Sepediša Dipeeletšo Ka Sebaka Se Sengwe Le Se Sengwe
1 Re na le lebaka le lebotse la go leboga Morokami le Phafoga! Ke dimakasine dife tše dingwe tšeo di ipiletšago gakaakaa ditšhabeng ka moka? Kgweding ye dimakasine di tla be di bolelelwa modirong wa rena wa boboledi, gomme ditokollo tša October di na le tsebišo e matla gakaakang! Gantši re sepediša bontši bja dipeeletšo tša rena modirong wa ntlo le ntlo; lega go le bjalo, re tla rata go itokišetša go di sepediša le ka sebaka se sengwe le se sengwe se se swanetšego.
2 Ge o sepediša “Morokami” wa October 1, mo gongwe o ka tsoša kgahlego sehlogong se se rego “Lefase le le se Nago Ntwa—Neng?” ka go re:
◼ “Batho ba bantši ba ipotšiša lebaka leo ka lona lefase le le se nago ntwa le bonalago e le leo le ka se fihlelelwego go sa šetšwe maiteko ka moka a batho. O nagana’ng ka dipolelo tše tše di lego go letlakala 5 la Morokami wa October 1? [Bala lefoko la mathomo go se sengwe le se sengwe sa dirapa tše pedi tša pele ka tlase ga sehlogwana se se rego “Bodumedi—Lepheko le Legolo,” gomme o dumelele karabo.] Ee, se ga se bolele gore go tla dula go e-na le dintwa. Ela hloko kholofetšo ya Modimo mo go Jesaya 9:5, 6.” O ka bala temana ye Beibeleng ya gago goba go etša ge e tsopotšwe sehlogong sa Morokami. Hlalosa ka bokopana gore Morokami o bolelela Mmušo wa Jehofa e le kholofelo e nnoši bakeng sa lefase la khutšo, gomme o sepediše peeletšo. Ge e ba peeletšo e ganwa, sepediša makasine le mogwera wa wona Phafoga! gomme o kgothaletše motho gore a di bale.
3 Ge o neela “Phafoga!” ya November 8, mo gongwe o ka re:
◼ “O nagana’ng ka potšišo yeo e lego letlakaleng la ka ntle la makasine wo yeo e rego: ‘Ke ka Baka La’ng Bophelo e le bjo Bokopana Gakaakaa?’ [Dumelela karabo.] Lelokelelo le la dihlogo le lebiša tlhokomelo go seo bo-rathutamahlale ba mehleng yeno le ba bangwe ba se bolelago ka go tšofala, gomme ka morago la lebiša tlhokomelo go seo Mmopi wa rena a se holofeditšego mabapi le ditebelelo tša bophelo bjo bo sa felego. Ke tla thabela go go tlogelela kopi ye le mogwera wa yona ka moneelo wa R1,60.”
4 Ge o hwetša batho ba ba sekametšego bodumeding, ke ka baka la’ng o sa bolelele sehlogo se se tšwago go “Morokami” wa October 15? Thero ye e ka tsoša karabelo e kgahlišago:
◼ “Ke tla rata go kwa kgopolo ya gago ka potšišo ye: Na go a kgonega go rata Modimo le go mmoifa ka nako e swanago?” Dumelela karabo ke moka o bale temana ya motheo ya sehlogo se se rego “Ke ka Baka La’ng re Swanetše go Boifa Modimo wa Therešo Gona Bjale?” (Mmo. 12:13) Diriša se sengwe sa diswantšhetšo tše lego go letlakala 212 la puku ya Go Boledišana gomme o sepediše peeletšo goba dimakasine tše pedi ka moneelo wa R1,60.
5 Ge le šoma ka ntlo le ntlo, le se ke la feta mabenkele a manyenyane le a magolo. Bao ba tlwaetšego go etela mabenkeleng ba hlalosa modiro wo e le o thabišago le o enywago. O ka leka thero e bonolo e swanago le ye ge o sepediša “Phafoga!” ya October 8:
◼ “Re a tseba gore bo-rakgwebo ba thabela go gata ka mošito o tee le ditaba tšeo di kgomago tikologo ya gabo bona. Ke kgolwa gore dihlogo tše e tla ba tše di kgahlišago go wena.” Ka gona hlalosa ka boripana ntlha e tšwago sehlogong se se rego “Go ba Motswadi yo a Atlegago yo a se Nago Molekane.” Hlalosa thulaganyo ya peeletšo.
6 Boloka pego ya ntlo le ntlo ka šedi gomme o boele gohle mo o sepedišitšego se sengwe. Leetong la go boela, sepediša peeletšo ya makasine o tee goba ka bobedi. Anke re itokišetšeng le go phafogela go sepediša dimakasine tša rena, kudu-kudu dipeeletšo tša tšona ka sebaka se sengwe le se sengwe seo se swanetšego.