Batswadi, Thabišwang ke Bana ba Lena

“A xo thabê tat’axo le mm’axo.”—DIEMA 23:25.

1. Ke’ng seo se tlago go dira gore batswadi ba thabišwe ke bana ba bona?

KE MO gobotse gakaakang go bona sehlašana se gola gomme se e-ba sehlare se se tiilego seo se neago botse le moriti—kudu-kudu ge e ba o se bjetše le go se hlokomela! Ka mo go swanago, batswadi bao ba hlokomelago bana bao ba golelago go ba bahlanka ba budulego ba Modimo ba thabišwa kudu ke bona, go etša ge seema sa Beibele se re: “Tata-xo-moloki ó tlo hlalala ka xoxolo; yo bohlale ó thabêlwa ke motswadi w’axwe. A xo thabê tat’axo le mm’axo, xo hlalalê wa xaxo motswadi.”—Diema 23:24, 25.

2, 3. (a) Batswadi ba ka phema bjang manyami le bohloko? (b) Ke’ng seo se nyakwago ke dihlašana le bana e le gore di be mothopo wa lethabo?

² Lega go le bjalo, ngwana ga a be “moloki” le “yo bohlale” ka go fo itiragalela. Go nyakega boiteko bjo bogolo go thibela bana go ba mothopo wa “manyami” le “bohloko,” go fo etša ge go ka akaretšwa modiro tabeng ya go fetola sehlašana gore e be sehlare se se tiilego. (Diema 17:21, 25, bapiša le NW.) Ka mohlala, diphate tša go thekgetša di ka tlwaetša sehlašana se senyenyane go gola ka go letla le ka go tia. Go nošetšwa ka mehla ke ga bohlokwa, gomme sehlašana se ka nyaka gore se šireletšwe dijing. Sa mafelelo, go kgotha go thuša go tšweletša sehlare se sebotse.

³ Lentšu la Modimo le utolla gore bana ba nyaka dilo tše bjalo ka tlwaetšo ya go boifa Modimo, go tlatšwa ka meetse a therešo ya Beibele, go šireletšwa dikgobošong tša boitshwaro le tayo e lerato ya go kgotha ka mo go feletšego mekgwa e sa nyakegego. Go nea dinyakwa tše, bo-tate kudu-kudu ba kgothaletšwa go godiša bana ba bona “ka tayo le tlhahlo ya monagano ya Jehofa.” (Ba-Efeso 6:4, NW) Se se akaretša’ng?

Go Gatelela Mantšu a Jehofa

4. Ke boikarabelo bofe bjo batswadi ba nago le bjona go bana ba bona, gona ke’ng seo se nyakegago pele ba ka bo phethagatša?

⁴ “Tlhahlo ya monagano ya Jehofa” e bolela go hlahla kgopolo ya rena gore e dumelelane le thato ya Jehofa. Ka gona, batswadi ba swanetše go tsenya kgopolo ya Jehofa baneng ba bona ge e le mabapi le ditaba. Le gona ba swanetše go ekiša mohlala wa Modimo wa go nea tayo ya kwelobohloko goba tlwaetšo e phošollago. (Psalme 103:10, 11; Diema 3:11, 12) Eupša pele batswadi ba dira se, bona ka noši ba swanetše go monya mantšu a Jehofa go etša ge Moše moporofeta wa Modimo a ile a eletša ba-Isiraele ba bogologolo ka gore: “Mantšu a [a tšwago go Jehofa] a ke Xo laetšaxo lehono a a dulê a le pelong ya xaxo.” (Mongwalo o sekamego ke wa rena.)—Doiteronomio 6:6.

5. Ke neng gomme ka tsela efe batswadi ba ba-Isiraele ba bego ba ruta bana ba bona, gona ke eng seo se bolelwago ke go ‘tiišetša’?

⁵ Go ithuta Beibele ka mehla, go naganišiša le thapelo di hlama batswadi go dira seo Moše a se laetšego ka mo go latelago: “O a tiišetšê [mantšu a Jehofa] bana ba xaxo; O bolêlê ôna Ò dutše ngwakong wa xaxo, le xe O le tseleng xe O y’o rôbala le xe Ò tsoxa.” (Mongwalo o sekamego ke wa rena.) Lentšu la Sehebere leo le fetoletšwego e le “tiišetšê” le bolela “go boeletša,” “go bolela leboelela,” “go gatelela ka mo go kwalago.” Ela hloko kamoo Moše a gateletšego ka mo go tšwelago pele go nyakega ga go etiša mantšu a Jehofa pele: “O a tlêmêlêlê seatleng sa xaxo e bê seká, e bê mofapahlôxô mo phatleng ya xaxo. O a ngwalê dijakwaneng tša ngwakô wa xaxo, le mo maxorong a xaxo.” Ka mo go kwalago, Jehofa o nyaka gore batswadi ba nee bana ba bona tlhokomelo ya ka mehla e lerato!—Doiteronomio 6:7-9.

6. Ke’ng seo batswadi ba bego ba swanetše go se tiišetša bana ba bona, gomme mohola e be e le ofe?

⁶ “Mantšu a” a Jehofa ao batswadi ba bego ba swanetše go a tiišetša bana ba bona ke afe? Moše o be a sa tšwa go boeletša seo ka tlwaelo se bitšwago Melao e Lesome, go akaretša ditaelo tša mabapi le go se bolaye, go se otswe, go se utswe, go se bolele bohlatse bja maaka le go se dume. Dinyakwa tše bjalo tša boitshwaro gotee le taelo ya go “rata Jehofa Modimo wa gago, ka pelo ya gago ka moka, le ka moya wa gago ka moka, le ka matla a gago ka moka,” ke tšeo kudu-kudu batswadi ba ba-Isiraele ba bego ba swanetše go di tiišetša bana ba bona. (Doiteronomio 5:6-21; 6:1-5, PK) Na o be o ka se ke wa dumela gore wo ke mohuta wa thuto yeo bana ba e nyakago lehono?

7. (a) Bana ba be ba bapišwa le eng ka Beibeleng? (b) Ke’ng seo bjale re tlago go se hlahloba?

⁷ Tate wa mo-Isiraele o be a boditšwe gore: “Mosadi wa xaxo ó etša morara wa dienywa mo lapeng la xaxo; ’me bana ba xaxo ba etša mahloxedi a mohlware bà tetile mexopo ya xaxo.” (Psalme 128:3) Lega go le bjalo, gore batswadi ba thabišwe ke “dihlašana” tša bona go e na le go nyama, ba swanetše go ba le kgahlego ya motho ka noši ya letšatši le letšatši baneng ba bona. (Diema 10:1; 13:24; 29:15, 17) Anke re hlahlobeng kamoo batswadi ba ka tlwaetšago, ba nošetša ka tsela ya moya, ba šireletša le go laya bana ba bona ka lerato ka tsela yeo ka yona ba ka thabišwago e le ka kgonthe ke bona.

Go ba Tlwaetša go Tloga Boseeng

8. (a) Ke bomang bao ba dirilego e le diphate tša tlwaetšo go Timotheo? (b) Tlwaetšo e ile ya thoma neng, gomme ka mafelelo afe?

⁸ Nagana ka Timotheo, yo ge re bolela ka go swantšhetša a ilego a hwetša thekgo diphateng tše pedi tša tlwaetšo tše di tsemilwego ka go tia—e lego mmagwe le makgolo’agwe. Ka ge tatago Timotheo e be e le mo-Gerika gomme go bonala gore e be e se modumedi, ke mmagwe wa mo-Juda e lego Oinika le makgolo’agwe Loisa, bao ba ilego ba tlwaetša mošemane ‘go tloga boseeng ka mangwalo a makgethwa.’ (2 Timotheo 1:5; 3:15, NW; Ditiro 16:1) Mafolofolo a bona go ruteng Timotheo—gaešita le ge e be e sa le lesea—“mehlolo yeo [Jehofa] a e dirilego,” a ile a putswa ka mo go humilego. (Psalme 78:1, 3, 4, PK) Timotheo o ile a ba moromiwa dinageng tša kgole, mohlomongwe le ge e be e sa le mofsa wa mahlalagading gomme o kgathile tema e kgolo go matlafatšeng diphuthego tša pele tša Bokriste.—Ditiro 16:2-5; 1 Ba-Korinthe 4:17; Ba-Filipi 2:19-23.

9. Bana ba ka ithuta bjang go phema mereo ya go rata dilo tše di bonagalago?

⁹ Batswadi, le diphate tša tlwaetšo tša mohuta mang? Ka mohlala, na le nyaka bana ba lena ba hlagolela pono e leka-lekanego ka dilo tše di bonagalago? Gona le swanetše go bea mohlala o nepagetšego ka go se phegelele ditlabakelo ka moka tša morago-rago goba dilo tše dingwe tšeo ge e le gabotse le sa di nyakego. Ge e ba le kgetha go phegelela mehola ya dilo tše di bonagalago, le se ke la makala ge bana ba lena ba le ekiša. (Mateo 6:24; 1 Timotheo 6:9, 10) Ka kgonthe, ge e ba diphate tša go tlwaetša di sa letla, sehlašana se ka gola bjang se letlile?

10. Ke tlhahlo ya mang yeo batswadi ba swanetšego go e tsoma ka mehla, gomme ke boemo bofe bja kgopolo bjo ba swanetšego go ba le bjona?

¹⁰ Batswadi bao ba thabišwago ke bana ba bona ba tla tsoma thušo ya Modimo ka mehla gore ba ba tlwaetše, ba naganišiša ka mehla seo e lego se se holago kudu go bana ba bona moyeng. Mma wa bana ba bane o ile a anega ka gore: “Gaešita le pele ga ge bana ba rena ba ka belegwa, re be re rapela Jehofa ka mehla gore a re thuše go ba batswadi ba ba botse, gore re hlahlwe ke Lentšu la gagwe le go le diriša maphelong a rena.” O okeditše ka gore: “‘Jehofa o tla pele’ e be e se polelwana feela e tlwaelegilego, eupša e le tsela yeo re bego re phela maphelo a rena ka yona.”—Baahlodi 13:8.

Go Aba “Meetse” ka Mehla

11. Gore bobedi dihlašana le bana di gole go nyakega’ng?

¹¹ Dihlašana gantši di nyaka kabo ya ka mehla ya meetse, ka ge go bontšhwa ke kamoo dihlare di melago gabotse ka gona go bapa le noka. (Bapiša le Kutollo 22:1, 2.) Bana le bona ba tla gola gabotse moyeng ge e ba ba newa meetse a therešo ya Beibele ka mehla. Eupša batswadi ba swanetše go ela hloko botelele bja nako yeo ngwana wa bona a ka kgonago go ela hloko ka yona. Mohlomongwe mananeo a leboelela a makopana a thuto e ka ba a atlegilego go feta a sego kae a matelele. O se ke wa nyenyefatša bohlokwa bja mananeo a bjalo a makopana. Go diriša nako le le gotee go bohlokwa bakeng sa go bopa tlemo magareng ga motswadi le ngwana, e lego tswalano yeo e kgothaletšwago leboelela ka Mangwalong.—Doiteronomio 6:6-9; 11:18-21; Diema 22:6.

12. Mohola wa go rapela le bana ke ofe?

¹² Le lengwe la mananeo a go ba le bana e ka ba bofelong bja letšatši. Mofsa yo mongwe o a gopola: “Batswadi ba rena ba be ba dula ntlheng ya bolao bja rena bošego bjo bongwe le bjo bongwe gomme ba theetša ge re rapela dithapelo tša rena ka noši.” Mabapi le bohlokwa bja go dira se, yo mongwe o itše: “Seo se ile sa ntsenya mokgweng wa go rapela Jehofa bošegong bjo bongwe le bjo bongwe pele ke e-ya go robala.” Ge bana ba e-kwa batswadi ba bona letšatši le letšatši ba bolela ka Jehofa le go mo rapela, e ba motho wa kgonthe go bona. Lesogana le lengwe le itše: “Ke be nka ponya mahlo gore ke rapele Jehofa gomme ke bone motho wa kgonthe wa mokgalabje. Batswadi ba-ka ba nthušitše go bona gore Jehofa o kgatha tema selong se sengwe le se sengwe seo re se dirago le seo re se bolelago.”

13. Dinako tša ka mehla tša go ithuta di ka akaretša’ng?

¹³ Go thuša bana go monya meetse a therešo ya Beibele, batswadi ba ka akaretša dilo tše dintši tše di šomago dinakong tša ka mehla tša thuto. Batswadi ba bana ba babedi ba sa hlwago ba tsena mahlalagading ba itše: “Bana ka bobedi ba ile ba thoma go amogela tlwaetšo ya go dula ba homotše ka Holong ya Mmušo go tloga dibekeng tša bona tše sego kae tša mathomo tša bophelo.” Tate o ile a hlalosa seo lapa la gagwe le se dirilego: “Re ile ra lokeletša dipuku ka moka tša Beibele dikarateng tša hlatlamano gomme ra itlwaetša go di bea ka go latelana, ka moka ga rena re tšea karolo ka go šielana. Bana ba be ba fagahlela se ka mehla.” Malapa a mantši a akaretša nako e kopana ya thuto, e ka ba pele goba ka morago ga dijo. Tate yo mongwe o itše: “Dijo tša mantšiboa e bile nako e botse go rena bakeng sa go ahla-ahla temana ya letšatši le letšatši ya Beibele.”

14. (a) Ke mediro efe e putsago moyeng yeo e ka abelanwago le bana? (b) Ke kgonagalo efe ya go ithuta yeo bana ba nago le yona?

¹⁴ Bana gape ba thabela go theetša dipego tše kwagalago tša Beibele gabotse ka go Puku Ya-ka ya Ditaba tša Beibele.a Banyalani ba ile ba hlalosa gore: “Ge bana e be e sa le ba banyenyane, go be go akaretšwa thuto e lego pukung ya Ditaba tša Beibele gomme ka morago bana ba be ba apara diaparo tša go ekišetša baanegwa gomme ba bapala dikarolo ka sebopego sa papadi e kopana. Ba be ba rata se gomme gantši ba phegelela go dira dikanegelo tše dintši go e na le kanegelo e tee thutong e nngwe le e nngwe.” Le se ke la nyatša matla a ngwana wa lena a go ithuta! Bana ba nywaga e mene ba ile ba swara dikgaolo ka moka tša puku ya Ditaba tša Beibele ka hlogo gomme ba bile ba ithutile go bala Beibele! Mofsa yo mongwe o gopola gore ge a be a sa na le nywaga e ka bago e meraro le seripa, o be a fela a bitša “diphetho tša boahlodi” ka mo go fošagetšego leboelela, eupša tatagwe o ile a mo kgothaletša gore a tšwele pele a itlwaetša.

15. Ke ditaba dife tšeo di ka akaretšwago dipoledišanong le bana, gomme ke bohlatse bofe bjo bo lego gona bja gore dipoledišano tše bjalo ke tša bohlokwa?

¹⁵ Mananeo ao a swarwago le bana ba gago gape a ka dirišwa bakeng sa go ba lokišeletša go abelana meetse a therešo le ba bangwe, bjalo ka go nea ditlhaloso dibokeng. (Ba-Hebere 10:24, 25) Mofsa yo mongwe o a gopola: “Nakong ya mananeo a rena a go itlwaetša, ke be ke tla swanelwa ke go hlalosa ka mantšu a-ka ka noši. Ke be ke sa dumelelwa go fo bala ke sa kwešiše.” Go oketša moo, bana ba ka tlwaetšwa gore ba tšee karolo e nago le morero bodireding bja tšhemo. Mosadi yo a godišitšwego ke batswadi ba ba boifago Modimo o hlalosa gore: “Le ka mohla re be re se kgwara yeo e fogo felegetša batswadi ba rena modirong wa bona. Re be re tseba gore re tšea karolo, gaešita le ge e be e fo ba go letša tšhipi ya mojako le go tlogela pampišana. Ka go lokišetša ka kelohloko pele ga mediro e mengwe le e mengwe ya mafelo-beke, re be re tseba seo re bego re tla se bolela. Le ka mohla re be re sa tsoge mesong ya Mokibelo re botšiša ge e ba re e-ya bodireding. Re be re tseba gore re a ya.”

16. Ke ka baka la’ng go swara thuto ya lapa le bana ka mehla go le bohlokwa?

¹⁶ Go nyakega ga ka mehla ga go nea bana meetse a therešo ya Beibele go ka se ke gwa gatelelwa ka mo go feteletšego, e lego seo se bolelago gore thuto ya Beibele ya lapa ya beke le beke e bohlokwa. Tate wa bana ba babedi o re “lebaka le legolo tabeng ya go galefiša bana ke go se tsepame.” (Ba-Efeso 6:4) O itše: “Nna le mosadi wa-ka re ile ra kgetha letšatši le nako gomme re swara thuto ya lapa ka potego ka thulaganyo yeo. Ga se gwa tšea lebaka le letelele pele bana ba letela nako yeo.” Tlwaetšo e bjalo ka moka go tloga boseeng e bohlokwa, ka go dumelelana le therešo e sa belaetšego e rego, ‘Sehlare se tla gola go ya kamoo lekala le lenyenyane le thekgeditšwego ka gona.’

17. Ke’ng seo se lego bohlokwa go swana le go nea bana ditherešo tša Beibele?

¹⁷ Go nea bana ditherešo tša Beibele go bohlokwa, eupša mohlala wa batswadi o bohlokwa ka mo go swanago. Na bana ba lena ba le bona le ithuta, le e-ya dibokeng ka mehla, le tšea karolo bodireding bja tšhemo, ee, le kgahlišwa ke go dira thato ya Jehofa? (Psalme 40:8) Ke gabohlokwa gore ba dire bjalo. Ka mo go lemogegago, morwedi yo mongwe o boletše ka mmagwe yo a bego a kgotleletše kganetšo ya monna wa gagwe gomme a godišitše bana ba tshelelago gore e be Dihlatse tše botegago ka gore: “Seo se re tutueditšego kudu e bile mohlala wa mma ka noši—e lego wo o boletšego go gontši go feta mantšu.”

Go Nea Bana Tšhireletšo

18. (a) Batswadi ba ka nea bjang bana tšhireletšo yeo ba e nyakago? (b) Ke thuto ya mohuta mang yeo bana Isiraeleng ba ilego ba e hwetša mabapi le ditho tša mmele tša pelego?

¹⁸ Ka ge dihlašana gantši di nyaka go šireletšwa dijing tše kotsi, tshepedišong ye e kgopo ya dilo bana ba nyaka go šireletšwa go “batho ba babe.” (2 Timotheo 3:1-5, 13) Batswadi ba ka nea tšhireletšo ye bjang? Ka go ba thuša go hwetša bohlale bja Modimo! (Mmoledi 7:12) Jehofa o ile a laela ba-Isiraele—go akaretša le “bana” ba bona—go theetša go balwa ga Molao wa gagwe wo o bego o akaretša go hlaloswa ga boitshwaro bjo bo swanetšego le bjo bo sa swanelago bja botona le botshadi. (Doiteronomio 31:12, mongwalo o sekamego ke wa rena; Lefitiko 18:6-24.) Ditho tša mmele tša pelego di bolelwa leboelela, go akaretša “dithaka tša peu ya bonna” le “setho sa bong.” (Lefitiko 15:1-3, 16; 21:20; 22:24, bapiša le NW; Numeri 25:8; Doiteronomio 23:10.) Ka baka la kgobogo e feteletšego ya lefase la lehono, bana ba swanetše go tseba go dirišwa mo go swanetšego le mo go sa swanelago ga ditho tše bjalo tša mmele tšeo di akaretšwago tlholong yeo Modimo a e biditšego e “botse kudu.”—Genesi 1:31; 1 Ba-Korinthe 12:21-24.

19. Ke thuto efe e swanetšego yeo e ka rutwago bana mabapi le ditho tša bona tša pelego?

¹⁹ Ka mo go swanetšego, batswadi ka bobedi goba mogodiši yo mongwe le yo mongwe yo e lego motho yo mogolo, ba swanetše go hlalosetša bana ka ditho tša bona tša pelego. Ka morago ba swanetše go hlalosa gore ga go na motho yo mongwe yo a swanetšego go dumelelwa go swara ditho tše. Ka ge bagoboši ba bana gantši ba leka kamoo bana ba arabelago ka gona diphegelelong tša bohwirihwiri tša botona le botshadi, ngwana o swanetše go rutwa go gana ka go tia gomme a re, “Ke tlo go tlalea!” Rutang bana ba lena go tlalea ka mehla motho le ge e le ofe yo a lekago go ba swara ka tsela yeo e ba dirago gore ba ikwe ba sa lokologa, go sa šetšwe ditšhošetšo le ge e le dife tše tšhošago tšeo di dirwago.

Go Nea Tayo e Lerato

20. (a) Tayo e swana bjang le go kgotha? (b) Ke mafelelo afe a mathomo ao tayo e nago le ona, eupša go feleletša ka eng?

²⁰ Bana ba holwa ke tayo e lerato, go etša ge sehlare se holwa ke go kgothwa. (Diema 1:8, 9; 4:13; 13:1) Ge makala ao a sa nyakegego a ripša, go gola ga a mangwe go a hlohleletšwa. Ka gona ge e ba bana ba lena ba tsepelela kudu dithotong tša dilo tše di bonagalago goba ba sekamela bogwereng bjo bobe goba boithabišo bjo bo sa kgahlišego, ditshekamelo tše tše fošagetšego di swana le makala ao a nyakago go ripša. Ge e ba di tlošwa, bana ba lena ba tla thušwa go golela ka lehlakoreng la moya. Tayo e bjalo mathomong e ka bonala e sa thabiše, go fo etša ge go kgotha go ka baka tšhitišo e itšego sehlareng. Eupša mafelelo a mabotse a tayo ke kgolo e mpshafaditšwego ya go golela ka lehlakoreng leo le nyakago ngwana wa lena a golela go lona.—Ba-Hebere 12:5-11.

21, 22. (a) Ke’ng seo se bontšhago gore go nea goba go amogela tayo ga go thabiše? (b) Ke ka baka la’ng batswadi ba sa swanela go lesa go nea tayo?

²¹ Ke mo go lemogegago kudu gore tayo ga go thabiše go e nea goba go e amogela. Tate yo mongwe o itše: “Morwa wa-ka o be a fetša nako e ntši le mofsa yo bagolo ba bego ba ntemošitše gore ga se mogwera yo botse. Ke be ke swanetše go ba ke ile ka gata mogato kapejana go feta kamoo ke dirilego ka gona. Gaešita le ge morwa wa-ka a se a ka a akaretšwa phošong le ge e le efe e bonalago, go ile gwa tšea lebaka go lokiša kgopolo ya gagwe.” Morwa o ile a bolela gore: “Ge ke be ke arogantšhwa le mogwera wa-ka wa potego, ke ile ka nyama kudu.” Eupša o okeditše ka gore: “Ye e bile phetho e botse, ka ge kapejana ka morago ga moo a ile a kgaolwa.”

²² Lentšu la Modimo le re: “Thsôlô le keletšô ké tsela ya bophelô.” Ka gona go sa šetšwe kamoo go ka bago thata ka gona go nea tayo, o se ke wa hlokiša bana ba gago tayo. (Diema 6:23; 23:13; 29:17) Ge nako e dutše e e-ya, ba tla leboga ge o ba phošolotše. Mofsa o a elelwa: “Ke gopola ke be ke galefetše batswadi ba-ka kudu ge ke be ke laiwa. Ga bjale ke be ke tla galefa kudu ka go fetišiša ge nkabe batswadi ba-ka ba ile ba ntlhokiša tayo yeo.”

Moputso o Swanelwa ke Boiteko

23. Ke ka baka la’ng tlhokomelo ka moka e lerato yeo e newago bana e swanelwa ke boiteko?

²³ Ga go na pelaelo ka se, bana bao batswadi ba bona gotee le ba bangwe ba kgahlišwago ke bona ba ba gona ka baka la tlhokomelo e ntši ya letšatši le letšatši le e lerato. Lega go le bjalo, boiteko ka moka bjo bo dirišetšwago go bona—e ka ba e le bana ba nama goba ba moya—ke bjo bo tlogago bo swanelwa ke moputso wo o ka thabelwago. Moapostola Johane yo a tšofetšego o bontšhitše se ge a be a ngwala gore: “Nna xa ke na lethabô le le fetaxo leo la xe ke kwa xore bana ba-ka ba swere tsela ya therešô.”—3 Johane 4.

[Mongwalo wa tlase]

Na o a Gopola?

◻ Ke’ng seo dihlašana gotee le bana di se nyakago gore e be tše kgahlišago?

◻ Ge e le gabotse, batswadi ba ka dira bjang e le diphate tše di atlegago tša tlwaetšo?

◻ Ke’ng seo se ka akaretšwago mananeong a go ithuta gotee le bana, gona ba swanetše go rutwa gore ba gane eng?

◻ Tayo e hola ngwana bjang go etša ge go kgotha go hola sehlare?

[Picture Credit Line on page 10]

Courtesy of Green Chimney’s Farm