Kgaolo 1
O Ka Ba Le Bokamoso Bja Lethabo!
1, 2. Mmopi wa gago o nyaka gore o be le eng?
GO GOKARELWA ka borutho ke motho yo o mo ratago. Lesego le le tšwago pelong nakong ya dijo tše di bose gotee le bagwera ba ba rategago. Lethabo la go bogela bana ba gago ba bapala ka lethabo. Dinako tše di swanago le tše ke tše di thabišago bophelong. Lega go le bjalo, bophelo bo bonala bo tlišetša ba bantši mathata a magolo ka go latelana. Ge e ba o bile le phihlelo yeo, gona kgodišega.
2 Modimo o rata gore o be le lethabo la ka mo go sa felego ka tlase ga maemo a kaone kudu ditikologong tše di thabišago. Se ga se toro feela, ka gobane ge e le gabotse Modimo o go nea senotlelo se se išago bokamosong bjo bo bjalo bja lethabo. Senotlelo seo ke tsebo.
3. Ke tsebo efe yeo e lego senotlelo se se išago lethabong, gona ke ka baka la’ng re ka kgodišega gore Modimo a ka nea tsebo yeo?
3 Re bolela ka mohuta o kgethegilego wa tsebo e fetago bohlale bja motho kgole. Ke “xo tseba Modimo.” (Diema 2:5) Mo e nyakilego go ba nywaga e 2 000 e fetilego, mongwadi wa Beibele o itše: “Xobane malapá ka moka a na le baaxi ba ôna; xomme Mo-axa-tšohle ké Modimo.” (Ba-Hebere 3:4) Nagana ka tsebo yeo Modiri wa dilo tšohle a swanetšego go ba a e-na le yona! Beibele e bolela gore Modimo o bala le go bitša dinaledi ka moka ka maina. Ke kgopolo e tlabago gakaakang, ka ge go e-na le dinaledi tše dimilione tše dikete tše makgolo molalatlading wa rena wa dinaledi gomme diithuti tša tša dinaledi di bolela gore go na le mo e ka bago melalatladi e mengwe e dimilione tše dikete tše lekgolo ya dinaledi! (Psalme 147:4) Modimo o bile o tseba tšohle ka rena, ka gona ke mang yo mongwe yo a ka neago dikarabo tše di kwalago tša dipotšišo tše bohlokwa tša bophelo?—Mateo 10:30.
4. Ke ka baka la’ng re swanetše go letela gore Modimo a nee ditaelo bakeng sa go re hlahla, gona ke puku efe e kgotsofatšago senyakwa se?
4 Akanya ka banna ba babedi ba leka go lokiša dikoloi tša bona. Ka go ferekana, monna yo mongwe o lahlela didirišwa tša gagwe fase. Yo mongwe o lokiša bothata ka boiketlo, o dikološa senotlelo gomme o a myemyela ge entšene e thoma go duma e bile e šoma gabotse. O be o ka se be le bothata bja go phopholetša yo a bego a e-na le puku ya ditaelo e tšwago go batšweletši gare ga banna ba ba babedi. Na ga se mo go kwalago gore Modimo o be a tla nea ditaelo tša go re hlahla bophelong? Go etša ge mo gongwe o ka ba o tseba, Beibele e ipolela gore ke yona—puku ya ditaelo le tlhahlo e tšwago go Mmopi wa rena e reretšwego go nea tsebo ya go tseba Modimo.—2 Timotheo 3:16.
5. Tsebo yeo Beibele e e rwelego ke ya bohlokwa gakaaka’ng?
5 Ge e ba boipolelo bja Beibele e le therešo, anke o nagane ka mahumo a tsebo ao puku yeo e swanetšego go ba e e-na le ona! Go Diema 2:1-5 e re kgothaletša go tsoma bohlale, gore re bo epe bjalo ka ge re be re tla dira bakeng sa lehumo le le fihlilwego—e sego mobung wa kgopolo ya motho, eupša Lentšung la Modimo ka noši. Ge e ba re tsoma moo, re tla “tseba Modimo.” Ka ge Modimo a kwešiša mafokodi le dinyakwa tša rena, o re nea thuto e tlago go re thuša go phela maphelo a khutšo le a lethabo. (Psalme 103:14; Jesaya 48:17) Go feta moo, tsebo ya go tseba Modimo e re nea ditaba tše di thabišago tše di lokilego.
BOPHELO BJO BO SA FELEGO!
6. Jesu Kriste o neile kgonthišetšo efe mabapi le go tseba Modimo?
6 Motho yo a tumilego kudu wa histori e lego Jesu Kriste, o hlalositše karolo ye ya tsebo ya go tseba Modimo ka mo go kwalago. O itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3, mongwalo o sekamego ke wa rena.) Akanya—tsebo e išago bophelong bjo bo sa felego!
7. Go na le bohlatse bofe bja gore Modimo o be a sa re rerela gore re hwe?
7 O se ke wa akgofela go tshediša bophelo bjo bo sa felego mahlo e le toro feela. Go e na le moo, anke o lebelele tsela yeo mmele wa motho o dirilwego ka yona. O hlamilwe ka mo go tlabago kudu gore o latswe, o kwe ka ditsebe, o dupe, o bone gomme o kwe ka go kgoma. Go na le mo gontši kudu lefaseng mo go thabišago dikwi tša rena—dijo tše di bose, molotšana o thabišago wa nonyana, monkgo o bose wa matšoba, ponagalo e botse le bogwera bjo bo thabišago! Le gona bjoko bja rena bjo bo makatšago bo feta kgole computer e matla ka gobane bo dira gore re kgone go leboga le go thabela dilo tše bjalo ka moka. Na o nagana gore Mmopi wa rena o nyaka gore re hwe gomme re lahlegelwe ke se ka moka? Na e ka se be mo go nago le tlhaologanyo kudu go phetha ka gore o nyaka gore re phele re thabile gomme re thabele bophelo ka mo go sa felego? Ee, ke sona seo go tseba Modimo go ka se bolelago go wena.
BOPHELO PARADEISENG
8. Beibele e re’ng ka bokamoso bja batho?
8 Seo Beibele e se bolelago ka bokamoso bja lefase le batho se ka hlaloswa ka boripana ka lentšu le tee—Paradeise! Jesu Kriste o boletše ka yona ge a be a botša monna yo a hwago gore: “O tlo ba le Nna Paradiseng.” (Luka 23:43) Ga go pelaelo gore go bolelwa ga Paradeise go ile gwa gopotša monna yoo boemo bja lethabo bja batswadi ba rena ba pele, e lego Adama le Efa. Ge Modimo a be a ba bopa, ba be ba phethagetše gomme ba dula phakeng e swanago le tšhemo yeo Mmopi a bego a e hlamile le go bjala go yona. E be e bitšwa ka mo go swanetšego gore ke tšhemo ya Edene, e lego leina leo le bolelago lethabo.
9. Go phela Paradeiseng ya mathomo go be go le bjang?
9 Tšhemo yeo e be e le e thabišago gakaakang! E be e le paradeise ya kgonthe. Gare ga dihlare tša yona tše dibotse go be go e-na le tše di enyago dienywa tše di hlabolago. Ge Adama le Efa ba be ba dutše ba hlahloba tikologo ya bona, ba e-nwa meetse a yona a bose e bile ba fula dienywa dihlareng tša yona, ba be ba se na lebaka la go belaela goba go boifa. Gaešita le diphoofolo di be di sa bake kotsi le gatee, ka gobane Modimo o be a beile monna le mosadi wa gagwe gore ba di buše ka moka ka lerato. Go oketša moo, batho ba babedi ba pele ba be ba phetše gabotse kudu mmeleng. Bokamoso bja ka mo go sa felego bja lethabo bo be bo le ka pele ga bona ge feela ba be ba dula ba e-kwa Modimo. Ba be ba neilwe modiro o kgotsofatšago wa go hlokomela legae la bona le le kgahlišago la Paradeise. Go oketša moo, Modimo o neile Adama le Efa taelo ya go ‘tlatša lefase le go le buša.’ Bona le bana ba bona ba be ba swanetše go katološa mellwane ya Paradeise go fihlela polanete ya rena ka moka e e-ba lefelo le lebotse le le le thabišago.—Genesi 1:28.
10. Jesu o be a naganne ka eng ge a be a bolela ka Paradeise?
10 Lega go le bjalo, ge Jesu a be a bolela ka Paradeise o be a sa kgopele monna yo a hwago gore a nagane ka tša nakong e fetilego. Aowa, Jesu o be a bolela ka bokamoso! O be a tseba gore legae la rena la lefaseng ka moka e be e tla ba paradeise. Ka gona Modimo o be a tla phethagatša morero wa gagwe wa mathomong ka batho le lefase la rena. (Jesaya 55:10, 11) Ee, Paradeise e tla tsošološwa! Ka gona e tla ba bjang? Anke Lentšu la Modimo, e lego Beibele e Kgethwa le arabe.
BOPHELO PARADEISENG E TSOŠOLOŠITŠWEGO
11. Go tla direga’ng ka bolwetši, botšofadi le lehu Paradeiseng e tsošološitšwego?
11 Bolwetši, botšofadi le lehu di ka se sa hlwa di e-ba gona. “Ké mo xo tl’o xo budollwa mahlô a difofu, xwa thibollwa ’tsêbê tša difoa. Ke mo dixôlê di tl’o xo taboxa bo-ka thsêpê, xwa tlo hlalala ’leme la semuma.” (Jesaya 35:5, 6) “’Me Yêna mong Modimo ó tlo ba le [batho] è le Modimo wa bôná. ’Me Yêna Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.”—Kutollo 21:3, 4.
12. Ke ka baka la’ng re ka kgodišega gore go ka se be le bosenyi, bošoro le bokgopo Paradeiseng ya nakong e tlago?
12 Bosenyi, bošoro le bokgopo di tla be di feletše sa ruri. “Ba babe ba tlo lôba; . . . Xo se xokae e mobe ó tlo ba a ile . . . yêna à [ka] se [be] xôna. Ba bolêta e tlo ba bôná beng ba naxa.” (Psalme 37:9-11) “Ba babe ba tlo fedišwa naxeng; bakxeloxi ba tlo rakwa mo xo yôna.”—Diema 2:22.
13. Modimo o tla tliša bjang khutšo?
13 Khutšo e tla aparela lefaseng ka bophara. “E a [Modimo] fetšago dintwa go fihla mafelelong a lefase, o thokga dikgapa [“bora,” NW], o robaganya marumo.” (Psalme 46:10, PK) “Xo taxê moloki, moláô o xolê ò e-ya le dikxwedi di sa kxaotše xo balama.”—Psalme 72:7.
14, 15. Beibele e re’ng ka madulo, modiro le dijo Paradeiseng e tsošološitšwego?
14 Madulo e tla ba a šireletšegilego mola modiro e le o kgotsofatšago. “Nywakô ye ba e axaxo ba tlo dula mo xo yôna; . . . Ba ka se kê ba axa, xwa dula o šele; ba ka se kê ba lema xwa ja o šele; xobane matšatši a batho ba-ka a tlo lekana le matšatši a sehlare, ’me bahlaolwa ba-ka ba tlo phela ka tše ba itiretšexo tšôna, tša tlo bá tša ba ônalêla diatleng. Ba ka se itapiše, ’me ya ba lefêla; ba ka se tswale bana ba xo tlo hwa ka pela.”—Jesaya 65:21-23.
15 Dijo tše di nago le phepo di tla hwetšagala ka boati. “Xo tlo ba le mohora wa mabêlê mo naxeng; ’phoxong tša thaba meré ya dienywa e tlo xwaša.” (Psalme 72:16) “Lefase le nthšitše dikenyô tša lôna. Re šegofatšwa ke Modimo, Modimo wa rena.”—Psalme 67:6.
16. Ke ka baka la’ng bophelo Paradeiseng e tla ba bjo bo thabišago?
16 Bophelo bjo bo sa felego lefaseng la paradeise e tla ba bjo bo thabišago. “Baloki e ba beng ba naxa, ba dula mo xo yôna ka mehla le ka mehla.” (Psalme 37:29) “A xo thabê lešoka le naxa ye e omilexo; le lehanata a le hlalalê, le taxê byalo ka letšoba.”—Jesaya 35:1.
TSEBO LE BOKAMOSO BJA GAGO
17. (a) O swanetše go dira’ng ge e ba o rata go phela Paradeiseng? (b) Re tseba bjang gore Modimo o tla tliša diphetogo tše dikgolo lefaseng?
17 Ge e ba o rata go phela Paradeiseng, o se ke wa dumelela selo se go thibela go hwetša tsebo ya go tseba Modimo. O rata batho gomme o tla tliša diphetogo tše di nyakegago go dira lefase paradeise. Le gona, ge nkabe o e-na le matla a go fediša manyami le go hloka toka mo go apareditšego lefaseng, na o be o ka se dire bjalo? Na re ka letela gore Modimo a dire mo go nyenyane? Ge e le gabotse, Beibele e bolela ka mo go kwalago ka nako yeo ka yona Modimo a tlago go tloša tshepedišo ye yeo e tletšego dintwa gomme a bea pušo e phethagetšego ya go loka legatong la yona. (Daniele 2:44) Eupša Beibele e dira se se fetišago go re botša ka se ka moka. E re bontšha kamoo re ka phologelago ka gona lefaseng le lefsa le le holofeditšwego la Modimo.—2 Petro 3:13; 1 Johane 2:17.
18. Go tseba Modimo go ka go direla’ng gona bjale?
18 Go tseba Modimo go ka ba gwa go direla mo gontši gona bjale. Dipotšišo tše di tseneletšego kudu le tše di hlobaetšago kudu tša bophelo di arabja ka Beibeleng. Go amogela tlhahlo ya yona go tla go thuša go godiša segwera le Modimo. Ke tokelo e kgolo gakaakang! Le gona se se tla go dira gore o kgone go thabela khutšo yeo e lego Modimo a nnoši a ka e neago. (Ba-Roma 15:13, 33) Ge o thoma go amogela tsebo ye e bohlokwa, o tsena modirong o bohlokwa kudu le o putsago wa bophelo bja gago. Le ka mohla o ka se ke wa itshola ka baka la go hwetša tsebo ya go tseba Modimo e išago bophelong bjo bo sa felego.
19. Ke potšišo efe yeo e tlago go ahla-ahlwa kgaolong e latelago?
19 Re boletše ka Beibele e le puku e rwelego tsebo ya go tseba Modimo. Lega go le bjalo, re tseba bjang gore ga se puku ya bohlale bja motho eupša ke selo se segolo kudu? Re tla ahla-ahla potšišo ye kgaolong e latelago.
HLAHLOBA TSEBO YA GAGO
Ke ka baka la’ng go tseba Modimo go ka go lebiša lethabong la ka mo go sa felego?
Bophelo Paradeiseng e tlago ya lefaseng bo tla ba bjang?
Ke ka baka la’ng o tla holwa ke go amogela tsebo ya go tseba Modimo gona bjale?