Bodiredi bja Mehleng Yeno bja Letago ke Lehumo la Rena
“Lehumô leo re le swere ka dibya tša letsopa; xore matla a maxolo e bê a Modimo, e sexo a rena.”—2 BA-KORINTHE 4:7.
1. (a) Ke lehumo lefe la letago leo re ka bago le lona, gomme ka baka la’ng? (b) Beibele e hlalosa bjang go newa ga Molao wa Moše?
BODIREDI bja go bolela “ebangedi yé ya mmušô wa maxodimong” nakong ya bofelo bja tshepedišo ya dilo ruri ke lehumo, ke leruo la bohlokwa-hlokwa. Ka gobane Jehofa ke Modimo wa letago, tirelo ya Gagwe ke bodiredi bja letago, ka go rialo ke lehumo. (Mateo 24:14; 2 Ba-Korinthe 3:18–4:1) Ge e le mabapi le go newa ga letago ga Molao wa Moše, go ngwadilwe go Ekisodo 34:29, 30 gwa thwe: “Mošê xe a foloxa thabeng ya Sinai, xe a boa à swere matlapa ao a melaô, ó be a sa tsebe xore letlalô la sefahloxô sa xaxwe le phadima ka xe a be a bolêla le [Jehofa]. Arone le Ba-Isiraele ka moka xe ba lebêlêla ba bôna letlalô la sefahloxô sa Mošê lè phadima, ’me ba boifa xo mmatamêla.”
2. Tirelo ya Molao wa Moše e ile ya swantšhetša eng e sa le pele, gomme ke ka baka la’ng bodiredi bjo bja bobedi e le bja letago kudu?
2 Ditemana 32 go ya go 34 di tlaleletša ka gore: “Xwa tseb’o batamêla Ba-Isiraele ka moka, a ba anêxêla tšohle tše Morêna a mmoditšexo thabeng ya Sinai. Xe a feditše xo bolêla nabô, a šira sefahloxô sa xaxwe ka lešira. Xomme xe a tlile pele xa sefahloxô sa Morêna xo bolêla naê’, a tloše lešira xo fihla xe a e-tšwa.” Tirelo ye ya Molao wa Moše e swantšheditše bodiredi bja kgwerano e mpsha ka Mmoelanyi, e lego Jesu Kriste. Ka gona, ge e ba bodiredi bja pele e be e le bja letago, gona bja bobedi bjo e lego “botseta bya Môya,” bo swanetše go ba bjo bo fetišago bjola gakaakang ka letago! (2 Ba-Korinthe 3:7-11) Ke bja letago kudu ka gobane bo na le letago le le duletšego ruri, gomme balatedi ba Jesu Kriste ba ba le karolo go lona.—Ba-Roma 12:11.
3. (a) Ke’ng se se swanetšego go ba sa therešo ka bodiredi bja Dihlatse tša Jehofa, eupja ke ka baka la’ng se se sa bonagale go batho ba bantši? (b) Ke’ng seo se bontšhago gore Moše o be a eme letagong moo Jehofa a bego a le gona?
3 Ka gona, bodiredi bja Dihlatse tša Jehofa ke bja letago. Lega go le bjalo, se ga se bonagale go batho ba bantši bao ba foufaditšwego ke bodumedi bja maaka. Lege ba bantši ba e-na le Beibele gomme ba e bala, ga ba ‘bone.’ (2 Petro 1:5-9) Gore lešira le tlošwe pele ga mahlo a bona, ba swanetše go retologela go Jehofa Modimo ka tumelo, ka gobane ge Moše a be a e-ya pele ga Jehofa, o ile a tloša lešira leo le bego le mo širetša go ba-Juda. (2 Ba-Korinthe 3:16) Ba-Isiraele ba be ba boifa go bona letago la Modimo sefahlegong sa mmoelanyi wa bona gomme ba ile ba kgopela gore sefahlego se širele mahlong a bona. Go fo etša selo se tšweletšago seetša ge se le lefsifsing ka morago ga ge se be se beilwe seetšeng, go bjalo le ka Moše, mmaditsela, yo a ilego a tšweletša letago la Jehofa, a bontšha gore o be a le pele ga Jehofa.
4. Batho ba ba sa dumelego ba lehono ba ekiša bjang ba-Juda ba bogologolo, eupja ke’ng seo balatedi ba Moše o Mogolo ba sa se boifego?
4 Moše o be a swantšhetša Moporofeta o mogolo wa Modimo, e lego Jesu Kriste. Go swana le yo a mo swantšheditšego e sa le pele, Moše yo o Mogolo ga a boife go lebelela letago la Jehofa ka go lebanya. Lega go le bjalo, go ba go fihla lehono, batho bao ba sa dumelego ka ge ba foufaditšwe ke Diabolo le bodumedi bja gagwe bja setlogo sa Babele, ba ekiša ba-Juda bale ba bogologolo gomme ba gana go bona goba go lemoga letago la Moše o Mogolo, e lego Jesu Kriste. (2 Ba-Korinthe 3:12-15) Lega go le bjalo, balatedi ba gagwe ba kgonthe ga ba boife go lebelela letago la Jehofa bjalo ka ge le bonagala sefahlegong sa Jesu Kriste. Ka ge ba lokolotšwe tutuetšong ya Babele, ba newa sebete sa go bontšha letago la Modimo. Paulo o ile a ngwala gore: “Ka gona, ka ge re e-na le kholofelo e bjalo, re bolela ka bolokologi.”—2 Ba-Korinthe 3:12, NW.
Bao ba Tšweletšago Letago la Modimo
5. Re ka tšweletša bjang letago la Modimo gomme ra swana le Moše tlhoreng ya thaba moo Jehofa a bego a le gona?
5 Jesu Kriste o tlošitše lešira ka go re utollela le go re tsebiša Jehofa Modimo. (Johane 1:14, 17, 18) Ka gona, re swanetše go phadima, gomme ka go rialo letago la Modimo le phadime ka “lebône le Ebangedi ya letaxô la Kriste, Yêna seswanthšo sa Modimo,” yeo re swanetšego go e tsebatša. Go tšweletšwa ga seetša sa lona ke “xo tseba letaxô la Modimo ka sefahloxô sa Jesu Kriste.” Re swanetše go tšweletša letago le ka go bolela letago la Jehofa le letago la Mmušo wa gagwe ka Morwa wa gagwe. (2 Ba-Korinthe 4:4-6) Go swana le Moše yo a bego a le tlhoreng ya thaba moo Jehofa a bego a le gona, Dihlatse tša Gagwe mo lefaseng ga di šire dipelo tša tšona letagong la Jehofa. Ba kgahlwa ke letago le le tšwelelago sefahlegong sa Morwa wa Jehofa le Kgoši, e lego Jesu Kriste. Ka gona, ba swanetše go phadimišetša ba bangwe seetša se se lego mabapi le letago la Modimo.
6. Paulo o hlalosa bjang bodiredi bja rena bja letago go 2 Ba-Korinthe 3:18, gomme ke ka ditsela dife re ‘bopjago lefsa’?
6 Moapostola Paulo o hlalosa letago la Jehofa go dihlatse-gotee le yena ka moka ka mantšu a: “Xomme rena ka moka ba re boxêlaxo letaxô la Morêna ra le bôna byalo ka seiponeng mahlô à tlošitšwe seširô, re bopya lefsa ke Yêna Mong wa Môya, ra tla ra swana le Yêna rè fêla re tšwêlêla pele xo taxafaleng.” (2 Ba-Korinthe 3:18) Ge re dutše re amogela letago la seetša se ka bontši, ke mo re swanelwago ke go tšweletša letago la sona ka bontši gomme ka go rialo, re ba le phetogo e kgolo. Megopolo e a mpshafatšwa le go kaonefatšwa gaešita lege phetogo ya mmele le ya sefahlego mo gongwe e sa lemogege. Ke seetša sa molaetša wa letago seo re se tšweletšago seo se tšweletšago phapano yeo e lego go rena. Maphelo a rena a a fetoga gore re swane le Kriste, ge re dutše re itokišetša go dira tirelo ye re e neilwego ya go phatlalatša seetša sa letago go ba bangwe mafelong ka moka.—Ba-Hebere 13:15.
7. Letago la kgonthe le tšwa mothopong ofe, gomme ke bjang re ka bontšhago letago le le bjalo?
7 Diphetogo tše bjalo ka moka di dirwa ke moya goba matla a dirago a Modimo. Baruti ba Bojakane ga ba tšweletše letago la Jehofa Modimo eupja ba retologela tabeng ya go itira bo-mponeng e le gore ba kgahliše babogedi. Letago le ga se la rena, gomme ga re a swanela go ikgabiša ka diaparo tša boruti tša go kgabišwa ka silika, gauta le mafsika a bohlokwa ao a phadimago. Letago la kgonthe le tšwa moyeng wa Modimo gomme le bontšhwa ka go neelwa ga bohlatse bja letago mabapi le Jehofa yo e lego Moya.
Barwadi ka Moka ba Seetša Bao ba Gaugetšwego
8, 9. Ke kgothatšo efe yeo Paulo a e neago go 2 Ba-Korinthe 4:1, 2, gomme go nyakega maikemišetšo afe go rena?
8 Go 2 Ba-Korinthe 4:1, 2 re bala gore: “Byale, xa re na le botseta byoo, ka mo kxauxêlô yé e re direxetšexo, xa re lape. Re kxaoxane le mamênêmênê a masêmê; xa re tle ka tsela ya maanô; xa re retolle Lentšu la Modimo; re sekišana le matswalô a batho ka moka pele ga Modimo rè bola therešô.” Modimo o re gaugetše ka go re nea kabelo ye ya bodiredi. Se se re kgothaletša go tšwela pele ka sebete, gomme re tla dira seo! Ka ge re neilwe seetša se se tšwago Lentšung la Modimo, re swanetše go bonegela ba bangwe ka lona.—Bapiša le Mateo 5:14-16.
9 Dilo tšeo di lešago batho dihlong, bjalo ka bofora, ba di fihla ka bomenetša le mathaithai. Eupja ga re a swanela go lewa ke dihlong ka gobane molaetša wa rena le modiro wa rena ga se wa boradia eupja ke wa go loka le wa go rereša. Ka gona, re ka dira gore seetša se phadime ka letago le le tletšego. Ga re diriše Lentšu la Modimo ka boradia. Go dira bjalo go be go tla bolela go le diriša ka boithati bakeng sa go ikhweletša leruo, botumo, poelo le matla a lefase gotee le go široga kganetšo le tlaišo e tšwago go lona. Bao ba sa boifego go tla go Jehofa ka difahlego tšeo di se nago seširo gomme ba lebelela seetša sa letago sa therešo ka mo go swanago ba ka se ke ba boifa go lebeletšana le boikarabelo bja bona. Ba tla dumela seetša se ba bonegela.
10. Ke ka baka la’ng e se molato wa Dihlatse tša Jehofa ge ditaba tše di lokilego tša Mmušo di širetše mahlong a batho ba bangwe?
10 Ge e ba go e-na le bao ditaba tše di lokilego tša Mmušo di širetšego mahlong a bona, ga se molato wa Dihlatse tša Jehofa, ke wa bona ka noši. Ditaba tše di lokilego tša Mmušo ga se tša fihlwa. Modiro wa boboledi wa lefase ka bophara wa Dihlatse tša Jehofa o tsebja ka gohle. Ka gona ba ka bolela go etša ge moapostola Paulo a itše: “Xa se tša dirêxa sekxutlong.” Ka kgonthe, go etša ge a ngwadile, ditaba tše di lokilego di ‘begetšwe babopja bohle ka tlase ga legodimo.’—Ditiro 26:26; Ba-Kolose 1:23.
11. Ke ka baka la’ng ditaba tše di lokilego tša letago di fihlagetše gare ga batho ba bantši kudu lehono?
11 Batho bao ditaba tše di lokilego tša Mmušo wa Modimo di fihlegilego go bona ke baganetši, e lego bao ba foufaditšwego ke Diabolo. (Bapiša le Mateo 12:30.) Ge e se gore ba lokologe bodumeding bja maaka le mereong ya Diabolo, gona ba swanetšwe ke tshenyego. Ka tlase ga tutuetšo ya botemona, batho ba bjalo ba ikhupetša mahlo ka lešira, ka gobane moapostola Paulo go 2 Ba-Korinthe 4:3-5 o re: “Xe Ebangedi ya rena è sa le phihlô, e fihletšwe bao ba lahlêxaxo. Ké ba ba sa dumelexo, ba modimo wa lefase lé o foufaditšexo dipelo tša bôná, xore ba se bônêxêlwê ke lebônê la Ebangedi ya letaxô la Kriste, Yêna seswanthšô sa Modimo. Xa re ba xo ipolêla, re bolêla Jesu Kriste, re re: Ké Yêna Morêna; re re: Rena re bahlanka ba lena ka ’baka la Yêna Jesu.”
12. Go fapana le batho ba ba foufetšego megopolo, batho ba Jehofa ba arabela bjang mantšung ao a lego go 2 Ba-Korinthe 4:6?
12 Bao ba foufetšego megopolong ga ba rate go dumela. Go se dumele ga bona go bulela batemona gore ba hlasele megopolo ya bona. (1 Timotheo 4:1) Ba ka se ke ba bona letago la Jehofa goba ponagalo ya lona sefahlegong sa Jesu, e lego Moše o Mogolo. Batho ba Jehofa ba hwetša seetša sa letago Beibeleng, gomme ba se bonagatša go ba bangwe. Ka gona, bahlanka ka moka ba Modimo ke barwadi ba seetša, gomme Modimo o laela gore seetša se bonege. Seetša se swanetše go bonagala bathong ba Modimo gomme se edišetše ba bangwe bao ba lego lefsifsing le kotsing ya tshenyego. Se se fo ba bjalo ka ge 2 Ba-Korinthe 4:6 e bea taba: “Xobane ké Yêna Modimo e a itšexo: Seetša a se bônêxê mo xo lexo lefsifsi. Ké Yêna a bonexetšexo dipelo tša rena, ya ba xo edišwa ka xo tseba letaxô la Modimo ka sefahloxô sa Jesu Kriste.” Ponong ya se, Dihlatse tša Jehofa di kwa molao o tšwago go Modimo gomme tša dira gore seetša se bonegele ba bangwe, gore go tumišwe Modimo.
Lehumo la Letago Dibjaneng tše Fokolago
13. Go bea tirelo e šegofetšego ya go ba morwadi wa seetša godimo ga dibopiwa tša nama go feleletša ka eng?
13 Tokelong ye e kgolo-kgolo ya tirelo, sa bohlokwa kudu ke gore barwadi ba seetša ba ipontšhe e le ba ba swanelegelago go ba le seetša ka go dula ba botegela Modimo. Go phetha tokelo ye e makatšago ya tirelo, Modimo ga se a diriša barongwa ba bakgethwa bao ba kganyogago go lebeledišiša dilo tše, eupja o beile tirelo ye e šegofetšego godimo ga dibopiwa tša nama. (1 Petro 1:12) O dirile se bakeng sa go bontšha matla a gagwe bofokoding bja batho. Bjalo ka ge 2 Ba-Korinthe 4:7 e bolela: “Lehumô leo re le swere ka dibya tša letsopa; xore matla a maxolo e bê a Modimo, e sexo a rena.”
14. (a) ‘Lehumo le le rwelwego ka dibjana tša letsopa’ ke eng? (b) Ke ka baka la’ng Moše le Jesu Kriste e le mehlala ya go dira ka bohlale go rena ge e le mabapi le lehumo?
14 Dibjana tša mehleng ya bogologolo gantši di be di swara dilo tša bohlokwa. Lehumo le la letago le Dihlatse tša Jehofa di le rwelego dibjaneng tše fokolago tša letsopa—bona ka noši e le dibopiwa tše fokolago go tšwa leroleng la lefaseng, ke’ng? Lehumo le ga se seetša feela seo se ilego sa bonega dipelong tša bona. Ke bodiredi bja seetša, e lego bodiredi goba tirelo ye e swanetšego go phethwa ba le mebeleng ya bona ya lefaseng. Bodiredi ke go phatlalatša seetša seo Modimo a se hlabišitšego dipelong tša bona. Bodiredi bjo ke lehumo le lebotse ka ge e le tokelo e bohlokwa ya tirelo yeo e dirwago lehono e sego ke mašaledi a tloditšwego a “mohlatswana o monyenyane” feela eupja gape le ke “lešaba le lexolo” la “dinku tše dingwe” tša Modiši yo Bolo, e lego Jesu Kriste. (Luka 12:32; Johane 10:14-16; Kutollo 7:9) Moše le Jesu Kriste yo a ilego a swantšhetšwa ke yena, ke mehlala ya rena ya go dira ka bohlale gore re tsepamiše dipelo tša rena lehumong la tirelo e tšwago go Modimo, “xobane mo xo lexo lehumô la xaxo, ké mo xo lexo pelo ya xaxo.”—Mateo 6:19-21; Ba-Hebere 11:26.
15, 16. (a) Matla ao a fetago a tlhago a bontšhwa bjang gore a tšwa go Modimo, e sego go rena? (b) Ke ka baka la’ng kganetšo ya lefase ka moka e tla palelwa ke go pšhatla dibjana tša letsopa tša Modimo?
15 Bjale ke bjang matla ao a fetišago a tlhago a bontšhwago e le ao a tšwago go Modimo e sego go rena ka noši? Ka tsela ye: Dibjana tše bjalo tše fokolago tša letsopa tšeo e lego rena bao re swerego tirelo ye e bohlokwa le thomo ke tšeo di sa swanelegego gomme le ka mohla di be di ka se ke tša ikhweletša tlhompho e bjalo ka botšona. Go feta moo, rena Dihlatse tša Jehofa re ka tlase ga dikgateletšo tša mehuta ka moka tša manaba ao a nyakago go re phšatla le go dira gore re palege e le gore re se ke ra swanelega go rwala thomo e tšwago go Modimo. Ka gona, e swanetše go ba matla a Molaedi o Mogolo ao a re thušago go kgotlelela tshwaro e šoro kudu ya lefase le go kgomarela thomo gaešita le go ipontšha re le ba swanelegago go tšwela pele re le tirelong ya gagwe. Ka go rialo, kganetšo ya lefase ka moka e tla palelwa ke go senya dibjana tša letsopa tša Modimo le go di amoga lehumo la tšona la bohlokwa, ka gobane go 2 Ba-Korinthe 4:8-12 go ngwadilwe gwa thwe:
16 “Re dikilwe thokô tšohle, ’me xa re pitlaxanywe. Re a phoraphora, ’me xa re xakanexe. Re a tlaišwa, ’me xa r’a lahlêxa. Re dixêlwa fase, ’me xa re senyexe. Re sepela xohle rè swailwe mebele ka leswaô la xo hwa xa Morêna; ya ba xôna le bophelô bya Jesu bo bônaxalaxo mebeleng ya rena. Xobane ka mehla xe re sa phela, re ba xo xafêlwa lehu ka ’baka la Jesu, ya ba xôna le bophelô bya Jesu bo bônaxalaxo nameng ya xo hwa. Xe xo le byalo, mo xo rena lehu le dira ka matla; ’me xo lena a e bê bophelô [ka go bolelwa ga ditaba tše di lokilego tša Mmušo].”
Lešaba le Legolo le Tšea “Lehumo le” e le la Bohlokwa-hlokwa
17. Lešaba le legolo le lebelela bjang ‘lehumo le’ la bodiredi bja letago?
17 “Mo xo rena lehu le dira ka matla; ’me xo lena a e bê bophelô.” Polelo ye e dira go Bakriste ba ba tloditšwego ka moya. Lega go le bjalo, e ka dira gore re naganišiše gabotse ka tswalano ya mašaledi a tloditšwego a Modimo le lešaba le legolo la dinku tše dingwe. Mašaledi a a tseba gore mafelelong a swanetše go phetha tsela ya ona ya lefaseng lehung bjalo ka Jesu, eupja a na le bagwera ba ona bao ba swanetšego go abelana le ona lehumo la letago la tirelo, bao ba swanetšego go a thuša ka go dira karolo e kgolo ya modiro wa boboledi bja ditaba tše di lokilego tša Mmušo. Go swana le mašaledi a tloditšwego, lešaba le legolo la dinku tše dingwe lehono le lemoga gore lehumo feela le le tlago go phologa ntwa e šoro kudu ya Haramagedone gomme la tšwela pele le se la fišwa goba go fedišwa go fihla lefaseng le lefsa, ke lehumo le le šegofetšego la bodiredi, e lego go direla Jehofa Modimo le Kgoši ya gagwe ya letago, Jesu Kriste. Lešaba le legolo le tla kgomarela ka go tia, ‘la hlankela [Modimo] mosegare le bošego le le ntlong-kgethwa.’—Kutollo 7:15.
18. (a) Go tla direga’ng kapejana ka letago la maaka la lefase le? (b) Ke “letago” lefe leo Jesu a ilego a le gana, gomme o hweditše letago le legolo ka go dira’ng?
18 Kapejana, Modimo o tla fediša letago la maaka la tshepedišo ye e kgopo ya dilo—“letago” leo le ilego la tšwela pele ga e sa le mola Sathane Diabolo a tšeago Jesu a mo nametša thaba e telele gomme a mmontšha mebušo ka moka ya lefase le “letago la yona.” (Luka 4:5, 6, NW) Jesu o ile a gana mpho ya letago go tšwa mothopong o bjalo gomme mono lefaseng o ile a tšwela pele a phegelela tsela yeo Modimo a bego a e amogela. Ka go dira bjalo, o be a tla rwešwa letago le legolo leo le fetago leo yena, Morwa e a tswetšwego a nnoši wa Modimo, a bego a e-na le lona legodimong pele a tšea kabelo ya gagwe ya lefaseng bjalo ka ge e ile ya rulaganywa ke Jehofa.—Johane 5:36; 17:5; Ba-Filipi 2:9-11.
19. Ke tokelo efe e hlomphegago ya tirelo yeo e batamelago go phethweng ga yona ka botlalo, gomme maikemišetšo a rena ke afe tabeng ye?
19 Bofelo bjo bo porofetilwego bja tshepedišo ye e tletšego ka bokgopo ya dilo bo ka se ke bja tla pele ga ge bohlatse bja Mmušo bo neilwe lefaseng ka moka e le seremo se segolo medirong ya balatedi ba Jesu Kriste bao e lego Dihlatse tša Jehofa. (Mateo 24:14) Bohlatse bja Mmušo mo nakong ye bo šetše bo neilwe mo dikotareng tše tharo tša ngwaga-kgolo, gomme bjale ka ge go bontšhwa ke dilo tše di tšwelelago mehleng ya rena, bofelo bjo bo boletšwego e sa le pele bo swanetše go ba bo le kgaufsi. Ka go rialo, tokelo e hlomphegago ya go ba le karolo bodireding bja mmušo o mokgethwa e swanetše go ba e batamela go phethwa ga yona ka botlalo. (Mateo, dikgaolo 24, 25; Mareka, kgaolo 13; Luka, kgaolo 21) Tokelo ya rena ya go ba le karolo go neeng bohlatse lefaseng ka bophara ka go thewa ga Mmušo, ruri ke lehumo la letago leo Dihlatse tša Jehofa, bjalo ka balatedi ba Morwa wa gagwe yo a beilwego sedulong sa bogoši, e lego Jesu Kriste, ba e tšeago e le ya bohlokwa-hlokwa. Ka phišego ba rata go e kgomarela go ba go fihla ge bohlatse bja Mmušo bo phethilwe gomme Modimo Ramatla-ohle, Jehofa, a apeša boemo bja legohle ka bohlatse bja gagwe ka noši pušong ya gagwe ya legohle.—Tsefanya 3:8.
◻ Ke ka baka la’ng bodiredi bja Dihlatse tša Jehofa e le bja letago?
◻ Ke ka baka la’ng ditaba tše di lokilego di fihlagetše bathong ba bantši lehono?
◻ ‘Lehumo le le rwelwego ka dibjana tša letsopa’ ke’ng?
◻ Ke ka baka la’ng Modimo a dirišitše dibjana tše fokolago tša letsopa bakeng sa tirelo ya gagwe e bohlokwa?
◻ Batho ba Jehofa ba tšea bjang ‘lehumo le,’ gomme ka baka la’ng?
Letago la Modimo le bonagatšwa sefahlogong sa Jesu Kriste, e lego Moše o Mogolo. Dihlatse tša Jehofa di na le tokelo ya go tšea seetša sa letago sa Modimo Beibeleng gomme tša se bontšha go ba bangwe