bangwe ditaba tše di lokilego bobedi ka tsela e rulaganyeditšwego le e sa rulaganyetšwago? Bjalo ka Dihlatse tša Jehofa, ka mehla re swanetše go ikemišetša go “bolela leina la gagwe phatlalatša.”—Ba-Heb. 13:15, NW.
5 Go tšea ga rena karolo bodireding go bontšhwa kudu ke boemo bja kgopolo ya rena. Na re leboga ka mo go tseneletšego sohle seo Jehofa a re diretšego sona? Na re godišitše ka dipelong tša rena lerato la go rata Jehofa leo le re tutueletšago go dira sohle se re ka se kgonago tirelong ya gagwe? Go naganišiša ka ditšhegofatšo tšeo re di hwetšago gona bjale gotee le tšeo Jehofa a di holofeditšego bakeng sa nako e tlago go re thuša gore re be le lerato le le falalago go Mmopi wa rena. Lerato le bjalo le re tutueletša go gata mogato—go phegelela le go ba gona ka mehla modirong wa go bolela ka Mmušo go fihla moo maemo a rena a re dumelelago gona. Phišego ya rena e tla hlatsela lerato la rena go Jehofa le go baagišani ba rena.—Mar. 12:30, 31.
6 Re bontšha kamoo re semago selo se sengwe go ba sa bohlokwa kudu ka go dira se sengwe le go bolela se sengwe ka sona. Na ruri re sema tokelo ya rena ya go bolela ka Mmušo e le ya bohlokwa? Na re godiša bodiredi bja rena? Na re ikemišeditše go kgotlelela modirong wo wa bohlokwa go sa šetšwe kganetšo? Ge e ba re hlompha kudu tokelo ye e botse, ruri re tla ba mafolofolo le ka pelo ka moka.—2 Ba-Kor. 4:1, 7.