Modimo o be a tla thaba ge e ba mosadi a be a ka se ke a tlola ditlolo goba a ikapeša ka mabje a bohlokwa, eupja a phela ka go hloka boitshwaro? Goba na o be a tla thabela basadi bao e lego ba bothakga le bao ba elago hloko ge ba diriša ditlolo goba mabje a bohlokwa, le bao ba ikapešago kudu ka dika tša Modimo le boitshwaro bja Bokriste? Jehofa o re: “Tsela yeo motho a bonago ka yona ga se tsela yeo Modimo a bonago ka yona, ka gobane motho o bona feela seo se tšwelelago mahlong a gagwe; eupja Jehofa yena o bona seo se lego pelong.”—1 Sam. 16:7, NW.)

Die. 31:30: “Botsôrô bo a fora, le botse ké lefêla; mosadi xo rêtwa mo-šia-[Jehofa].”

Beibele

Tlhaloso: Lentšu la Jehofa Modimo le le ngwaletšwego batho. O dirišitše bangwaledi ba batho ba 40 ka nako ya makgolo a nywaga a 16 gore ba e ngwale, eupja Modimo ka noši o sepedišitše go ngwalwa ga yona ka moya wa gagwe. Ka gona, e buduletšwe ke Modimo. Karolo e kgolo ya yona e dirilwe ka dipolelo tša kgonthe tšeo di boletšwego ke Jehofa gotee le ditaba tšeo di lego mabapi le dithuto le mediro ya Jesu Kriste, Morwa wa Modimo. Go tše re hwetša dipolelo tša melao ya Modimo go bahlanka ba gagwe, le seo a tlago go se dira e le gore a tle a phethe morero wa gagwe o mogolo lefaseng. Jehofa gore a tle a godiše tebogo ya rena ya go leboga dilo tše, ruri o dirile le gore pego e bolokwe ka Beibeleng yeo e bontšhago seo se diregago ge batho le ditšhaba ba theetša Modimo gomme ba dira ka go dumelelana le morero wa gagwe, gotee le seo se diregago ge ba sepela ka tsela yeo e lego ya bona. Jehofa ka go diriša pego ye ye botegago ya histori, o re tlwaelanya le mediro ya gagwe go batho gotee le seo a lego sona se se makatšago.

Mabaka a go ela Beibele hloko

Beibele ka noši e bolela gore e-tšwa go Modimo, yena Mmopi wa batho

2 Tim. 3:16, 17: “Mangwalô ka moka ke ma-hebetšwa-ke-Modimo, le xôna a hola batho ka xo ruta, le ka xo kxodiša le xo sokolla, le ka xo iša tokong. Xore motho wa Modimo e bê yo boló-ka-tlalô, a kxonišwê xo dira medirô e botse ka moka.”

Kut. 1:1: “Kutollô ya Jesu Kriste ye Modimo a Mo filexo yôna, ya ba xo bonthša bahlanka ba xaxwe tše di tl’o xo dirêxa ka pelá.”

2 Sam. 23:1, 2: “Moênô wa Dafida morwa wa Isai, . . . Môya wa [Jehofa] ó bolêla ka nna, leleme la-ka le n’e ’fokô l’axwe.”

Jes. 22:15, NW: “Se ke seo Morena yo a Phagamego, Jehofa wa makgotla a se boletšego.”

Re be re ka lebelela gore molaetša wa Modimo wo o yago bathong ka moka e be o hwetšwago lefaseng ka moka. Beibele ka moka ga yona goba diripa tša yona, ruri e fetoletšwe malemeng a mangwe a 1 800. Palo ya yona e gatišitšwego e fihla go dibilione. The World Book Encyclopedia e re: “Beibele ke puku yeo e badilwego kudu historing. Mo gongwe e ka ba e bile e le yeo e tutuetšago kudu. Dikopi tše dintši tša Beibele di abilwe go feta tša puku lege e le efe e nngwe. Le gona, e fetoletšwe ka makga a mantši malemeng a mantši-ntši go feta puku lege e le efe e nngwe.”—(1984), Puku 2, letl. 219.

Boporofeta bja Beibele bo hlalosa seo se bolelwago ke maemo a lefase

Baetapele ba bantši ba lefase ba dumela gore batho ba leribeng la kotsi. Beibele e boletše ka maemo a kgale-kgale; e hlalosa seo a se bolelago le seo se tlago go tšwelela. (2 Tim. 3:1-5; Luka 21:25-31) E re botša seo re swanetšego go se dira e le gore re tle re phologe tshenyego e batamelago ya lefase, gotee le sebaka sa go hwetša bophelo bjo bo sa felego tlase ga maemo a lokilego mo lefaseng.—Tsef. 2:3; Joh. 17:3; Ps. 37:10, 11, 29.

Beibele e re thuša go kwešiša morero wa bophelo

E araba dipotšišo tše di swanago le tše: Bophelo bo tšwa kae? (Dit. 17:24-26) Ke ka baka la’ng re le mo? Na ke fela go phela ka nywaga e sego mekae re hwetša seo se lego bophelong, gomme re fetša ka go hwa?—Gen. 1:27, 28; Ba-Roma 5:12; Joh. 17:3; Ps. 37:11; Ps. 40:8.

Beibele e bontšha kamoo re ka bago le dilo tšona tšeo barati ba go loka ba di kganyogago kudu

E re botša moo re ka hwetšago gona bagwera ba lokilego bao ba ratanago e le ka kgonthe (Joh. 13:35), seo se ka holofetšago gore re ka ba le dilo tše di lekanego go rena le go malapa a rena (Mat. 6:31-33; Die. 19:15; Ba-Ef. 4:28), kamoo re ka thabago ka gona go sa šetšwe maemo a thata ao a re dikologilego.—Ps. 1:1, 2; 34:8; Luka 11:28; Dit. 20:35.

E bolela gore Mmušo wa Modimo o tla fediša tshepedišo ya mehleng yeno e mpe (Dan. 2:44), gomme batho tlase ga pušo ya wona ba tla kgona go thabela bophelo bjo bo phethagetšego le bjo bo sa felego.—Kut. 21:3, 4; bapiša le Jesaya 33:24.

Ruri puku yeo e ipolelago gore e-tšwa go Modimo, yeo e hlalosago ka bobedi seo se bolelwago ke maemo a lefase le morero wa bophelo le yeo e bontšhago kamoo mathata a rena a tlago go rarollwa ka gona, ruri e swanetšwe ke go elwa hloko.

Bohlatse bja go budulelwa ga yona

E tletše ka diporofeto tšeo di bolelago ka tsebo ya go tseba ka bokamoso, e lego selo seo se palelago batho

2 Pet. 1:20, 21: ‘Ga go porofeto e kago hlathollwa ka boithatelo. Gobane ga go ešo gwa ba gwa tšwelela porofeto ka go ithatela ga motho, eupja batho ba bakgethwa ba Modimo ba boletše ba išwa ke moya o mokgethwa.’

◼ Boporofeta: Jes. 44:24, 27, 28; 45:1-4: “[Jehofa] . . . Nna ke bolêlaxo le bodiba ka re: Pšhaa! Ka phšeša dinoka tša xaxo. Ké Nna ke raxo Korese ka re ké modiši wa-ka e a tl’o xo phêtha tšohle di nkxahlaxo ka xo bolêla le Jerusalema a re: Axiwa! Le Ntlo-kxêthwa a re: Theiwa! [Jehofa] ó bolêla le Motlotšwa w’axwe, ké Korese a mo rexo: Ke mo swere ka letsôxô l’axwe le letona, xore dithšaba ke di dixêlê pele xa xaxwe; ke hlamolla dikxoši, ke mmulêla mejakô, e se sa tswalêlwa. Ó re Ké Nna ke Xo êtaxo pele; ke latša makukunô; ke phšatla mamati a mphiri, ke thokxa mapheko a thsipi. . . . Xe ke Xo bitša ka leina l’axo, . . . ké ka baka la Jakobo mohlanka wa-ka, le Isiraele mohlaolwa wa-ka.” (Jesaya o feditše go ngwala mo e ka bago ka 732 Pele ga Mehla ya Rena.)

◻ Phethagatšo: Korese o be a sešo a belegwa nakong ya ge boporofeta bo be bo ngwalwa. Ba-Juda ba be ba sešo ba išwa bothopja Babele go fihlela ka 617-607 Pele ga Mehla ya Rena, gomme Jerusalema le tempele ya yona di be di sešo tša senywa go fihlela ka 607 Pele ga Mehla ya Rena. Boporofeta ka kakaretšo bo ile bja thoma go phethega ka 539 Pele ga Mehla ya Rena. Korese o ile a fapošetša meetse a Noka ya Eforate letsheng la maitirelo gomme dikgoro tša ka nokeng tša Babele di ile tša tlogelwa di se tša tswalelwa ge go be go binwa monyanya motseng, ka gona Babele ya wela go ba-Meda le ba-Peresia tlase ga Korese. Korese ka morago o ile a hunolla mathopja a ba-Juda gomme a ba bušetša Jerusalema ka ditaelo tša gore ba tsošološe tempele ya Jehofa moo.—The Encyclopedia Americana (1956), Puku III, letl. 9; Light From the Ancient Past (Princeton, 1959), Jack Finegan, matl. 227-229; “All Scripture Is Inspired of God and Beneficial” (New York, 1983), matl. 282, 284, 295.

◼ Boporofeta: Jer. 49:17, 18: “Edomo e tlo ba lešope; bohle ba ba tl’o xo feta ka xôna, ba tlo tlabya, ’me ba thšoxa ka xe a otlilwe xa-kaakaa. Byalo ka Sodoma le Gomora xe xo ribexetšwa le dinakana tša xôna. [Jehofa o itše] xôna moo Edomo xo ka se hlwê xo dula motho.” (Go ngwala ga Jeremia diporofeto go ile gwa fetšwa ka 580 Pele ga Mehla ya Rena.)

◻ Phethagatšo: “[Ba-Edomo] ba ile ba lelekwa Palesitina lekgolong la bo-2 B.C. la nywaga ke Judas Maccabæus, gomme ka 109 B.C. John Hyrcanus yo e bego e le moetapele wa ba-Maccabee, o ile a godiša mmušo wa Juda gore o akaretše karolo ya ka bosobelatšatši bja lefase la Edomo. Lekgolong la 1 B.C. la nywaga, go naba ga Roma go ile gwa gogola karolo ya mafelelo ya boipušo bja Edomo . . . Ka morago ga tshenyego ya Jerusalema e dirilwego ke Ba-Roma ka 70 A.D. . . . ruri leina la Idumæa [Edomo] le ile la hwelela historing.” (The New Funk & Wagnalls Encyclopedia, 1952, Puku 11, letl. 4114) Hlokomela gore phethagatšo e nanabela go fihlela mehleng ya rena. Ruri ga go na kamoo go ka hlahlwago kgang ya gore boporofeta bjo bo ile bja ngwalwa ka morago ga ge ditiragalo di šetše di diragetše.

◼ Boporofeta: Luka 19:41-44; 21:20, 21: “[Jesu Kriste] a bôna motse [Jerusalema], a o llêla, A re: . . . O tlo tlêlwa ke matšatši ao manaba a xaxo a tl’o xo êpa lengôpê a Xo dikoloxa, a Xo rakêlêla, a Xo tlaletše thokô tšohle. Ba tlo Xo dixêla fase le bana ba xaxo ba xo wene; ba ka se kê ba tloxêla lefsika lè sa hlatlaxane le le lengwê; ka xobane O sa ka wa lemoxa lebaka leo O etetšwexo ka lôna.” Ge a be a kgala barutiwa ba gagwe matšatšing a mabedi ka morago, o itše: “E re xe Le bôna motse wa Jerusalema ò dikilwe ke makôkô a madirá,