Go Thuša ba Bangwe go Rapela Modimo

“Xe xo ka . . . tsêna e a sa dumelexo le e a sa di lemoxexo, . . . [go] tlo utoloxa tše di lexo mo pelong ya xaxwe, a tlo khunama a inama a rapêla Modimo.”—1 BA-KORINTHE 14:24, 25.

1-3. Ke bjang ba bantši kua Korinthe ba ilego ba thušwa gore ba amogelwe ke Modimo?

MOAPOSTOLA Paulo leetong la gagwe la bobedi la boromiwa, o ile a dula motseng wa Korinthe ngwaga le seripa. O be a ‘fišegela go nea bohlatse’ moo. Ka mafelelo afe? “Ba-Korinthe ba bantši ba ba kwilexo Lentšu ba dumêla ba kolobetšwa.” (Ditiro 18:5-11) Ba ile ba ‘kgethega . . . , ba bitšwa gore e be bakgethwa.’—1 Ba-Korinthe 1:2.

² Apollo ka morago o ile a etela Korinthe. Pejana, Perisila le Akwila ba be ba mo thušitše go kwešiša “thutô ya Modimo xabotse,” go akaretša le taba ya kolobetšo. Ka gona o ile a fetoga Mokriste yo a kgahlago Modimo le yo a amogelwago ke yena. (Ditiro 18:24-19:7) Apollo le yena o ile a thuša ba-Korinthe bao pele ‘ba bego ba gogetšwe medimong ya diswantšho ya dimuma.’ (1 Ba-Korinthe 12:2) Batho ba go bonala ba be ba rutwa ka Beibele magaeng a bona; gape ba be ba ka ithuta ka go ba gona dibokeng tša Bokriste.—Ditiro 20:20; 1 Ba-Korinthe 14:22-24.

³ Mafelelo a thuto e bjalo e bile gore ba bantši bao pele e bego e le ‘batho ba sa dumelego gotee le batho feela’ ba tle borapeding bja therešo. Go swanetše go ba go be go kgotsofatša gakaakang go bona banna le basadi ba tšwela pele go ya kolobetšong le go amogelwa ke Modimo! Se se sa dutše se kgotsofatša.

Go Thuša ‘ba ba sa Dumelego le Batho Feela’

4. Ke ka ditsela dife moo ba bantši lehono ba thušwago go etša bao ba bego ba le Korinthe?

⁴ Dihlatse tša Jehofa le lehono di kwa taelo ya Jesu ya ‘go dira batho ba ditšhaba ka moka barutiwa le ‘go ba kolobetša.’ (Mateo 28:19, 20) Ka morago ga go bjala dipeu tša therešo dipelong tšeo di arabelago, ba a boela gore ba tle go di nošetša. (1 Ba-Korinthe 3:5-9; Mateo 13:19, 23) Dihlatse di nea dithuto tša Beibele tša legae tša beke le beke tšeo di sa lefelelwego e le gore dipotšišo tša batho di ka arabja le gore ba ithute ditherešo tša Beibele. Batho ba bjalo le gona ba laleletšwa go ba gona dibokeng tša lefelong leo tša Dihlatse tša Jehofa, go etša ge “ba ba sa dumelexo” ba lekgolong la pele la nywaga ba ile ba ba gona dibokeng kua Korinthe. Eupja Dihlatse tša Jehofa di swanetše go lebelela bjang batho bao ba ithutago Beibele ba bile ba e-tla dibokeng?

5. Ke motheo ofe wa Mangwalo wo o lego gona wa go phafoga ge go dirišanwa le batho ba itšego?

⁵ Re thabela go ba bona ba e-tla go Modimo. Lega go le bjalo, re elelwa gore ga se ba hlwa ba e-ba badumedi ba kolobeditšwego. Le gona gopola dithuto tše pedi tšeo di theilwego sehlogong se se fetilego. (1) Ba-Isiraele ba be ba bontšha go ela hloko malebana le badudi ba badiiledi bao gaešita lege ba be ba le gare ga batho ba Modimo ba bile ba phetha melao e itšego, e bego e se basokologi ba bolotšego, e lego banababo bona borapeding. (2) Bakriste ba Korinthe bao ba bego ba dirišana le ‘batho ba ba sa dumelego le batho feela’ ba be ba ela hloko ka baka la mantšu a Paulo a rego: “Le se kê la ba ba xo ikxokêla jokong e sele ya ba ba sa dumelexo; tokô e ka amana bya’ng le bokxôpô?”—2 Ba-Korinthe 6:14.

6. “Batho ba ba sa dumelego” ba ka ‘solwa’ bjang ke diboka, gomme woo ke mohuta ofe wa kgalemelo?

⁶ Ka gona, gaešita lege re amogela ‘batho ba ba sa dumelego le batho feela,’ re lemoga gore ga se ba hlwa ba fihlelela ditekanyetšo tša Modimo. Bjalo ka ge Beibele e bontšha go 1 Ba-Korinthe 14:24, 25, batho ba bjalo mo gongwe ba nyaka gore ba ‘hlahlobje e le ka kgonthe’ gaešita le go ‘kgalengwa’ ke seo ba ithutago sona. Kgalemelo e bjalo ga se ya mohuta wa boahlodi; ga ba biletšwe ka pele ga komiti ya boahlodi ya phuthego ka ge e se ya hlwa e eba ditho tse kolobeditšwego tša yona. Go e na le moo, ka baka la seo ba ithutago sona, batho ba ba bafsa ba kgonthišega gore Modimo o nyatša ditsela lege e le dife tša boithati le boitshwaro bjo bo gobogilego.

7. Ke tšwelopele efe e oketšegilego yeo barutwana ba bantši ba tla nyakago go e dira gomme ka baka la’ng?

⁷ Batho ba bantši bao ba sa kolobetšwago ge nako e dutše e e-ya mo gongwe ba ka nyaka go dira selo se se fetago feela go ba gona dibokeng e le baithuti ba thabelago. Mantšu a a Jesu a bontšha lebaka la gore ba dire seo: “Morutiwa xa a phale moruti wa xaxwe; mang le mang ô tlo rutêxa [“yo a rutilwego gabotse,” NW] a etša moruti wa xaxwe.” (Luka 6:40) Morutwana wa Beibele a ka bona gore morutiši wa gagwe o lebelela bodiredi bja tšhemo e le bjo bohlokwa gomme o a bo thabela. (Mateo 24:14) Ka gona, ge tumelo ya motho yo a bego a dutše a ithuta ditherešo tša Beibele gomme a e-ba gona dibokeng e gola mo gongwe a ka kgongwa e le ka kgonthe ke mantšu a: “A ratêxa bya’ng maoto a motseta wa ditaba tse di botse dithabeng, sexoeledi sa phološô.” (Jesaya 52:7; Ba-Roma 10:13-15) Gaešita lege a sa kolobetšwa, mo gongwe a ka nyaka go ba mogoeledi wa Mmušo yo a ikgokaganyago le phuthego ya Dihlatse tša Jehofa.

8, 9. (a) Ke’ng seo se swanetšego go dirwa ge morutwana wa Beibele a nyaka go ba le karolo bodireding bja phatlalatša? (b) Ge bagolo ba babedi ba kopana le yo go lebeletšwego gore e be mogoeledi gotee le morutiši wa gagwe, ke’ng seo ba tlago go se dira? (c) Mogoeledi o mofsa o rwala boikarabelo bofe?

⁸ Ge Hlatse yeo e swarago thuto ya Beibele e hwetša gore morutwana o kganyoga go ba le karolo tirelong ya tšhemo, go na a ka boledišana le molebeledi yo a okamelago ka taba yeo gomme yena o tla rulaganya gore bagolo ba babedi ba kopane le morutwana wa Beibele le morutiši wa gagwe. Bagolo ba a thaba ge motho o mofsa a nyaka go direla Modimo. Ba ka se letele gore a be le tekanyo ya tsebo ya batho bao ba kolobeditšwego gomme ba tswetše pele therešong, bao go nyakwago go gontši go bona. Lega go le bjalo, bagolo ba tla nyaka go bona gore pele ga ge motho o mofsa a e-ba le karolo bodireding bja tšhemo le phuthego, o tseba dithuto tša Beibele gomme o dumelelantše bophelo bja gagwe le melao ya motheo ya Modimo. Ka go na ke ka baka la mabaka a mabotse ge bagolo ba babedi ba kopana le yo go lebeletšwego gore e tla ba mogoeledi le Hlatse yeo e swarago thuto.a

⁹ Bagolo ba ba babedi ba tla tsebiša morutwana gore ge a swanelega gomme a e-ba le karolo tirelong ya tšhemo, mo gongwe a ka tliša pego ya tirelo ya tšhemo gomme karata ya Pego ya Mogoeledi ya Phuthego e tla ngwalwa ka leina la gagwe. Se se tla bontšha go ingwadiša ga gagwe ka molao thulaganyong ya pušo ya legodimo ya Dihlatse tša Jehofa le go ikokobeletša yona. (Se se tla ba bjalo gape go bohle bao ba tlišago dipego tša tirelo ya tšhemo.) Poledišano e swanetše go akaretša le keletšo ya Beibele, go etša yeo e ngwadilwego letlakaleng 98 le 99 la Go Rulaganyetšwa go Dira Bodiredi bja Rena.b Ka gona, ye e tla ba nako e swanetšego ya gore morutwana a amogele kopi ya gagwe ka noši ya puku yeo.

10. (a) Ke bjang mogoeledi yo a sa kolobetšwago a ka tšwelago pele, gomme ka pakane efe? (b) Ke ka baka la’ng go dirwa phetogo ge e le mabapi le leina “mogwera yo a amogelegago”? (Bona mongwalo wa ka tlase.)

¹⁰ Motho yo a ilego a swanelega e le mogoeledi yo a sa kolobetšwago wa ditaba tse di lokilego o ile lehlakoreng la go ba ‘motho yo a kgahlegelwago.’c (Luka 2:14) Gaešita lege a se a ineela le go kolobetšwa, bjale a ka bega modiro wa gagwe wa go nea bohlatse gotee le batho ba dimilione ba mafolofolo bao ba ‘rutago lentšu la Modimo’ lefaseng ka bophara. (Ditiro 13:5; 17:3; 26:22, 23) Tsebišo ya gore ke mogoeledi o mofsa yo a sa kolobetšwago e ka dirwa ka phuthegong. O swanetše go tšwela pele a ithuta Beibele, a e-ba le karolo dibokeng, a diriša seo a ithutago sona le go se abelana le ba bangwe. Go se go ye kae o tla nyaka go gata mogato wa kolobetšo ya Bokriste, ka gona a ba yo a amogetšwego ke Modimo le go ‘swaelwa’ phologo.—Hesekiele 9:4-6.

Thušo go yo a Dirago Phošo

11. Phuthego e swara bjang bafoši ba kolobeditšwego?

¹¹ Sehlogong se se fetilego re boletše ka ditokišetšo tša phuthego tša go thuša Mokriste lege e le ofe yo a kolobeditšwego yo a dirago sebe se segolo. (Ba-Hebere 12:9-13) Le gona re bone go tšwa Beibeleng gore ge e ba mofoši yo a kolobeditšwego a sa itshole, gona phuthego mo gongwe e ka swanelwa ke gore e mo rake gomme ka morago ga moo e pheme go gwerana le yena ka tsela lege e le efe. (1 Ba-Korinthe 5:11-13; 2 Johane 9-11; 2 Ba-Thesalonika 2:11, 12) Lega go le bjalo, ke megato efe yeo e ka gatwago ge e ba mogoeledi yo a sa kolobetšwago a dira phošo e kgolo goba sebe?

12. (a) Ke ka baka la’ng thušo e nago le kgaugelo e hwetšagala bakeng sa bagoeledi ba sa kolobetšwago bao ba dirago dibe? (b) Ke bjang molao wa motheo wo o lego go Luka 12:48 o ka tswalanago le go ikarabelela bakeng sa phošo?

¹² Juda o ile a opeletša gore go bontšhwe kgaugelo go Bakriste ba tloditšwego bao ba bego ba e-na le dipelaelo goba bao ba bego ba dirile dibe tša nama ge feela ba be ba itshola, (Juda 22, 23; bona le 2 Ba-Korinthe 7:10.) Ka gona, na e be e ka se be mo go swanelago kudu gore kgaugelo e bontšhwe motho yo a dirilego phošo yo a sa kolobetšwago yo a bontšhago boitsholo? (Ditiro 3:19, 20) Ee, e tla ba mo go swanelago ka gobane motheo wa gagwe wa moya ga se o tiilego gakaalo le gona phihlelo ya gagwe ya go phela bophelo bja Bokriste ke ye e lekaneditšwego kudu. Mo gongwe a ka ba a sa ithuta kgopolo ya Modimo ka ditaba tse itšego. Ga se a hlahloba lelokelelo la dipoledišano tša Beibele tša pele ga kolobetšo le bagolo gomme ga se a gata mogato o bohlokwa wa go inwa meetseng. Go feta moo, Jesu o boletše gore “E a filwexo tse ntši, 6 tlo belwa [“nyakwa,” NW] tse ntši.” (Luka 12:48) Ka gona, go letetšwe go gontši go batho ba kolobeditšwego bao go tlaleletša tsebong e okeditšwego le ditšhegofatšo ba nago le boikarabelo bjo bo kgethegilego.—Jakobo 4:17; Luka 15:1-7; 1 Ba-Korinthe 13:11.

13. Ge e ba mogoeledi yo a sa kolobetšwago a dira phošo, ke’ng seo bagolo ba tlago go se dira gore ba thuse?

¹³ Go dumelelana le keletšo ya Paulo, banababo rena bao ba swanelegago moyeng ba nyaka go thuša mogoeledi lege e le ofe yo a sa kolobetšwago yo a gatago mogato o fošagetšego pele ga ge a ka lemoga. (Bapiša le Ba-Galatia 6:1.) Bagolo ba ka kgopela bagolo ba babedi bao ba lego sehlopheng sa bona sa bagolo (mo gongwe bao ba kopanego le yena pejana) gore ba leke go mo phošolla ge e ba a nyaka go thušwa. Ba tla dira bjalo e sego ka kganyogo ya go mo kgalema o šoro eupja ka tsela e bontšhago kgaugelo le ka moya o bonolo. (Psalme 130:3) Mabakeng a mantši kgothatšo ya Mangwalo le dikeletšo tse holago e tla ba tse lekanego gore di tsweletše boitsholo gomme di mmee tseleng e lokilego.

14, 15. (a) Ke’ng seo se ka dirwago ge e ba mofoši a itshola e le ka kgonthe? (b) Ke tlhaloso efe e kopana yeo e ka dirwago mabakeng a mangwe?

¹⁴ Bagolo ba ba babedi ba tla nea tlhahlo e dumelelanago le boemo bja mofoši yo a sa kolobetšwago. Mabakeng a mangwe, mo gongwe ba ka rulaganya gore motho yo a dirilego phošo a se ingwadiše Sekolong sa Bodiredi sa Puso ya Legodimo ka nako e itšego goba a se dumelelwe go nea ditlhaloso dibokeng. Goba mo gongwe ba ka mo laela gore a se be le karolo bodireding bja phatlalatša le phuthego go fihlela ge a dirile tšwelopele e kgolo moyeng. Ka morago ga moo, mo gongwe ba ka mmotša gore a ka ba le karolo gape bodireding bja tšhemo. Ge e ba phošo e sa tšweletša boemo bjo bobe bjo bo tsebjago ka bophara gomme e se ya bea bohlweki bja mohlape boemong bjo kotsi, go na ga go nyakege gore phuthego e lemošwe ka tsebišo lege e le efe.

¹⁵ Eupja go thwe’ng ge e ba bagolo ba babedi ba hwetša gore motho yoo o itshola e le ka kgonthe eupja phošo e tsebja ka gohle? Goba go thwe’ng ge e ba go direga gore phošo e tsebje ka gohle ka morago? Maemong ao ka bobedi, ba ka tsebiša Komiti ya Tirelo ya Phuthego yeo e tlago go rulaganya gore go dirwe tsebišo e bonolo ye e rego: “Taba ya . . . e ahla-ahlilwe, gomme o tšwela pele a dira le phuthego e le mogoeledi yo a sa kolobetšwago.” Ditabeng tse bjalo ka moka, sehlopha sa bagolo se ka phetha ge e ba go tla ba bohlale gore nakong e nngwe e tlago go newe polelo ya Mangwalo yeo e nago le keletšo mabapi le mohuta wa phošo yeo e dirilwego.

16, 17. (a) Ke maemo afe a mabedi ao mo gongwe e ka bago mabaka a tsebišo e fapanego? (b) Tsebišo ye e ka sebopego sefe?

¹⁶ Gantši mogoeledi yo a sa kolobetšwago yo a dirilego phošo a ka se ke a arabela thušong e lerato. Goba mogoeledi yo a sa kolobetšwago mo gongwe a ka phetha ka gore ga a sa nyaka go tšwela pele go ya kolobetšong gomme a tsebiša bagolo gore ga a sa nyaka go lebelelwa e le mogoeledi. Ke’ng seo se swanetšego go dirwa? Mogato wa go kgaola o ka se ke wa gatwa malebana le ba bjalo bao ge e le gabotse ba sa amogelwago ke Modimo. Thulaganyo ya go kgaola bafoši ba sa itsholego e dira go bao ‘ba bitšwago banababo rena,’ e lego batho ba kolobeditšwego. (1 Ba-Korinthe 5:11) Lega go le bjalo, na se se bolela gore phošo e hlokomologilwe? Aowa.

¹⁷ Bagolo ba ikarabelela ka go ‘diša mohlape wa Modimo wo ba o hlokometšego.’ (1 Petro 5:2) Ge e ba bagolo ba babedi bao ba neago thuso ba phetha ka gore mofoši yo a sa kolobetšwago ga a itshole gomme ga a swanelege gore a be mogoeledi, ba tla tsebiša motho yoo.d Goba ge e ba motho o mongwe yo a sa kolobetšwago a botša bagolo gore ga a sa hlwa a rata go lebelelwa e le mogoeledi, gona ba tla amogela phetho ya gagwe. Mabakeng ao ka bobedi, ke mo go swanetšego gore Komiti ya Tirelo ya Phuthego e laele gore go dirwe tsebišo e bonolo yeo e dirwago ka nako e swanetšego, yeo e rego “ . . . ga e sa le mogoeledi wa ditaba tse di lokilego.”

18. (a) Ka morago ga tsebišo e bjalo, ke’ng seo Bakriste ka o tee ka o tee ba ka se gopolago ge ba dira phetho ya kamoo ba swanetšego go itshwara ka gona? (b) Na go tloga go nyakega go phema batho ba sa kolobetšwago bao ba nago le molato wa phošo ya nakong e fetilego?

¹⁸ Dihlatse ka morago di tla lebelela motho yoo bjang? Ke therešo gore pele e be e le ‘motho yo a sa dumelago’ yo a bego a e-ba gona dibokeng. Ka morago o ile a nyaka go ba mogoeledi wa ditaba tše di lokilego gomme a swanelegela seo. Ditaba ga di sa le bjalo, ka gona ke motho wa lefase gape. Beibele ga e laele gore Dihlatse di pheme go bolela le yena, ka gobane ga a kgaolwa.e Lega go le bjalo, Bakriste ba tla phafogela motho yo bjalo wa lefase yo a sa rapelego Jehofa, go fo etša ge ba-Isiraele ba ile ba dira bjalo mabapi le badudi ba badiiledi bao ba sa bollago. Go phafoga mo go thuša go sireletsa phuthego go “komêlwana e nyane,” lege e le efe goba selo se se šilafatšago. (1 Ba-Korinthe 5:6) Ge e ba ka morago ga nako e itšego a bontšha kganyogo ya kgonthe ya gore go swarwe thuto ya Beibele le yena gomme se se bonala se swanetše go bagolo, mo gongwe se se tla mo thuša gore a lemoge gape tokelo e kgolo ya go rapela Jehofa le batho ba Gagwe.—Psalme 100.

19. Ke bjang bagolo mabakeng a mangwe ba ka neago thuso e oketšegilego ya ka thoko?

¹⁹ Ge e ba bagolo ba bona gore motho yo a itšego wa mohuta wo o tsenya mohlape poifo e sego ya tlhago, ba ka lemoša bao ba lego kotsing ka thoko. Ka mohlala, yo e bego e le mogoeledi mo gongwe e ka ba mofsa yo a nweletšego botagweng goba boitshwarong bjo bo gobogilego. Go sa setšwe tsebišo ya gore ga e sa le mogoeledi yo a sa kolobetšwago, mo gongwe a ka leka go ikgweranya le bafsa ka phuthegong. Boemong bjoo, bagolo ba tla bolela thopeng le batswadi ba bafsa bao ba lego kotsing, gomme mo gongwe ba bolela le bafsa bao. (Ba-Hebere 12:15, 16; Ditiro 20:28-30) Tabeng e sa tlwaelegago ya motho yo a šitišago diboka goba yo a lego kotsi o šoro, a ka botšwa gore ga a amogelwe dibokeng le gore boiteko lege e le bofe bja go tsena bo tla lebelelwa e le go tsena ka ntle le molao.

Go Thuša Bana go Rapela Modimo

20. Ke thušo efe yeo batswadi ba Bakriste ba e neago bana ba bona, gomme ka mafelelo afe?

²⁰ Beibele e nea batswadi boikarabelo bja go hlahla bana ba bona tseleng ya therešo ya Modimo. (Doiteronomio 6:4-9; 31:12, 13) Ka gona, Dihlatse tša Jehofa ke kgale di kgothaletša malapa a Bakriste gore a be le thuto ya Beibele ya beke le beke. Batswadi ba Bakriste ba swanetše go kgothaletša bana ba bona gore ba tšwele pele go ya boineelong le kolobetšong gomme ka go rialo ba amogelwe ke Modimo. (Diema 4:1-7) Re bona mafelelo a kgahlišago diphuthegong, e lego bafsa ba makgolo a dikete ba beago mohlala bao ba ratago Jehofa gomme ba nyaka go mo rapela ka mo go sa felego.

21-23. (a) Ge e le gabotse phošo ya ngwana e swarwa bjang? (b) Ke karolo efe yeo bagolo ba phuthego ba bago le yona maemong a bjalo?

²¹ Batswadi ba Bakriste le bona ba na le boikarabelo bjo bogolo bja go laya le go kgalema bana ba bona, ba bee dithibelo lege e le dife goba ba ba otle ka tsela yeo e bontšhago lerato ge e ba ba bona gore go a nyakega. (Ba-Efeso 6:4; Ba-Hebere 12:8, 9; Diema 3:11, 12; 22:15) Lega go le bjalo, ge e ba ngwana o monyenyane yo a bego a kopanela e le mogoeledi yo a sa kolobetšwago a dira phošo e kgolo, seo se kgoma bagolo bao ba ‘hlokomelago meoya’ ya mohlape.—Ba-Hebere 13:17.

²² Ka kakaretšo, diphošo tse bjalo di swanetše go hlokomelwa go etša ge go bontšhitšwe pele sehlogong se. Bagolo ba babedi ba ka abelwa gore ba hlahlobe taba yeo. Ka mohlala, mo gongwe ba ka boledišana le batswadi (goba motswadi) ka seo se diregilego, ka boitshwaro bja ngwana, le ka megato ya go phošolla yeo e gatilwego. (Bapiša le Doiteronomio 21:18-21.) Ge e ba batswadi ba Bakriste ba hlokometše boemo, gona bagolo ba ka fo bonana le bona nako le nako gore ba nee keletšo e thušago, dikakanyo le kgothatšo e lerato.

²³ Lega go le bjalo, ka dinako tše dingwe poledišano ya bona le batswadi e bontšha gore go be go tla ba kaone gore bagolo ba kopane le ngwana yo a sa kwego le batswadi. Gaešita lege balebeledi ba gopola mellwane le ditshekamelo tša bafsa, ba tla katanela go ruta mogoeledi o mofsa yo a sa kolobetšwago ka bonolo. (2 Timotheo 2:22-26) Mabakeng a mangwe, mo gongwe go ka ba molaleng gore ga a sa swanelega e le mogoeledi le gore tsebišo e swanelago e swanetše go dirwa.

24. (a) Gaešita lege ngwana a bile le karolo phošong e kgolo, ke’ng seo batswadi ba swanetšego go se dira, gomme ba ka fihlelela se bjang? (b) Se se tla dira bjang go ngwana yo a kgaotšwego?

²⁴ Ka morago ga moo, ke’ng seo batswadi ba tlago go se dira go thuša ngwana wa bona e monyenyane yo a dirilego phošo? Ba sa dutše ba ikarabela ka ngwana wa bona, gaešita lege a se sa hlwa a swanelega e le mogoeledi yo a sa kolobetšwago goba gaešita lege a kgaotšwe ka baka la go dira phošo ka morago ga kolobetšo. Go swana lege ba tla tšwela pele ba mo nea dijo, diaparo le lefelo la bodulo, ba swanetše go mo hlahla le go mo laya ka go dumelelana le Lentšu la Modimo. (Diema 6:20-22; 29:17) Ka gona batswadi ba nago le lerato mo gongwe ba ka rulaganya gore ba sware thuto ya Beibele ya legae le yena, gaešita lege a kgaotšwe.f Mo gongwe o tla holega kudu ka tsela yeo e tlago go mo phošolla ge ba ithuta le yena a nnoši. Goba mo gongwe ba ka phetha ka gore a ka tšwela pele a e-ba le karolo thulaganyong ya thuto ya lapa. Gaešita lege a fapogile, ba nyaka go mmona a boela go Jehofa, bjalo ka ge go dirile morwa wa lehlaswa wa seswantšhong sa Jesu.—Luka 15:11-24.

25. Ke ka baka la’ng tlhokomelo e lerato le thuso di lebišwa go “ba ba sa dumelexo” lehono?

²⁵ Pakane ya go bolela ga rena le go ruta ke go thuša ba bangwe gore ba be barapedi ba thabilego ba Modimo wa therešo. ‘Batho ba sa dumelego le batho feela’ kua Korinthe ba ile ba tutueletšwa go ‘khunama gomme ba rapele Modimo,’ ba bolela gore: “Ruri, Modimo ó na le lena.” (1 Ba-Korinthe 14:25) Ke lethabo le le kaakang lehono go bona batho ba oketšegago ba e-tla go rapela Modimo! Se ke phethagalo e kgahlišago ya tsebišo ya barongwa e rego: “Tumišô a e yê xo Modimo maxodimo-dimong, lefaseng xo bê le khutšô, kxahlišô bathong [goba batho ba amogelwago ke Modimo].”—Luka 2:14.

[Mengwalo ya tlase]

Na o a Gopola?

◻ Pono ya Bakriste ke efe malebana le “bao ba sa dumelego” bao ba bago gona dibokeng?

◻ Ge morutwana wa Beibele a nyaka go ba le karolo tirelong ya tšhemo, ke megato efe yeo bagolo ba swanetšego go e latela, gomme ke boikarabelo bofe bjoo morutwana a bo amogelago?

◻ Ke’ng seo se dirwago ge e ba mogoeledi yo a se a kolobetšwago a dira sebe se segolo?

◻ Ke bjang batswadi le bagolo ba ka thušago bana ba banyenyane bao ba dulago gae, gaešita lege bafsa ba bjalo ba dira diphošo tse dikgolo?

[Seswantšho go letlakala 16]

Go ba mogoeledi gaešita lege o se wa hlwa o kolobetšwa ke mogato o bohlokwa le wa boikarabelo gore o tle o amogelwe ke Modimo