Lebelela ka Kua ga Dilo Tšeo o di Bonago!

MAHLO a kgonthe a bonago gabotse ke tšhegofatšo. Ge e le gabotse, batho ba bantši ba be ba ka bolela gore dilo tše sego kae tše ba nago le tšona ke tša bohlokwa kudu. Lega go le bjalo, go Bakriste go na le mohuta wa mahlo ao moapostola Paulo a boletšego ka ona gore ke a bohlokwa kudu go feta gaešita le mahlo a kgonthe a bonago gabotse. Paulo o ngwadile gore: “Re tsepeletša mahlo a rena e sego go tše di bonwago, eupša go tše di sa bonwego.” (2 Ba-Korinthe 4:18, NW) E swanetše go ba e le mohuta o kgethegilego e le ka kgonthe wa bokgoni bja go bona o dirago gore motho a kgone go bona dilo tše di sa bonwego! Re ka a bitša a mohuta wa 20/20 wa bokgoni bja moya bja go bona.

Ke ka Baka La’ng bo Nyakega?

Bakriste ba lekgolong la pele la nywaga ba be ba swanelwa e le ka kgonthe ke go ba le mohuta wo wa mahlo a moya. Ba be ba phetha bodiredi bja bona bja Bokriste ka tlase ga bothata bjo bogolo. Paulo o beile se ka tsela ye: “Re dikilwe thokô tšohle, ’me xa re pitlaxanywe. Re a phoraphora, ’me xa re xakanexe. Re a tlaišwa, ’me xa r’a lahlêxa. Re dixêlwa fase, ’me xa re senyexe.”—2 Ba-Korinthe 4:8, 9.

Go sa šetšwe maemo a bjalo, barutiwa ba botegago ba ile ba ema ba tiile. Ba e-na le tumelo e tiilego go Modimo, ba be ba ka bolela bjalo ka ge Paulo a boletše gore: “Ké ka ’baka leo re sa lapexo. Le xe motho yó wa rena wa ntlê a ônala, motho wa teng ó fêla a mphsafatšwa ka mehla.” Lega go le bjalo, ke eng seo se bakago go mphsafala mo ga letšatši le letšatši? Paulo o tšwetše pele go bolela gore: “Xobane morwalônyana wó wa ditlaišêxô tša lebakanyana, [o] re ruiša lehumô la letaxô le le sa felexo, le le fetišaxo tšohle. Xo tlo ba byalo xe re sa late tše di bônwaxo ka mahlô, rè lata tše di sa bonwexo. Xobane tše di bônwaxo ka mahlô ké tša lebaka leno fêla; ’me tše di sa bonwexo ké tša neng le neng.”—2 Ba-Korinthe 4:16-18.

Paulo o be a kgothaletša banababo ba moya gore ba se ke ba dumelela mathata, ditlaišo—le masetla-pelo a mohuta le ge e le ofe—di fsifatša pono ya bona ya moputso wa letago wo o bego o beilwe ka pele ga bona. Ba be ba swanetše go lebelela ka kua ga maemo a ba bego ba le go ona, mahlo a bona a dule a tsepeletše ditla-morago tše thabišago tša tsela ya Bokriste. Seo ke sona se ilego sa ba thuša go mpshafatša maikemišetšo a bona a go tšwela pele ntweng letšatši le letšatši. Lehono Bakriste ka mo go swanago ba swanetše go ba le leihlo le lebotse le le bjalo la moya.

Lebelela Ditlaišego tša Gona Bjale e le tša Lebakanyana!

Ka mo go sa phemegego, letšatši le letšatši re bona dilo tšeo re bego re tla kgetha go se di bone. Go fo lahlela mahlo seiponeng go dira gore dipatso le diphošo tše di sa rategego tša mmele tšeo e lego dipontšho tša go se phethagale ga mmele di be molaleng. Ge re okamela seiponeng sa Lentšu la Modimo, re bona diphošo tša moya bobedi go rena le go ba bangwe. (Jakobo 1:22-25) Ge re lebelela kuranta ya letšatši le letšatši goba sekirining sa thelebišene, dipego tša go hloka toka, sehlogo le masetla-pelo di kgoma dipelo tša rena gatee-tee.

Sathane o tla rata go re dira gore re tlalelwe ka baka la dilo tšeo re di bonago goba re aroge gomme re thome go tekema tumelong. Re ka thibela se bjang gore se se ke sa direga? Re swanetše go latela mohlala o beilwego ke Jesu Kriste bjalo ka ge go eleditše moapostola Petro ge a be a re: “Ké sôna se Le bileditšwexo sôna; xobane le Kriste ó tlaišitšwe ka ’baka la lena, a ba kêta-pele ya lena, xore Le tšeê ka mohlala wa xaxwe.” (1 Petro 2:21) Jesu e be e le mohlala o phethagetšego sebopegong se sengwe le se sengwe sa bophelo bja Bokriste.

Ge a šupa Jesu e le mohlala wa rena, Petro ka mo go kgethegilego o boletše gore Jesu o ile a tlaišega. Ka kgonthe Jesu o ile a tlaišega kudu ge a be a le lefaseng. E le “mošomi yo a nago le bokgoni” wa Jehofa yo a bego a le gona ge batho ba bopša, o be a tseba gabotse seo Modimo a bego a rerile gore batho ba be sona. (Diema 8:30, 31) Eupša bjale o iponetše ka noši seo sebe le go se phethagale di bego di ba baketše gore ba be sona. O bone gomme a swanelwa ke go lebeletšana letšatši le letšatši le go se phethagale ga batho gotee le mafokodi. Seo e swanetše go ba e ile ya ba teko go yena.—Mateo 9:36; Mareka 6:34.

Ka ntle le ditlaišego tša ba bangwe, Jesu o ile a ba a welwa ke tša gagwe. (Ba-Hebere 5:7, 8) Fela o ile a lebelela ka kua ga tšona ka mahlo a bonago gabotse a moya go bona moputso wa go phagamišetšwa bophelong bjo bo se nago lehu ka baka la tsela ya gagwe ya potego. Ka gona e le Kgoši ya Mesia, o be a tla ba le tokelo ya go phagamiša batho ba tlaišegago boemong bja bona bjo bo kokobetšego go ba bušetša phethegong yeo Jehofa a bego a e rerile mathomong. Go boloka leihlo la gagwe le tsepeletše dikholofetšong tše tše di sa bonagalego tša nakong e tlago go mo thušitše gore a kgomarele lethabo tirelong ya Modimo go sa šetšwe ditlaišego tšeo a di bonego letšatši le letšatši. Go bjalo ka ge Paulo a ile a ngwala ka morago gore: “E a kxôtleletšexo [kota ya tlhokofatšo, NW], le xe se se bexo se mo loketše e le lethabô, a dumêla xo xobošwa, a kxôna xo y’o dula ka letsoxong le letona la sedulô sa boxoši bya Modimo.”—Ba-Hebere 12:2.

Jesu le ka mohla ga se a ka a dumelela mathata le maemo a lekago gore di mo tlaletše, a arošwe goba a tekeme tumelong ya gagwe. Re le barutiwa ba gagwe, re swanetše go latela kgaufsi-ufsi mohlala wa gagwe o phagamego kudu.—Mateo 16:24.

Tsepelela Dilong tše di sa Bonagalego tša ka mo go sa Felego!

Ge a bolela ka seo se dirilego gore Jesu a kgone go kgotlelela, Paulo gape o re bontšhitše tsela ge a be a ngwala gore: “Re kxôtlêlêlê thlabanong ye re lexo mo xo yôna, re išê mahlô xo Mo-êta-pele le Mophethi wa tumêlô, Yêna Jesu.” (Ba-Hebere 12:1, 2) Ee, gore re kitime lebelo la Bokriste ka katlego le ka lethabo re swanetše go lebelela ka kua ga dilo tšeo di lego ka pele ga rena. Eupša re ‘iša mahlo’ bjang go Jesu, gomme go tla re direla’ng?

Ka mohlala, ka 1914 Jesu o ile a bewa Kgoši ya Mmušo wa Modimo gomme o buša a le legodimong. Ee, se ka moka ga re se bone ka mahlo a rena a nama. Lega go le bjalo, ge e ba re ‘iša mahlo’ go Jesu, mahlo a rena a moya a tla re thuša go bona gore mo nakong ye o itokišeditše go gata mogato wa go fediša tshepedišo ye e kgopo ya dilo le go lahlela Sathane le madira a gagwe a batemona ditlemong tša go se dire selo. Ge re lebelela pele kudu, bokgoni bja rena bja moya bja go bona bo tla utolla lefase le lefsa le kgahlišago leo go lona “lehu le ka se [hlwego] le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.”—Kutollo 19:11-16; 20:1-3; 21:4.

Ka gona-ge, go e na le go imelwa ke ditlaišego tša lebakanyana tšeo re ka swanelwago ke go lebeletšana le tšona letšatši le lengwe le le lengwe, ke ka baka la’ng re sa tsepeletše mahlo a rena dilong tšeo e lego tša ka mo go sa felego? Ka mahlo a tumelo, ke ka baka la’ng re sa lebelele ka kua ga bolwetši le megabaru ya lefase le le šilafetšego gore re bone paradeise e tletšego batho ba phetšego gabotse mmeleng, ba thabilego le ba kgomegago? Ke ka baka la’ng re sa lebelele ka kua ga bosodi bja rena, bobedi bja mmele le bja moya gomme re ipone re lokolotšwe go tšona ka mo go sa felego ka mohola wa sehlabelo sa topollo sa Kriste? Ke ka baka la’ng re sa lebelele ka kua ga polao e kgolo e bakilwego ke ntwa, bosenyi le bošoro gomme re bone batho ba sa tšwago go tsošwa ba rutwa khutšo le go loka ga Jehofa?

Go oketša moo, go ‘iša mahlo’ go Jesu go tla akaretša le go tsepeletša mahlo a rena a moya go seo Mmušo o šetšego o se phethagaditše gare ga batho ba Modimo lefaseng le ge o sa bonagale: botee, khutšo, lerato, maikwelo a borutho a borwarre le katlego ya moya. Mosadi yo mongwe wa Mokriste kua Jeremane ka morago ga ge a bone bidio ya United by Divine Teaching o ile a ngwala gore: “Bidio e tla nthuša ka mo go oketšegilego go dula ke gopola gore banabešo ba bantši gakaakaa le dikgaetšedi ba Bakriste lefaseng ka moka ka motsotso wo ba hlankela Jehofa ka potego—gomme ba dira se go sa šetšwe kganetšo ya setšhaba. Botee bja rena bja borwarre ke bjo bohlokwa gakaakang lefaseng leo le nago le bošoro le lehloyo!”

Na le wena o “bona” Jehofa, Jesu, barongwa ba botegago le Bakriste-gotee le wena ba dimilione ba eme ka lehlakoreng la gago? Ge e ba go le bjalo, o ka se ke wa belaela ka mo go feteletšego ka “dipelaêlô tša bophelô byono” tšeo di ka go nweletšago manyaming gomme tša go bakela go “opafala” tirelong ya Bokriste. (Mateo 13:22) Ka gona ‘iša mahlo’ go Jesu ka go tsepeletša mahlo a gago a moya Mmušong o hlomilwego wa Modimo le ditšhegofatšong tša wona, bobedi tša gona bjale le tša nakong e tlago.

Phelela go Bona Seo se sa Bonagalego!

Ka ge re bona phapano e kgolo magareng ga lefase le lefsa la Modimo la ka mo go sa felego le lefase la mehleng yeno le le senyegago, re swanetše go tutueletšega go itshwara ka tsela yeo e re tlago go balwa re le ba swanelwago ke go phela gore re bone e le ka kgonthe dilo tšeo lehono re kgonago go di bona feela ka mahlo a tumelo. Mašaba-šaba a tsošitšwego a ka se ke a kgolwa seo a se bonago ge a tsoga gomme a bona lefase la go loka la paradeise leo le fapanego kudu le lefase leo a le bonego pele a e-hwa. Akanya ka lethabo la rena ge re tla be re phela gomme re ba dumediša le go ba hlalosetša seo Modimo a se dirilego!—Bapiša le Joele 2:21-27.

Ee, mahlo a bonago gabotse a moya ke a bohlokwa gakaakang, gomme ke gabohlokwa gakaakang go a boloka a phafogile! Se re ka se dira ka go ba le thuto ya Beibele ya motho ka noši ya ka mehla, go ba gona ka mehla dibokeng tša Bokriste, go boledišana le ba bangwe ka kholofelo ya rena e theilwego Beibeleng, gomme go feta tšohle, re rapelele tlhahlo ya Modimo. Se se tla boloka bokgoni bja rena bja go bona bja moya bo le matla e bile bo sa širega, bo re dira go re kgone go lebelela ka kua ga dilo tšeo re di bonago!