Kgaolo 11

Ye Ke Mehla Ya Bofelo!

LEFASE la rena le le dubegilego le fihlile bjang boemong bjo? Re lebile kae? Na o kile wa botšiša dipotšišo tše bjalo? Ba bantši ba ikwa ba nolegile moko ka tsela e itšego ge ba lebelela boemo bja lefase. Ditiragalo tše bjalo ka ntwa, bolwetši le bosenyi di tlogela batho ba ipotšiša ka seo bokamoso bo se huperego. Baetapele ba mebušo ba nea kholofelo e nyenyane. Lega go le bjalo, tlhaloso e ka botwago ya mehla ye e nyamišago e hwetšagala go Modimo ka Lentšung la gagwe. Beibele e re thuša ka potego go bona moo re lego gona ge nako e dutše e e-⁠ya. E re bontšha gore re “mehleng ya bofêlô” bja tshepedišo ya gona bjale ya dilo.​—⁠2 Timotheo 3:⁠1.

² Ka mohlala, ela hloko karabo yeo Jesu a e neilego bakeng sa dipotšišo tše dingwe tše di botšišitšwego ke barutiwa ba gagwe. Matšatšing a mararo pele ga ge Jesu a e-⁠hwa ba ile ba mmotšiša gore: “Pontšho ya go ba gona ga gago le ya bofelo ya tshepedišo ya dilo e tla ba eng?”a (Mateo 24:⁠3, NW) Jesu ge a araba o ile a bolela ka ditiragalo tše di kgethegilego tša lefase le maemo ao a bego a tla bontšha gabotse gore tshepedišo ye ya go se boife Modimo e tsene mehleng ya yona ya bofelo.

³ Go etša ge go bontšhitšwe kgaolong e fetilego, tatelano ya Beibele ya dinako e lebiša phethong ya gore Mmušo wa Modimo o šetše o thomile go buša. Eupša seo se ka direga bjang? Dilo di befetše pele, ga se tša kaonefala. Ge e le gabotse, ye ke pontšho e tiilego ya gore Mmušo wa Modimo o thomile go buša. Ke ka baka la’ng go le bjalo? Ee, Psalme 110:⁠2 e re botša gore Jesu o be a tla buša ka nakwana ‘gare ga manaba a gagwe.’ Ka kgonthe, mogato wa gagwe wa mathomo e le Kgoši ya legodimong e be e le go lahlela Sathane le barongwa ba gagwe ba batemona tikologong ya lefase. (Kutollo 12:⁠9) Mafelelo e bile afe? E bile sona seo Kutollo 12:​12 e se boletšego e sa le pele: “Ba madi-mabe ké lena ba Le axilexo lefaseng le lewatleng, xobane Diabolo ó theoxetše xo lena à tuka boxale ka kudu; ó tseba xe a sa šaletšwe ke lebakanyana fêla.” Bjale re phela ‘lebakanyaneng’ leo.

⁴ Ka gona, ge Jesu a be a botšišwa ka seo e tlago go ba pontšho ya go ba gona ga gagwe le ya bofelo bja tshepedišo ya dilo, karabo ya gagwe e be e le e dirago motho ka mo go sa makatšego gore a nagane. Dikarolo tše di fapa-fapanego tša pontšho di hwetšwa lepokising le le lego go letlakala 102. Go etša ge o ka bona, baapostola ba Bakriste e lego Paulo, Petro le Johane ba re nea ditaba tše di oketšegilego tše di nabilego mabapi le mehla ya bofelo. Ke therešo gore dikarolo tše dintši tša pontšho le tša mehla ya bofelo di akaretša maemo a nyamišago. Lega go le bjalo, go phethagala ga diporofeto tše go swanetše go re kgodiša gore tshepedišo ye e kgopo e batametše bofelo bja yona. Anke re hlahlobišiše tše dingwe tša dikarolo tše dikgolo tša mehla ya bofelo.

DIKAROLO TŠA MEHLA YA BOFELO

⁵ “Xobane sethšaba se tlo tsoxêla sethšaba: mmušô o tlo tsoxêla mmušô.” (Mateo 24:⁠7; Kutollo 6:⁠4) Mongwadi Ernest Hemingway o biditše Ntwa ya I ya Lefase gore ke “polao e kgolo, e senyago le e sa laolegego ka go fetišiša yeo e kilego ya direga lefaseng.” Go ya ka puku ya The World in the Crucible​—⁠1914-1919, ye e be e le “tekanyo e kgolo kudu ya ntwa, ntwa ya mathomo e akaretšago yeo batho ba kilego ba e bona. Nako yeo e e tšerego, bogolo bja yona le tekanyo ya yona di be di feta selo le ge e le sefe seo se bego se tsebja pele goba se letetšwe ka kakaretšo.” Ka morago go ile gwa tla Ntwa ya II ya Lefase yeo e ilego ya ipontšha e le e senyago kudu go feta Ntwa ya I ya Lefase. Moprofesara wa histori Hugh Thomas o re: “Lekgolo la masome-pedi la nywaga le be le laolwa ke sethunya, ditanka, B-⁠52, pomo ya nuclear, gomme mafelelong ya ba dibetša tša go fošwa. Le swailwe ke dintwa tša tšhollo e kgolo ya madi le tshenyo e kgolo go feta tša mehla le ge e le efe e mengwe.” Ke therešo gore go ile gwa bolelwa mo gontši ka go bea marumo fase ka morago ga ge Ntwa ya Molomo e fedile. Lega go le bjalo, pego e nngwe e ukama gore ka morago ga go fokotšwa mo go šišintšwego ga dibetša go tla šala mo e ka bago dithuthupi tše 10 000 go ya go tše 20 000 tša ntwa ya nuclear​—⁠tše di fetago dithunya tše di dirišitšwego Ntweng ya II ya Lefase ka makga a 900.

⁶ “Xo tlo ba le ditlala.” (Mateo 24:⁠7; Kutollo 6:​5, 6, 8) Ga e sa le go tloga ka 1914 go bile le bonyenyane ditlala tše 20 tše dikgolo. Mafelo ao a hlasetšwego a akaretša Bangladesh, Burundi, Cambodia, China, Ethiopia, Gerika, India, Nigeria, Russia, Rwanda, Somalia le Sudan. Eupša ga se ka mehla tlala e bakwago ke tlhaelelo ya dijo. Sehlopha sa bo-rathutamahlale ba tša temo le ditsebi tša tša boiphedišo se phethile ka gore: “Kabo ya lefase ya dijo nywaga-someng e sa tšwago go feta e oketšegile ka lebelo go feta palo ya baagi ba lona. Eupša ka ge bonyenyane batho ba dimilione tše 800 ba dula bodiiding bjo bogolo kudu, . . . ga ba kgone go reka tše di lekanego tša tše dintši bakeng sa go ba hlakodiša phepo-mpeng e šoro.” Go tsena-tsena ga dipolitiki ditabeng go a akaretšwa maemong a mangwe. Dr. Abdelgalil Elmekki wa Yunibesithing ya Toronto o bontšha mehlala e mebedi yeo go yona ba dikete ba ilego ba bolawa ke tlala mola dinaga tša bona di be di romela ditekanyo tše dikgolo kudu tša dijo ka ntle. Mebušo e be e bonala e tshwenyegile kudu ka go hwetša tšhelete ya dinageng dišele bakeng sa go thekga dintwa ka tša ditšhelete go e na le go fepa babušwa ba yona. Phetho ya Dr. Elmekki e bile efe? Gantši tlala “e bakwa ke thulaganyo ya go aba le molao wa mmušo.”

⁷ “Dinkhu [“mauba a malwetši,” NW].” (Luka 21:​11; Kutollo 6:⁠8) Kwatama ya ka 1918-19 e fetile bonyenyane ka maphelo a dimilione tše 21. A. A. Hoehling o ngwala ka go The Great Epidemic gore: “Le ka mohla historing lefase ga se la ka la senywa ke mmolai yo a bolailego batho ba bantši gakaakaa ka lebelo le lekaakaa.” Lehono, mauba a malwetši a a gola. Ngwageng o mongwe le o mongwe kankere e bolaya batho ba dimilione tše hlano, malwetši a letšhollo a bolaya masea le bana ba ba fetago dimilione tše tharo gomme bolwetši bja mafahla bo bolaya ba dimilione tše tharo. Malwetši a ditho tša go hema, kudu-kudu pneumonia e bolaya bana ba dimilione tše 3,5 ba nywaga ya ka tlase ga e mehlano ngwaga le ngwaga. Ba dimilione tše di tšhošago tše dikete tše 2,5​—⁠e lego seripa-gare sa baagi ba lefase⁠—​ba swerwe ke malwetši ao a bakwago ke tlhaelelo ya meetse goba meetse a šilafetšego le tshepedišo ya maemo a tlase ya ditšhila. AIDS e oketšega e le kgopotšo e nngwe ya gore motho ga a kgone go fediša mauba a malwetši go sa šetšwe dilo tša gagwe tše bohlokwa tšeo a di fihleletšego tša tša kalafo.

⁸ “Batho e tla ba . . . barati ba tšhelete.” (2 Timotheo 3:⁠2, NW) Dinageng lefaseng ka moka, batho ba bonala ba e-⁠na le kganyogo e sa kgotsofalego ya lehumo le legolo kudu. “Katlego” gantši e lekanywa ka bogolo bja mogolo wa motho, “se se fihlelelwago” se elwa ka tekanyo ya seo motho a nago le sona. Mothuša-mopresidente wa lekgotla la phatlalatšo ya tša papatšo o boletše gore: “Go rata dilo tše di bonagalago go tla tšwela pele go ba a mangwe a matla a tutuetšago setšhabeng sa ma-Amerika . . . le matla a bohlokwa ka mo go oketšegago le mebarakeng e mengwe e megolo.” Na o bona se se direga mo o dulago gona?

⁹ “Ba xo se kwe batswadi.” (2 Timotheo 3:⁠2) Batswadi ba mehleng yeno, barutiši le ba bangwe ba na le bohlatse bjo ba iponetšego bjona bja gore bana ba bantši ga ba hlomphe e bile ga ba kwe. Ba bangwe ba bana ba ba ka ba ba arabela go goba ba ekiša boitshwaro bjo bobe bja batswadi ba bona. Dipalo tše di oketšegago tša bana ba kgaotša go dumela go​—⁠le go rabela malebana le⁠—​sekolo, molao, bodumedi le batswadi ba bona. Morutiši yo mongwe yo a nago le phihlelo o re: “E le tshekamelo, ba bonala ba e-⁠na le tlhompho e nyenyane kudu bakeng sa selo le ge e le sefe.” Lega go le bjalo, ke mo go thabišago gore bana ba bantši ba ba boifago Modimo ba bea mohlala o mobotse wa boitshwaro.

¹⁰ “Ba sehlogo.” (2 Timotheo 3:⁠3, PK) Lentšu la Segerika le le fetoletšwego e le “sehlogo” le bolela ‘go se thape, go hloka kwelobohloko le maikwelo a setho.’ Se se swanela gakaakang batutuetši ba bantši ba bošoro bja lehono! Sehlogo se sengwe sa kuranta se itše: “Bophelo ke bjo bo boifišago kudu, bjo bo tletšego tšhollo ya madi mo e lego gore go nyakega sebete se segolo kudu go bala ditaba tša letšatši le letšatši.” Satšhene wa maphodisa a tlhapetšo ya dintlo o boletše gore bafsa ba bantši ba bonala ba iphoufaletša mafelelo a ditiro tša bona. O itše: “Go na le kgopolo ya gore, ‘Ga ke tsebe tša gosasa. Ke tla hwetša se ke se nyakago lehono.’”

¹¹ “Ba ba se nago maikwelo a borutho a tlhago.” (2 Timotheo 3:⁠3, NW) Lefokwana le le fetoletšwe go tšwa lentšung la Segerika le le bolelago “go hloka pelo, go hloka botho,” le le le šupago “go se be le maikwelo a borutho a tlhago le a lešika.” (The New International Dictionary of New Testament Theology) Ee, maikwelo a borutho gantši ga a gona tikologong yeo a swanetšego go ba gona go yona​—⁠e lego ka gae. Dipego tša go swarwa gampe ga balekane ba lenyalo, bana gaešita le batswadi ba ba tšofetšego di atile ka mo go hlobaetšago. Sehlopha se sengwe sa nyakišišo se hlalositše gore: “Bošoro bja batho​—⁠e ka ba go betha goba go kgorometša, go hlaba ka thipa goba go thuntšha⁠—​bo direga gantši kudu ka lapeng go e na le lefelong le ge e le lefe le lengwe setšhabeng sa rena.”

¹² “Ba ba nago le sebopego sa borapedi [“boineelo go Modimo,” NW], eupša ba latola matla a bjona.” (2 Timotheo 3:⁠5, PK) Beibele e na le matla a go fetoša maphelo go a dira a kaone. (Ba-Efeso 4:​22-24) Lega go le bjalo, ba bantši lehono ba diriša bodumedi bja bona e le seširo seo ba dirago mediro e sa lokago yeo e sa kgahlišego Modimo ka morago ga sona. Go bolela maaka, go utswa gotee le boitshwaro bjo bobe bja botona le botshadi gantši di dumelelwa ke baetapele ba bodumedi. Madumedi a mantši a ruta lerato eupša a thekga ntwa. Sehlogo se sengwe ka makasineng wa India Today se re: “Leineng la Mmopi yo a Phagamego, batho ba tutueditše ditiro tše sehlogo tše di hlaswegago kudu go dibopiwa-gotee le bona.” Ge e le gabotse, dintwa tše pedi tša tšhollo e kgolo ya madi mehleng e sa tšwago go feta​—⁠Ntwa ya I le ya II tša Lefase⁠—​di phulegile ka gare ga Bojakane.

¹³ “Basenya-lefase.” (Kutollo 11:​18) Bo-rathutamahlale ba ba fetago 1 600 go akaretša le bathopa-difoka tša Nobel ba 104 ba ba tšwago lefaseng ka moka ba ngwadile temošo yeo e ntšhitšwego ke Union of Concerned Scientists (UCS [Lekgotla la Bo-rathutamahlale ba ba Tshwenyegilego]) yeo e itšego: “Batho le lefase la tlhago ba tseleng e išago thulanong. . . . Go šetše nywaga-some e sego kae pele ga ge go lahlega sebaka sa go phema dikotsi.” Pego e boletše gore mediro ya motho e beilego bophelo kotsing “e ka fetoša lefase kudu moo le ka se sa kgonago go thekga bophelo ka tsela yeo re e tsebago.” Go fedišwa ga ozone, tšhilafalo ya meetse, go fedišwa ga dithokgwa, go fela ga matla a mobu a go tšweletša dilo le go fedišwa ka mo go feletšego ga mehuta e mentši ya diphoofolo le dimela di ile tša bontšhwa e le mathata a akgofilego ao a swanetšego go rarollwa. UCS e itše: “Go tshwenyana ga rena le mologelelo o thekganego wa bophelo go ka baka mafelelo a aparetšago, go akaretša le go senyega ga ditshepedišo tša tša mmele tšeo mekgwa ya tšona re sa e kwešišego ka mo go feletšego.”

¹⁴ “Ditaba tše tše di lokilego tša mmušo di tla bolelwa lefaseng ka moka leo go agilwego go lona.” (Mateo 24:​14, NW) Jesu o boletše e sa le pele gore ditaba tše di lokilego tša Mmušo di be di tla bolelwa lefaseng ka moka gore e be bohlatse go ditšhaba tšohle. Ka thušo ya Modimo le tšhegofatšo ya gagwe, Dihlatse tša Jehofa tše dimilione di diriša diiri tše dimilione tše dikete modirong wo wa go bolela le go dira barutiwa. (Mateo 28:​19, 20) Ee, Dihlatse di lemoga gore di be di tla ba le molato wa madi ge e ba di sa goeletše ditaba tše di lokilego. (Hesekiele 3:​18, 19) Eupša di thabišwa ke gore ngwageng o mongwe le o mongwe, ba dikete ba arabela ka tebogo molaetšeng wa Mmušo gomme ba ema e le Bakriste ba therešo, ke gore e le Dihlatse tša Jehofa. Ke tokelo e ka se kego ya lekanywa go hlankela Jehofa, ka go rialo ra gaša tsebo ya go tseba Modimo. Ka morago ga ge ditaba tše tše di lokilego di boletšwe lefaseng ka moka leo go agilwego go lona, bofelo bja tshepedišo ye e kgopo ya dilo bo tla tla.

ARABELA BOHLATSENG

¹⁵ Tshepedišo ye e tla fela bjang? Beibele e bolela e sa le pele ka ‘masetla-pelo a magolo’ ao a tlago go thoma ka go hlaselwa ga “Babele o moxolo,” e lego mmušo wa lefase wa bodumedi bja maaka ke dikarolo tša dipolitiki tša lefase le. (Mateo 24:​21; Kutollo 17:​5, 16) Jesu o boletše gore lebakeng le ‘letšatši le tla fsifala, kgwedi ya lesa go etša gomme dinaledi di tla wa legodimong, le matla a legodimo a tla šišinyega.’ (Mateo 24:​29) Se se ka bolela ditiragalo tša kgonthe tša legodimong. Boemong le ge e le bofe, dietša tše di phadimago tša bodumedi bja lefase di tla pepentšhwa le go tingwa. Ka gona Sathane yo a bitšwago “Gogo wa naxa ya Magogo” o tla diriša batho ba ba gobogilego go dira tlhaselo e feletšego go batho ba Jehofa. Eupša Sathane a ka se ke a atlega ka gobane Modimo o tla ba hlakodiša. (Hesekiele 38:​1, 2, 14-23) ‘Tlaišego e kgolo’ e tla fihla seremong sa yona ka Haramagedone, e lego “ntweng ya mohla-moxolo wa Modimo Ra-matla-ohle.” E tla fediša karolo e nngwe le e nngwe ya mafelelo ya mokgatlo wa Sathane wa lefaseng, ya bula tsela bakeng sa ditšhegofatšo tše di sa felego gore di elelele go batho ba ba phologilego.​—⁠Kutollo 7:​9, 14; 11:​15; 16:​14, 16; 21:​3, 4.

¹⁶ Dikarolo tše dingwe tša diporofeto tše di hlalosago mehla ya bofelo ka botšona di ka bonala di šoma dinakong tše dingwe tša histori. Eupša bohlatse bjo bo porofetilwego ge bo kopane bo šupa mehleng ya rena. Ka mohlala: Methalo yeo e dirago kgatišo ya menwana ya motho e bopa mohlala wo e ka se kego ya ba wa motho yo mongwe le ge e le ofe. Ka mo go swanago, mehla ya bofelo e na le mohlala wa yona ka noši wa maswao goba ditiragalo. Tše di bopa “kgatišo ya menwana” yeo e ka se kego ya ba ya nako le ge e le efe e nngwe. Ge bo hlahlobja gotee le dipontšho tša Beibele tša gore Mmušo wa Modimo wa legodimong bjale o a buša, bohlatse bo nea motheo o tiilego wa go phetha ka gore ka kgonthe ye ke mehla ya bofelo. Go oketša moo, go na le bohlatse bjo bo kwalago bja Mangwalo bja gore tshepedišo ya gona bjale e kgopo e tla tloga a fedišwa.

¹⁷ O tla arabela bjang bohlatseng bja gore ye ke mehla ya bofelo? Nagana ka se: Ge ledimo le kotsi le le senyago le batamela, re gata megato ya tšhireletšo e sa le pele ka ntle le go diega. Ka mo go swanago, seo Beibele e se bolelago e sa le pele bakeng sa tshepedišo ye ya gona bjale se swanetše go re tutuetša gore re gate mogato. (Mateo 16:​1-⁠3) Re ka bona gabotse gore re phela mehleng ya bofelo bja tshepedišo ye ya lefase. Se se swanetše go re tutueletša gore re dire dipeakanyo le ge e le dife tše di nyakegago gore re amogelwe ke Modimo. (2 Petro 3:​3, 10-12) Ge a ipolela e le motseta wa phološo, Jesu o gala-gatša kgoeletšo e akgofilego e rego: “Fêla, Le itôtê xore dipelo tša lena di se kê tša imêlwa ke bohori le xo boiwa, le dipelaêlô tša bophelô byono, ’me letšatši leo la tlo Le wêla sehloxo. Xobane le tlo etša sefu xe le wêla ba ba dutšexo lefaseng mo xo fêla. Phakxamang-xe, Le fêlê Le rapêla ka mabaka ohle, xore Le hwetšwê Lè loketše xo phônyôkxa tšeo ka moka di tl’o xo dirêxa, le xo tlo êma pele xa Morwa-motho.”​—⁠Luka 21:​34-⁠36.

[Mengwalo ya tlase]

HLAHLOBA TSEBO YA GAGO

Beibele e boletše eng e sa le pele ka ditiragalo tša lefase mathomong a pušo ya Kriste?

Dibopego tše dingwe tša mehla ya bofelo ke dife?

Ke eng se se go kgodišago gore ye ke mehla ya bofelo?

[Study Questions]

1. Ke ka baka la’ng ba bantši ba ikwa ba nolegile moko ge ba nagana ka boemo bja lefase, eupša tlhaloso e ka botwago ya ditiragalo tša lefase e ka hwetšwa kae?

2. Jesu o ile a botšišwa potšišo efe ke barutiwa ba gagwe, gona o ile a e araba bjang?

3. Ke ka baka la’ng maemo a ile a befela pele lefaseng ge Jesu a be a thoma go buša?

4. Dibopego tše dingwe tša mehla ya bofelo ke dife, gona di bontšha’ng? (Bona lepokisi.)

5, 6. Diporofeto tše di lego mabapi le ntwa le tlala di phethagala bjang?

7. Ditherešo mabapi le mauba a malwetši ke dife lehono?

8. Batho ba ipontšha bjang gore ke “barati ba tšhelete”?

9. Go ka thwe’ng ka go se kwe batswadi mo go boletšwego e sa le pele?

10, 11. Go na le bohlatse bofe bja gore batho ke ba sehlogo le ba ba se nago maikwelo a borutho a tlhago?

12. Ke ka baka la’ng go ka thwe batho ba na le sebopego feela sa boineelo go Modimo?

13. Go na le bohlatse bofe bja gore lefase le a senywa?

14. O be o ka hlatsela bjang gore Mateo 24:​14 e a phethagatšwa mehleng ya rena?

15. Tshepedišo ya gona bjale e kgopo ya dilo e tla fela bjang?

16. Re tseba bjang gore dibopego tše di porofetilwego tša mehla ya bofelo di šoma mehleng ya rena?

17. Go tseba gore ye ke mehla ya bofelo go swanetše go re tutueletša go dira’ng?

[Lepokisi go letlakala 102]

DIBOPEGO TŠE DINGWE TŠA MEHLA YA BOFELO

• Dintwa tše di sa bapišwego.​—⁠Mateo 24:​7; Kutollo 6:⁠4.

• Tlala.​—⁠Mateo 24:⁠7; Kutollo 6:​5, 6, 8.

• Mauba a malwetši.​—⁠Luka 21:​11, NW; Kutollo 6:⁠8.

• Go hloka molao mo go oketšegago.​—⁠Mateo 24:⁠12, NW.

• Go senya lefase.​—⁠Kutollo 11:⁠18.

• Ditšhišinyego tša lefase.​—⁠Mateo 24:⁠7.

• Dinako tše hlobaetšago tšeo go lego thata go lebeletšana le tšona.​—⁠2 Timotheo 3:⁠1, NW.

• Lerato le le feteletšego la tšhelete.​—⁠2 Timotheo 3:⁠2, NW.

• Go se kwe batswadi.​—⁠2 Timotheo 3:⁠2.

• Go hlokega ga maikwelo a borutho a tlhago.​—⁠2 Timotheo 3:⁠3, NW.

• Go rata maipshino go e na le go rata Modimo.​—⁠2 Timotheo 3:⁠4.

• Go hlokega ga boitshwaro.​—⁠2 Timotheo 3:⁠3.

• Ba ba sa ratego go loka.​—⁠2 Timotheo 3:⁠3, NW.

• Ba ba sa lemogego kotsi e batamelago.​—⁠Mateo 24:⁠39.

• Bakweri ba ganetša bohlatse bja mehla ya bofelo.​—⁠2 Petro 3:​3, 4.

• Go bolelwa ga Mmušo wa Modimo lefaseng ka moka. ​—⁠Mateo 24:⁠14.