molato wa go dira gore lentšu la Modimo le nyatšege ka baka la moetlo wa bona le go ruta “thutô ya ma-laya-batho.” (Mateo 15:​1, 6, 9) Ga go makatše ge Jesu goba barutiwa ba gagwe ba be ba se ba rutwa dikolong tša bo-rabi.​—Johane 7:​14, 15; Ditiro 4:​13; 22:3.

20. Ke’ng seo tlhahlobo ye ya thuto mehleng ya Beibele e re bontšhitšego sona, gomme ke’ng seo se bontšhago gore bahlanka ba Jehofa ba nyaka thuto?

²⁰ Kakaretšo ye ya thuto mehleng ya Beibele e bontšhitše gore Jehofa ke Morutiši yo Mogolo wa batho ba gagwe. Ka Moše, Modimo o ile a rulaganya tshepedišo e atlegago ya thuto Isiraeleng. Eupja ka morago ga nako e telele, tshepedišo ya thuto e phagamego ya Sejuda yeo e bego e ruta dilo tše di ganetšanago le Lentšu la Modimo e ile ya tšwelela. Gaešita lege Jesu a se a ka a tsena dikolo tše bjalo tša Sejuda, lega go le bjalo o be a se na yo a ka bapetšwago le yena bjalo ka Morutiši. (Mateo 7:​28, 29; 23:8; Johane 13:​13) Le gona o ile a laela barutiwa ba gagwe gore ba rute gaešita le go fihla bofelong bja tshepedišo ya dilo. (Mateo 28:​19, 20) Gore ba dire se, ba be ba swanetše go ba barutiši ba babotse gomme ka go rialo se se be se tla nyaka thuto. Ka gona Bakriste ba therešo ba swanetše go lebelela thuto bjang lehono? Potšišo ye e tla hlahlobja sehlogong se se latelago.

Tlhahlobo ya ge e ba o sa Gopola

◻ Ke ka baka la’ng re ka kgonthišega gore Jehofa o kgomega ka thuto ya bahlanka ba gagwe?

◻ Ke ka ditsela dife tshepedišo ya thuto ya Isiraele e bego e fapana le ya ditšhaba tše dingwe?

◻ Ke thuto efe yeo bana ba Isiraele ba ilego ba e hwetša?

◻ Ke mekgwa efe ya go ruta yeo e bego e dirišwa Isiraeleng?

◻ Ke ka baka la’ng Jesu le barutiwa ba gagwe ba sa ka ba ya dikolong tša thuto e phagamego tša Sejuda?

Thuto Yeo e Nago le Morero

“Ruta yo bohlale a tšwêlêle pele bohlaleng. Ruta moloki a ekeletšwê tsebô.”​—DIEMA 9:9.

1. Jehofa o letetše’ng go bahlanka ba gagwe ge e le ka tsebo?

JEHOFA ke “Modimo wa tsebo.” (1 Samuele 2:3, NW) O ruta bahlanka ba gagwe. Moše o boletše e sa pele gore ditšhaba tšeo di bego di tla phela mehleng ya ba-Isiraele di be di tla re: “Ruri sethšaba se sexolo sé ké se bohlale, sa thlaoloxanyô!” (Doiteronomio 4:6) Bakriste ba therešo le bona ba swanetše go ba le tsebo. Ba swanetše go ba barutwana ba ba kgonago kudu ba Lentšu la Modimo. Moapostola Paulo ge a bontšha morero wa thuto e bjalo, o ngwadilwe gore: “Rena, . . . xa re kxaotše xo Le rapêlêla le xo Le kxopêlêla xore Le tlatšwê tsebô ya xo tseba thatô ya xaxwe, Le bê le bohlale ka moka le thlaoloxanyô ya Môya. Re le rapêlêla xore Le swarê ka tsela ye e loketšexo ba Morêna, e bê xo mo kxahla xohle, le xo enywa dienywa ka medirô e botse yohle, la tšwêlêla pele tsebong [“e nepagetšego”, NW] ya xo tseba Modimo.”​—Ba-Kolose 1:​9, 10.

2. (a) Go nyakega eng gore go hwetšwe tsebo e nepagetšego ya go tseba Modimo? (b) Sehlopha se Bušago sa Dihlatse tša Jehofa se ile sa swara taba ye bjang?

² Go ithuta ka morero wa go hwetša tsebo e nepagetšego ya go tseba Modimo le merero ya gagwe go nyaka bonyenyane tekanyo e nyenyane ya thuto. Eupja batho ba bantši bao ba ithutilego therešo ya Lentšu la Modimo ba phela dinageng tšeo go tšona ba bilego le sebaka se senyenyane sa go hwetša thuto e swanetšego ya lefase goba ba sa kago ba ba le sona. Ba hlokile mahlatse. E le gore go fenywe bothata bjoo, Sehlopha se Bušago sa Dihlatse tša Jehofa ka nywaga e mentši go fihla gona bjale se ile sa laela gore mo go nyakegago, go rulaganywe diklase tša bao ba sa kgonego go ngwala le go bala ka diphuthegong. Nywageng e fetago e 30 e fetilego, kuranta ya Brazil ya Diário de Mogi, e ile ya gatiša sehlogo se se rego: “Dihlatse tša Jehofa di Lwantša go se Kgone go Bala le go Ngwala.” E itše: “Morutiši yo a swanelegago o itokišetša . . . go ruta bangwe go bala le go ngwala a sa fele pelo. . . . Barutwana, ka baka la maemo ao a tlogago a ba gapeletša gore e be badiredi ba Modimo, ba swanetše go godiša tsebo ya bona ya leleme e le gore ba tle ba nee dipolelo.” Batho ba dikete lefaseng ka moka ba dirilwe gore ba kgone go ba barutwana ba babotse ba Lentšu la Modimo ka tsela yeo. Ba ile ba tsenela thuto ye ya motheo ba nagana ka morero o phagamego.

Bokgoni bjo bo Nyakegago bja go ba Badiredi ba Atlegago

3, 4. (a) Ke ka baka la’ng Bakriste ba therešo ba kgahlegela thuto? (b) Boemo e be e le bofe Isiraeleng, gomme ke thuto efe ya motheo yeo e lego ya bohlokwa kudu ka diphuthegong tša rena lehono?

³ Bakriste ba therešo ba kgahlegela thuto, e sego ka baka la go kgahlwa ke go fo rutega, eupja e le gore e tle e be bahlanka ba atlegago kudu ba Jehofa. Kriste o neile Bakriste ka moka thomo ya ‘go dira ditšhaba ka moka barutiwa . . . le go ba ruta go boloka tšohle tše ke le laetšego tšona.’ (Mateo 28:​19, 20) Gore ba tle ba rute ba bangwe, bona ka noši ba swanetše go ithuta pele, gomme se se nyaka mekgwa e mebotse ya go ithuta. Ba swanetše go kgona go hlahlobišiša Mangwalo ka kelohloko. (Ditiro 17:11) Gore ba phethe thomo ya bona, ba bile ba swanetše go kgona go bala ka go ela.​—Bona Habakuku 2:2, NW; 1 Timotheo 4:13.

⁴ Bjalo ka ge re bone sehlogong se se fetilego, go na le lebaka le lebotse la go dumela gore ka kakaretšo, gaešita le bana Isiraeleng ya bogologolo ba be ba kgona go bala le go ngwala. (Baahlodi 8:14; Jesaya 10:19) Badiredi ba Bakriste lehono ba swanetše go ngwala dintlha gabotse ge ba dutše ba sepela ka ntlo le ntlo. Ba ngwala mangwalo, ba ngwala dintlha dibokeng le go ngwala dintlha tšeo di hlalosago tabeng yeo ba ithutago yona. Tše ka moka di nyaka mongwalo o balegago. Go boloka dipego ka phuthegong ya Bokriste go nyaka bonyenyane thuto ya motheo ya dipalo.

Mehola ya go Tsena Sekolo ka Tshwanelo

5. (a) Lentšu “sekolo” le tšwa kae? (b) Bafsa ba swanetše go diriša sebaka sefe ka mo go holago?

⁵ Seo se kgahlišago ke gore lentšu “sekolo” le tšwa lentšung la Segerika la skho·leʹ, leo mathomong le bego le bolela “boiketlo” goba go dirišetša nako ya boiketlo modirong o itšego wa bohlokwa, go swana le go ithuta. Ka morago le ile la thoma go šupa lefelo leo thuto e bjalo e ithutwago go lona. Se se bontšha gore ka nako e nngwe, sehlopha feela sa batho ba kgethegilego​—kua Gerika le dinageng tše dintši—​ba be ba e-na le nako ya go ithuta. Sehlopha sa bao ba bego ba šoma ka kakaretšo se be se sa rutega. Lehono, dinageng tše dintši bana le bafsa ba fiwa sebaka sa go ithuta. Bafsa ba Dihlatse ruri ba swanetše go thakanela sebaka sa go ithuta gore ba tle ba be bahlanka ba nago le tsebo le bokgoni ba Jehofa.​—Ba-Efeso 5:​15, 16.

6, 7. (a) Mehola e mengwe ya go tsena sekolo ka tshwanelo ke efe? (b) Ke ka ditsela dife go ithuta leleme le šele e ka bago mo go holago? (c) Boemo ke bofe lehono go bafsa ba bantši ge ba fetša sekolo?

⁶ Tsebo ya motheo ya histori, thutafase, thutamahlale le tše dingwe, e tla dira gore bafsa ba Dihlatse ba kgone go ba badiredi ba leka-lekanego. Go tsena ga bona sekolo go tla ba ruta e sego feela dithuto tše dintši, eupja gape le mokgwa wa go ithuta. Bakriste ba kgonthe ga ba kgaotše go ithuta ge ba tlogela sekolo. Lega go le bjalo, seo ba se hwetšago dithutong tša bona se tla ithekga kudu ka go tseba ga bona mokgwa wa go ithuta. Go tsena sekolo sa lefase le sa ka phuthegong go ka ba thuša gore ba godiše bokgoni bja bona bja go nagana. (Diema 5:​1, 2) Ge ba bala, ba tla kgona gakaone go lemoga seo e lego sa bohlokwa, seo se nyakago go elwa hloko le go swarwa ka hlogo.

⁷ Ka mohlala, go ithuta leleme le šele go ka se godiše feela matla a bafsa a monagano, eupja gape go tla ba dira ba nago le mohola kudu mokgatlong wa Jehofa. Makaleng a mangwe a Mokgatlo wa Watch Tower banababo rena ba bantšinyana ba bafsa ba hweditše go kgona go bolela le go bala Seisemane ka go ela e le mo go holago. Go feta moo, badiredi ka moka ba Bakriste ba swanetše go katanela go ba bao ba kgonago leleme la bona. Ditaba tše di lokilego tša Mmušo di swanetše go bolelwa ka mokgwa o kwalago le wo o nepagetšego go ya ka popopolelo. Ditherešo di bontšha gore lehono bafsa ba bantši ge ba fetša sekolo ba sa dutše ba na le bothata bja go ngwala le go bolela ka mo go nepagetšego le go šoma gaešita le dipalo tše bonolo-nolo; le gona ba na le tsebo e sa tsepamago kudu ya histori le thuta­fase.

Thuto e Lekanego

8. Ke mangwalo afe ao a gokaganago le taba ya thuto ya lefase le bokgoni bja motho bja go iphepa?

⁸ Ka gona, ye e bonala e le nako e swanetšego ya go hlahloba pono ya Mokriste mabapi le thuto ya lefase. Ke melao efe ya motheo yeo e tsenago tabeng ye? Sa pele, dinageng tše dintši go ikokobeletša “Kesara” ka mo go swanetšego go nyaka gore batswadi ba romele bana ba bona sekolong. (Mareka 12:17; Tito 3:1) Ge e le ka bafsa ba Dihlatse, mošomong wa bona wa sekolo ba swanetše go gopola Ba-Kolose 3:​23, yeo e rego: “Ka moka tše Le di diraxo, Le di dirê ka pelo e rataxo, e ke Le dirêla Modimo, e sexo batho.” Molao wa bobedi wa motheo woo o akaretšwago ke gore Bakriste ba swanetše go kgona go iphepa, gaešita lege e le badiredi ba babulamadibogo ba nako e tletšego. (2 Ba-Thesalonika 3:​10-12) Ge e ba a nyetše, monna o swanetše go kgona go hlokomela mosadi wa gagwe gabotse le bana lege e le bafe bao ba ka belegwago, a e-ba le se sengwe se se šalelago go ka newa bahloki le go thekga modiro wa boboledi lefelong la gabo le wa lefase ka bophara.​—Ba-Efeso 4:28; 1 Timotheo 5:8.

9, 10. (a) Ke’ng seo se bonalago e le mokgwa dinageng tše dintši? (b) Ke eng seo modiredi wa mmulamadibogo a ka se lebelelago e le moputso o lekanego?

⁹ Mofsa wa Mokriste o nyaka thuto e kaaka’ng gore a hlomphe melao ye ya motheo ya Bokriste le go phetha boikarabelo bja gagwe bja Bokriste? Se se fapana go ya ka dinaga. Lega go le bjalo, ka kakaretšo go bonala mokgwa wo o tlwaetšwego dinageng tše dintši e le wa gore tekanyetšo ya go tsena sekolo yeo e nyakegago go hwetša moputso o mobotse ke e phagamego kudu mo nakong ye go feta nywaga e sego kae e fetilego. Dipego tšeo di amogetšwego go tšwa makaleng a Mokgatlo wa Watch Tower dikarolong tše di fapa-fapanego tša lefase di bontšha gore mafelong a mantši go thata go hwetša mediro e lefago gabotse ka morago ga go tsena sekolo ganyenyane mo go nyakwago ke molao goba dinageng tše dingwe gaešita le ka morago ga go fetša sekolong sa sekontari goba se se phagamego.

¹⁰ Ke’ng seo se bolelwago ke “moputso o mobotse”? Ga o šupe mediro yeo e lefago tšhelete e ntši. Webster’s Dictionary e hlalosa “botse” boemong bjo e le “lekanego, kgotsofatšago.” Ka mohlala, ke eng seo go ka thwego ke se se “lekanego” go bao ba kganyogago go ba badiredi ba ditaba tše di lokilego ba babulamadibogo? Ba bjalo gantši ba nyaka modiro wa nakwana go phema go rweša banababo rena le malapa a gabo bona ‘boima.’ (1 Ba-Thesalonika 2:9) Meputso ya bona go ka thwe ke e “lekanego,” goba e “kgotsofatšago,” ge e ba seo ba se hwetšago se ba thuša go phela gabotse mola se ba tlogelela nako e lekanego le matla bakeng sa go phetha bodiredi bja bona bja Bokriste.

11. Ke ka baka la’ng bafsa ba bangwe ba tlogetše tirelo ya bobulamadibogo, gomme ke potšišo efe yeo e botšišwago?

¹¹ Boemo gantši ke bofe lehono? Go begilwe gore dinageng tše dingwe bafsa ba bantši bao ba bego ba e-na le maikemišetšo a mabotse ba tlogetše sekolo ka morago ga go fetša thuto e nyenyane e nyakegago e le gore e tle e be babulamadibogo. Ba be ba se na modiro wa diatla wo ba o kgonago goba ditshwanelo tša modiro wa boiphedišo. Ge e ba ba be ba sa thušwe ke batswadi ba bona ka tša ditšhelete, gona ba be ba swanelwa ke go hwetša modiro wa nakwana. Ba bangwe ba ile ba swanelwa ke go amogela mediro yeo e bego e ba nyaka gore ba šome diiri tše dintši gore ba hwetše tšhelete e lekanego ya go iphediša. Ka go ikwa ba lapa mmele, ba ile ba kgaotša bodiredi bja bobulamadibogo. Batho ba bjalo ba ka dira’ng gore ba itlhokomele ka tša ditšhelete gomme ba boele tirelong ya bobulamadibogo?

Pono e Leka-lekanego ka Thuto

12. (a) Mabapi le thuto, ke dipono dife tše pedi tšeo di feteletšego tšeo Mokriste a tlago go di phema? (b) Go bahlanka ba ineetšego ba Jehofa le bana ba bona, ke morero ofe woo thuto e swanetšego go o phetha?

¹² Pono e leka-lekanego ka thuto e ka thuša. Go bafsa ba bantši ba lefase, thuto ke sešupo sa maemo a phagamego, selo seo se ka ba thušago go namelela maemong a phagamego go tša leago, tsela ya go iša mokgweng wa go phela wa katlego le wa go ba le dilo tše di bonagalago. Go ba bangwe go tsena sekolo ke modiro wo e lego kgwara wo o swanetšego go fetšwa ka pela ka mo go ka kgonegago. Ga go le e tee ya dipono tše yeo e lego e swanetšego go Bakriste ba therešo. Bjale, ke’ng seo mo gongwe go ka thwego ke “pono e leka-lekanego”? Bakriste ba swanetše go lebelela thuto e le tsela ya go fihlelela selo se itšego. Mehleng ye ya bofelo, morero wa bona o mogolo ke go hlankela Jehofa ka matla le ka katlego ka mo go ka kgonegago ka gona. Ge e ba nageng yeo ba dulago go yona, thuto e nyenyane ka mo go lekanego goba gaešita le ya sekolong se se phagamego e tla ba dumelela feela gore ba hwetše mediro e neago moputso wo o sa lekanago bakeng sa go itlhokomela ka tša ditšhelete e le babulamadibogo, gona go ka naganwa ka thuto goba tlwaetšo ya tlaleletšo. Se se tla dirwa ka pakane e kgethegilego ya go ba tirelong ya nako e tle­tšego.

13. (a) Kgaetšedi o mongwe kua Philippines o ile a kgona bjang go tšwela pele ka tirelo ya gagwe ya bobulamadibogo mola a dutše a phetha boikarabelo bja gagwe bja lapa? (b) Ke temošo efe yeo e lego nakong?

¹³ Ba bangwe ba tšere dithuto tša tlwaetšo tše di ilego tša bula dibaka tša go hwetša mediro yeo e ba dirago gore ba kgone go tsenela goba go boela tirelong ya nako e tletšego. Kgaetšedi o mongwe kua Philippines e be e le yena a hlokomelago lapa, eupja o be a nyaka go bula madibogo. Lekala le a bega: “O kgonne go dira se ka gobane a hweditše thuto e oketšegilego ya gore a swanelegele go ba mmalamatlotlo yo a nago le mangwalo wa setšhaba.” Lekala lona leo le bega gore: “Re na le ba bantšinyana bao ba ithutago mola ka nako e swanago ba kgonne go beakanya dithulaganyo tša bona gore ba bule madibogo. Gantši ba fetoga bagoeledi ba bakaone ka ge e le bao ba ithutago kudu, ge feela e sa be bao ba fišegelago ka mo go feteletšego dilo tšeo di phegelelwago ke lefase.” Mantšu a a mafelelo a swanetše go re nea lebaka la go naganišiša. Morero wa thuto e oketšegilego, moo se se bonalago se nyakega, ga se wa swanela go lebalwa goba go fetošetšwa pakaneng ya go phegelela dilo tše bonagalago.

14, 15. (a) Ke ka baka la’ng go sa swanela gore go dirwe melao e sa fetogego mabapi le thuto? (b) Banababo rena ba bangwe ba hweditše thuto efe ya lefase, eupja ba boetšwe ke’ng ka baka la yona?

¹⁴ Dinageng tše sego kae, dikolo tša sekontari di nea tlwaetšo ya go ithutela mediro yeo e ka hlamelago Mokriste yo e lego mofsa mošomo o itšego nakong ya ge a feditše sekolo. Gaešita lege se se se bjalo, dinageng tše dingwe bafsa ba mafolofolo bao ba nago le thuto ya motheo feela, ba hwetša modiro wa nakwana wo o ba dirago gore ba kgone go hwetša moputso o lekanego wa gore ba bule madibogo. Ka gona, ga go na melao e sa fetogego e swanetšego go dirwa bakeng sa go thekga goba go ganetša thuto e oketšegilego.

¹⁵ Ba bantši bao mo nakong ye ba hlankelago maemong a boikarabelo e le balebeledi ba basepedi, bao ba hlankelago ntlong-kgolo ya Mokgatlo goba go lengwe la makala ba be ba e-na le thuto ya motheo feela. E be e le babulamadibogo ba botegago, ga se ba ka ba kgaotša go ithuta le ka mohla, ba ile ba amogela tlwaetšo gomme ba gafelwa boikarabelo bjo bogolo. Ga ba itshole. Ka lehlakoreng lengwe, ba bangwe ba dithaka tša bona ba kgethile thuto ya yunibesithi gomme ba se sa hlwa ba tšwela pele moyeng, ba fekeetšwa ke difilosofi tšeo di senyago tumelo le “bohlale bya lefase leno.”​—1 Ba-Korinthe 1:​19-21; 3:​19, 20; Ba-Kolose 2:8.

Go Bala Ditshenyagalelo

16. (a) Ke mang yo a dirago phetho ya ge e ba thuto e oketšegilego e nyakega, gomme ke eng seo go swanetšego go naganwa kudu ka sona? (b) Ke’ng seo se swanetšego go elwa hloko?

¹⁶ Ke mang yo a dirago phetho ya ge e ba mofsa wa Mokriste a swanetše go tsenela thuto e oketšegilego goba tlwaetšo? Mo ke moo molao wa motheo wa Beibele wa bohlogo o tsenago tabeng. (1 Ba-Korinthe 11:3; Ba-Efeso 6:1) Motheong wo, batswadi ruri ba tla rata go hlahla bana ba bona kgethong ya modiro gomme mafelelong le go ba nea tlhahlo ge e le ka bogolo bja thuto yeo e tlago go nyakega. Dinageng tše dintši go kgetha thuto le mošomo go swanetše go dirwa e sa le ka pela nakong ya thuto ya sekontari. Yeo ke nako yeo ka yona batswadi ba Bakriste le bafsa ba swanetšego go tsoma tlhahlo ya Jehofa go direng kgetho e bohlale, ba nagana kudu ka dikgahlego tša Mmušo. Bafsa ba na le ditshekamelo tše sa swanego le bokgoni. Batswadi ba bohlale ba tla ela se hloko. Mediro ka moka e dirwago ka potego e a hlomphega, go sa šetšwe gore ke wa go šoma ka thata ka diatla goba wa ka ofising. Gaešita lege lefase mo gongwe le ka phagamiša modiro wa ka ofising gomme la nyatša go šoma ka thata ga motho ka diatla tša gagwe, Beibele ruri ga e dire bjalo. (Ditiro 18:3) Ka gona ge batswadi le Bakriste ba e lego bafsa lehono, ka morago ga go hlahloba mehola le mathata ka kelohloko le ka thapelo, ba kgetha dithuto tša ka morago ga thuto ya sekontari goba ba di gana, ba bangwe ka phuthegong ga se ba swanela go ba swaya diphošo.

17. Ke kgetho efe yeo batswadi ba bangwe ba Dihlatse ba swanetšego go e direla bana ba bona?

¹⁷ Ge e ba batswadi ba Bakriste ka tsela ya go ikarabela ba kgetha go nea bana ba bona thuto e oketšegilego ka morago ga thuto ya sekolo se se phagamego, seo ke kgetho ya bona. Botelele bja nako ya dithuto tše bo tla fapana go ya ka mohuta wa modiro wo o kgethilwego. Ka baka la mabaka a tša ditšhelete le go dira gore bana ba bona ba kgone go ba tirelong ya nako e tletšego kapejana ka mo go ka kgonegago ka gona, batswadi ba bantši ba Bakriste ba ile ba ba kgethela mananeo a thuto a tšeago nako e kopana dikolong tša go ithutela modiro wa botsebi goba tša thekhinikhale. Mabakeng a mangwe bafsa ba ile ba nyaka go thwalelwa go ithuta modiro o itšego eupja ka mehla ba e-na le pakane ya go hlankela Jehofa bophelo ka moka.

18. Ge e ba dithuto tše di oketšegilego di tšewa, ke’ng seo se swanetšego go gopolwa?

¹⁸ Ge e ba dithuto tše oketšegilego di ithutwa, maikemišetšo ga se a swanela go ba a go phagamela ba bangwe ka thuto ya sekolo goba go katanela modiro wa bophelo ka moka wa maemo wa lefase. Dithuto di swanetše go kgethwa ka kelohloko. Makasine wo o gateletše dikotsi tša thuto e phagamego, gomme o dirile bjalo ka tshwanelo ka gobane karolo e kgolo ya thuto e phagamego yeo e lego gona e ganetšana le “thutô e phedilexo” ya Beibele. (Tito 2:1; 1 Timotheo 6:​20, 21) Le gona, ga e sa le go tloga ka bo-1960, dikolo tše dintši tša thuto e phagamego di fetogile lefelo le le hlohleletšago go hloka molao le boitshwaro bjo bo gobogilego. “Molaki e a bôtêxaxo le yo bohlale” o ile a tloga a sa kgothaletše go tsena boemong bja mohuta woo. (Mateo 24:​12, 45) Lega go le bjalo, go swanetše go dumelwe gore bafsa ba bantši mehleng yeno ba gahlane le dikotsi tšona tšeo dikolong tše phagamego, dikholetšheng tša thekhinikhale gaešita le lefelong la mošomo.​—1 Johane 5:19.a

19. (a) Ke megato efe ya tšhireletšo yeo e swanetšego go gatwa ke bao ba kgethago go tšea dithuto tša tlaleletšo? (b) Ba bangwe ba dirišitše bjang thuto ya bona ka mo go holago?

¹⁹ Ge e ba phetho e le ya gore go nyakega thuto e oketšegilego, mofsa wa Hlatse o tla dira gabotse gore ge e ba go kgonega a dire se mola a sa dutše a dula ka gae, ka rialo a kgona go kgomarela mokgwa wo o tlwaetšwego wa go ithuta wa Mokriste, wa go ba gona dibokeng le modirong wa boboledi. Di sa tloga fase, boemo bjo bo swanetšego le bjona bo swanetše go tšewa bo theilwe melaong ya motheo ya Beibele. Go swanetše go gopolwe gore Daniele le bagwera ba gagwe ba bararo ba ba-Hebere ba be ba le bothopjeng ge ba gapeletšwa go tšwetša dithuto tša bona pele kua Babele, eupja ba ile ba kgomarela potego ya bona ka go tsepama. (Daniele, kgaolo 1) Mola ba etiša dikgahlego tša mmušo pele, bafsa ba Dihlatse dinageng tše dintši ba tšere dithuto tše bjalo e le gore ba itlhamele modiro wa nakwana e le bo-mmalamatlotlo, ditsebi tša mošomo wa diatla, barutiši, bafetoledi, bahlatholodi goba mediro e mengwe ye e ba thekgilego ka mo go lekanego ka tša ditšhelete modirong wa bona o mogolo wa bophelo ka moka wa bobulamadibogo. (Mateo 6:​33) Ba bantši ba bafsa ba ka morago ba ile ba ba balebeledi ba basepedi goba baithapi ba Bethele.

Batho ba Nago le Botee le Bao ba Rutegilego

20. Ke kgethologanyo efe ya lefase yeo e sa nyakegego gare ga batho ba Jehofa?

²⁰ Go batho ba Jehofa, go sa šetšwe gore modiro wa motho ke wa ka ofising goba wa go šoma ka thata ka diatla, temo goba go direla batho mešongwana e itšego, ka moka ba swanetše go ba barutwana ba babotse ba Beibele le barutiši bao ba nago le bokgoni. Bokgoni bjo bo hwetšwago ke bohle ka go bala, go ithuta le go ruta bo bonala bo tloša kgethologanyo yeo lefase le e dirago magareng ga bašomi ba šomago ka thata ka diatla le ba ka ofising. Se se feleletša ka botee le tlhomphano tšeo di bonagalago ka mo go kgethegilego go bašomi ba baithapi magaeng a Bethele le mafelong a moago a Mokgatlo wa Watch Tower, moo dika tša moya e lego tša bohlokwa kudu gomme di nyakegago go bohle. Mo, bašomi bao ba nago le phihlelo ya mošomo wa ka ofising ba šomišana ka lethabo le bašomi ba šomago ka thata ka diatla bao ba nago le bokgoni, ka moka ba bontšhana lerato leo le nago le tebogo.​—Johane 13:​34, 35; Ba-Filipi 2:​1-4.

21. Pakane ya bafsa ba Bakriste e swanetše go ba efe?

²¹ Batswadi, hlahlang bana ba lena go leba dipakaneng tša go ba ditho tše di holago tša lekoko la lefase le lefsa! Bafsa ba Bakriste, dirišang dibaka tša lena tša thuto e le tsela ya go itlhamela go ngaparela ka go tia ditokelong tša lena tša go hlankela Jehofa! Ka go ba bao ba rutegilego, eka le ka ipontšha le le ditho tše di hlamilwego gabotse tša lekoko la pušo ya legodimo gona bjale le ka mo go sa felego ‘lefaseng le lefsa’ la Modimo leo le holofeditšwego.​—2 Petro 3:13; Jesaya 50:4; 54:13; 1 Ba-Korinthe 2:13.

[Mongwalo wa tlase]

Itlhahlobe ge e ba o sa Gopola

◻ Ke ka ba’ka la’ng Bakriste ba e-na le kgahlego ka thuto?

◻ Ke dipono dife tšeo di feteletšego ka thuto tšeo Bakriste ba therešo ba tlago go di phema?

◻ Ke dikotsi dife tša thuto e oketšegilego tšeo di swanetšego go elwa hloko, gomme ke megato efe ya tšhireletšo yeo e swanetšego go ­gatwa?

◻ Ke kgethologanyo efe ya lefase yeo e sa nyakegego gare ga batho ba Jehofa?

[Seswantšho go letlakala 16]

Ka go ithuta ka mafolofolo, bafsa ba Bakriste ba ka fetoga ditho tšeo di nago le mohola kudu tša lekoko la lefase lefsa

[Seswantšho go letlakala 19]

Ge e ba thuto e oketšegilego e kgethwa, gona e swanetše go tutuetšwa ke kganyogo ya go hlankela Jehofa gakaone

Motho yo a Rutegilego

“BANA bešo! Bônang ka mo Le biditšwexo ka xôna. Mo xo lena xa xo ba bantši ba bohlale ka nama; xa xo ba bantši ba baxolo; xa xo ba bantši ba meloko ya boxoši.” (1 Ba-Korinthe 1:​26) Go etša ge mantšu a a bontšha, go na le kotsi go nweleleng bohlaleng bja lefase goba go ba maemong a phagamego setšhabeng. Dilo tše di bjalo di ka ba tšhitišo go amogeleng ga motho ditaba tše di lokilego.​—Diema 16:5; Mareka 10:25.

Lega go le bjalo, ba bangwe mehleng ya Paulo bao ba bego ba le bohlale ka tsela ya nama ba ile ba amogela therešo, gomme o mongwe wa ba ke Paulo ka noši. A rutegile kudu, a bile a bonala a be a e-tšwa lapeng leo le tumilego, Paulo e be e le moebangedi yo mafolofolo. Ka tsela yeo o bontšhitše gore batho ba atlegilego lefaseng le ba ka hlankela Jehofa ge e ba dipelo tša bona di lokile. Ba ka ba ba diriša bokgoni bjo ba ithutilego bjona lefaseng tirelong ya Jehofa.​—Luka 16:9.

Modudi wa Setlogo wa Tareso

Paulo o belegetšwe Tareso, e lego ‘motseng woo o tsebjago,’ ka ge a ile a o hlalosa bjalo ka morago. (Ditiro 21:39) Mohlomongwe ke gona moo a ilego a hwetša tsebo ya maleme​—kudu-kudu bokgoni bja Segerika—​tsebo yeo e bego e le ya bohlokwa-hlokwa modirong wa gagwe wa boromiwa. Bophelo bja kua Tareso bo swanetše go ba bo se bja tlwaelanya Paulo le ditsela tša Sejuda feela eupja gape le ditlogo tša Ba-ntle, e lego phihlelo yeo a e dirišitšego nywageng ya ka morago e le moapostola ditšhabeng. O be a kgona go hlalosa therešo ka tsela yeo ba bego ba ka e kwešiša. (1 Ba-Korinthe 9:21) Ka mohlala, ela hloko polelo ya gagwe go ba-Athene yeo e ngwadilwego go Ditiro kgaolo 17. Moo o ile a logelela ka bohlale ditšhupetšo tše di bolelago ka bodumedi