Monei wa “’Neô Tšohle tše Botse”
“Lebakeng le lengwe ke ile ka bitšwa ke moruti wa kereke ya Reformed. O be a nyaka go tseba kamoo ke bego ke swara kereke ya-ka ka gona. Ke ile ka re go yena: . . . ‘Ga go na megolo yeo re e lefago; ga go na selo seo se dirago gore batho ba ngongorege. Ga re na koleke.’ O botšišitše ka gore, ‘Le hwetša bjang tšhelete?’ Ke ile ka araba ka gore, ‘Bjale, Dr.——, ge ke go botša seo e lego therešo e bonolo kudu o ka se e dumele le gatee. Ge batho ba kgahlegela tsela ye, ga ba hwetše seroto se sepedišwa pele ga bona. Eupja ba a bona gore go na le ditshenyagalelo. Ba ipotša ka noši gore, “Holo ye e bitša se sengwe. . . . Nka neela bjang tšhelete go se?”’ O ile a ntebelela bjalo ka ge eka o be a nagana gore, ‘O nagana gore ke eng—ke mohloka-temogo?’ Ke itše, ‘Bjale, Dr.——, ke go botša seo e lego therešo. . . . Ge motho a hwetša tšhegofatšo gomme a na le matlotlo lege e le afe, o nyaka go a dirišetša go Morena. Ge e ba a se na sa gagwe, ke ka baka la’ng re swanetše go mo gapeletša seo?’”
—Charles T. Russell, mopresidente wa pele wa Mokgatlo wa Watch Tower, “The Watch Tower” ya July 15, 1915.
RE NEA ka gobane Jehofa Modimo e bile wa pele wa go nea. Go nea ga gagwe go thomile nywageng e dimilione tše dikete tše sa balegego e fetilego ka tlholo—tlholo ya gagwe ya pele, e lego ‘Morwa yo a tswetšwego a nnoši.’ (Johane 3:16) Ka lerato, o neile mpho ya bophelo go ba bangwe.
Morwa wa Modimo, Jesu Kriste, ke mpho e kgolo kudu ya Jehofa go rena. Eupja Morwa wa Modimo ka noši ga se pheletšo ya go nea ga Modimo. “Kgaugelo e kgolo ya Modimo” ke yeo moapostola Paulo a e bitšago “neo e sa bolelwego” ya Jehofa. (2 Ba-Korinthe 9:14, 15, PK) Neo ye ka mo go kwagalago e akaretša palo-moka ya go loka le botho bjo lerato ka moka tšeo Modimo a di fetišetšago go batho ba gagwe ka Jesu. Botho bjo bjalo bjo sa swanelago ke bjo bo makatšago kudu mo e lego gore bo phagametše matla a motho a go hlalosa goba go bolela. Lega go le bjalo, go sa dutše go e-na le mo go oketšegilego ka go nea ga Modimo.
Nako e telele e fetilego, kgoši e ile ya amogela ka bohlale le ka boipoetšo gore dilo lege e le dife tše botse tšeo e bego e di neetše bjalo ka dimpho ge e le gabotse e be e le tša Jehofa. O itše: “Xobane tšohle kwa lexodimong le mo lefaseng ké tša xaxo; O mmuši, O hlôxô ye e iphaxamišitšexo xodimo xa tšohle. . . . Xobane ké nna mang, xomme sethšaba sa-ka ké eng? Re fo kxanthša matla rè ithapa rè nthša dilô tšé, mola di tšwile xo Wene tšohle, rè Xo nthšeditše tšohle di tšwaxo ’atleng sa xaxo.”—1 Koronika 29:11-14.
Mohlala wa Modimo
Jakobo, morutiwa wa Jesu Kriste, o be a tseba gore Jehofa Modimo ke mothopo wa selo lege e le sefe se se lokilego ka mo go feletšego. Ke feela dimpho tše phethagetšego tšeo di tšwago go yena. Jakobo o ngwadile gore: “’Neô tšohle tše botse, le ’mphô tšôhle di tletšexo, di tšwa xodimo xo Ra-dietša, yo xo Yêna xo se naxo phetoxô le xo dikoloxa xa meriti.”—Jakobo 1:17.
Gaešita le tabeng ya go nea dimpho, Jakobo o bone kamoo Modimo a fapanego le batho ka gona. Batho ba ka kgona go nea dimpho tše botse, eupja ga se ka mehla ba dirago bjalo. Dimpho tše di ka newa ka lebaka la boithati goba tša dirišetšwa go leka motho gore a dire selo se sengwe se sebe. Go Jehofa ga go na go feto-fetoga; ga a fetoge. Ka baka leo, mohuta wa dimpho tša gagwe ga o fetoge. Di dula e le tše hlwekilego. Ka mehla di godiša katlego le lethabo la batho. Ka mehla ke tše botho le tše holago, le ka mohla ga di gobatše.
Mabaka Bakeng sa go Nea Dimpho
Mehleng ya Jakobo, baetapele ba tumilego ba bodumedi ba ile ba nea dimpho e le feela gore ba bonwe ke batho. Ba be ba nea ka tutuetšo e fošagetšego. Ka go fišegela go tumišwa ke batho, ba ile ba kwanantšha ditekanyetšo tša bona tša go loka. Lega go le bjalo, Bakriste ba be ba swanetše go ba ba fapanego. Jesu o ba eleditše ka gore: “Xe o dira tša kxauxêlô, O se iteletšê phalafala bo-ka baikaketši xe ba dira diphuthexong le mekxotheng, è le xore ba rêtwê ke batho. Ruri ke a Le botša, ke xôna xe ba tšere moputsô wa bôná. Wêna, xe o dira tša kxauxêlô, seatla sa xaxo se sethsadi se se kê sa tseba tše di dirwaxo ke se setona. Xore ya xaxo kxauxêlô e dulê è utamê; ké mo Tat’axo Yêna mošetša-phihlô à tl’o xo Xo bušetša ka tše di bônalaxo.”—Mateo 6:2-4.
Lebaka la Mokriste la go nea dimpho ke go thuša ba bangwe go kgotsofatša senyakwa goba go ba thabiša goba go tšwetša pele borapedi bja therešo. Ga se bakeng sa go ikgodiša. Go ba gona, mahlo a Jehofa a ka phuleletša karolong ya ka gare-gare ya dipelo tša rena. O kgona go bona tutuetšo ya ka gare-gare yeo e tutuetšago go nea ga rena dimpho tša kgaugelo.
Dihlatse tša Jehofa di katanela go latela mohlala wa Jehofa le wa Morwa wa gagwe wa go nea dimpho. Di neela ka seo di nago le sona. Di na le ditaba tše di lokilego tša Mmušo, gomme di nea se bakeng sa tšhegofatšo ya ba bangwe. Di tseba gore Diema 3:9 e re: “Loba Morêna ka khumô ya xaxo, le ka di-thaka-ngwaxa tša punô ya xaxo ka moka.” Ka ge ofisi e nngwe le e nngwe ya lekala, phuthego le motho ka o tee ka o tee a tsoma ka potego go tlaleletša katlegong ya bohle, borwarre ka moka bo dirwa bjo matlafetšego moyeng le bjo atlegago. Katlego ya dilo tše di bonagalago ga e lebiše katlegong ya moya, eupja katlego ya moya e tliša katlego e lekanego ya dilo tše bonagalago bakeng sa dinyakwa tša modiro wa Jehofa.
Ditsela tša go ba le Karolo
Go na le ditsela tše dintši tšeo ka tšona yo mongwe le yo mongwe a ka neelago ka tšona e le motho ka noši bakeng sa go thekga ditaba tše di lokilego. Tsela e nngwe ke mabapi le Diholo tša Mmušo. Ditho ka moka tša phuthego di diriša Holo ya Mmušo. Motho yo mongwe o ile a neelana ka tšhelete bakeng sa go agwa ga yona goba bakeng sa rente, mabone, taolo ya thempheretšha le tlhokomelo ya yona. Ka ge go thekgwa ga phuthego ke yo mongwe le yo mongwe e le mo go nyakegago, mapokisi a moneelo a bewa Holong ya Mmušo, gomme meneelo ya boithatelo yeo e amogelwago e dirišetšwa go lefa ditshenyagalelo tša phuthego. Go yeo e šetšego, meneelo e ka neelwa lekaleng la Watch Tower la lefelong, go ya ka phetho ya phuthego.
Meneelo e ka neelwa lekaleng la Mokgatlo ka go lebanya bakeng sa go tlwaetša le go thekga baromiwa le babulamadibogo ba kgethegilego dikarolong tša lefase moo ditaba tše di lokilego di sego tša fihlela batho ka kakaretšo. Ditshenyagalelo tše dingwe go phatlalatšeng ditaba tše di lokilego di gokagane le modiro wa balebeledi ba basepedi. Moapostola Paulo, yo a beilego mohlala modirong wa bosepedi lekgolong la pele la nywaga, o ile a reta phuthego ya Filipi ka gore: “Xa se xa-tee, kè xa-bedi Lè nthomêla tše ke bexo ke di hlôka.” (Ba-Filipi 4:14-16) Ka ntle ga ditshenyagalelo tša dibopego tše tša tirelo ya nako e tletšego, tšeo makala ka moka a nago le tšona, go na le tlhokomelo legaeng le lengwe le le lengwe la Bethele le bao ba dulago le go šoma go lona. Go ngwalwa le go gatišwa ga dipuku tšeo di nago le molaetša o mobotse wa ditaba tše di lokilego ka kgonthe ke ditokelo tšeo di neelwago ke Modimo, eupja go phatlalatšwa ga dipuku le gona go a nyakega, gomme go akaretša ditshenyagalelo. Gape go na le ditshenyagalelo tša dikopano tše nyenyane le tše kgolo, go sa balwe melato ya kgorong ya tsheko yeo e ilego ya lwewa bakeng sa go ‘lwela le go hloma ditaba tše di lokilego ka molao.’—Ba-Filipi 1:7.
Nako yeo e dirišwago ke mohlanka yo mongwe le yo mongwe wa Jehofa go boleleng ditaba tše di lokilego ke ya boithapi, gomme go bjalo le ka go neela ga gagwe ka dilo tše di bonagalago. Go beela ka thoko ka mehla tšhelete yeo e ka dirišwago go thekga go katološwa ga borapedi bja therešo go kgothaletšwa ke moapostola Paulo: “Gomme ge e le dineo tše di kgobelwago bakgethwa, . . . Ka letšatši le lengwe le le lengwe le le thomago beke, e mongwe le e mongwe a bee ga gagwe, mme a kgobele ka mo a filwego lešego ka gona.”—1 Ba-Korinthe 16:1, 2, PK.
Ge motho a ntšha moneelo, ga se ka mehla a tsebago gabotse kamoo o tlago go dirišwa ka gona, eupja o bona mafelelo koketšegong ya boboledi bja Mmušo. Dipego tšeo di lego ka go 1993 Yearbook of Jehovah’s Witnesses di bontšha gore ditaba tše di lokilego tša Mmušo di bolelwa dinageng tše di fetago 200 le dihlakahlakeng tša lewatle ke badiredi ba Bakriste ba fetago 4 500 000. Dipego tše ke tšeo di kgothaletšago. Ka gona mpho e nngwe le e nngwe, go sa šetšwe bogolo bja yona, e thuša go phatlalatšeng ditaba tše di lokilego lefaseng ka bophara.
Modiro wo o thekgwa ke meneelo e kopanego ya bohle. Ba bangwe ba kgona go neela ka mo go oketšegilego, e lego seo se thušago modiro wa boboledi go fihla tekanyong e kgolo. Ba bangwe ba neela go gonyenyane. Eupja bao ba neelago meneelo e menyenyane ga se ba swanela go nyama goba ba ikwa gore kabelo ya bona ke yeo e tlogago e se bohlokwa. Jehofa ka kgonthe ga a ikwe ka tsela yeo. Jesu o ile a hlalosa se ka mo go kwagalago ge a be a bontšha kamoo Jehofa a bego a leboga ka gona tšheletšana e nyenyane ya mohlologadi. “A bôna mosadi wa mohlôlôxadi e a humanexilexo à thšêla dithšêlêtyana tše pedi. A bolêla a re: Ruri, ke a Le botša, mohlôlôxadi yó wa modiitšana ó thšetše se se fetišaxo sa ba bangwê ka moka. Xobane bao ka moka ba ba thšetšexo moo xo yaxo dineô, ba di nthšitše xo tše di ba tlaletšexo; ’me yêna ó nthšitše bohumanexing bya xaxwe, a thšela tšohle tše a bexo a tlo phela ka tšôna.”—Luka 21:2-4.
Go sa šetšwe gore boemo bja rena bja tša ditšhelete bo bjang, re ka neela ka ditsela tšeo di kgahlišago Jehofa. Mopsalme o akaretša gabotse kamoo re ka neago Kgoši le Moahlodi wa rena tumišo. O re: “Lobang ka xo rêta ’ina la Morêna; rwalang dibexô Le tlê malapeng a xaxwe.” (Psalme 96:8) Ka gona, anke re ekišeng mohlala o lerato wa Tatago rena wa legodimong ka go nea ga rena dimpho ka lethabo gobane ke yena a re neilego pele.
[Lepokisi go letlakala 30]
KAMOO BA BANGWE BA NEELAGO KA GONA MODIRONG WA MMUŠO
◻ DIMPHO: Meneelo ya go ithatela e ka romelwa ka go lebanya go Watch Tower Bible and Tract Society of Pennsylvania, 25 Columbia Heights, Brooklyn, New York 11201, goba ofising ya lekala ya Mokgatlo ya lefelo leo. Dilo tša go dirwa ka mafsika a bohlokwa le dilo tše dingwe tša bohlokwa le tšona go ka neelwa ka tšona. Lengwalo le le kopana leo le bolelago gore selo se se bjalo ke moneelo o newago ka go lebanya le swanetše go sepela le meneelo e bjalo.
◻ THULAGANYO YA MENEELO YEO E ITHEKGILEGO KA MAEMO: Tšhelete e ka newa Mokgatlo wa Watch Tower gore e dirišwe ke wona go ba go fihla lehung la monei ka thulaganyo ya gore mabakeng a ge go e-na le tšeo motho a di nyakago, e tla bušetšwa go monei.
◻ PHEMELO: Mokgatlo wa Watch Tower o ka ngwadišwa e le mojalefa wa thulaganyo ya tša phemelo ya bophelo goba thulaganyo ya go rola modiro/phenšene. Mokgatlo o swanetše go tsebišwa ka e nngwe le e nngwe ya dithulaganyo tše bjalo.
◻ DI-STOCK LE DI-BOND: Di-Stock le di-bond di ka neelwa go Mokgatlo wa Watch Tower e le mpho e newago ka go lebanya goba ka tlase ga thulaganyo yeo go yona ditseno di lefšago monei.
◻ DINTLO LE MAFELO AO E LEGO DITHOTO: Dintlo le mafelo ao e lego dithoto tšeo di ka rekišwago di ka neelwa go Mokgatlo wa Watch Tower e le mpho e neelwago ka go lebanya goba ka go boloka thoto e le go monei a dula go yona ge a sa dutše a phela. Motho o swanetše go ikopanya le Mokgatlo pele a fetišetša lefelo goba ntlo yeo e lego thoto ya gagwe go Mokgatlo.
◻ DIKENO: Dithoto goba tšhelete di ka tlogelelwa Watch Tower Bible and Tract Society of Pennsylvania e le lefa ka go dirišwa ga keno e dirilwego go ya ka molao. Kopi e swanetše go romelwa go Mokgatlo.
Bakeng sa tsebišo e oketšegilego le keletšo mabapi le ditaba tše bjalo, ngwalela go Treasurer’s Office, Watch Tower Bible and Tract Society of Pennsylvania, Private Bag X2067, Krugersdorp, 1740, goba ofisi ya lekala ya kgaufsi ya Mokgatlo.
[Pictures on page 31]
Kamoo meneelo ya lena e dirišwago ka gona:
1. Baithapi ba Bethele
2. Go agwa ga ofisi ya lekala
3. Tlhakodišo nakong ya kotsi
4. Diholo tša Mmušo
5. Baromiwa