wa Modimo wo ba o neilwego’ ba nyaka go dira seo Petro a se boletšego, e lego gore, ‘ba se itire babuši ba diphuthego.’ (1 Petro 5:​2, 3) Ge ba dutše ba dira modiro wa bona wo o dirwago ka lerato, go ka rotoga dipotšišo ditabeng tšeo go tšona go ka bago go e-na le boikgethelo bjo bo sa swanego. Mo gongwe ke mokgwa wa lefelong le itšego go ema bakeng sa go bala dirapa nakong ya Thuto ya Morokami. Dithulaganyo tša sehlopha tša tirelo ya tšhemo gotee le ditaba tše dingwe tše di lego mabapi le bodiredi di ka swarwa ka tsela e tlwaetšwego. Lega go le bjalo, na e be e tla ba selo se segolo ge e ba o mongwe a be a ka dira ka tsela e fapanego ganyenyane? Balebeledi ba ba nago le lerato ba kganyoga gore “tšohle di yê ka bothakxa le ka molaô,” e lego polelo yeo Paulo a e dirišitšego mabapi le dimpho tša mohlolo. Eupja moko wa taba o bontšha gore selo se segolo seo Paulo a bego a se tsoma e be e le go “axiša phuthêxô.” (1 Ba-Korinthe 14:​12, 40) Ga se a bonagala a rata go bea melao e mentši-ntši, bjalo ka ge o ka re o be a nyaka gore go be le go swana mo go feletšego goba gore go se be le phošo lege e ka ba e tee. O ngwadile gore: ‘Morena o re neile matla a go le agiša, e sego go le šwalalanya.’​—2 Ba-Korinthe 10:8.

23. Ditsela tše dingwe tšeo ka tšona re ka ekišago mohlala wa Paulo wa go aga ba bangwe ke dife?

²³ Paulo ka ntle le pelaelo o be a nyaka go aga ba bangwe ka dipolelo tše botse le tše di kgothatšago. Go e na le gore a be gotee le sehlopha se senyenyane feela sa bagwera, o ile a itapiša gore a etele banababo ba bantši le dikgaetšedi ba ba tiilego moyeng gotee le bao ba bego ba nyaka go agiwa. Le gona o ile a gatelela taba ya lerato​—e sego melao​—ka gobane “se se axišaxo ké lerato.”​—1 Ba-Korinthe 8:1.

Holwa ke Boithabišo le Bagwera, Eupja Phema Mereo ya Bjona

“Ga go se kaone go motho, ge e se go ja le go nwa, le go thabiša pelo ya gagwe ditapišegong tša gagwe.”​—MMOLEDI 2:​24, PK.

1. Ke ka ditsela dife tlhahlo ya Modimo e thušago batho ba gagwe mabapi le boithabišo?

TLHAHLO ya Jehofa e hola bahlanka ba gagwe ka mekgwa e mentši. Re kgona go bona se tabeng ya boithabišo. Tlhahlo ya gagwe e thuša Bakriste go phema go fetelela selong sefe goba sefe. Batho ba bangwe ba bodumedi bao ba phegelelago go gana dilo tše dintši go tša moaparo le boitshwaro, ba tšea gore boithabišo bjo bongwe le bjo bongwe ke sebe. Ka lehlakoreng le lengwe, batho ba bantši ba phegelela maipshino gaešita le ao a sa dumelelanego le melao le melao ya motheo ya Jehofa.​—Ba-Roma 1:​24-27; 13:​13, 14; Ba-Efeso 4:​17-19.

2. Ke’ng se se bontšhitšego pono ya mathomong ya Modimo ka boithabišo?

² Lega go le bjalo, na go thwe’ng ka batho ba Modimo? Batho ba bantši bao ba ithutago Beibele ba a makala ge ba e-kwa gore ge e le gabotse Modimo o bopile batho ka tsela ya gore ba ipshine ka bophelo. O neile batswadi ba rena ba mathomo mošomo​—eupja e sego mošomo wo o lapišago woo batho ba bantši ba ba sa phethegago ba phelago ka wona. (Genesi 1:​28-30) Anke o nagane ka ditsela tše dintši tše di lokilego tšeo ka tšona batho bao ba tlago go phela paradeiseng ya lefaseng ba ka ipshinago ka tšona. Nagana ka lethabo leo ba tlago go ba le lona ge ba bogetše diphoofolo tša lešoka tšeo di ka se kego tša ba hlasela gotee le mehuta-huta ya diruiwa tšeo ba tlago go phela le tšona ka mehla! Le gona ba tla ipshina gakaakang ka dijo tšeo di tšwago ‘dihlareng tšohle tše di kgahlišago ge di bonwa le tše bose ge di lewa.’​—Genesi 2:9; Mmoledi 2:24.

3-5. (a) Boithabišo bo swanetše go phetha morero ofe? (b) Ke ka baka la’ng re ka kgonthišega gore Modimo ga se a ka a ganetša ba-Isiraele go ithabiša?

³ Dilo tšeo ge e le gabotse di ka tšewa e le boithabišo, bjoo morero wa bjona Paradeiseng e tlago go ba o swanago le wa gona bjale: go lapološa motho le go mo nea matla a mafsa gore a kgone go tšweletša dilo tše di oketšegilego (go šoma). Ge boithabišo bo phethagatša se, e ba bjo bo holago. Na seo se bolela gore barapedi ba therešo ba ka ba le nako ya boithabišo bophelong bja bona gaešita lege ba sešo ba hlwa ba phela Paradeiseng? Ee. Insight on the Scriptures e bolela se mabapi le boithabišo bja batho ba Jehofa ba ­kgale:

⁴ “Mekgwa ya go thaba goba dilo tša ka thoko tšeo ba-Isiraele ba bego ba di dira ga di bolelwe kudu pegong ya Beibele. Lega go le bjalo, e di bontšha e le tšeo di bego di lebelelwa e le tše di lokilego le tše di kganyogegago ge e ba di be di dumelelana le melao ya bodumedi ya setšhaba. Boithabišo bjo bogolo e be e le go letša diletšo, go opela, go bina, go hlamula gaešita le go bapala dipapadi tše itšego. Go hlaba dinyepo le go botšiša dipotšišo tše thata go be go ratwa kudu.​—Baa 14:​12.”​—Volume 1, letlakala 102.

⁵ Ge Dafida a be a boa a fentše ntwa, basadi ba Bahebere ba ile ba bina (Sehebere, sa·chaqʹ) ka meropa le diletšo. (1 Samuele 18:​6, 7) Lentšu la Sehebere mo ge e le gabotse le ra gore “go sega,” gomme diphetolelo tše dingwe di bolela ka “basadi ba ba hlaletšego.” (Byington, Rotherham, The New English Bible) Ge go be go khudušwa Polokelo, “Dafida le ba sethšaba sa Isiraele ka moka ba tšama bà bina ka matla pele xa Morêna, ba letša diletšô tša mehuta-huta.” Mikala, mosadi wa Dafida, o be a e-na le pono e sa leka-lekanago ka gobane o ile a sola go ba gona ga Dafida lethabong leo le bego le le gona. (2 Samuele 6:​5, 14-20) Modimo o boletše e sa le pele gore mathopja ao a bego a tla boa Babele a be a tla ba le lethabo le le swanago.​—Jeremia 30:​18, 19; 31:4; bapiša le Psalme 126:2.

6. Mangwalo a Bakriste a Segerika a re thuša bjang ponong ya rena ka boithabišo?

⁶ Le rena re swanetše go leka-lekanya boithabišo. Ka mohlala, na re a lemoga gore Jesu e be e se moikgonari? O bile le nako ya go ja dijo tše di lapološago, go etša ge a be a le ‘monyanyeng o mogolo’ wo o kilego wa dirwa ke Lefi. Le gona ge batho bao ba itirago ba ba lokilego ba be ba mo sola ka taba ya go ja le go nwa, Jesu o ile a ganetša dikgopolo tša bona le ditsela tša bona. (Luka 5:​29-31; 7:​33-36) Le gona, gopola gore o ile a ya monyanyeng wa lenyalo gomme a ba le letsogo mathabong a gona. (Johane 2:​1-10) Juda, ngwanabo Jesu ka motswadi o tee o bolela gore Bakriste ba be ba e-na le ‘menyanya ya lerato,’ mo gongwe e le dijo tšeo bao ba hlokago ba bego ba ka ipshina ka tšona gotee le go thabela bogwera bjo bobotse ba iketlile.​—Juda 12.

Boithabišo le Bagwera ka Nako ya Bjona le Lefelong la Bjona

7. Ke bjang Lentšu la Modimo le kgothaletšago teka-tekano mabapi le boithabišo?

⁷ Mmoledi 10:​19 e bolela gore ‘senkgwa seo se tlišago lesego go bašomi le beine yeo e dirago gore bophelo bo thabiše’ ke selo se se lokilego. Seo ga se kwagale se bolela gore boithabišo ka bobjona bo na le molato, na se kwagala bjalo? Lega go le bjalo, yona puku yeo e re: “Tšohle di na le mohla wa tšôna, . . . Xo lla xo na le mohla wa xôna, le xo sêxa xo na le mohla wa xôna. Xo xôlôla xo na le mohla wa xôna, le xo bina xo na le mohla wa xôna.” (Mmoledi 3:​1, 4) Ee, lege Beibele e sa sole boithabišo bjo bo lokilego, fela e re nea ditemošo. E nngwe ya ditemošo tše ke ya gore boithabišo le bagwera bo swanetše go bewa lefelong le le swanetšego, ka nako e swanetšego le ka tekanyo e swanetšego. Le gona e lemoša ka mereo yeo gantši e bilego gona dipokanong tše kgolo tša bogwera.​—2 Timotheo 3:4.

8, 9. Ke ka baka la’ng nako yeo re phelago go yona gotee le kabelo yeo re e neilwego ke Modimo di swanetše go kgoma boithabišo bja rena?

⁸ Re boletše gore ba-Juda bao ba bego ba boile go tšwa Babele​—bao ba bego ba lebanwe ke modiro o montši kudu—​ba be ba tla ba le boitapološo bjo bo thabišago. Lega go le bjalo, Jeremia pejana o boletše gore o be a ka se ‘dule le batho ba metlae goba go thabišana le bona.’ (Jeremia 15:​17) O be a neilwe kabelo ke Modimo ya go romela molaetša wa kotlo ye e bego e tla tla kgaufsinyane, ka gona yeo e be e se nako ya gore a dulele boithabišo.

⁹ Bakriste lehono ba abetšwe go goeletša molaetša wa Modimo wa kholofelo gaešita le go tsebiša dikahlolo tša gagwe malebana le tshepedišo e kgopo ya Sathane. (Jesaya 61:​1-3; Ditiro 17:30, 31) Ka gona, go swanetše gore go be molaleng go rena gore ga se ra swanela go dumelela boithabišo gore e be karolo e kgolo ya bophelo bja rena. Re ka swantšha ntlha ye ka letswai le lenyenyane goba senoko seo se dirago gore dijo di latswege. Na o be o ka tlopela dijo ka senoko se sentši kudu se se bilego se fetago le dijo ka bontši? Aowa, o ka se dire bjalo. Go ya ka mantšu a Jesu go Johane 4:​34 le Mateo 6:​33, selo se segolo mo go rena​—seo e lego dijo tša rena​—e swanetše go ba go dira thato ya Modimo. Ka gona boithabišo bo swana le senoko. Bo swanetše go re lapološa le go re nea mafolofolo, e sego go re lapiša.

10. Ke ka baka la’ng ge ka moka ga rena re swanetše go hlahloba ka lefsa nako yeo re e dirišago boithabišong?

¹⁰ Fela anke o eme go se nene gomme o nagane: Na batho ba bantši ga ba nagane gore nako yeo ba e dirišago bakeng sa boithabišo ke e lekanetšego feela? Ge e ba ba be ba sa nagane bjalo, ba be ba tla dira phetogo. Na se ga se nee kgopolo ya gore o mongwe le o mongwe wa rena o swanetše go ema ganyenyane gomme a hlahlobe ka go botega le ka go rereša karolo yeo ge e le gabotse boithabišo bo e bapalago bophelong bja rena? Na ganyenyane-ganyenyane bo ka ba bo fetogile selo se segolo kudu bophelong bja rena? Ka mohlala, na ka mehla ge re goroga ka gae, re thoma ka go bula TV? Na re tlwaetše gore beke le beke re beele ka thoko nako ya boithabišo, bjalo ka bošegong bjo bongwe le bjo bongwe bja Labohlano goba bja Mokibelo? Na re ka ikwa re šegame ge e ka re ge nako yeo e fihla, ra ikhwetša re dutše gae re se na boithabišo bjo re bo rulagantšego? Dipotšišo tše dingwe tše pedi ši-di: Na letšatšing la ka morago ga moletlo re hwetša gore re boile bošego kudu goba re sepetše leeto le letelele kudu mo e lego gore re lapile goba re hloka matla a gore re ka ya bodireding bja Bokriste goba go direla mothwadi wa rena mošomo o tletšego wa letšatši? Ge e ba ka dinako tše dingwe goba gantši boithabišo bja rena bo re dira bjalo, na ke boithabišo bjo bo lokilego le bjo bo lekanetšego?​—Bapiša le Diema 26:​17-19.

11. Ke ka baka la’ng e le mo go swanetšego go hlahloba boithabišo bjo re bago le bjona?

¹¹ Le gona e ka ba mo gobotse ge re ka hlahloba gaešita le mohuta wa boithabišo wo re bago le wona. Go ba ga rena bahlanka ba Modimo ga se tiišo ya gore boithabišo bja rena ke bja maleba. Nagana ka seo moapostola Petro a ilego a se ngwalela Bakriste ba ba tloditšwego: “Xobane xa xo sa nyakwa tša mehla ye e fetilexo, tša xe re sa dira tše ratwaxo ke ba-ntlê tša xo kêka le maipshinô le dikxanyoxô le botaxwa le bohori le xo nwa, le mekxwa ye e rônaxo ya xo dirêla medimo e šele.” (1 Petro 4:3) O be a sa ntšhe banababo diphošo goba a ba sola ka gore ba ekiša seo batho ba lefase ba se dirago. Lega go le bjalo, Bakriste (nakong yeo le gona bjale) ba swanetše go phafoga ka gore motho a ka tanywa gabonolo ke boithabišo bjo bo lego kotsi.​—1 Petro 1:2; 2:1; 4:7; 2 Petro 2:13.

Phafogela Mereo

12. Petro wa Pele 4:3 e bontšha moreo wa mohuta ofe?

¹² Ke moreo wa mohuta ofe wo re swanetšego go o phafogela? Petro o boletše ka “maipshinô le dikxanyoxô le botaxwa le bohori le xo nwa.” Mohlalosi wa Mojeremane o hlalositše gore mantšu a Segerika ao a dirišitšwego mo “kudu-kudu a be a hlalosa go nwa le bagwera monyanyeng.” Moporofesara wa kua Switzerland o ngwadile gore mekgwa yeo e be e tlwaetšwe mehleng yeo: “Tlhaloso e swanetše go ba e lebišitše meletlong ye e rulagantšwego goba mafelo a tlwaetšwego a boithabišo moo mekgwa ye e lešago dihlong e bego e dirwa.”

13. Go dirišwa ga dino tše di tagago dipokanong e bile moreo ka tsela efe? (Jesaya 5:​11, 12)

¹³ Go ba le dino tše di tagago dipokanong tše kgolo le bagwera go tantše ba bantši. Ga se gore Beibele e gana go dirišwa ga dino tše bjalo ka mo go lekanetšego, ga e gane. Bohlatse bja se ke gore Jesu o ile a dira beine monyanyeng wa lenyalo kua Kana. Go swanetše go ba go sa ka gwa nwewa kudu ka gobane Jesu o be a tla diriša keletšo ya Modimo ya go phema go dula le batho ba ba nwago kudu. (Diema 23:​20, 21) Eupja anke o nagane ka ntlha ye: Molaodi wa monyanya woo o ile a bolela gore menyanyeng e mengwe go be go ntšhwa beine e botse pele ‘gomme ka morago ge batho ba kgotšwe go ntšhwe e botšwa.’ (Johane 2:​10) Ka gona e be e le selo se se tlwaelegilego gore ba-Juda ba tagwe menyanyeng ya lenyalo moo go nago le beine e ntši.

14. Bakriste bao ba laleditšego baeng ba ka lebeletšana le moreo wo o ka tšweletšwago ke dino tše di tagago bjang?

¹⁴ Ka gona, Bakriste ba bangwe ba dirile phetho ya gore ge ba laleditše baeng ba ntšhe beine, piri le dino tše dingwe tše di tagago ge feela e le bona ka noši bao ba tlago go hlokomela seo se newago baeng ba bona goba tekanyo ya seo ba se jago. Ge e ba sehlopha e le se segolo kudu gore moamogedi wa sona a ka kgona go se hlokomela, bjalo ka monyanyeng wa ba-Juda wo go boletšwego ka wona, bjala bjo bontši e ka ba moreo. Mo gongwe go ka ba go e-na le motho yo a ilego a lwantšha bothata bja go nwa kudu gomme a bo fenya. O ka bona gore ge e ba bjala bjo bo lego gona bo nwewa ka bolokologi, bo sa lekanetšwe, a ka lekega gore a nwe kudu gomme a šulafaletša bohle monyanya. Molebeledi yo e lego tatago bana wa kua Jeremane o boletše gore lapa la gagwe le holwa ke go ipshina le bagwera bao e lego badumedi-gotee le bona. Lega go le bjalo, o ile a oketša ka gore ge go e-na le dipiri tše dintši gona mathata a be a ka tšwelela gabonolo.

15. Tlhahlo e nepagetšego mabapi le dipokano tša bogwera e ka hwetšwa bjang?

¹⁵ Monyanya wa lenyalo kua Kana o be o e-na le “mosepediši wa monyanya.” (Johane 2:8, NW) Se ga se bolele gore ge e ba lapa le laleditše sehlopha se itšego ngwakong wa lona bakeng sa dijo goba go iketla le swanetše go kgetha mosepediši. Monna wa lapa o tla ba le boikarabelo bja go hlokomela moletlo wo. Eupja go sa šetšwe gore sehlopha ke sa malapa a mabedi goba ke se segolwanyane go feta moo, go swanetše gore go bonagale gore go na le motho yo a beilego dilo leihlo. Batswadi ba bantši ba kgonthiša se ge e ba morwa wa bona goba morwedi a laleditšwe boithabišong bja sehlopha. Ba botšiša mong wa moletlo gore ke mang a tlago go hlokomela tiragalo yeo le ge e ba a tla ba gona go fihlela ge go fedile. Batswadi ba Bakriste ba bile ba fetotše thulaganyo ya bona gore ba be gona e le gore batho ka moka ba bagolo le ba banyenyane ba ka ipshina ka go ba gotee.

16. Ke dilo dife tšeo di swanetšego go naganelwa ge e le mabapi le bogolo bja dipokano?

¹⁶ Lekala la kua Canada la Mokgatlo wa Watch Tower le ngwadile lengwalo le le rego: “Bagolo ba sego kae ba tšere gore go ba le menyanya e megolo ya lenyalo ke go se kwe keletšo ya gore re lekanetše palo ya bao ba bago gona dipokanong tša bogwera. Ba phethile ka gore ge e ba re eletšwa gore re be le dipokano tše nyenyane tšeo di laolegago tša boithabišo le bagwera, gona e tla ba phošo go laletša batho ba 200 goba ba 300 monyanyeng wa lenyalo.”a Go e na le gore re bee palo yeo motho ka noši a swanetšego go ipeela yona, taba-kgolo e swanetše gore e be ya go ba le tlhokomelo e botse, go sa šetšwe gore go tla ba go e na le batho ba bakae. Bontši bja beine yeo Jesu a e dirilego bo bontšha gore monyanya wa lenyalo wo o bego o le kua Kana o be o kgeregetšwe ke batho ba bantši, eupja go bonagala seo se be se hlokometšwe ka tshwanelo. Menyanya e mengwe mehleng yeo e be e sa hlokomelwe gabotse; bogolo bja yona e ka ba e le sona selo se se bakilego gore e se ke ya kgona go laolega. Ge batho ba ba bokanego e le ba bantši, gona go ba hlokomela e ba mošomo o mogolo ka gobane go ka direga gore bao ba fokolago bao ba ratago go dira dilo ka mo go feteletšego ba tsene gona fao. Dipokanong tšeo di hlokometšwego mo gongwe ba ka dira dilo tše di solegago.​—1 Ba-Korinthe 10:​6-8.

17. Go leka-lekana ga Bokriste go ka bontšhwa bjang ge go rulaganywa pokano?

¹⁷ Go hlokomelwa gabotse ga dipokano tša bogwera go akaretša go rulaganywa ga tšona le go lokišetšwa ga tšona. Se ga se nyake gore go dirišwe mekgabišo e gokago mahlo bakeng sa go dira gore pokano e be ye e kgethegilego goba ye e ka se lebalwego eupja e le ye mo gongwe e tlago go swana le meletlo ya lefase bjalo ka go ba le dihlopha tše di binago di apere diaparo tša mabai-bai goba meletlo yeo go yona go aparwago ka mokgwa wa go ikgakantšha. Na o nagana gore ba-Isiraele ba ba botegago kua Nageng ya Kholofetšo ba be ba ka rulaganya moletlo woo go wona batho ka moka ba bego ba tla apara bjalo ka baheitene ba kua Egipita goba ba nageng e nngwe? Na ba be ba ka rulaganya go ba le mebino ya go tsoša dikganyogo goba meopelo ya mašata yeo e ratwago ke baheitene? Morago kua Thabeng ya Sinai, ba ile ba tanywa ke meopelo le mebino e swanago le yeo e bego e ratwa ka nako yeo kua Egipita. Re tseba gore Modimo gotee le mohlanka wa gagwe yo a godilego ka tsebo Moše ba ile ba lebelela boithabišo bjoo ka leihlo le le bjang. (Ekisodo 32:​5, 6, 17-19) Ka gona, mong wa moletlo goba mohlokomedi wa pokano o swanetše go ipotšiša ge e ba go tla opelwa goba gwa binwa; ge e ba di tla ba gona, gona o swanetše go kgonthiša gore di dumelelana le melao ya motheo ya Bokriste.​—2 Ba-Korinthe 6:3.

18, 19. Re ka hwetša temogo efe ge e le mabapi le go laleletšwa ga Jesu monyanyeng wa lenyalo, gomme re ka diriša se bjang?

¹⁸ Mafelelong, re a gopola gore ‘Jesu gotee le barutiwa ba gagwe ba be ba laleditšwe monyanyeng wa lenyalo.’ (Johane 2:2) Go a kwala gore, Mokriste o mongwe goba lapa le itšego mo gongwe le ka fo etela ba bangwe bakeng sa go ipshina le go iketla le bona. Eupja ge go tliwa meletlong ye e rulagantšwego, go bonagetše gore go beakanya e sa le pele gore ke bomang bao ba tlago go ba gona moo go thibela mathata. Bohlokwa bja se bo gateletšwe ke mogolo wa kua Ten­nessee, U.S.A., yo a godišitšego barwa le barwedi bao ba lego bodireding bja nako e tletšego. Pele yena goba mosadi wa gagwe ba ka amogela taletšo, goba go nea bana ba bona tumelelo ya go ya moo, o be a ikopanya le mong wa moletlo bakeng sa go kgonthiša ge e ba batho bao ba tlago go ba gona e le bao ba kgethilwego e sa le pele. Lapa la gagwe le ile la šireletšega mereong yeo e ilego ya tanya ba bangwe dipokanong tše di buletšwego mang le mang, e ka ba tša go ja, phikiniki goba go raloka kgwele.

¹⁹ Jesu o ile a sola taba ya gore dipokanong go laletšwe feela batho ba leloko, bagwera ba kgaufsi, dithaka goba ba ba nago le maemo a swanago a ditšhelete. (Luka 14:​12-14; bapiša le Jobo 31:​16-19; Ditiro 20:​7-9.) Ge e ba o kgetha ka kelohloko bao o ba laletšago, go bonolo go akaretša le Bakriste ba nywaga e fapa-fapanego ya bogolo le ba maemo a sa swanego. (Ba-Roma 12:​13; Ba-Hebere 13:2) Ba sego kae ba bona mo gongwe ba ka ba ba fokola moyeng goba e le ba bafsa bao ba ka holwago ke go gwerana le Bakriste ba ba godilego ka tsebo.​—Diema 27:17.

Boithabišo Lefelong la Bjona

20, 21. Ke ka baka la’ng e se molato gore boithabišo bo be le karolo maphelong a rena?

²⁰ Ke ga maleba gore rena bjalo ka batho ba ba boifago Modimo re tsenye boithabišo bja rena mahlo le go kgonthiša gore ke bjo bo nepagetšego le gore re lekanetša gabotse ge e le mabapi le nako yeo re e dirišago boithabišong. (Ba-Efeso 2:​1-4; 5:​15-20) Mongwadi yo a buduletšwego wa puku ya Mmoledi le yena o be a nagana bjalo: “Nna ka rêta lethabô; ka xobane motho fá tlase xa letšatši xa a na se se botse, xe e se xo ja le xo nwa le xo thaba. Tšôna-tšeo a di bê naê’ ditapišong tša xaxwe mehleng yeno, Modimo à sa mo file bophelô fá tlase xa letšatši.” (Mmoledi 8:​15) Lethabo le le bjalo le le lekanetšego le ka lapološa mmele gomme la fokotša mathata le go ngamoga hlogo tšeo di atilego tshepedišong ya gona bjale ya dilo.

²¹ Ka mohlala, mmulamadibogo wa kua Austria o ngwaletše mogwera wa gagwe wa kgale lengwalo a re: “Re bile le leeto le le bose maloba. Re ile ra ya letsheng le lenyenyane le le lego kgaufsi le Ferlach re le ba 50. Ngwanabo rena B—— o be a re etile pele ka lori ya gagwe, a rwele mašimelo a mararo, ditulo tša go phuthwa, ditafola gotee le tafola ya go bapala thenise. Re ipshinne kudu. Kgaetšedi yo mongwe o be a swere seletšo, ka gona go ile gwa bapalwa dikopelo tša Mmušo tše dintši. Banababo rena, ba bagolo le ba bafsa ba ile ba thabela go ba gotee.” O be a kgahlilwe ke boithabišo bjo bo bego bo hlokometšwe gabotse bjo bo sa kago bja ba le mereo e bjalo ka go nwa kudu goba boitshwaro bjo bo gobogilego.​—Jakobo 3:​17, 18.

22. Ge re dutše re thabela boithabišo le bagwera, ke temošo efe yeo o mongwe le o mongwe wa rena a swanetšego go e iša hlogong?

²² Paulo o re kgothaleditše gore re hlokomele gore re se ke ra ineela dikganyogong tša nama e sa phethagalago, le gore re se ke ra ba ra dira dithulaganyo tše di ka re lebantšhago le moleko. (Ba-Roma 13:​11-14) Seo se akaretša dithulaganyo tša boithabišo gotee le bagwera. Ge e ba re diriša keletšo ya gagwe dilong tše bjalo, re tla kgona go phema maemo ao a ilego a dira gore ba bangwe ba robegelwe ke sekepe sa moya. (Luka 21:​34-36; 1 Timotheo 1:​19) Go e na le moo, ka bohlale re tla kgetha boithabišo bjo bo hlwekilego bjo bo tlago go re thuša go swarelela tswalanong ya rena le Modimo. Ka go dira bjalo re tla holwa ke boithabišo le bagwera bjoo bo ka lebelelwago e le e nngwe ya dimpho tše botse tša Modimo.​—Mmoledi 5:18.

[Mongwalo wa tlase]

Re Ithutile’ng?

◻ Ke pono efe e leka-lekanego yeo re e hwetšago ka Beibeleng ge e le mabapi le go ipshina ka boithabišo le bagwera?

◻ Ke ka baka la’ng taba ya nako le mohuta wa boithabišo di swanetše go fiwa šedi?

◻ Ke dilo dife tše dingwe tšeo Mokriste yo e lego mong wa moletlo a ka di dirago bakeng sa go phafogela mereo?

◻ Ge e ba boithabišo e le bjo bo nepagetšego le bjo bo lekanetšego, bo ka direla Bakriste eng?

[Seswantšho go letlakala 18]

Mong wa moletlo goba mosepediši pokanong ke yena a rwelego boikarabelo bja go bona gore baeng ba se wele moreong