Go se Fele Pelo—Ke ka Baka La’ng e le ga Sewelo Gakaakaa?

EMILIO o be a le nywageng ya gagwe ya bo-60.a O be a tlile Oahu ka morero wa manyami—go tlo boloka morwa wa gagwe yo mogolo. Ge a dutše a sepela tseleng yeo e lego ka gare ga dithaba gomme a bolela le ba bangwe ba bagwera ba gagwe, Emilio o ile a tšhošwa ke koloi yeo e bego e le lebelong e sepela ka sa morago tsejaneng ya go tsena ka gae. Koloi e nyakile e mo thula gomme ka baka la go befelwa le go fela pelo, Emilio o ile a kgadimola mootledi gomme a betha koloi ka seatla sa gagwe. Ka morago go ile gwa latela ngangišano. Go bonala e ka mootledi o ile a kgarametša Emilio, yo a ilego a wa gomme a bethagana ka hlogo boalong bjo thata bja tsela. Matšatši a sego kae ka morago, Emilio o be a hwile ka baka la kgobalo ya gagwe ya mo hlogong. A mafelelo a nyamišago gakaakang!

Re phela lefaseng leo go lona go se fele pelo e lego seka se se sa tlwaelegago. Baotledi ba bantši kudu ba dikoloi ba otlela ka lebelo le legolo kudu. Ba bangwe ba momela—e lego ba latela kgaufsi-ufsi—dikoloi tšeo di sepelago ka lebelo le le lekanyeditšwego. Go sa dutše go le bjalo ba bangwe ba feto-fetola methaladi go tloga mothalading o mongwe go ya go o mongwe ka gobane ba ka se ke ba leta ka go se fele pelo go ba ka morago ga koloi e nngwe. Ka gae, ditho tša lapa di ka bontšha go galefa ga tšona gomme ya ba tše di lwago. Gaešita le Bakriste ba bangwe ba ka hwetša ba nyamile kudu ka baka la diphošo tša banababo bona ba moya.

Ke ka baka la’ng go se fele pelo e le mo go sa tlwaelegago gakaakaa? Na go bile bjalo ka dinako tšohle? Ke ka baka la’ng go le thata gakaakaa go ba yo a sa felego pelo mehleng ya rena?

Mehlala ya go ba yo a Felago Pelo

Beibele e bolela ka mosadi yo a sa kago a letela go ikopanya le monna wa gagwe pele a dira phetho e kgolo. Leina la gagwe e be e le Efa. Ka baka la go eta Adama pele, mohlomongwe ka karolo e itšego e le ka baka la go fela pelo, o ile a ja seenywa se se ileditšwego. (Genesi 3:1-6) Go thwe’ng ka monna wa gagwe? Le yena mohlomongwe o ile a bontšha go fela pelo ka go latela Efa sebeng ka ntle le go batamela pele ga Tata’gwe wa legodimong, Jehofa bakeng sa thušo le tlhahlo. Go ba ga bona le megabaru, mohlomongwe go kopantšwe le go fela pelo mo go ilego gwa lebiša sebeng, go bile le mafelelo a bolayago bakeng sa rena ka moka. Go tšwa go bona re bile re amogetše tshekamelo ya go dira dibe e le bohwa, go akaretša boikgodišo le go fela pelo.—Ba-Roma 5:12.

Mo e ka bago nywaga e 2 500 ka morago ga sebe sa batswadi ba rena ba pele, batho ba kgethilwego ba Modimo, e lego Ba-Isiraele, ba ile ba bontšha go hloka tumelo mo go tseneletšego le mo go phegelelago gaešita le go hloka kgotlelelo. Gaešita le ge Jehofa a be a sa tšwa go ba phološa ka mohlolo bohlankeng kua Egipita, ka pela-pela ba ile ba “lebala ’tirô tša xaxwe” gomme “ba lesa xo letêla morêrô wa xaxwe.” (Psalme 106:7-14) Nako le nako ba ile ba wela phošong e kgolo ka gobane ba be ba ka se ke ba kgotlelela. Ba ile ba dira namane ya gauta gomme ba e rapela; ba ile ba ngongorega ka tokišetšo ya Jehofa ya dijo ya manna bakeng sa bona; gomme ba bantši ba bona ba ile ba ba ba rabela malebana le Moše moemedi wa Jehofa yo a kgethilwego ke Modimo. Ka kgonthe, go hloka ga bona kgotlelelo go ile gwa ba lebiša manyaming le kotsing.

Kgoši ya pele ya motho ya Isiraele, e lego Saulo e ile ya lahlegelwa ke sebaka sa gore barwa ba yona e be bahlatlami ba yona ba bogoši. Ka baka la’ng? Ka gobane e paletšwe ke go letela moporofeta Samuele, yo a bego a swanetše go direla Jehofa sehlabelo. Poifo ya go boifa motho e baketše Saulo gore a etele Samuele pele go neeng sehlabelo. Anke o nagane ka moo a swanetšego go ba a ile a ikwa ka gona ge Samuele a tšwelela gatee-tee ka morago ga gore yena a phethe monyanya! Ruri, nkabe a ile a leta metsotso e sego kae feela!—1 Samuele 13:6-14.

Ruri, ge feela nkabe Efa a ile a fo letela Adama go e na le go re a akgofele go tšea seenywa! Ge feela nkabe ba-Isiraele ba ile ba gopola go letela keletšo ya Jehofa! Ee, go se fele pelo go ka be go ile gwa ba thuša go ba phološa gotee le rena manyaming le bohlokong bjo bogolo.

Dilo Tšeo di Bakago go Fela Pelo

Beibele e re thuša go kwešiša selo se segolo seo se bakago go fela pelo lehono. Timotheo wa Bobedi kgaolo 3 e hlalosa moloko wa rena e le wo o phelago ‘dinakong tše hlobaetšago tšeo go lego thata go lebeletšana le tšona.’ (NW) E re “batho e tlo ba ba xo ithata, ba mexabaru, ba lenyatšô le baikxoxomoši . . . ba dihwirihwiri, le ba ba sa tsebexo xo ithswara, manaba a tše boló.” (Ditemana 2, 3) Megabaru e bjalo le mokgwa wa boikgogomošo di tutueletša dipelo le megopolo ya batho ba bantši, di dira gore go be thata go bohle, gaešita le go Bakriste ba therešo go re ba bontšhe go se fele pelo. Ge re bona batho ba lefase bao ba otlelago ka lebelo kudu goba bao ba tsenelago methalading goba ba re goeletša ka go re rogaka, ruri go se fele pelo ga rena e ka ba mo go lekwago o šoro. Re ka lekega gore re ekiše goba go itefetša malebana le bona, ka go rialo ra ipea boemong bja bona bja boikgogomošo bja boithati.

Ka dinako tše dingwe ke diphetho tša rena ka noši tša phošo tšeo di re bakelago gore re lahlegelwe ke go se fele pelo. Ela hloko kamoo Kgoši e bohlale Salomo e ilego ya bontšha kgokagano magareng ga kgopolo ya kapejana ya phošo le ya go fela pelo le mokgwa wa boitshwaro wa go fela pelo le wa go befelwa: “Mokxotleledi ó phala moipoti. Se phakê xo selekêxa ka pelong; thselekêxò e axile mo pelong ya setlatla.” (Mmoledi 7:8, 9) Ge e ba re hwetša sebopego se nepagetšego ka mo go feletšego ka boemo pele re gata mogato ka bjona, mo gongwe re tla ba bao ba kwešišago kudu, bao ba bontšhago kwelobohloko kudu gomme ra ba bao re tlogago re sa felele ba bangwe pelo. Ka lehlakoreng le lengwe, moya wa boikgogomošo le wa boithati o ka re bakela go ba ba naganelago kgaufsi, ba felago pelo le ba galefago, go etša ba-Isiraele ba belaelago ba melala e thata bao ba ilego ba tshwenya Moše.—Numeri 20:2-5, 10.

Selo se sengwe seo se bakelago go ata ga go fela pelo ga lefase ke boemo bja lona bja go hloka kholofelo, bjo bo tlišwago ke go ba kgole le Jehofa. Dafida o ile a bolela seo motho a se nyakago e le gore a holofele Jehofa ka gore: “A môya wa-ka o ikhomolêlê ò letetše Modimo fêla, xobane xe ke holofetše, di tšwa xo Yêna.” (Psalme 62:5) Batho ba bantši bao ba sa tsebego Jehofa ba na le pono e lekanyeditšwego e se nago kholofelo, ka gona ba leka go gogola selo le ge e le sefe se senyenyane sa boithabišo gomme ba se diriše ka mo ba ka kgonago pele nako ya bona e fela. Go etša tatago bona wa moya, e lego Sathane Diabolo, gantši ga ba šetše selo ge e le kamoo ditiro tša bona di ka kwešago ba bangwe bohloko ka gona.—Johane 8:44; 1 Johane 5:19.

Ga go pelaelo gore go se fele pelo ke ga sewelo kudu lehono. Tshepedišo ye e kgopo ya dilo ya boithati, modimo wa yona Sathane, le ditshekamelo tša sebe tša nama ya rena ya sebe di dira gore go be thata bakeng sa yo mongwe le yo mongwe gaešita le bao ba botegago, gore ba be ba ba sa felego pelo. Lega go le bjalo, Beibele e re kgothaletša go bontšha go ‘se fele pelo,’ kudu-kudu mabapi le go phethagala ga merero ya Modimo. (Jakobo 5:8) Ke ka baka la’ng go se fele pelo e le gabohlokwa gakaakaa? Ke meputso efe yeo go ka re tlišetšago yona?

Go se Fele Pelo—Lebaka Leo ka Lona go Lego Bohlokwa Kudu

“Gape ba hlankela bao ba fogo ema gomme ba leta.” Mantšu ao a be a bolelwa ke sereti sa Leisemane John Milton nywageng e ka godimo ga e makgolo a mararo e fetilego seretong sa gagwe sa methaladi e lesome-nne se se rego “On His Blindness.” Mathomong a sereto o boletše ka go gakanega ga gagwe le pelaelo mabapi le maikwelo a gagwe a go se kgone go hlankela Modimo ka mo go tletšego ka gobane a ile a foufala nywageng ya gagwe ya bo-40. Eupša bjalo ka ge go bontšhitšwe ke mothaladi wa mafelelo wa sereto se se tsopotšwego ka mo godimo, o ile a lemoga gore motho a ka rapela Modimo ka go kgotlelela masetla-pelo ka go se fele pelo gomme a tsoma ka go iketla dibaka tšeo di hwetšagalago tša tirelo. Milton o bone bohlokwa bja go ithekga ka Modimo ka go se fele pelo.

Bontši bja rena re ka ba le pono e botse, eupša ka moka ga rena re na le moo re palelwago gona mo e lego gore go ka re bakela gore re galefe goba re belaele. Re ka hwetša bjang go se fele pelo le go go bontšha?

Mehlala Yeo e Kgothatšago

Beibele e re nea mehlala e mentšinyana e mebotse ya go se fele pelo. Go se fele pelo ga Jehofa go dira gore bophelo bjo bo sa felego bakeng sa batho ba dimilione tše di sa balegego bo kgonege. (2 Petro 3:9, 15) Taletšong ya gagwe e botho ya gore re rwale joko ya gagwe gomme re ‘hwetše tapologo ya meoya ya [rena],’ Jesu o bonagatša ka mo go phethagetšego go se fele pelo mo go kgahlišago ga Tatagwe. (Mateo 11:28-30) Go naganišiša ka mehlala ya Jehofa le Jesu go ka re thuša go ba bao ba sa felego pelo.

Motho yo a ilego a bonala a e-na le mabaka a lekanego a gore a befelwe, a galafe goba go itefeletša e bile morwa wa Jakobo, Josefa. Banababo ba ile ba mo swara ka mo go sa swanelago kudu, ba loga maano a go mmolaya gomme mafelelong ba mo rekiša bohlankeng. Kua Egipita, go sa šetšwe tirelo ya gagwe e lokilego le ya potego go Potifaro, Josefa o ile a latofatšwa ka mo go sa swanelago gomme a golegwa. O ile a kgotlelela ka go se fele pelo masetla-pelo a gagwe ka moka, mohlomongwe a kwešiša gore diteko tše bjalo di ka thuša go phetha merero ya Jehofa. (Genesi 45:5) Ka gobane a ile a hlagolela tumelo le kholofelo go Jehofa gotee le boikokobetšo le kwešišo, Josefa o be a ka bontšha go se fele pelo gaešita le ka tlase ga maemo a lekago o šoro.

Thušo e nngwe e bohlokwa ke moya o mokgethwa wa Jehofa. Ka mohlala, ge e-ba re galefa ka pela gomme re e-na le leleme le le hlabago, re ka rapelela thušo ya moya o mokgethwa e le gore re ka hlagolela dienywa tša wona. Go naganišiša ka se sengwe le se sengwe sa dienywa tše, bjalo ka go se fele pelo le boitshwaro, go tla re thuša go bona kamoo di tswalanago ka gona ka mo go tseneletšego le go se fele pelo.—Ba-Galatia 5:22, 23.

Meputso ya go se Fele Pelo

Go ba ba ba sa felego pelo go ka re tlišetša mehola e mentši. Go matlafatša semelo sa rena le go re šireletša go dira ditiro tša bošaedi le tša bošilo. Ke mang wa rena yo a sa kago a dira diphošo tše di kwešago bohloko ka baka la go ba ga rena bao ba akgofelago kudu go gata mogato maemong a thata goba ao a gateletšago? Re ka no ba re ile ra bolela lentšu le le sa swanelago goba re ile ra itshwara ka tsela ya go hloka mekgwa. Mohlomongwe re ka be re ile ra dumelela tiragalo e nyenyane e gola go ba go fihla e e-ba ntwa e kgolo ya go lwa le motho yo a ratwago yeo go yona go se nago yo a nyakago go oba molala. Ka morago ga go befelwa o šoro, kgakanego le bohloko, mohlomongwe re ka be re ile ra nagana ka go nyama gore, ‘Ge nkabe ke ile ka fo leta go senene.’ Go bontšha go se fele pelo go ka re šireletša mehuteng ka moka ya manyami. Therešo yeo e nnoši e nea maphelo a rena khutšo e kgolo kudu, go tsepama le kgotsofalo.—Ba-Filipi 4:5-7.

Go ba ba sa felego pelo le gona go ka re thuša go ba le pelo e rotšego le e nago le kholofelo. Se se ka lebiša boemong bjo bokaone bja go thabela bophelo bja mmele, bja maikwelo le bja moya. (Diema 14:30) Bogale bjo šoro bjo bo sa laolegego bo ka baka maikwelo a šoro le bolwetši bja mmele gotee le lehu. Ka lehlakoreng le lengwe, ka go ba bao ba sa felego pelo re ka hwetša boemo bjo bo swanetšego kudu bja kgopolo mabapi le ba bangwe, kudu-kudu banababo rena ba moya le ditho tša lapa. Ka go rialo re tla ba bao ba sekametšego kudu go beng bao ba naganelago le ba thušago go e na le go ba bao ba kgopišegago ka pela le bao ba ntšhago diphošo. Mafelelong, ba bangwe ba tla hwetša go le bonolo gape e le mo go thabišago kudu go ba le rena.

Bagolo ka phuthegong ya Bokriste go nyakega gore ba bontšhe go se fele pelo ka mo go kgethegilego. Ka dinako tše dingwe, Bakriste gotee le bona ba ba batamela ka mathata a magolo. Ba bao ba botegago mohlomongwe ba ka be ba gakanegile, ba nyamile goba ba gateletšegile, mola bagolo ka bobona ba ka no ba ba lapišitšwe goba ba tshwentšwe ke mathata a bona ka noši goba a lapa. Lega go le bjalo, ke gabohlokwa gakaakang gore bagolo ba bontšhe go se fele pelo maemong a bjalo ao a lekago! Ka tsela ye ba ka kgona go ruta “ka bolêta” gomme ‘ba šetša mohlape.’ (2 Timotheo 2:24, 25; Ditiro 20:28, 29) Maphelo ao a lego bohlokwa a kotsing. Bagolo ba botho, ba nago le lerato le bao ba sa felego pelo ke tšhegofatšo gakaakang go phuthego!

Dihlogo tša lapa di swanetše go swara malapa a tšona ka go se fele pelo, kwešišo le botho. Gape di swanetše go letela le go kgothaletša ditho ka moka tša lapa go bontšha dika tše tše di swanago. (Mateo 7:12) Se se tla tlaleletša leratong le khutšong ya ka gae.

Go bontšha go se fele pelo ge ba le bodireding bja tšhemo go tla thuša badiredi ba Bakriste go thabela tirelo ye ka mo go tletšego kudu. Ba tla kgona gakaone go kgotlelela phapano le ge e le efe le kganetšo tšeo di ka rotogago. Go e na le go ngangišana le beng ba dintlo bao ba galefilego, badiredi bao ba sa felego pelo ba tla kgona go nea karabo e boleta goba ba tloga ka setu, ka go rialo ba boloka khutšo le lethabo. (Mateo 10:12, 13) Go feta moo, ge Bakriste ba swara yo mongwe le yo mongwe ka go se fele pelo le botho, bao ba swanago le dinku ba tla gogelwa molaetšeng wa Mmušo. Jehofa o šegofaditše maiteko a go se fele pelo tekanyong ya lefase ka bophara, ka ge re bona makgolo a dikete a batsomi ba therešo a ikokobeditšego a kgeregela ka phuthegong ya Jehofa e lerato ngwaga o mongwe le o mongwe.

Ka kgonthe, go bontšha go se fele pelo go tla re tlišetša meputso e mebotse. Re tla phema dikotsi tše dintši le mathata ao a bakwago ke go ba ga rena bao ba akgofago ditirong tša rena goba bao ba akgofago go dirišeng leleme la rena. Re tla ba ba thabilego kudu, ra iketla kudu, gomme mohlomongwe ra ba ba phedilego gabotse kudu mmeleng. Re tla ba le lethabo le legolo kudu le khutšo bodireding bja rena, ka phuthegong le ka gae. Eupša sa bohlokwa kudu, re tla thabela tswalano ya kgaufsi kudu le Modimo. Ka gona letela Jehofa. Bontšha go se fele pelo!

[Mongwalo wa tlase]

[Pictures on page 10]

O yo a sa felego pelo gakaaka’ng bophelong bja gago bja letšatši le letšatši?